په کرملېن کې د روسیې د ولسمشر ولادیمیر پوتین او د چین د ولسمشر شي جین پېنګ تر لیدنې وروسته دواړو مشرانو په یوې ګډې اعلامیه کې په یو وخت د شمالي کوریا د اټمي پروګرام او د لیرې واټن ویشتونکو توغندیو او د امریکا او جنوبي کوریا د پراخو پوځي تمریناتو د په ټپه درېدو پر اړتیا ټینګار کړی دی.
د روسیې او چین د مشرانو تر منځ له دې لیدنې وروسته د روسیې د بهرنیو چارو وزارت په یوې خبرپاڼه کې ویلي، مسکو او پیکېنګ له واشنګټن څخه غوښتي چې په جنوبي کوریا کې دې د "تاد" په نوم د توغندیو د دفاعي سیسټم له لګولو ډډه وکړي.
د امریکا متحده ایالاتو د شمالي کوریا د توغندیو د ګواښ په وړاندې د توغندیو د دې دفاعي سیسټم فعالول لازم بللي دي.
چین د شمالي کوریا لهخوا د اوږده واټن ویشتونکي توغندي د وروستۍ ازموینې وروسته له ټولو خواوو د زغم غوښتنه کړې.
د چین د بهرنیو چارو وزارت ویاند جېنګ شوانګ ویلي، هېواد يې په قاطع توګه د شمالي کوریا د هر هغه فعالیت مخالف دی چې د توغندیو د ازموینې په اړه د ملګرو ملتونو د ملي امنیت شورا له پرېکړو سره په مخالفت کې وي.
جاپان د شمالي کوریا لهخوا د توغندي د وروستۍ ازموینې په وړاندې سخت اعتراض کړی او هغهیې د ملګرو ملتونو د امنیت شورا له پرېکړو یوه ښکاره سرغړونه بللې ده.
شمالي کوریا د سې شنبې په ورځ ادعا وکړه چې «هُواسانک-۱۴» ډوله د لیرې واټن ویشتونکی توغندی یې په بریالیتوب ازمویلی دی.
شمالي کوریا وايي، دې توغندي له ځمکې په ۲۸۰۰ کېلو متره ارتفاع کې ۳۹ دقیقې الوتنه وکړه او هدف لهمنځه یووړ.
په امریکا کې د لیرې واټن ویشتونکو توغندیو یو څېړونکي ډېوېډ رایټ ویلي، که چېرې د دې توغندي د ارتفاع او د الوتنې د وخت په اړه اطلاعات سم وي، نو په عادي مسیر کې دا توغندی ۶۷۰۰ کېلو متره واټن وهلی شي او د امریکا د الاسکا سیمې ته رسېدلی شي.
دا په داسې حال کې ده چې د روسیې د دفاع وزارت د امریکا، جاپان او جنوبي کوریا د پوهانو ارزونې رد کړې دي.
د دې هېوادونو څېړونکو ویلي چې د شمالي کوریا لهخوا ازمویل شوی توغندي یوازې ۵۳۵ کېلو متره ارتفاع واخیسته او د الوتو فاصلهیې له هغه ځایه چې وتوغول شو تر هغه ځایه چې د جاپان په اوبو کې وغورځېده ۵۱۰ کېلو متره وه.
شمالي کوریا له کلونو راهیسې د لیرې واټن ویشتونکو داسې توغندیو پر جوړولو کار کوي چې د اټمي سرګلولې د انتقال او د امریکا د متحده ایالاتو د هدف ګرځولو وړتیا ولري.