د پاکستان پوځي مقامات وايي چې د دې هېواد د پوځ مشر جنرال جاوید قمر باجوه د امریکا د ملي امنیت له سلاکار مکمسټر سره په لیدنه کې له خپلې خاورې د نیابتي جګړو پلانول رد کړي دي.
دا په داسې حال کې ده چې د امریکا د ملي امنیت سلاکار مکمسټر د یکشنبې په ورځ د کابل او د دوشنبې په ورځ اسلاماباد ته سفر وکړ او له افغان او پاکستانیو چارواکو سره یې د افغانستان او سیمې پر عمومي وضعیت خبرې وکړې.
مکمسټر کابل ته د خپل سفر پر مهال د افغانستان له یوه شخصي تلویزیون "طلوع نیوز" سره په مرکه کې د پاکستان په اړه د یوې پوښتنې په ځواب کې ویلي وو:
"پاکستان ته د ګټو د تعقیب تر ټولو ښه لار ډپلوماسي ده، نه دا چې د تاوتریخوالي منځته راوړونکې نیابتي ډلې وکاروي."
خو د پاکستان پوځي مقامات له خپلې خاورې د نیابتي جګړو پلانول رد کړي او وايي چې له امتیاز او توپیر پرته يې د ټولو ترهګرو پر ضد اقدام کړی دی.
د پوځ د مطبوعاتي دفتر ویاند اصف غفور د سې شنبې په ورځ په دې اړه په یوې خپرې خبرپاڼه کې ویلي:
"مکمسټر ته د پوځ له مشر جنرال قمر باجوه سره په لیدنه کې د ترهګرۍ پرضد د پوځي عملیاتو او همدا راز د سیمې او د نړۍ د سولې په لړ کې د پاکستان د هڅو په اړه لنډ معلومات ورکړل شول."
خبرپاڼه کاږي چې د پوځ مشر د امریکا د ملي امنیت سلاکار ته پر پاکستان د نیابتي جګړو په لړ کې د خپلې خاورې د کارېدو تورونه رد کړي او په خبره یې:
"پاکستان پر خاوره د نیابتي جګړو د پلانولو تورونه په کلکه ردوي، ځکه چې دا هېواد پهخپله د ریاستي ترهګرۍ ښکار دی."
که څه هم د پوځ د مطبوعاتي دفتر خبرپاڼې د پوځ د مشر قمر جاوید باجوه او د امریکا د ملي امنیت د سلاکار د لیدنې نور تفصیلات نه دي په ډاګه کړي، خو وايي چې:
"د مکمسټر د ترهګرۍ او د ترهګرو د زیربناوو د لهمنځه وړلو په لړ کې د پاکستاني پوځ هلې ځلې منلي او په سیمه او نړۍ کې یې د سولې او ثبات راوستو په لړکې د امریکا د همکاریو ډاډ ورکړی. "
د یادونې وړ ده چې د روان کال په جنورۍ میاشت کې په امریکا کې د ډونالډ ټرمپ په مشرۍ د نوي حکومت تر جوړېدا وروسته پاکستان او افغانستان ته دا د جګپوړي امریکايي چارواکي لومړی سفر و.
راپور: ذبیح مومند