د لاسرسي لېنکونه

نیویارک ټایمز: کندهار کې د موټر سایکلونو بازار ګرم دی


نیویارک ټایمز:

نیویارک ټایمز ورځپاڼې په یوه مطلب کې لیکلي چې کندهار کې د موټر سایکلونو بازار ګرم دی.

ورځپاڼې کندهار کې د موټر سایکلونو د خرڅلاو د یوې مغازې عکس هم خپور کړی دی چې سلګونه موټرسایکلونه په کې ولاړ دي.

په یو بل عکس کې لېدل کېږي چې د سړک یوې سرې اشارې مخې ته څو موټر سایکلونه په انتظار دي.

ورځپانه لیکي چې کندهار کې د موټر سایکلونو بازار ځکه ګرم دی چې د امنیتي دلایلو له کبله د ځینو موټرو په تګ راتګ بندیز لګول شوی دی.

نیویارک ټایمز لیکي چې موټر سایکل اوس د کندهار د ټولنې یو مهم عنصر دی او هغه کندهاری چې موټر سایکل نه‎لري په حقیقت کې داسې وي لکه بندي.

په داسې حال کې چې مسکو نن د افغانستان د سولې د یوې غونډې کوربه دی، واشنګټن پوسټ ورځپاڼې په خپل یوه عنوان کې وايي، په دې چې امریکا له افغانستانه خپل پام بل‎خوا واړاوه ایران او روسیي افغانستان کې خپلې پښې ټینګې کړي.

ورځپاڼه لیکي:

په افغانستان کې د جګړې له پیله درې کاله وروسته امریکا عراق ته مخه کړه او وروسته بیا د سوریې او د منځني ختیځ د نورو هېوادونو بحران سبب شو چې امریکا د افغانستان له جنګه خپل پام بلې خوا ته واړوي.

واشنګټن پوسټ لیکي:

سره له‎دې چې امریکا په دې موده کې افغانستان په بشپړه توګه هېر نه‎کړ خو روسیې او ایران له رامنځته شوې خلا څخه په استفاده په افغانستان کې خپل نفوذ پراخ کړ.

ورځپاڼه په افغانستان کې د امریکایي ځواکونو د قوماندان جنرال نکلسن له قوله لیکي چې د امریکا د سنا د مجلس پوځي کمېټې ته يې ویلي روسیه او ایران په افغانستان کې سره نېږدې شوي او خپل فعالیتونه يې هماهنګ کړي دي.

ایران له افغانستان سره اوږده پوله لري او د واشنګټن پوسټ په لیکنه امریکايي جنرال په دې باور دی چې ایران د افغانستان په لویدیځو سیمو کې وسله‎والو طالبانو سره مرسته کوي.

واشنګټن پوسټ لیکي:

سره له‎دې چې د روسيې، شیعه ایران او سُني طالبانو ترمنځ ائتلاف دومره عملي نه بریښي خو عموماً ائتلافونو د کلونو په اوږدو کې بدلون موندلی او ایران او روسیې تل خپله پلوي بدله کړې ده.

ورځپانه مثال ورکوي او وايي چې روسیې په ۲۰۰۱میلادي کال کې د طالبانو خلاف د امریکا د عملیاتو ملاتړ وکړ چې په نتیجه کې د دوی رژیم وپرځېده او ایران هم هغه مهال د طالبانو مخالف شمالي ټلوالي سره همکاري درلوده.

دمسکو په نننۍ غونډه کې چې افغانستان، پاکستان، ایران او چین هم په کې برخه اخلي امریکا ګډون نه‎کوي او د افغانستان ګډون هم یواځې د بهرنیو چارو د وزارت د مرستیال په مشرۍ دی.

په داسې حال کې واشنګټن پوسټ د مسکو د غونډې او په افغانستان کې د مسکو او ایران د رول په هکله یو مطلب خپور کړی.

XS
SM
MD
LG