د هلمند والي حیاتالله حیات وايي، د ایران او د طالبانو استازو په دې ولایت کې سره لیدلي دي.
ښاغلي حیات پرون یکشنبه ازادي راډیو ته وویل چې استخباراتي معلوماتو څرګنده کړې چې دواړو خواو د هلمند په ګرمسېر ولسوالۍ کې سره لیدلي دي.
د هلمند والي ازادي راډیو ته وویل چې استخباراتي معلومات تائیدوي چې د ایران رژیم او د وسلهوالو طالبانو استازو په ګرمسېر ولسوالۍ کې سره لیدلي خو جزئیاتیې نهدي څرګند.
د حیاتالله حیات په وینا، په دې اړه څېړنې روانې دي چې د ایران او طالبانو استازو پر کومو مسئلو خبرې کړې دي.
حیاتالله حیات زیاته کړه:
"تاسو ته څرګنده ده چې په وروستیو کې د افغانستان په چارو کې د پاکستان تر څنګ، د ایران لاسوهنې هم زیاتې شوي او د افغانستان له لوري هم د اوبو د مهارولو مسئله جدي شوې ده. زموږ د استخباراتو په ابتدايي رپوټونو کې څرګنده شوې چې پاکستاني او ایراني وګړو په ګرمسېر کې سره کتلي دي خو موږ د ملي امنیت ادارې له لارې غواړو چې دا مسئله په ډېر دقت وڅېړو. "
د هلمند والي حیاتالله حیات په خپل ولایت کې وروستیو جګړو ته په اشارې وویل چې وسلهوالو طالبانو له داسې مزایلو کار اخیستی چې په ایران کې جوړ شوي دي.
حیات وویل، وسلهوالو طالبانو د لښکرګاه په عملیاتو کې د ولایت پر ودانۍ مزایل ورتوغولي چې یو شمېر یې نهدي چاودېدلي او ورڅخه څرګندېږي چې په ایران کې تولید شوي دي.
حیاتالله حیات وايي:
"دوه میاشتې وړاندې چې وسلهوالو طالبانو پر لښکرګاه حمله وکړه، تقریباً ۴۲ مزایل د ولایت پر ودانۍ، د والي پر مېلمستون او کور وتوغول شول چې درې یا څلور یې نهدي چاودېدلي. متأسفانه، پر دې مزایلو زموږ د ګاونډي هېواد ایران مارک واضح لیدل کېږي او تېر کال تولید شوي دي."
د هلمند د والي په وینا، هلته په ناکراریو کې د ایران د لاس درلودلو یو عمده دلیل د سیند اوبه دي چې هغه هېواد ته وربهېږي.
د هلمند والي ښاغلی حیات زیاتوي:
"موږ د امنیتي وضعیت په اړه له ولسمشر سره خبرې کړې دي. په ځانګړي ډول، د ولسمشر او د هلمند سیند په حوزه کې د مخورو، د ولایتي شورا د استازو او د پنځو ولایتونو د والیانو تر منځ خبرې شوې دي. دوی د اوبو د وېش پر هغې موافقې چې د افغانستان پخواني صدراعظم موسی شفیق له ایران سره لاسلیک کړې وه، بحث کړی دی."
د ایران حکومت په مکرر ډول له وسلهوالو طالبانو سره د همکارۍ په اړه رپوټونه رد کړي دي.
خو د هلمند والي حیاتالله حیات ویلي چې ولسمشر محمد اشرف غني ژمنه کړې چې له ایران سره د اوبو د لانجې د حل هڅې به چټکې کړي څو په هلمند کې د بېامنیتۍ یو لوی عامل ختم شي.