د افغانستان مشرانو جرګې د شپږم کال د تقنیني دورې کاري راپور وړاندې کړ.
مشرانو جرګه وايي چې دوی په دغه کال کې د قانون پر اساس خپلې دندې په ښه توګه ترسره کړې دي.
د دغې جرګې لومړی منشي عبدالله قرلق د سې شنبې په ورځ په عمومي جلسه کې د دغه راپور په یوه برخه کې وویل چې مشرانو جرګې په دغه کال کې ۷۵ عمومي جلسې،۶۴۱ د لوړو پوړو چارواکو او وزیرانو د استجواب او استماعیه غونډې درلودې او یو شمېر قوانین یې تصویب کړې دي.
نوموړي همدارنګه د دغه راپور په یوه برخه د مشرانو جرګې یو شمېر نورو فعالیتونو ته هم اشاره وکړه.
نوموړي زیاته کړه:
"د افغانستان مشرانو جرګې په دغه کال کې خپلې دندې د قانون پر اساس ترسره کړي دي چې له دغه جملې د ۸۸۳ کمېسیونونو نوبتي غونډې، ۶۴۱ د لوړپوړو چارواکو او وزیرانو د استجواب او استماعیه غونډې، ولایتونو ته ۲۵ معلوماتي او نظاراتي سفرونه ترسره شوي دي او د کابل ښار له اداراتو کتنه او د خلکو او ادارو ۲۷۸ شکایتونو او عریضو په اړه غور شوی."
د یادونې وړ ده چې د افغانستان ملي شورا د هر کال په پای کې خپل کاري راپورونه وړاندې کوي.
د افغانستان د ملي شورا ولسي جرګې او مشرانو جرګې د ژمي رخصتۍ د دلوې له لومړۍ نېټې پیلېږي او د حوت تر پنځلسمې دوام کوي.
دې سره هممهاله بیا افغان حقوقپوه کبیر رنجبر په دغه کال کې د مشرانو جرګې کارونه تر یوه حده د قناعت وړ بولي.
ښاغلي رنجبر له ازادي راډيو سره په خبرو کې په دې اړه وویل:
"په عمومي ډول که چېرې د مشرانو جرګې پر کارونو قضاوت وکړو تر یوه حده دوی بریالي وو، کومې نیمګړتیاوې چې دوی درلودې هغه دوی پورې مستقیماً اړیکه نهدرلوده، کومې دندې چې مشرانو جرګې ته د قانون پر اساس ټاکل شوي دي تر ډېره حده دوی سره ته رسولي دي."
خو له بلېخوا د مدني ټولنې یو شمېر غړي د افغانستان پر مشرانو جرګې انتقادونه کوي او وایي چې دوی د خلکو د ستونزو د هواري پر ځای تر ډېره پر خپلو شخصي کارونو بوخت دي.
مدني فعال محمد عارف حیدري په دې اړه وویل:
"دوی تر ډېره خپلمنځي ستونزو او په وزارتونو کې د خپلو خپلوانو په مقرریو بوخت و، د افغانستان پر ملي شورا خلکو خپل اعتماد له لاسه ورکړی، زه خپله د یوه مدني فعال په توګه او اکثره مدني فعالان په دغو دوو قوو باور نهلري."
نوموړي وویل د دې مسایلو تر څنګ د وکیلانو غیر حاضري هغه ستونزه ده چې تر ډېره خلکو په دغو وکیلانو خپل اعتماد له لاسه ورکړی.
دوی وایي، د ملي شورا کړنې په هېڅ صورت خلکو ته د منلو وړ نهدي او په وینا یې چې د خلکو دغه استازي باید پر خپلو کړنو له سره کتنه وکړي.
راپور: ناجیه ساپۍ