د لاسرسي لېنکونه

کابل کې پر افغان مدني فعال میرویس عمرخېل حمله شوې


په یوه افغان مدني فعال میرویس عمرخېل باندې پرون ماښام په کابل ښار کې حمله شوې او ټپي شوی دی.

د میرویس عمرخېل لنډې خبرې له روغتونه په ټولنیزو رسنیو خپرې شوي او ویلي یې دي چې بیا به هم خپلې مبارزې ته دوام ورکوي.

دی وايي:

"مرګ او ژوند د خدای په لاس کې دی. د بنده په لاس کې نه‎دی. زموږ مبارزه دوام لري او د خپل هېواد او خلکو لپاره به کار کوو."

د میرویس عمرخېل ځینو نېږدې ملګرو په ټولنیزو رسنیو له هغې ډلې فېسبوک کې ویلي چې په هغه باندې د بې‌غږه توپانچې ډزې شوي دي.

اخوا د افغانستان د ملي امنیت شورا ویاند تواب غورځنګ په خپله رسمي فېسبوک پاڼه ویلي چې د عمرخېل د قضیې په اړه به ژر څېړنه کېږي او د پېښې له عاملانو سره به قانوني چلند وشي.

میرویس عمرخېل له څو کلونو راهیسې په بېلابېلو ټولنیزو او سیاسي فعالیتونو بوخت دی او څو واره د افغان ځواکونو په ملاتړ او نورو ټولنیزو مسائلو لاریونونه او غونډې هم جوړې کړي دي.

XS
SM
MD
LG