د اطلاعاتو او فرهنګ وزارت د ځوانانو معینیت د بېلابېلو مؤسسو په مرسته د ځوانانو او د افراط پالنې ستونزې تر نامه لاندې یو سیمینار پیل کړ.
د دې وزارت د ځوانانو چارو معین د هېواد له ځوانانو وغوښتل چې له افراط پالنې ډډه وکړي او په هېواد کې د امنیت ټینګښت او پرمختګ برخه کې خپل ذهنیت مثبت لوري ته وګرځوي.
د ځوانانو معین کمال سادات د دوشنبې په ورځ په دې اړه جوړې شوې ناستې ته وویل چې دوی د اړوندو مؤسسو په مرسته دا ډول پروګرامونه د افراط پالنې په وړاندې د مبارزې او د ځوانانو د لیدلوري بدلولو په هدف پیل کړي دي.
ښاغلي سادات زیاته کړه چې د افراط پالنې مفکوره نهیوازې ځوانان د بربادۍ پر لور بیايي بلکې ټولنه هم ناامنه کوي.
دی وايي:
"د اطلاعاتو او کلتور وزارت د ځوانانو چارو معینیت د اړوندو مؤسساتو په مرسته د ځوانانو د ذهنیت ښه کولو په خاطر پروګرامونه پیل کړي، د دغو پروګرامونو له مخې ځوانانو ته داسې ذهنیت ورکول کېږي چې دوی د انسان دوستۍ او وطن پرستۍ ذهنیت پیدا کړي، څو افغانستان له دا ډول حالته خلاص شي."
ښاغلي سادات زیاته کړه چې دغه سیمینارونه نمایشي جنبه نهلري او د کابل سربېره په څو نورو ولایتونو کې هم عملاً پیل شوي، د ځوانانو ذهنیت بدلول یوازې د مؤسساتو او دغه وزارت کار نهدی بلکې خپله ځوانان هم باید په دغې برخه کې مرسته وکولای شي.
د ښاغلي سادات په خبره اوسمهال هېواد کې ډېری ځوانان د افراط پالنې د دسیسو قرباني شوي خو وختیې رارسېدلی چې دوی ته د وطن د ابادۍ ذهنیت ورکول شي.
دا په داسې حال کې ده چې تر دې مخکې یو شمېر هغه ځوانان چې د پاکستان په قبایلي مدرسو کې یې زدهکړې کړي هغوی ته د افراط پالنې ذهنیت ورکول شوی او افغانستان ته د ترورېستي کړنو لپاره استول کېږي.
په ورته وخت کې یو شمېر ځوانانو چې په دغې ناسته کې یې ګډون کړی وو، د دا ډول سیمینارونو جوړول وستایل خو ټینګار یې وکړ چې دغه ډول پروګرامونه هغه وخت ګټور تمامېږي چې عملي بڼه خپله کړي.
د دې ځوانانو څخه دوه تنه محمد عارف او حکیم احمدي داسې وایي:
"موږ باید له افراطه کار وانهخلو، افراط د دې سبب کېږي چې موږ ځوانان لهمنځه یوسي زما په نظر دغه ډول کنفرانسونه د ځوانانو لپاره ګټور دي، ځوانانو ته انګېزه ورکوي چې څه ډول له خپل ژونده ګټه واخلي."
"د دا ډول سیمنارونو جوړول ډېر تأثیر د ځوانانو پر روحیه لري."
بلخوا د افغانستان د مشرانو جرګې نایبه منشي، نجیبه حسیني وایي، که څه هم د ځوانانو معینیت کارونه په تېرو کلونو کې د قناعت وړ نهدي خو که دغه پروګرام په ښه ډول د دوی لهخوا عملي شي ښايي د ځوانانو او د هېواد د ښهوالي لپاره ګټور تمام شي.
راپور: سباوون کاکړ