يو بندي په ګوانتانامو بې زندان کې له څوارلس کاله بند تېرولو وروسته له خپلې کورنۍ سره يو ځای شو.
محمد ولد صالحي په ګوانتانامو زندان کې د موريتانيا اخري بندي وو.
وروسته له هغه چې صلاحي خپل هېواد ته انتقال شو، په ګوانتانامو زندان کې د بنديانو شمېر شپېته ته کم شو.
د صلاحي د کتاب د ګوانتانامو خاطرات له خپرېدو سره د ټولو پام د ده قضيې ته اووښتی دی.
په دې کتاب کې صلاحي په ګوانتانامو زندان کې له ده سره د ناوړه چلند په اړه لیکلي دي.
ده په خپلو لومړيو خبرو کې چې د موريتانيا له ملي تلويزيون څخه خپرې شوې، خپل کور او کهول ته د راستنولو لپاره يې د دې هېواد د ولسمشر له هڅو مننه کړې ده.
دی چې خوشاله او روغ رمټ ښکارېده، د زندان د شرايطو په اړه یې څه ونه ويل خو په کتاب کې يې د دې موضوع په اړه پراخ معلومات شته.
د مورتيانيا «ی. ايم. اې» رسمي خبري اژانس تاييد کړې ده چې صلاحي له ګوانتانامو زندانه له راخوشي کېدو وروسته د امريکايي چارواکو له خوا د هغوی موريتانيايي سيالانو ته سپارل شوی دی.
د دې خبري اژانس د راپور له مخې، صلاحي د څو کلونو په اوږدو کې له ډپلوماټيکو هلو ځلو وروسته موريتانیا ته وسپارل شو.
د امریکا د دفاع وزارت په يوه اعلاميه کې ويلي، د ګوانتانامو زندان د بندولو د بهير د ملاتړ په خاطر امریکا له موريتانيا منندوی دی.
د موريتانيا يوې سرچينې فرانسې خبري اژانس ته ويلي چې صلاحي د دوشنبې په ورځ د يوې الوتکې په واسطه د دې هيواد پلازمينې نواکشوت ته ورسېد.
د بخښني نړيوال سازمان د صلاحي د راخوشي کېدو هرکلی کړی دی خو ويلي يې دي چې دې اقدام ډېر وخت ونیوه.
په امریکا کې د دې سازمان کمپاين کوونکې اليزابت بي ورز ويلي، د ښاغلي صلاحي غير قانوني توقيف او ځورونه غير عادلانه ده.
په امریکا کې د يوولسم سپتمبر له حملو وروسته، پنځه څلوېښت کلن صلاحي په ۱۹۹۹میلادي کال کې په لاس انجلس کې د بمي چاودنو په دسيسه کې د لاس درلودو په تور په خپل هېواد کې ونيول شو.
دی په افغانستان او اردن کې له پلټنو وروسته په ۲۰۰۲میلادي کال کې ګوانتانامو زندان ته انتقال شو.