د کندز ولایت د کډوالو او راستېدونکو ریاست چارواکي وايي چې له دغه ولایته په دې څلورو ورځو کې د جګړو له کبله تخمیناً ۶۰۰۰ زره کورنۍ د هېواد بېلابېلو ولایتونو ته بېځایه شوي دي او دغه لړۍ لاهم جریان لري.
د کډوالو او راستنېدونکو ریاست رئیس سید عبدالسلام هاشمي ازادي راډیو ته وویل چې له دغو بېځایه شویو کورنیو څخه څه باندې زر کورنۍ یې تخار ولایت ته ستنې شوي او پاتې یې بغلان، بلخ او کابل ته کډه شوي دي.
ښاغلي هاشمي زیاته کړه:
"اوسمهال په شمال ختیځ ولایتونو کې هوا هم ډېره سړه شوې او هغه شمېر مهاجرین چې تخار ولایت ته تللي د خوراکي توکو، د ځای او د ګرمو پوښاکو له نهشتون سره مخامخ دي."
پرون مازیګر د کندز حوزوي روغتون په انګړ کې د طالبانو او افغان ځواکونو تر منځ د درنو او سپکو وسلو ډزې تبادله شوې چې په ترڅ کې يې د روغتون پر ودانۍ راکټونه ولګېدل.
د کندز د عامې روغتیا سرپرست رئیس عبدالحمید عالم ازادي راډيو ته وویل چې پرون د طالبانو او افغان ځواکونو تر منځ د روغتون په انګړ کې د ډزو له کبله د دغه روغتون ډاکټرانو کار درولی وو.
نوموړي په ډاګه کړه:
"د جګړې په جریان کې له دغې موقع څخه ډاکټرانو استفاده کړې او له روغتونه وتلي که همداسې د روغتون انګړ د جګړو ډګر وګرځي نو فکر نهکوم چې ډاکټران به بېرته خپلو کارونو ته راوګرځي."
نوموړي زیاته کړه چې د جګړې له پيل څخه تر اوسه پورې دغه روغتون ته ۲۱۰ تنه د جګړې ټپیان را انتقال شوي دي چې دغه شمېر څخه ۱۵۰ تنهیې په روغتون کې بستر شوي او پاتې شمېر یې له درملنۍ وروسته رخصت شوي دي.
بلخوا د کندز ښاریان وايي چې اوسمهال دوی د اوبو او خوراکي توکو له نهشتون سره مخامخ دي.
د یادونې وړ ده، نن څلورمه ورځ ده چې کندز ښار کې د افغان ځواکونو او وسلهوالو طالبانو تر منځ درنه جګړه جریان لري او د دغې جګړې ډېر زیان ملکي وګړو ته رسېدلی دی.