په کندز ولایت کې د ملي اردو د پامير د شلمې فرقې چارواکي وايي چې له دوه ورځو راهیسې د کندز د نوې منظور شوي اقتاش ولسوالۍ د بېرته نیولو په هدف د افغان ګډو ځواکونو د ۱۷م تندر په نوم تصفیوي عملیات پیل کړي او لا هم په سیمه کې جریان لري.
نوموړي ولایت کې د پامیر د شلمې فرقې د ارکان رئیس سید قربان موسوي ازادي راډيو ته وویل چې د دغه عملیاتو په پایله کې تر اوسه پورې ۲۵ تنه وسلهوال طالبان وژل شوي دي.
ښاغلی موسوي زیاتوي چې په وژل شويو طالبانو کې یو شمېر مهم قوماندانان هم شامل دي.
دی وايي:
"د دغه عملیاتو په جریان کې ۲۵ تنه طالبان وژل شوي دي او په وژل شویو کسانو کې مولوي احمدشاه، مولوي عبدالحی، مولوي فیضالله او مولوي نجیب شامل دي."
نوموړی وايي، دغه عملیات به تر هغه وخته دوام ولري، څو چې دغه نوې تشکیل شوې ولسوالۍ د طالبانو له شتونه نه وي پاکه شوې.
په ورته وخت کې کندز کې د پولیسو د ۸۰۸ م سپينزر زون د جنايي تحقیقاتو رئیس احمدجان بیا وايي، په دې عملیاتو کې افغان ځواکونه وتوانېدل چې د جنت باغ، باسوس، د عینالله تپه او د لرخابیو کلی د طالبانو له موجودیته تصفیه کړي.
نوموړي زیاته کړه چې په دې عملیات کې د وسلهوالو طالبانو یو شمېر پوځي وسایط هم لهمنځه تللي دي.
احمدجان زیاتوي:
"عملیات ډېر ښه روان دي او زموږ ځواکونو ته کوم زیان نه دی رسېدلی او خلک هم ډېر خوشحاله دي چې د دوی سیمې د طالبانو له شتونه تصفیه شي."
په همدې حال کې د اقتاش ولسوالۍ اوسېدونکي له دولته غواړي څو د دوی سیمې ډېر ژر د طالبانو له شتونه تصفیه کړي چې بې ځایه شوي خلک خپلو کورونو راستانه شي.
د دغې ولسوالۍ د باسوس کلي یو تن اوسېدونکي ازادي راډیو ته وویل:
"موږ خوشحاله یو چې دولت راشي، څو زموږ سړک او پُل څوک خراب نه کړي او موږ په خپله سیمه کې امنیت غواړو."
د یادونې وړ ده چې د اقتاش سیمه له دې وړاندې د کندز ولایت د خاناباد ولسوالۍ اړوند سیمه وه او له یوکال راهیسې د طالبانو په کنټرول کې ده، خو دغه سیمې هغه مهال ولسوالۍ شوه چې تېر کال د افغانستان ولسمشر محمد اشرف غني لهخوا کندز ته درې نوې ولسوالۍ منظور شوي، لکه اقتاش، کلبات او ګل تېپه او د دغو ولسوالیو په منظورېدو سره د دغه ولایت د ۶ ولسوالیو شمېر ۹ ولسوالیو ته پورته شو.
خو تر اوسه پورې وسلهوالو طالبانو په دې اړه څه نه دې ویلې.
اجمل آرین-کندز
