د لاسرسۍ وړ لېنکونه

تازه خبر
چهارشنبه ۸ چنګاښ ۱۴۰۱ کابل ۰۹:۳۴

خبرونه

ارنسټ: د سوریې حکومتي ځواکونه پر ملکي خلکو حملې کوي

د امریکا متحده ایالاتو پر روسیې او سوریه کې د بشارالاسد پر رژیم تور لګولی چې د ملکي خلکو پر ضد یې ګډ کمپاین پيل کړی دی.

د سپینې ماڼۍ ویاند جاش ارنسټ پرون دوشنبه وویل چې د سوریې حکومتي ځواکونه چې د روسیې جنګي الوتکې یې ملاتړ کوي، پر ملکي خلکو بمي حملې کوي او په‎ دې ډول‌يې تسلیمېدو ته اړ باسي.

د سوریې حکومت تېره اوونۍ اعلان وکړ چې په حلب کې یې د اپوزېسیون ډلو پر وځي عملیات پیل کړي دي. په حلب کې لږ تر لږه دوه لکه او پنځه اویا زره انسانان ژوند کوي.

د ورځې تازه خبرونه دلته ولولئ

یو طالب پلاوى له امریکایي چارواکو سره د خبرو لپاره دوحې ته روان شو

د طالبانو د بهرنیو چارو سرپرست وزیر امیرخان متقي

د طالبانو حکومت د مالیې وزرات او د افغانستان بانک چارواکي له امریکایي چارواکو سره د خبرو لپاره نن د قطر پلازمېنې دوحې ته روان شول.

د آسوشیتدپرس خبري آژانس د راپور له مخې د طالبانو د بهرنیو چارو وزرات مرستیال ویاند حافظ ضیا احمد ویلي، چې د دغه پلاوي مشري به د بهرنیو چارو سرپرست وزیر امیرخان متقي کوي او په دوحه کې به د افغانستان لپاره د امریکا له ځانګړي استازي ټوماس ویسټ او د امریکا د خزانې وزارت له چارواکو سره د افغانستان پر اقتصادي وضعیت او بانکي سکتور خبرې وکړي.

له دې مخکې واشنګټن پوسټ ورځپاڼې پرون سې شنبې خبر ورکړی و، چې د امریکا د ولسمشر جو بایډن ادارې چارواکي د طالبانو له مشرتابه سره پر یوه میکانېزم کار کوي څو پر اساس به یې د طالبانو حکومت ته اجازه ورکړل شي چې د افغانستان بانک له شتمنیو څخه د شدیدې لوږې او بې وزلۍ د ستونزو د کمولو لپاره کار واخلي او دا ډاډ ترلاسه کړي، چې له دغو پیسو به ناوړه ګټه نه اخیستل کېږي.

د تېر کال د اګست د میاشتې راهیسې، چې طالبان بیا پر افغانستان واکمن شوي نړیوالې ټولنې منجمله امریکا پر دې هېواد بندیزونه لګولي دي.

دغه راز د افغانستان د مرکزي بانک شاوخوا نهه نیم میلیارد ډالره په بهر کې کنګل شوې چې شاخوا اوه ميليارده ډالره یې د امریکا په بانکونو کې ده.

په کندهار کې د کراتې سیالۍ پیلېږي

آرشیف

په کندهار کې د پنځو ولایتونو د لوبغاړو ترمنځ د کراتې سیالۍ پیلېږي.

د افغانستان د بدني روزنې او ورزش ادارې پر خپله فېسبوک پاڼه لیکلي، چې د دې سیالیو لپاره چمتووالی روان دی.

دا سیالۍ چې د جمعې په ورځ پیلېږي، د کوربه کندهار ترڅنګ به د هرات، فراه، خوست او کابل ولایتونو د کراتې لوبغاړي ګډون وکړي.

په خبر کې د کندهار د کراتې فدراسیون له قوله لیکل شوي دي، چې د نورو ولایتونو د لوبغاړو ترڅنګ به د کندهار ولایت ۶۰ لوبغاړي هم په دې لوبو کې ګډون وکړي چې غوره لوبغاړي به یې د کندهار ولایتي لوبډلې ته لار ومومي.

جوانان میهن لوبډله د کابل فوټسال غوره لیګ سیالیو اتله شوه

آرشیف

جوانان میهن لوبډله د کابل فوټسال غوره ليګ سياليو اتله شوه.

د افغانستان فوټبال فدراسیون پر خپله فېسبوک پاڼه لیکلي دي، د کابل فوټسال غوره لیګ سیالۍ چې له یوې میاشتې راهیسې د ۱۱ لوبډلو ترمنځ د افغانستان فوټبال فدراسیون په جمنازيوم کې پيل شوې وې، پرون مازدیګر د جوانان میهن لوبډلې په اتلولۍ پای ته ورسېدې.

جوانان میهن لوبډلې، چې ۴۲ ګولونه وهلي و، لومړی مقام او میوند لوبډلې چې ۲۰ ګولونه وهلي و، دوهم مقام یې خپل کړ.

جوانان میهن په ۱۰ لوبو کې ۸ لوبې وګټلې، یوه یې وبایلله او یوه یې مساوي کړه.

د انګلستان کيپټان له نړيوال کرکټ سره مخه ښه وکړه

ايون مورګن د نيوزيلنډ لوبډلې خلاف په يوه لوبه کې د توپوهنې پرمهال

د انګلستان د یو ورځنیو او شل اوریزو لوبو کيپټان ایون مورګن له نړيوال کرکټ سره مخه ښه وکړه.

۳۵ کلن ایون مورګن پرون اعلان وکړ، چې نور به نړيوال کرکټ پرېږدي.

مورګن که څه هم انګلستان ته د ۲۰۱۹ کال د یو ورځنیو لوبو نړيوال جام وګاټه خو په وروستیو لوبو کې ښه نه و ځلېدلی.

مورګن په ایرلنډ کې زېږېدلی و او په لومړي ځل د ایرلنډ په ملي لوبډله کې ولوبېد خو وروسته د انګلستان له لوبډلې سره یو ځای شو او تر دې چې د دې لوبډلې کيپټان وټاکل شو.

ایون مورګن په ۱۲۶ نړيوالو کې د انګلستان لوبډلې کيپټاني کړې وه، چې ۷۶ لوبې یې ګټلې وې.

مورګن د ټېست کرکټ په ۱۶ لوبو کې ۷۰۰، په ۲۴۸ یو ورځنیو لوبو کې ۷۷۰۱ او ۱۱۵ نړىوالو شل اوریزو لوبو کې ۲۴۵۸ منډې جوړې کړې وې.

د کجکي له بنده کندهار ته ١١٠کيلو ولټه برښنا ورکړل شوه

د کجکي بند

د افغانستان برښنا شرکت وایي، چې د کجکي له بند څخه د ۱۱۰ کیلو ولټه برښنا نوي مزي له کندهارسره ونښول شول.

چارواکو ویلي، چې د دغې پروژې په بشپړېدو سره به د کندهار د اوسېدونکو په تېره د تولیدي فابریکو د برښنا د کمښت ډېرې ستونزې هواري شي.

په دې اړه په نن په یوه خپره شوې خبرپاڼه کې د افغانستان برښنا شرکت د عملیاتي څانګې ريیس انجینر صفي الله احمدزي ویلي، چې د ۲۷۲ ميليونه افغانیو په مالي لګښت د دغو نویو مزیو پروژه د دې شرکت د تخنیکي او نورو عملیاتي ټیمونو پر مټ په دوو میاشتو کې بشپړه شوې ده.

په کندهارکې د برښنا د کمښت له امله په تېرو څو کلونو کې د دې ولایت په صنعتي پارک کې په سلګونو تولیدي فابریکو خپل فعالیت بند کړی دی.

په دې اړه په جوړو شویو مراسمو کې د کندهار د صنعت او سوداګرۍ د خونې ريیس سید سرور اماني کندهار ته د دغې پیاوړې برښنا رسېدل د صنعت کارانو لپاره لویه ډالۍ وبلله او زیاته یې کړه، چې په دې سره به د صنعتي فابریکو ټکني شوي کارونه بېرته نورمال حالت ته را وګرځي او د صنعت په برخه کې به هم پانګونه زیاته شي.

د طالبانو د استخباراتو رياست: افغان يوټيوبر غلام سخي مو له بنده خوشې کړی

خو له غلام سخي سره درې تنه نور لا هم د طالبانو په زندان کې دي.

د طالبانو د استخباراتو لوی ریاست مني چې افغان یوټیوبر غلام سخي یې له بنده پرون خوشې کړی دی.

د طالبانو د استخباراتو د لوی ریاست ویاند خلیل همراز ازادي راډیو ته وویل، غلام سخي پرون له بنده ازاد او خپلې کورنۍ ته سپارل شوی دی.

یوټیوبر غلام سخي نږدې درې اوونۍ وړاندې مقدساتو ته د توهین په تور زنداني شوی و.

خو له هغه سره درې تنه نور لا هم د طالبانو په زندان کې دي.

د اوکراين په ليسچيانسک کې وضعيت خراب بلل شوی

د اوکراين د جګړې يو انځور

روسي ځواکونه د اوکراین په لیسچیانسک کې ړندو بمباریو ته دوام ورکوي او سیمه ییزو چارواکو په دې ښار کې چې د اوکراین په ختیځ کې د جګړې وروستۍ سنګر بلل کېږي، وضعیت ډېر خراب بللی دی.

د اوکراین ولسمشر ولادمیر زلنسکي روسیه تورنه کړې چې په کریمینچوک کې په قصدي توګه ملکیان په نښه کوي په هغه ښار کې چې د خرڅلاو پر یوه لوی مرکز د روسیې د تیرې ورځې د توغندویي برید په نتیجه کې لږ تر لږه اتلس کسان وژل شوي او په لسګونو نور تر اوسه تري تم دي.

زلنسکي وویل، روسیه غواړي هر څومره چې کولای شي خلک ووژني.

نوموړي دغه راز پرون له ملګرو ملتونو وغوښتل چې ځانګړی پلاوی دې د پېښې ځاته واستوي یا دې په خپله د ملګروملتونو سرمنشي ورشي ترڅو پر توغنديو لګېدلی دغه ځای له نژدې وګوري.

زلنسکي دغه څرګندونې د ملګرو ملتونو د امنیت شورا هغې بېړنۍ غونډې ته وکړې چې د روسیې له دغه توغندویي برید وروسته د کییف په غوښتنه رابلل شوې وه.

کندهار: طالبان په نارنج تاريخي ماڼۍ کې مدرسه جوړوي

کندهار کې د نارنج تاريخي او لرغوني ماڼۍ

ازادي رادیو د کندهار د زاړه ښار له سیمي داسي انځورونه تر لاسه کړي چې ښکاري د دې تاریخي ودانۍ په ساحه کې د یوې مدرسې د جوړیدو چاري روانې دي.

په کندهار کې طالب چارواکې په دې اړه په رسمي ډول څه نه وایي، خو یوې سرچينې ازادي رادیو ته د نوم نه ښودلو په شرط وویل، دا مدرسه د طالبانو د حکومت د یوه لوړپوړي چارواکې په امر جوړیږي.

د سرچنې په وینا د دې مدرسې یوه برخه د طالبانو د پخوانی تحریک پر مهال جوړه شوې او د مدرسې د پراختیا لپاره اوس تازه د نارنج ماڼۍ په حریم کې بله ودانۍ جوړیږي.

د نارنج ماڼۍ چې د سکندر مقدوني د امپراطورۍ پر مهال ودانه شوې تاریخي قدامت یې ۲۳۴۳ کاله ته رسیږي.

د تاریخ پوهانو په وینا دا ماڼۍ چې په لومړیو کې د مقدوني سکندر پوځی اډه او وروسته په شاهي دربار بدله شوه، د هوتکیانو د حکومت پرمهال ادبي دربار وو.

توماس ويسټ: امريکا له افغان زلزله ځپلو سره مرسته کې د خپلو شريکانو د ملاتړ هرکلی کوي

د افغانستان لپاره د امریکا ځانګړی استازی توماس ويسټ

د افغانستان لپاره د امریکا ځانګړی استازی وایي، امریکا د افغانستان په جنوب ختیځ کې د تیرې اونۍ د مرګونې زلزلې له زیانمن شویو سره نژدې ۵۵ ميلیون ډالره مرسته کوي او په دې برخه کې د خپلو شریکانو د کلک ملاتړ هرکلی کوي.

ټوماس ویسټ په یوه ټویټ کې ویلي چې د امریکا دغه اضافي مرسته به د اړتیا وړ په ضروري موادو لکه پر سرپناه، د اوبو د تصفیې کېټونو، کمپلو، جامو او نورو شیانو ولګول شي.

د امریکا د بهرنیو چارو وزارت له خوا پرون په خپره شوې خبرپاڼه کې انتوني بلینکین ویل، دغه پیسې به د امریکا د نړیوالې پراختیایي ادارې له لوري ولګول شي اوپه دې سره د هغو مرستو اندازه چې امریکا په تېر یوه کال کې له افغانستان سره کړې، ۷۷۴ ملیون ډالرو ته رسیږي.

د فابريکو مسؤلين: د شيخ مصري صنعتي پارک ځمکه په لوړه بيه ورکول کېږي

د افغانستان په عمومي نقشه کې د ننګرهار ولايت موقعيت

په ننګرهار کې د فابریکو خاوندان وايي، د شیخ مصري صنعتي پارک ځمکه په لوړه بیه دوی ته ورکول کېږي.

د ننګرهار د صنایعو او کانونو خونې مشر تور ملنګ شګیوال نن ازادي راډيو ته وویل، چې د ننګرهار د ۱۰۰ فابریکو څښتانو د سې شنبې په ماسپښين د طالبانو حکومت د صنعت او سوداګرۍ وزارت له سرپرست سره په لیدنه کې غوښتنه وکړه چې د شیخ مصري صنعتي پارک کې د ځمکو لپاره ټاکل شوې بیې باید ټيټي شي.

ښاغلی شګیوال وايي، په تېر جمهوري حکومت کې پرېکړه شوې وه چې د دې صنعتي پارک د یو جرېب ځمکې بیه به ۱۰۰۰۰۰ افغانۍ وي خو اوس له دې بیې سره شاوخوا ۳۰۰۰۰ ډالر د زېربنا د مصارفو په نوم غوښتل کېږي چې سوداګر یې د ورکولو وس نه‌لري.

د شګیوال په خبره په ناسته کې پرېکړه وشوه چې يوه کمېټه به ټاکل کېږي چې د شیخ مصري صنعي پارک د ځمکو بیې په دقیق ډول معلومې او وټاکي.

د ننګرهار د صنایع او کانونو خونې مشر وايي، په دې ناسته کې یې د شیخ مصري صنعتي پارک د برېښنا د نشتوالي او لوړو مالیاتو ستونزه هم د طالبانو حکومت د صنعت او سوداګرۍ وزارت له سرپرست سره شریکه کړه.

د غاليو د توليد او صادرونکې ټولنه: د غاليو صادرات ۲۴ سلنه ډېر شوي

د افغانستان جوړې غالۍ

د غالیو د تولید او صادرونکو ټولنه وايي، د تېرو کلونو په پرتله د غالیو صادرات ۲۴ سلنه ډېر شوي دي.

د دې ټولنې مشر نور احمد نوري نن له ازادي راډیو سره په خبرو کې که څه هم د غالیو د سږ کال صادراتو په اړه ارقام وړاندې نه کړل خو وې ویل چې تېر کال یې اته نیم میلیونه ډالره صادرات درلودل.

نوموړي زیاته کړه چې پخوا به یوازې د افغانستان په شمال کې غالۍ اوبدل کېدلې خو اوس په نورو ولایتونو کې هم غالۍ اوبدل کېږي.

ښاغلی نوري وايي، د وزګارتیا او وچکالۍ له امله ډېرو خلکو د غالیو اوبدلو ته مخه کړې ده.

هغه زیاتوي، د افغانستان غالۍ تر ډېره پاکستان ته او د پاکستان له لارې نورو اروپايي، اسیايي او امریکايي هېوادونو ته صادرېږي.

ناټو کې د فنلنډ او سويډن د غړيتوب منلو په اړه ترکيې موافقه کړې

د ترکيې ولسشر رجب طيب اردغان او د ناټو عمومي منشي ينسټولټنبرګ

ترکیې منلې ده چې په ناټو کې د فنلنډ او سویډن د غړیتوب د غوښتنې پر وړاندې له مخالفت څخه لاس اخلي.

پر اوکراین د روسیې له یرغل وروسته دې دوو هېوادونو په ناټو کې د غړیتوب غوښتنه وکړه خو د ناټو غړې ترکیې یې مخالفت کاوه.

د فنلنډ ولسمشر ساولي نینیستو پرون وویل دا موافقه وروسته له هغه ترلاسه شوه چې ده او د سویډن صدر اعظمې مګدالینا اندرسون پرون (د جون ۲۸مه) په مادرید کې د ناټو د سرمشریزې له جوړېدو مخکې د ترکیې له ولسمشر رجب طیب اردوغان سره وکتل.

نوموړي ويلي، له دې کتنې وروسته هغه ګډه موافقه لاسليک شوه چې له مخې یې دا درې هېوادونه له بهره د امنیتي ګواښ په صورت کې د یو بل پوره ملاتړ کوي.

شمالي وزيرستان: دوه پوليس او د پوليو ضد واکسين کمپاين يو غړی وژل شوي

د وژل شويو کسانو د تدفين مراسم

په شمالي وزیرستان کې د پولیو پرضد د واکسین د کمپاین پرمهال د وسله والو په برید کې دوه پولیس او د واکسین د کمپاین یو غړی وژل شوي دي.

په سیمه کې د پولیسو یوه چارواکي عزیزالله ویلي دي چې په دې برید کې یو لاروی هم ټپي شوی دی.

د نوموړي په وینا برید کوونکي چې پر موترسایکل سپاره وو، له سیمې په تېښته بریالي شوي دي.

افغانستان او پاکستان د نړۍ یوازیني هېوادونه دي چې تر اوسه هم د ماشومانو د ګوزڼ د ناروغۍ- پولیو پېښې پکې شته.

له اپرېل میاشتې راهیسې، په پاکستان کې د پولیو یوولس پېښې موندل شوي چې واړه په شمالي وزیرستان کې وې.

دا پېښه یوه ورځ وروسته له دې وشوه چې د پاکستان حکومت د ټول هېواد په کچه د پولیو پرضد د واکسین کمپاین پیل کړ. د دې برید پړه تراوسه کومې ډلې نه ده منلې.

کولمبيا: په يوه زندان کې د اور لګېدنې له امله ۵۱ کسان مړه شوي

ارشيف

د کولمبیا د جنوب لویدیځ په یوه زندان کې د بلوا پر مهال اور لګېدلی چې په نتیجه کې یې لږ تر لږه ۵۱ کسان مړه او تر شلو زیات نور ټپیان شول.

د زندانونو ملي ادارې ویلي، پېښه پر ځايي وخت د سې شنبې سهار شوې.

بلوا او اورلګېدنې هغه وخت پېښه شوه، چې بلواګرو زندانیانو دوی لوري ته د پولیسو د مخکې تګ د مخنیوي لپاره اورونه ولګول.

د کولمبیا چارواکي وايي، په پېښه کې ۵۱ بندیان مړه او ۲۴ نور ټپیان شوي دي.

ملګرو ملتونو په مراکش کې د ۲۳ کسانو د مړينې د څېړنو غوښتنه وکړه

د مراکشي پناه غوښتونکو انځور

ملګرو ملتونو پرون سې شنبه د لږ تر لږه ۲۳ کسانو د مړینې په اړه د بېطرفانه څېړنو غوښتنه وکړه.

دغه کسان وروسته له هغې مړه شول، چې تېره جمعه شا و خوا ۲۰۰۰ پناه غوښتونکو هڅه وکړه، چې له مراکش څخه هسپانیا ته واوړي.

د ملګرو ملتونو د بشري حقونو ادارې ویاندې راوینا شامداساني پرون په جنیوا کې خبریالانو ته وویل: ملګري ملتونه له دواړو هېوادونو غواړي چې اغېزناکې او بې پرې څېړنې یقیني کړي.

ملګري ملتونه وايي په تاوتریخوالي کې ۲۳ پناه غوښتونکي مړه شوي او ۷۶ نور ټپیان شوي دي.

د مراکش چارواکي وايي په تاوتریخوالي کې د دوی ۱۴۰ پولیس هم ټپیان شوي دي.

نور راوښيه

XS
SM
MD
LG