د افغانستان حکومت د صافي ایروېز یا صافي هوايي شرکت الوتنې د مالیې د نهورکولو په خاطر ځنډولې دي.
د ملکي هوايي چلند خپلواکه اداره وايي، د صافي ایروېز الوتنې یې ځکه بندې کړي دي چې دې هوايي شرکت خپل سلګونه میلیونه افغانۍ پور نهدی ورکړی.
د ملکي هوايي چلند خپلواکې ادارې ویاند قاسم رحیمي ازادي راډيو ته وویل، صافي ایروېز د یوې میاشتې مهلت په ترڅ کې ونهشو کړای د مالیې له درکه له یو میلیارډ او ۱۵۰ میلیونه افغانیو زیات پور چې په تقریبي ډول له ۱۷ میلیونه ډالرو اوړي پرې کړي.
ښاغلي رحیمي زیاته کړه:
"د افغانستان مالیې وزارت له فیصلې سره-سم د صافي ایروېز فعالیتونه وځنډول شول. دلیلیې دا دی چې دا شرکت له نېږدې درېیو څلورو کلونو راهیسې د ماليې له درکه د افغانستان دولت پوروړی دی. د مالیې وزارت او د ملکي هوايي چلند خپلواکې ادارې ډېره هڅه وکړه چې دا پورونه حصول کړي خو له بده مرغه دې شرکت ونهشو کړای چې د افغانستان دولت پورونه تصفیه کړي."
د صافي ایروېز مسؤلانو له ازادي راډیو سره په لنډو خبرو کې د خپل شرکت د فعالیت ځنډېدلو خبره رد کړه خو وروستهیې د ازادي راډیو پرلهپسې تماسونو ته له ځواب ورکولو ډډه وکړه.
د ملکي هوايي چلند خپلواکې ادارې ویاند وايي، په هېواد کې دننه د صافي ایروېز الوتنې به د سې شنبې په ورځ چې د وږې میاشتې ۱۶مه نېټه او له دې دوه ورځې وروسته د وږې په ۱۸مه نېټه به بهر ته د دې شرکت الوتنې وځنډول شي.
قاسم رحیمي زیاته کړه، صافي ایروېز ته د هېواد له قوانینو سره سم یوه میاشت مخکې وروستی مهلت ورکړل شوی و.
ښاغلی رحیمي وايي، د دې شرکت د استازو په حضور کې شوې پرېکړه همدا وه چې که دا شرکت خپل پورونه پرې نهکړي د مالیې وزارت او د ملکي هوايي چلند خپلواکه اداره کولای شي الوتنې یې وځنډوي او له محکمې د هغه د شتمنیو د مصادرې غوښتنه وکړي.
د ملکي هوايي چلند خپلواکه اداره وايي، صافي ایروېز له ۱۳۹۰ تر ۱۳۹۳ کاله مالیاتي او غیر مالیاتي باقیدارۍ لري چې باید په ټاکلي مهلت کې یې د قسطونو په بڼه ورکړي وای خو دا شرکت په دې کار کې پاتې راغی.
دې ادارې په یوه بیان کې ویلي، صافي ایروېز ته خبرداری ورکړل شوی و چې که تر ټاکلي مهلته د خپل پور د ورکړې توان نهلري نو د ټکټونو له خرڅلاو څخه دې ډډه وکړي.
بیان زیاتوي چې د ټکټونو د خرڅلاو په صورت کې صافي ایروېز مکلف دی چې د مسافرینو د ستونزو د حل په برخه کې اقدام وکړي.