د لاسرسۍ وړ لېنکونه

تازه خبر
چهارشنبه ۲۹ مرغومی ۱۴۰۰ کابل ۰۲:۵۲

خبرونه

کابل کې د افغان او ایراني ماشین الاتو نندراتون پرانیستل شو

د افغانستان د سوداګرۍ او صنایعو خونه وایي چې په کابل کې د افغانستان او ایران ګډ نندارتون جوړول ددې لامل کیږي چې د دواړو هېوادونو ترمنځ سوداګریزې اړیکي پياوړې شي.

د سوداګرۍ او صنایعو خونې مرستیال خان جان الکوزي نن په کابل کې د افغانستان او ایران د وړو صنایعو د ماشین الاتو د ګډ نندارتون د پرانیستي پرمهال وویل چې، د دواړو هېوادونو سوداګر کولای شي د یادو نندارتونو په جوړولو سره خپلې تجربې شریکې کړي.

له بلې خوا د ایران د سوداګرۍ اوصنایعو خونې رئیس مهندس افخي وویل چې، هڅه کوي د دواړو هېوادونو ترمنځ دغه ډول نور نندارتونونه هم جوړ کړی.

په دغه نندراتون کې د وړو صنایعو ماشین آلات د ۴ ورځو لپاره نندارې ته ایښودل شوي دي.

د ورځې تازه خبرونه دلته ولولئ

د قزاقستان پخواني ولسمشر له قاسم جومارټ توقایف سره د لانجو خبر رد کړ

نورسلطان نظر باییف

د قزاقستان پخواني ولسمشر نورسلطان نظرباییف دا رد کړه چې ګنې دی له اوسني ولسمشر قاسم جومارټ توقایف سره کومه لانجه لري.

۸۱ کلن نظرباییف په یوه ویډیویي پیغام کې چې نن خپور شوی ویلي چې ده په ۲۰۱۹کال قدرت ښاغلي توقاییف ته سپارلی او له هغې را وروسته دی متقاعد شوی دی.

نوموړي ویلي چې په پلازمېنه نورسلطان کې اوسي او هېڅ کله له هېواده وتلی نه دی.

دا د جنوري د میاشتې له لومړیو راهیسې چې په دې هېواد کې تاوتریخجنې مظاهرې پیل شوي، په عام محضر کې د هغه لومړنۍ څرګندونې دي.

تراوسه نه ده څرګنده چې نورسلطان دغه ویډیو چېرې او کله ثبت کړې ده.

په هغو اعتراضونو کې په ژانوزین ښارکې په ناڅاپې توګه د تېلو د بیو د ډېرو لوړېدو پر وړاندې پیل شوې په چټکۍ د هېواد نورو برخو ته خپاره شول.

الماتي او یو شمېر نور ښارونو تر ډېره د تاوتریخجنو مظاهرو شاهد وو.

قزاقي چارواکو په دغو مظاهرو کې د امنیتي ځواکونو د نولسو غړیو په ګډون د ۲۲۵ کسانو د وژل کېدو خبره کړې ده.

پاکستاني طالبانو د دې هېواد پر پولیسو د خونړیو حملو مسؤلیت اخیستی

ارشیف؛ پاکستان

پاکستاني طالبانو د دې هېواد پر پولیسو د څو خونړیو حملو مسؤلیت اخیستی.

د تحریک طالبان د ډلې وسله والو په پلازمېنه اسلام اباد، د خیبرپښتونخوا ایالت په دیراو شمالي وزیرستان سیمو کې پرپولیسو د حملو او نښتو په ترڅ کې ۳ پولیس وژلي دي.

په دغو حملو کې د دغې ډلې ۳ حمله کوونکي هم وژل شوي دي.

د پولیسو په وینا د پاکستان د تحریک طالبان ډلې دوو وسله والو چې په موټرسایکل سپاره وو د دوشنبې په شپه د اسلام اباد په مرکزي برخه کې د پولیسو د تلاشۍ پر پوستې ډزې وکړې.

په دغه پېښه کې یو پولیس افسر او دواړه حمله کوونکي وژل شوي او دوه نور پولیس افسران ټپیان شوي دي.

د خیبرپښتونخوا ایالت په دیراو شمالي وزیرستان سیمو کې د پاکستاني طالبانو د دوشنبې د ورځې په بریدونو کې د دوه پولیسو د وژل کېدو خبر ورکړل شوی دی.

د تحریک طالبان پاکستان د ډلې ویاند محمد خراساني په یوه ټویټ کې د دغو حملو د مسؤلیت اخیستو ترڅنګ په باجوړ سیمه کې په برید کې د خپل یوه وسله وال د وژل کېدو خبره تائید کړې ده.

د پاکستان د کورنیو چارو وزیر شیخ احمد رشید په اسلام اباد کې پر پولیسو له حملې وروسته په پلازمېنه کې د نورو حملو خبرداری ورکړی دی.

پاکستاني طالبانو له هغې راهیسې چې د تېرکال په ډسمبر کې یې له حکومت سره موقت یو میاشتنۍ اوربند پای ته ورسېد، د پاکستان پر پوځ او پولیسو حملې زیاتې کړي دي.

په بادغیس کې زلزلې؛ ملګري ملتونه وایي ۲۶ کسان وژل شوي

په بادغیس کې زلزلې

ملګري ملتونه په بادغیس کې د دوو زلزلو د قربانیانو شمیر۲۶ ښیي او وایي، زلزله ځپلي خوراکي موادو او سرپناه ته اړتیا لري.

د ملګروملتونو د بشري چارو همغږي کوونکي دفتر په یوه بیان کې ویلي چې دغو زلزلو په درېیو کلو کې شااوخوا اته سوه کورونه ویجاړ کړي او د لومړنیو راپورونو له مخې زیانمن شوي خلک، خوراکي موادو، سرپناه، غیرخوراکي موادو په تېره د ګرمولو وسایلو ته عاجله اړتیا لري.

په بیان کې ویل شوي چې په سیمه کې له خټو او خښتو جوړ په سلګونو کورونه چې زلزلې ویجاړ کړي، له مخکې وروستیو سختو ورښتونو ډېر زیانمن کړي و.

په عین حال کې طالب چارواکو ویلي چې ژغورونکو په هغو کسانو پسې د لټون هڅې پیل کړي چې کېدای شي د نړېدلو کورونو ترخاورو خښتو لاندې تراوسه ژوندي پاتې وي.

دغو زلزلو تر ټولو ډېر زیانونو د بادغیس په قادس ولسوالۍ کې خلکو ته رسولي دي.

د امریکا د جیولوژۍ د سروې مرکز د یوې زلزلې چې پرون سهار وختي شوې، د قدرت اندازه د ریښتر په کچه ۵،۳ او د بلې یوې چې څوساعته وروسته شوې، ۴،۹ ثبت کړې ده.

یوې زلزلې د بادغیس د مرکز قلعه نو ختیځ په ۴۱ کیلومترۍ او بلې په جنوب ختېځ پنځوس کیلومترۍ کې سیمې لړزولي دي.

طالبان:هرات کې یو موټر چلوونکی وژل شوی خو درمل پلورونکی 'سهواً' لګېدلی

د افغانستان په نقشه کې د هرات ولایت

په هرات کې د طالبانو د حکومت یو چارواکی د یوه موټر چلونکي چې د هغه په وینا د درېدو امر ته یې پاملرنه نه وه کړې او غوښتل یې خپل موټر پر طالب ساتونکو ور ولي، د وژلو خبرې ورکوي.

په هرات کې د طالبانو د استخباراتو د ادارې ویاند ثابت هروي ازادي راډیو ته وویل چې په دې پېښه کې چې تېر ماښام د هرات په جبرییل سیمه کې رامنځته شوه، د طالب ساتونکو په ډزو یو درمل پلورونکی هم سهواً وژل شوی دی.

هروي زیاته کړه: "مجاهدین د تلاشۍ پر ځای کې ولاړ و چې یو سراچه ډوله موټر راځي او له تلاشۍ سره نه دریږي. ډریور یې ان غوښتل چې پر خپل موټر مجاهدین له لارې لېرې کړي. مجاهدین پر هغه ډزې کوي، د سراچه موټر چلونکي وژل کېږي او په هغو مرمیو کې چې په یوه درمل پلورنځي لګېږي، په خواشینۍ سره په داخل کې یې یو درمل پلورنکی هم وژل کېږي."

ښاغلي هروي د وژل شوېو کسانو د هویت په اړه څه نه دي ویلي.

تر دې مخکې تېره اوونۍ د کابل په لویدیځ کې هم ورته یوه پېښه رامنځته شوې وه.

د زینب په نوم د دې پېښې د قرباني خور فاطمه ویلي، که څه هم اوښي د طالبانو امر پر ځای کړی او له تلاشۍ سره یې موټر درولی و، خو وروسته چې حرکت کې طالبان پرې ډزې کوي او خور یې وژله کېږي.

خو د طالبانو د حکومت مرستیال ویاند احمدالله وثیق ازادي راډیو ته په یوه استولي پیغام کې د دغۍ کورنۍ دغه ادعا رد کړې ده.

ژغورونکي هڅې کوي چې بادغیس کې زلزله ځپلي وباسي

ارشیف، شوې زلزله

ژغورونکو په بادغیس کې په هغو کسانو پسې د لټون هڅې پیل کړي چې کیدای شي په دې ولایت کې د وروستیو زلزلو له امله تراوسه ژوندي پاتې وي.

پرون ترکمنستان پولې ته نژدې په دې غرني ولایت کې د دوو زلزلو له امله د لږ تر لږه ۲۶ کسانو د مړه کیدو او په سلګونو کورونو د ویجاړیدو راپورونه ورکړل شول.

د امریکا د جیولوژۍ د سروې مرکز د یوې زلزلې چې پرون سهار وختي شوې، د قدرت اندازه د ریښترپه کچه ۵،۳ او د بلې یوې چې څو ساعته وروسته شوې، ۴،۹ ثبت کړې ده.

یوې زلزلې د بادغیس د مرکز قلعه نو ختیځ په ۴۱ کیلومترۍ او بلې په جنوب ختیځ پنځوس کیلومترۍ کې سیمې لړزولي دي.

د بادغیس په قادس ولسوالۍ کې خلکو ته ډېر ځاني او مالي زیانونه رسیدلي دي.

د بادغیس لپاره د طالبانو د والي ویاند باز محمد سروري په یوه بیان کې ویلي چې زلزلې د اوو سوو نه تر زرو پورې کورونه ویجاړ کړي دي. د هغه په وینا ښایي د مړو شمېر زیات شي.

د طالبانو د حکومت مرستیال ویاند انعام الله سمنګاني وویل، ژغورنکي د نړیدلو کورونو تر خاور خښتو لاندې احتمالي ژوندي پاتې شوي کسان لټوي.

چارواکو ویلي، یو شمېر کسانو د خپلو کورونو د چتونو د راپریوتو له امله خپل ژوند له لاسه ورکړی چې په کې ښځې او ماشومان هم شامل دي.

په بادغیس کې چې د افغانستان له بې وزلو او وروسته پاتې ولایتونو ګڼل کیږي، له دې مخکې هم څو زلزلې شوي چې خلکو ته یې ځاني او مالي زیانونه اړولي دي.

اسلام اباد کې نښتې؛ د پاکستاني پولیسو یو افسر وژل شوی او ۲ ټپیان شوي

ارشیف، د اسلام اباد یوه څنډه

چارواکي د پاکستان په پلازمېنه اسلام اباد کې د پاکستاني طالبانو او پولیسو ترمنځ په نښتو کې د پولیسو د یوه افسر د وژلو او دوو نورو د ټپي کېدو خبر ورکوي.

دا په پلازمېنه اسلام اباد کې چې کلک امنیتي تدابیر په کې نیول شوې، یوه نادره حمله ده.

د پولیسو په وینا د پاکستان د تحریک طالبان ډلې دوو وسله والو چې په موټر سایکل سپاره و، د دوشنبې په شپه د اسلام اباد په مرکزي برخه کې د پولیسو د تلاشۍ پر پوستې ډزې وکړي. په دغه پېښه کې یو پولیس وژل شوی او دوه نور ټپیان شوي دي.

د پاکستان د تحریک طالبان ډلې هم په یوه بیان کې د دغې پېښې مسوليت اخیستی دی.

پاکستاني طالبانو له هغې راهیسې چې د تېرکال په ډسمبر کې یې له حکومت سره موقت اوربند پای ته ورسېد، د پاکستان پر پوځ او پولیسو حملې زیاتې کړي دي.

افغان سوداګر: ۵ میاشتو کې ۵۸ زره او ۹۳۲ جلده قره قل پوستکي صادر شوي

د قره قل پوستکي

د افغانستان د قره قل پوستکي اداره وايي، په تېرو پنځو میاشتو کې یې ۵۸ زره و ۹۳۲ جلده قره قل پوستکي له هېواده بهر صادر کړي دي.

د افغانستان د قره قل پوستکي ادارې مدیر محمد عارف نن سې شنبه (د مرغومي ۲۸مه) ازادي راډیو ته وویل، یاده اندازه د قره قل پوستکي د طالبانو تر واکمنۍ وروسته د ایران له لارې فنلنډ ته صادر شوي دي.

ښاغلی عارف وايي چې په افغانستان کې د مالي کال له پیل راهیسې دوی یو لک و څلور زره جلده د قره قل پوستکي روسیي او د منځنی اسیا هېوادونو ته صادر کړي دي.

د نوموړي په خبره د قره قل اداره هڅه کوي چې په راتلونکي کال کې نورو هېوادونو ته هم قره قل پوستکي صادر کړي.

صرافان: د ۵ میاشتو په تیرېدو لاهم زموږ بانکي ستونزې نه دي حل شوي

بانک ته ولاړ خلک

د افغانستان د صرافانو ټولنه وایي، د پنځو میاشتو په تیرېدو سره لا هم د صرافانو بانکي ستونزې نه دي حل شوي.

د افغانستان د صرافانو ټولنې مرستیال حاجي دادګل نن سې شنبه (د مرغومي ۲۸مه) ازادي راډیو ته وویل، که څه هم د پخوا پرتله په افغانستان کې پولي معاملې یو څه ښې شوي، خو لا هم صرافان نه شي کولای چې له بانکه ډېرې پیسې واخلي.

ښاغلی دادګل وایي، اوس مهال هغه صرافان چې انفرادي حسابونه لري، کولی شي په اوونۍ کې۴۰۰ ډالر او یا ۳۰ زره افغانۍ له بانکه واخلي او دغه شان د صرافۍ شرکتونه کولی شي په اوونۍ کې د خپل ډالري حساب پنځه سلنه او له افغاني حساب هم پنځه سلنه پیسې راوباسي.

د نوموړي په خبره دوی څو ځلي یاده ستونزه له افغانستان بانک سره شریکه کړې او د یاد بانک چارواکو یي په نژدې راتلونکي کې د حل ژمنه کړې ده.

دا په داسې حال کې ده چې د طالبانو له خوا د کابل له نیولو وروسته د بانکونو او شهزاده سرای فعالیت د څه مودې لپاره ځڼډیدلی و.

د روغتیا سازمان: هیله لرو افغانستان کې د پولیو د ناروغۍ ټغر ټول شي

ارشیف، یوه ماشوم ته د پولیو واکسین کیږي.

د روغتیا د نړیوال سازمان چارواکي هیله من دي چې سږکال به په افغانستان کې د کم عمره ماشومانو لپاره د پولیو واکسین د څو کمپاینونو په ترسره کولو سره د دغې ناروغۍ ټغر له دې هېواده ټول کړي.

د ماشومانو لپاره د ملګرو ملتونو مرستندویه ادارې یونېسف ویلي چې د پولیو پر ضد د روان ۲۰۲۲ میلادي کال د واکسین د کمپاین په ترڅ کې به چې پرون دوشنبې پیل شوی او څلور ورځې دوام کوي، په دې هېواد کې له پنځو کلونو کم عمره نهه میلیونه او نهه سوه زره ماشومان واکسین شي.

د افغانستان لپاره د روغتیا د نړیوال سازمان استازې ډاپینګ لاو ویلي، دا به د دوی لپاره یو ښه فرصت وي چې له افغانستانه د پولیو ناروغۍ ورکه کړي.

هغه ویلي چې روان کال پنځه د واکسین کمپاینونه پلان شوي او دوی هیله من دي چې د وروستي کمپاین په ترسره کولو سره به په دې هېواد کې پولیو صفر ته ورسوي.

د افغانستان لپاره د یونیسف استازې الیس اکونګا وویل، دا اداره دې ژمنه ده چې ټول ماشومان د پولیو او نورو د مخنیوي وړ ناروغیو پر وړاندې واکسین کړي.هغې ویلي چې روان کال به هڅې زیاتې کړي، څو د پولیو ناروغي د تل لپاره ورکه کړي.

تېر کال په افغانستان کې د پولیو څلور مثبتې پېښې ثبت شوي دي. یوه په غزني او درې په کندز ولایتونو کې. افغانستان او پاکستان په نړۍ کې هغه دوه هېوادونه چې تراوسه په کې پولیو خپره ده.

راشدخان به د هند د کرکټ غوره لیګ کې د احمداباد لوبډله کې ولوبېږي

راشدخان

د افغانستان د کرکټ وتلی ستوری راشدخان به سږ کال د هند د کرکټ په غوره لیګ کې د احمداباد په لوبډله کې ولوبېږي.

د کرکټ معلوماتي وېب پاڼې او هندي رسنیو ویلي چې احمداباد ټیم راشدخان په ۱۵ کروړه یا ۱۵ سوه لکه هندي پیسو اخیستی دی.

راشدخان د ای پي ایل تېرو لیګونو کې د حیدر اباد لوبډلې له خوا اخیستل کېده، خو لومړی ځل دی چې د احمداباد لوبډلې ته ځي.

نوموړي د حیدراباد ټیم ته په ۷۶ سیالیو کې ۹۳ ویکټې اخیستي.

د ای.پي.ایل یا د هند د کرکټ د غوره لیګ سږنۍ سیالۍ د اپریل په دوهمه پیلېږي او شااوخوا دوه میاشتې دوام کوي.

چین د ژمني المپیک لوبو عامو نندارچیانو ته د ټکټ پلورل لغوه کړي

ارشیف، عکس تزئیني بڼه لري

چین د پیکینګ د ژمني المپیک لوبو عامو نندارچیانو ته د ټکټ پلورل د کرونا له کبله لغوه کړي دي.

د ۲۰۲۲ کال ژمنۍ المپیکې لوبې د فبرورۍ په څلورمه پیلېږي او د نندارې لپاره به یې یوازې یوې ځانګړې ټاکل شوې ډلې ته اجازه ورکړل شي.

د دغو لوبو تنظیموونکو پرون دوشنبه ویلي، دا نندارچیان او دغه راز لوبغاړي موظف شوي چې د کرونا د مخنیوي ځانګړي تدابیر مراعات کړي.

چین ځان خپلې هغې تګلارې ته ژمن بولي چې له مخې یې غواړي کرونا صفر کړي، خو دغلته د اومېکرون بڼې څو پېښو د دې تګلارې په اړه هم شکونه پیدا کړي.

چین کې د جنورۍ په ۱۵مه د کرونا د اومېکرون بڼې لومړنۍ پېښه ثبت شوه.

فاریاب کې اعتراضونه؛ طالبانو میمنه کې پوځي تمرینونه ترسره کړل

میمنه

په فاریاب کې د تېرې اوونۍ له اعتراضونو وروسته د طالبانو ځواکونو د دې ولایت په مرکز میمنه کې پوځي تمرینونه ترسره کړل.

د طالبانو د دفاع وزارت یو چارواکی لطف الله حکیمي وایي، په سلګونو سرتیري یې د فاریاب په څنګلورو ولایتونو کې ځای پرځای شوي چې پر وضعیت کنټرول ولري.

په میمنه کې د تیرې پنجشنبې په ورځ اعتراضونه وروسته له هغې پیل شول چې د معترضانو په خبره د طالبانو د پوځي کمېسیون پخوانی رییس او ازبک ټبره قوماندان مخدوم عالم توقیف شوی دی.

د روح الله په نوم د میمنې ښار یو هټیوال وایي، اوس وضعیت بیرته عادي شوی دی: "نن ارامي ده. څوک پر چا کار نه لري. پر چا ظلم نه کېږي. ستونزه دا ده چې کار نشته او خلک وزګار دي."

په فاریاب کې د تېرې اوونۍ په اعتراضونو پسې د طالبانو د حکومت ویاند ذبیح الله مجاهد وویل چې د افغانستان په هېڅ یوه ځای کې به اعتراضونو ته اجازه ورنه کړي.

ویل کېږي چې په فاریاب کې په اعتراضونو کې دوه تنه وژل شوي خو دغه خبر د خپلواکو سرچینو له خوا نه دی تایید شوی.

ملګرو ملتونه:د راین ایر الوتکې په اړه څېړنیز راپور بشپړ شوی

د راین ایر الوتکه

د ملګرو ملتونو د ملکي هوایي چلند ادارې د راین ایر هوایي شرکت د هغې الوتکې په اړه خپل څېړنیز راپور بشپړ کړی چې تېرکال بېلاروس کې ناستې ته اړ ایستل شوې وه.

د هوایي چلند دغې نړیوالې ادارې پرون" د جنورۍ په ۱۷مه" وویل، د حقیقت موندنې دا راپور یې د خپلې شورا د ۳۶ هېوادونو په ګډون ۱۹۳ غړو ته سپارلی دی.

ټاکل شوې د ملګرو ملتونو د هوایي چلند شورا د جنورۍ په ۳۱مه د خپل راپور د موندنو په اړه غونډه وکړي او ځینې اقدامات اعلان کړي.

دا الوتکه تېر کال په مې میاشت کې د بېلاروس په پلازمېنه مېنسک کې په دې پلمه کینول شوه چې بمب په کې دی، خو وروسته د بېلاروس حکومت ترې د مسافرو له منځه ژورنالیست رامان پراتاسویچ او د هغه ملګرې ونیوله.

ډېرو هېوادونو هغه مهال د بېلاروس دا کار وغانده او د دغه هېواد پر فضا یې د ملکي الوتکو پر تګ راتګ بندیزونه اعلان کړل.

د پاکستان د ملي امنیت سلاکار طالب چارواکو سره خبرو لپاره کابل ته ځي

د پاکستان د ملي امنیت سلاکار معید یوسف

ټاکل شوې چې د پاکستان د ملي امنیت سلاکار معید یوسف له طالب چارواکو سره د خبرو لپاره نن کابل ته ولاړ شي.

د راپورونو له مخې ښاغلی یوسف به په دغه دوه ورځني سفر کې د طالبانو د حکومت له چارواکو سره د ډیورند پر کرښه د اغزن سیم د غځولو پر موضوع او د ملګرو ملتونو د غوښتنې پر اساس افغانستان ته د مرستو د رسولو پر چارو خبرې وکړي.

پاکستاني چارواکو ډان ورځپاڼې ته ویلي چې له ښاغلي یوسف سره به په دې سفر کې د پاکستان د حکومت یو شمېر غړي ملګرتیا کوي، خو په دې اړه نور جزئیات نه دي ورکړل شوي.

د ډیورند پر کرښه د پاکستان له خوا د اغزن سیم د غځولو پر وړاندې طالبانو تُند عکس العمل ښکاره کړی.

د طالبانو حکومت وایي، پر ډیورند کرښه چې تر اوسه یوه لانجمنه مساله ده، له اغزن سیم غځولو سره مخالف دي.

پاکستان چې دا کرښه له افغانستان سره رسمي پوله بولي وایي، د امنیتي موانعو جوړولو ته به دوام ورکړي او تر اوسه یې پر دې کرښه ۹۴ فیصده کار بشپړ کړی دی.

بادغیس کې دوو زلزلو ۲۶ تنه وژلي او سلګونه کورونه یې ویجاړ کړي

د افغانستان په نقشه کې د بادغیس ولایت

په افغانستان کې پرون دوشنبه(د مرغومي ۲۷مه) د دوو زلزلو له امله د لږ تر لږه ۲۶ کسانو د مړه کېدو او په سلګونو کورونو د ویجاړېدو راپورونه ورکول شوي.

دغه زلزلې ترکمنستان پولې ته نژدې په بادغیس ولایت کې شوي دي.

د امریکا د جیولوژۍ د سروې مرکز د یوې زلزلې چې پرون سهار وختي شوې، د قدرت اندازه د ریښتر په کچه ۵،۳ او د بلې یوې چې څو ساعته وروسته شوې، ۴،۹ ثبت کړې ده.

یوې زلزلې د بادغیس د مرکز قلعه نو ختیځ په ۴۱ کیلومترۍ او بلې په جنوب ختیځ پنځوس کیلومترۍ کې سیمې لړزولي دي.

د طالبانو د حکومت د بیړنیو چارو د وزارت د اضطراري عملیاتو د مرکز رییس ملا جانان صاعق د ۲۶ کسانو مړینه تایید کړې او ویلي یې دي چې څه باندې ۷۰۰ کورونه ویجاړ شوي دي.

په بادغیس کې چې د افغانستان له بې وزلو او وروسته پاتې ولایتونو ګڼل کېږي، له دې مخکې هم څو زلزلې شوي چې خلکو ته یې ځاني او مالي زیانونه اړولي دي.

نور راوښيه

XS
SM
MD
LG