د افغانستان د خپلواکو ژورنالستانو ټولنه او یو شمېر مدني او فرهنګي فعالان وايي چې په پاکستان کې دې د افغان رسنیو د نشراتو د بندیز په غبرګون په افغانستان کې د پاکستاني رسنیو پر خپرونو هم بندیز ولګول شي.
د افغانستان د خپلواکو ژورنالستانو ټولنه او یو شمېر مدني او فرهنګي فعالان د افغانستان په اطلاعاتو او فرهنګ وزارت له دې امله انتقاد کوي چې د پاکستان له خوا پر یو شمېر افغاني رسنیو د نشراتو د بندیز سره – سره یې په ورته عمل لاس نه دی پورې کړی.
د افغانستان د خپلواکو ژورنالستانو ټولنه وايي؛ کله چې پاکستان د افغان رسنیو پر وړاندې محدودیتونه وضع کوي افغان لوری هم باید په ورته عمل لاس پورې کړي.
د دغې ټولنې مشر رحیم الله سمندر د دوشنبې په ورځ په دې اړه ازادي راډیو سره په خبرو کې وویل؛ د افغانستان د اطلاعاتو او فرهنګ وزارت ته په کار ده چې دغه موضوع پاکستاني لوري سره په جدیت مطرح کړي:
"پاکستان کې دننه افغان رسنۍ اجازه نه لري چې په کیبل باندې ازاد نشرات وکړي؛ یا هم په سټلایټ باندې، هلته دوی ځني محدودیتونه لګولي؛ د افغانستان د اطلاعاتو او فرهنګ وزارت ته په کار ده چې دغه موضوع پاکستاني لوري سره په جدیت مطرح کړي؛ که چېرې هلته د افغان رسنیو د نشراتو ازادي محدویږي نو بیا افغان حکومت د ورته اقدام صلاحیت لري."
راپورونه وايي چې په پاکستان کې د یو شمېر افغان رسنیو پر خپرونو رسنیز بندیزونه لګول شوي دي؛ دا په داسې حال کې ده چې پاکستاني تصویري رسنۍ د افغانستان د کیبلي شبکو له لارې خپرونې لري.
دغه شان ویل کېږي چې په افغانستان کې د پاکستاني چاپي رسنیو د خرڅلاو د بندیزونو سره ـ سره لا هم دغه ورځپاڼې په خال - خال ډول له لوستونکو سره لیدل کېږي چې د چارو د شنونکو په باور د راوړلو او خپرولو څرنګوالی یې تعقیب ته اړتیا لري.
ویل کېږي چې په دغو خپرونو کې تر ډېره د افغانانو تر منځ د تفرقه اچونې او د مخالفو وسله والو ډلو په ملاتړ مطالب خپریږي.
په ورته وخت کې یو شمېر افغان فرهنګي او مدني فعالان هم د پاکستاني رسنیو پر وړاندې د افغان حکومت د ورته عمل غوښتونکي دي.
خو د افغانستان د اطلاعاتو او فرهنګ وزارت وايي؛ دوی له پاکستان سره د رسنیز چال چلند په یوه طرحه کار کوي چې تر اوسه نه ده ورستۍ شوې.
د دغه وزارت ویاند هارون حکیمي په دې اړه ازادۍ راډیو سره په خبرو کې وویل:
"افغانستان دا موضوع هم په پام کې لري چې له پاکستان سره د چلند یوه لاره غوره کړي؛ تر دې وړاندې د اطلاعاتو او فرهنګ وزارت له پاکستان سره د تفاهم خبره کړې وه چې په افغانستان کې د پاکستاني رسنیو د فعالیت په شان افغان رسنیو ته هلته د فعالیت اجازه ورکړل شي؛ خو دا خبره هغوی نه وه منلې، د اطلاعاتو او فرهنګ وزارت په دې ورستیو کې له پاکستان سره په یوې رسنیزې کړنلارې غور کوي."
د یادونې ده که څه هم پاکستاني رسنۍ تر ډېره په اردو ژبه خپرونې لري؛ خو دا چې ډېری افغانان د کډوالۍ پر مهال هلته اوسیدلي او په پاکستاني ښوونځیو کې یې سبق ویلی دی؛ نو ځکه یې په تفهیم کې کومه ستونزه نه لري او ډېر کتونکي او لوستونکي لري.