نن ماښام د ۰۶:۰۰ بجو په شاوخوا کې د کابل ښار د لسمې امنیتي حوزې په شېرپور سیمه کې یوه درنه چاودنه شوې ده.
یوه سرچینه چې نه غواړي ورڅخه نوم واخیستل شي ازادي راډیو ته وايي د کابل ښار په شېرپور سیمه کې د انتحاري حملې له امله ۷ تنه ټپيان چې ولسي وګړي دي د کابل ښار ایمېرجنسي روغتون ته لېږدول شوي دي.
دغه پېښه چې د یوه موټر بمب چاودنې له امله وه له چاودنې وروسته یې د وسله والو مخالفینو له خوا ډزې هم له ځانه سره درلودې.
یوه بله سرچینه ازادي راډیو ته وايي چې درې تنه وسله وال مخالفین د کابل ښار په شېرپور سیمه کې چې په نوموړې سیمه کې د هسپانیې سفارت هم شتون لري د هسپانیاویانو یوه مېلمستون ته ننوتلي دي او برید یې کړی دی.
عیني شاهدان وايي چې لاتر اوسه هم په سیمه کې د پاشلو ډزو غږونه اورېدل کېږي.
د ازادي راډیو خبریال چې له سیمې څخه رپوټ ورکوي وايي چې سیمه د امنیتي ځواکونو له خوا کلابند شوې او خبریالانو ته اجازه نه ورکول کېږي چې دغې سیمې ته نېږدې شي.
ذبیح الله مجاهد چې ځان د طالبانو ویاند معرفي کوي د دغه برید د مسؤلیت په منلو سره په دغې پېښه کې د ډېرې مرګ ژوبلې د اړولو ادعا کوي.
خو افغان امنیتي چارواکي وايي چې د دغې پېښې په اړه د هغوی څېړنې روانې دي خو د دغې پېښې د لازیاتو جزئیاتو په اړه یې څه نه وايي.