د لاسرسۍ وړ لېنکونه

تازه خبر
یکشنبه ۳۰ غبرګولی ۱۴۰۰ کابل ۰۳:۱۱

نړۍ

د ترکیې په قونیه ښار کې د داعش ډلې ۳۰ غړي نیول شوي دي

د ترکیې امنیتي چارواکو نن په مرکزي ښار قونیه کې د اسلامي دولت ډلې یا داعش دېرش مشکوک غړي ونیول.

د داعش د وسله والو د نیولو دا عملیات وروسته له هغه کېږي چې د ترکیې امنیتي ځواکونو په کردمېشتې سیمه دیارباقر کې د دې ډلې اوه مشکوک غړي ووژل او دولس نور یې ونیول.

د دې عملیاتو په ترڅ کې دوه پولیس افسران هم ووژل شول.

ترکي چارواکو د داعش ډلې د ځپلو لپاره عملیات وروسته له هغه چټک کړل چې څه باندې دوه اونۍ مخکې په انقره کې په دوو بمي چاودنو کې له سلو زیات کسان ووژل شول.

ترکي چارواکي وايي، دا حمله د سوریې استخباراتو او کردي وسله وال له داعش ډلې سره په ګډه پلان کړې وه.

د ورځې تازه خبرونه دلته ولولئ

د ایران د اټمي تړون د بیا برحاله کېدو لپاره خبرې بیا پیلېږي

ویانا کې مذاکره کوونکي

مذاکره کوونکي د نړۍ له پیاوړو قدرتونو سره، د ۲۰۱۵میلادي کال د اټمي تړون د بیا برحاله کېدو لپاره خپلې خبرې بیا پیلوي.

دا په داسې حال کې ده چې راپورونه وايي، لا هم پر ګڼو عمده مسایلو اختلافات پرځای پاته دي.

نننۍ خبرې د هغو مذاکرو لړۍ ده چې ایران او د نړۍ شپږ پیاوړي هېوادونه په کې ښکېل دي او له اپرېل میاشتې په ویانا کې روانې دي.

د امریکا متحدو ایالاتونو له اټمي تړونه په ۲۰۱۸میلادي کال کې د وتلو اعلان وکړ او پر ایران یې بېرته بندیزونه ولګول.

د هغه تړون له مخې ایران د اقتصادي بندیزونو کمېدو په بدل کې خپل اټومي پروګرام محدود کړی و.

د روسیې مذاکره کوونکي میخایل اولیانوف خپل یوه ټویټ کې ویلي، د اټمي تړون د بیابرحاله کېدو لپاره ګډ کمیسیون نن بیا سره ګوري.

ارمنستان کې خلک نن پارلماني ټاکنو کې خپلې رایې کاروي

ارمنستان کې ټاکنې

په ارمنستان کې خلک نن یکشنبه (د غبرګولي ۳۰مه) تر وخت مخکې پارلماني ټاکنو کې خپلې رایې کاروي.

وروسته له هغې چې ارمنستان له اذربایجان سره د لانجمنې سیمې نګرنو قره باغ پر سر د شپږو اوونیو لپاره جګړه وکړه، په دغه هېواد کې له څو میاشتو کړکېچ اوج ته رسېدلی و.

د ارمنستان صدراعظم نیکول پاشنیان، د اپوزیسیون د لاریونونو او مخالفتونو له کبله تر وخت مخکې پارلماني ټاکنو اعلان وکړ.

دا لاریونونه او مخالفتونه د پاشنیان له خوا له اذربایجان سره د هغې جګړې په تړاو پیل شول چې بالاخره په نوومبر میاشت کې د روسیې په منځګړیتوب د اوربند موافقې تر لاسلیک وروسته پای ته ورسېده.

د ارمنستان تر وخت مخکې پارلماني ټاکنو ته د رایې ورکولو تر ۲۰۰۰ زیات مرکزونه پرانیستل شوي دي.

په دغه هېواد کې دوه میلیونه او شپږ لکه کسان د رایې ورکولو پر شرایطو برابر دي. اټکل کېږي د دغو ټاکنو لومړنۍ نتیجه نن ناوخته اعلان شي.

د بښنې نړیوال سازمان: د ایران له نوي ولسمشره دې د جرمونو څیړنه وشي

ابراهیم رييسي

د بښنې نړیوال سازمان د ایران د ولسمشر په توګه د ابراهیم رييسي د بریالیتوب د اعلان په غبرګون کې وویل، له نوموړي څخه باید د جرمونو تحقیقات وشي.

دې ډلې د ۱۹۸۸ کال په دوبي کې د زرګونو سیاسي بندیانو اعدام کېدو ته په اشاره ویلي، د ایران راتلونکی ولسمشر ابراهیم رييسي باید د نړیوالو جرمونو په خاطر تر جنايي تعقیب لاندې راوستل شي.

د بښنې نړیوال سازمان یا ایمنسټي انترنیشنل پرون شنبه (د غبرګولي په ۲۹مه) په یوه اعلامیه کې د ۱۹۸۸ کال پېښې د بشریت پر ضد جنایتونه بللي دي.

د ۱۹۸۸ کال په دوبي کې د روح الله خمیني په امر ډېر شمېر سیاسي بندیان په داسې حال کې اعدام شول چې ابراهیم رييسي د تهران د څارنوالۍ مرستیال او د هغه پلاوي غړی و چې د مرګ په پلاوي مشهور و. دغه پلاوي د بندیانو د اعدامونو په اړه پرېکړې کولې.

د سعودي ایتلاف د حوثي یاغیانو ۱۱ بې پیلوټه الوتکې ویجاړې کړي

ارشیف، ویجاړه شوې بې پیلوټه الوتکه

د سعودي عربستان په مشرۍ ايتلاف وايي، په یمن کې د ایران له ملاتړه د برخمنو حوثي یاغیانو له لوري ورلېږل شوې ۱۱ بې پېلوټه الوتکې یې ویجاړې کړي دي.

د سعودي عربستان دولتي ټلوېزیون پرون شنبه (د غبزګولي په ۲۹مه) د پوځي ايتلاف په قول وویل چې ۸ انتحاري بې پېلوټه الوتکې د سعودي عربستان په جنوب لوېدیځ کې د نجران ښار لورته او دوه د خمیس مشیط ښار خوا ته توغول شوې وې.

امریکا په ایران کې د ولسمشرۍ د انتخاباتو پر بهیر نیوکه وکړه

ایران کې ټاکنې

د امریکا د بهرنیو چارو وزارت په ایران کې د ولسمشرۍ د انتخاباتو پر بهیر او د ولسمشر په توګه د ابراهیم رييسي پر غوره کېدو انتقاد وکړ.

د امریکا د بهرنیو چارو وزارت یوه ویاند پرون شنبه(د غبرګولي ۲۹مه) وویل چې د ایران د کورنیو چارو وزارت له لوري یې د ابراهیم رييسي د بري خبر لیدلی دی، خو ایرانیان په یوه ازاده او عادلانه انتخاباتي پروسه کې د خپل مشر د غوراوي له حقه بې برخې شول.

د ایران د کورنیو چارو وزارت وايي چې په دې انتخاباتو کې ابراهیم رييسي څه باندې ۱۷ میلیونه او ۹۲۶ زره رایې ترلاسه کړي دي.

د مسکو په یوه زېرمتون کې اورلګیدنې خلک وارخطا کړي

ارشیف

د مسکو په مرکزي برخه کې پرون شنبه (د غبرګولي ۲۹مه) په یوه زېرمتون کې اور ولګېد چې څو ساعته یې دوام وکړ، خلک وارخطا کړل.

لوژنیکي لوبغالي ته نژدې په دغه زېرمتون کې د اټکل له مخې د اور لوبو ۱۵ ټنه پټاقۍ ساتل کېدې.

د اوبو درې ټانکر لرونکو هلیکوپټرو او یوې بیړۍ یې د وژلو هڅه کوله.

په دې پېښه کې د درې اور وژونکو او د دغه زېرمتون د یوه کار کوونکي د ټپي کېدو راپورونه ورکړل شوي دي.

د ځینو راپورونو له مخې د دغه زېرمتون په ګاونډ کې په یو شمېر ودانیو کې هم اور بل شوی دی.

بورېل د لبنان د سیاسي او اقتصادي وضعیت په اړه اندېښنه ښکاره کړه

د اروپایي ټولنې د بهرني سیاست مشر جوزېف بورېل(چپ) د لبنان له ولسمشر مېشل عون سره

د اروپایي ټولنې د بهرني سیاست مشر جوزېف بورېل پرون شنبه(د غبرګولي ۲۹مه) د لبنان د سیاسي او اقتصادي وضعیت په اړه اندېښنه ښکاره کړه.

ښاغلي بورېل، د لبنان له ولسمشر مېشل عون سره تر کتنې وروسته خبریالانو ته وویل: "موږ سیاسي او اقتصادي بحران ته چې په اوس وخت کې لبنان ورسره مخامخ دی، ډېر اندېښمن یو. زه نن د دې لپاره دلته یم چې د اروپایي ټولنې په استازیتوب د لبنان له خلکو سره پیوستون او ملاتړ څرګند کړم او هم د دې هېواد چارواکو ته خپله اندېښنه ورسوم."

له کله چې د تېر کال په دوبي کې د لبنان د پخواني صدراعظم حسن دیاب حکومت په بیروت کې تر یوې بم چاودنې وروسته استعفا کړې، تر اوسه پورې دا هېواد له یوه سیاسي او اقتصادي بحران سره مخامخ دی.

ګینه کې د ایبولا ویروس له کبله خپره شوې ناروغي ختمه شوې 

ګینه کې د ایبولا ناروغۍ پر ضد واکسین

د روغتیا نړیوال سازمان وايي، په ګینه کې د ایبولا ویروس له کبله خپره شوې ناروغي ختمه شوې ده.

په دغه هېواد کې دغه وژونکی ویروس چې په انسانانو کې د داخلي وینې بهېدنې سبب کېږي، په فبروري میاشت کې خپور شوی و چې لږ تر لږه ۱۶ کسان ورباندې اخته شوي وو او له دې ډلې ۱۲ کسان مړه شوي وو.

د روغتیا نړیوال سازمان او د ګینه روغتیايي چارواکو ویلي، دوی د جنوبي افریقا په ساحه کې د دې ویروس د مخکني خپراوي له کبله درس اخیستی و، ځکه وتوانېدل چې په چټکۍ د دغه ویروس د بیا خپرېدو مخه ونیسي.

له ۲۰۱۴ څخه تر ۲۰۱۶میلادي کاله پورې په دې ویروس ۱۱،۰۰۰ کسان مړه شوي وو چې ډېری قربانیان په ګینه، لابریا او سیرالیون کې وو.

روسیه کې یوه امریکايۍ محصله وژل شوې؛ چارواکو یو مشکوک کس نیولی

ارشیف

روسي چارواکو نن شنبه (د غبرګولي ۲۹مه) وویل، دوی یو مشکوک کس د یوې امریکایۍ محصلې د مړي تر پیدا کېدو وروسته ونیوه.

تر درې ورځنۍ پلټنۍ وروسته د روسیې په ناژني نوفګورود کې یو مړی وموندل شو چې ګومان کېږي د ۳۴ کلنې کاټرین سیرو به وي.

چارواکو ویلي وو چې د جون له ۱۵ مې د دې امریکایۍ ښځې تر لادرکۍ وروسته د لټون په چارو بوخت دي.

د سیرو مور چې د امریکا په مسیسیپي کې ده، د امریکا (NPR) راډیو ته ویلي، لور یې په یوه لیکلي پیغام کې ورته ویلي وو چې له یوه ناپېژندوی کس سره په موټر کې ده او هیله منه ده چې تښتول شوې به نه وي.

پولیسو او تر ۱۰۰ زیاتو رضاکارانو ویلي، دوی د مسکو د ختیځ په ۴۰۰ کیلومترۍ کې له ښاره بهر ځنګلي ساحه پلټلې ده.

د سایبریا په کیمیروفو سیمه کې ۴ کسان مړه شول

د سایبریا کیمیروفو سیمه

د سایبریا په کیمیروفو سیمه کې لږ تر لږه ۴ کسان هغه وخت مړه شول چې د پراشوټ­ بازانو یوه تفریحي الوتکه د تمرین پر مهال په یوه هوايي اډه کې نسکوره شوه.

په L-410 ډوله الوتکه کې د موجودو کسانو د شمېر په اړه ضد او نقیض راپورونه ورکړل شوي وو.

چارواکو وروسته وویل چې په پېښه کې ۴ کسان مړه او ۱۵ نور ټپیان شوي دي.

د تحقیقاتو د فډرال ادارې یوې محلي څانګې ویلي، الوتکه هوايي اډې ته په ستنېدو وه چې یوه پېلوټه د ماشین د خرابۍ راپور ورکړ.

الوتکې ظاهراً یوه ونه په خپل وزر سره غوڅه کړه نسکوره شوه.

د ایران دولتي ټلوېزیون او سیالو کاندیدانو رییسي ته د بریا مبارکي وویله

د ولسمشرۍ کاندید ابراهیم رییسي

د ایران دولتي ټلوېزیون او سیالو کاندیدانو نن شنبه (د غبرګولي ۲۹مه) د ولسمشرۍ کاندید ابراهیم رییسي ته د بریا مبارکي وویله.

که څه هم په ټاکنو کې د خلکو ګډون اندازه کمه ښوول شوې او د رایو شمېرل روان دي، پرون د ټاکنو په ورځ هم اټکل دا و چې ۶۰ کلن ملا او د قضايیه قوې مشر ابراهیم رییسي به د دغو ټاکنو ګټونکی اعلانېږي.

د ولسمشرۍ کاندیدانو عبدالناصر همتي او محسن رضايي میرقاید، ابراهیم رییسي ته په ټاکنو کې د بریا مبارکي ورکړې ده.

انتخاباتي چارواکو او دولتۍ رسنیو تر غرمې مخکې وویل چې ابراهیم رییسي تراوسه د ایران د ولسمشرۍ ټاکنو ۶۰ فیصده رایې ګټلې دي.

که څه هم چارواکو په مشخص ډول نه دي ویلي چې څو رایې کارول شوي، خو ویلي یې دي چې ډېرې رایې شمېرل شوي دي.

د نهايي نتیجو اعلان ښايي څو ورځې وخت ونیسي.

ایران کې ټاکنې؛ ابراهیم رییسي ته د بریا مبارکي ورکړل شوه

ابراهیم رییسي

که څه هم د ایران د ولسمشرۍ ټاکنو رسمي نتایج نه دي اعلان شوي، خو د ولسمشرۍ کاندیدانو عبدالناصر همتي او محسن رضايي میرقاید، ابراهیم رییسي ته په ټاکنو کې د بریا مبارکي ورکړې ده.

د ازادي راډیو د ایرانۍ څانګې، راډیو فردا د راپور له مخې دغو دوو کاندیدانو رییسي ته په جلا- جلا پیغامونو کې د بریا مبارکي ویلې ده.

په ایران کې د ولسمشرۍ د پرونیو ټاکنو د رایو شمېرنې له بهیره د اوو ساعتونو له تېرېدو وروسته هم د نتایجو په اړه رسمي ارقام نه دي خپاره شوي.

لا معلومه نه ده، د څلورو کاندیدانو: محسن رضايي میرقاید، ابراهیم رییسي، امیر حسین قاضیزاده هاشمي او عبدالناصر همتي له منځ څخه به کوم یو د ایران نوی ولسمشر شي؟

د ازادۍ راډیو د خبر مرکزي څانګې په حواله، په پام کې ده ابتدايي نتایج نن پر ځایي وخت ماسپښین او نهايي نتیجه سبا علان شي.

د ملګرو ملتونو عمومي اسامبلۍ د برما پوځي کودتا وغندله

ارشیف، برما کې روان تاوتریخوالی

د ملګرو ملتونو عمومي اسامبلۍ د یوې نااشنا پرېکړې په ترڅ کې پرون جمعه (د غبرګولي ۲۸مه) د برما پوځي کودتا وغندله او پر دغه هېواد یې د وسلو پر خرڅلاو بندیز ولګاوه.

د یوسل او درې نوي غړیو هېوادونو دې سازمان همدا راز د برما د مشرې انګ سان سوچي او نورو سیاسي زندانیانو د خوشې کېدو او په برما کې د مظاهره چیانو پرضد د خشونت او وسلو د استعمال د بندېدو غوښتنه وکړه.

د ملګرو ملتونو دا پرېکړه الزامي نه ده، خو د برما پوځي چارواکو ته چې د فبروري په لومړۍ نېټه یې کودتا وکړه او پر برما واکمنه شوه، یو سیاسي پیغام استوي.

سپینه ماڼۍ: که روسیه پر اوکراین کې تیری وکړي کیف سره مرستې کوو

د سپینې ماڼۍ ویانده جین ساکي

سپینه ماڼۍ وایي، که روسیه په اوکراین کې نور پوځي تیری وکړي نو متحد ایالاتونه به له کیف سره په نظامي برخه کې مرستې وکړي او دا مرستې یې چمتو کړي دي.

د سپینې ماڼۍ ویاندې جین ساکي پرون جمعه(د غبرګولي ۲۸مه) په یوه بیان کې وویل، په وروستیو کې د رسنیو دا راپورونه بې بنسټه دي چې متحد ایالاتونو له اوکراین سره نظامي مرستې درولي دي.

پولیټیکو او واشنګټن پوسټ ورځپاڼو تېره اوونۍ راپور ورکړی وو چې ولسمشر جو بایډن له اوکراین سره د لسګونو میلیونو ډالرو په ارزښت د وسلو په ګډون، پوځي مرستې درولي دي.

د امریکا متحد ایالاتونو له دوه زره څوارلسم کال را په دې خوا له اوکراین سره په پوځي برخه کې تر دوه نیم میلیاډه ډالرو ډېرې مرستې کړي دي.

جین ساکي وویل، تېره اوونۍ د امریکا او روسیې د ولسمشرانو د غوندې په درشل کې واشنګټن د یو نیم سل میلیونه ډالرو په ارزښت په امنیتي برخه کې د وسلو په ګډون اوکراین ته مرستې چمتو کړي.

ایرانیانو محدودو کاندیدانو ته رای ورکړې

یو شمېر رایه ورکوونکي

ایرانیانو محدودو کاندیدانو ته چې د سخت دریځو محافظه کارانو له لوري په دقت غوره شوي وو، رای ورکړې.

اټکل کېږي چې ابراهیم رییسي چې ډېر محافظه کاره دی، د جون د اتلسمې نېټې په انتخاباتو کې په اسانۍ بریالی شي.

د ده د ډېرو پیاوړيو سیالانو د کاندیدیدو مخه نګهبان شورا چې مشري یې د ایران مشر علي خامنه اي کوي، ونیوله.

۶۰ کلن رییسي د ایران د قضایه قوې مشر پاتې شوی او د بشري حقونو ډلو دی له بشري حقونو په سرغړونو تورن کړی دی.

د رییسي ترڅنګ د ولسمشرۍ دې انتخابات کې درې تنه نور، محسن رضایي میرقاید، امیرحسین قاضي زاده هاشمي او عبدالناصر همتي کاندیدان وو.

د ایران د کورنیو چارو د وزارت په وینا تمه ده چې نن شنبه (د غبرګولي ۲۹مه) ماسپښین ابتدایي نتیجې او سبا رسمي نتیجې اعلان شي.

نور راوښيه

XS
SM
MD
LG