د لاسرسۍ وړ لېنکونه

تازه خبر
یکشنبه ۳۰ غبرګولی ۱۴۰۰ کابل ۰۱:۲۷

خبرونه

یونان راتلونکې میاشت د پيسو نړېوال صندوق ته پور نه شي پرې کولای

د يونان د کورنيوچارو وزير ويلي، چې هېواد به يې ونه کړای شي چې د پيسو نړېوال صندوق له خوا ورکړل شوی پور راتلونکې مياشت پرې کړي.

د يونان د کورنيو چارو وزيرنيکاس واوتيس د مې په ۲۴مه د يونان ميګا تلويزیون ته ويلي چې د جون مياشتې څلور برخې پور چې دغه هېواد يې بايد د پيسو نړېوال صندوق ته ورکړي، ۱.۶ میليارده ډالر دی.

واوتيس زياته کړې، چې د پور پرې کولو لپاره دا پيسې نشته او نه به ورکول کيږي.

په همدې ورځ د يونان د ماليې وزيريانيس واروفاکس بي بي سي ته ويلي چې هېواد يې د ديواليه کېدو څخه د ژغورلو او نويو مالي مرستو ترلاسه کولو لپاره د پيسو نړېوال صندوق او اروپايي اتحاديې په ګډون له پور ورکوونکو سره په مذاکراتو کې د پام وړ پرمختګ کړی دی.

د واکمن ګوند غړو د سختو اقتصادي اصلاحاتو د پاليسيو په مقصد د هر ډول موافقې پر وړاندې خبرداری ورکړی دی او ځينو پېشنهاد کړی دی چې يونان خپله پيسه له يورو څخه بدله کړي.

واروفاکس نن بي بي سي ته ويلي چې د يورو زون پرېښودل به د ناورين په مانا وي او دا به د واحدې پيسې د پروژې د ختمېدو پيل وي.

د ورځې تازه خبرونه دلته ولولئ

پکتیا والي: د خلکو د خوندیتوب لپاره له مېرزاکې ولسوالۍ شاتګ شوی

د پکتیا والي محمد حلیم فدایي

د پکتیا والي محمد حلیم فدایي د شنبې (د غبرګولي ۲۹مه) په ورځ د یوه خبري کنفرانس پر مهال رسنیو ته وویل چې د دې ولایت د مېرزاکې ولسوالۍ، له ودانۍ څخه یې د ملکي وګړو د خوندیتوب لپاره شاتګ کړی دی.

د دغې ولسوالۍ د نیولو لپاره وسله والو طالبانو له تېرو درېیو اوونیو راهیسې خپلو جګړو ته زور ورکړی و چې دواړو لورو ته د مرګ ژوبله له اوښتو سره مل وه.

د پکتیا مېرزاکې ولسوالۍ د دې ولایت د مرکز ګردېز ښار ختیځ لور ته پرته ده چې د پکتیا د ختیځو شپږو ولسوالیو لاره هم له دې ولسوالۍ تیریږي.

د ختیځو شپږو ولسوالیو اوسیدونکي وایي، د وسله والو طالبانو لاس ته د دې لویې لارې لوېدو؛ یو ځل بیا دوی له ګڼو ستونزو سره مخ کړي او د مرکز ګردېز په ګډون یې له نورو ولایتونو سره اړیکې پرې شوي دي.

د پکتیا والي وایي، د ټولو هغو لارو او سیمو د خلاصون لپاره د عملیاتو د ترسره کولو پلان لري چې دا مهال د وسله والو طالبانو له خوا نیول شوي او یا هم محاصره دي.

د وسله والو طالبانو ویاند ذبیح الله مجاهد رسنیو ته ویلي چې تېره شپه یې یاده ولسوالۍ نیولې او په ولسوالۍ کې موجود یو شمېر وسایط او وسله د دوی لاس ته ورغلې ده.

ګینه کې د ایبولا ویروس له کبله خپره شوې ناروغي ختمه شوې 

ګینه کې د ایبولا ناروغۍ پر ضد واکسین

د روغتیا نړیوال سازمان وايي، په ګینه کې د ایبولا ویروس له کبله خپره شوې ناروغي ختمه شوې ده.

په دغه هېواد کې دغه وژونکی ویروس چې په انسانانو کې د داخلي وینې بهېدنې سبب کېږي، په فبروري میاشت کې خپور شوی و چې لږ تر لږه ۱۶ کسان ورباندې اخته شوي وو او له دې ډلې ۱۲ کسان مړه شوي وو.

د روغتیا نړیوال سازمان او د ګینه روغتیايي چارواکو ویلي، دوی د جنوبي افریقا په ساحه کې د دې ویروس د مخکني خپراوي له کبله درس اخیستی و، ځکه وتوانېدل چې په چټکۍ د دغه ویروس د بیا خپرېدو مخه ونیسي.

له ۲۰۱۴ څخه تر ۲۰۱۶میلادي کاله پورې په دې ویروس ۱۱،۰۰۰ کسان مړه شوي وو چې ډېری قربانیان په ګینه، لابریا او سیرالیون کې وو.

روسیه کې یوه امریکايۍ محصله وژل شوې؛ چارواکو یو مشکوک کس نیولی

ارشیف

روسي چارواکو نن شنبه (د غبرګولي ۲۹مه) وویل، دوی یو مشکوک کس د یوې امریکایۍ محصلې د مړي تر پیدا کېدو وروسته ونیوه.

تر درې ورځنۍ پلټنۍ وروسته د روسیې په ناژني نوفګورود کې یو مړی وموندل شو چې ګومان کېږي د ۳۴ کلنې کاټرین سیرو به وي.

چارواکو ویلي وو چې د جون له ۱۵ مې د دې امریکایۍ ښځې تر لادرکۍ وروسته د لټون په چارو بوخت دي.

د سیرو مور چې د امریکا په مسیسیپي کې ده، د امریکا (NPR) راډیو ته ویلي، لور یې په یوه لیکلي پیغام کې ورته ویلي وو چې له یوه ناپېژندوی کس سره په موټر کې ده او هیله منه ده چې تښتول شوې به نه وي.

پولیسو او تر ۱۰۰ زیاتو رضاکارانو ویلي، دوی د مسکو د ختیځ په ۴۰۰ کیلومترۍ کې له ښاره بهر ځنګلي ساحه پلټلې ده.

د سایبریا په کیمیروفو سیمه کې ۴ کسان مړه شول

د سایبریا کیمیروفو سیمه

د سایبریا په کیمیروفو سیمه کې لږ تر لږه ۴ کسان هغه وخت مړه شول چې د پراشوټ­ بازانو یوه تفریحي الوتکه د تمرین پر مهال په یوه هوايي اډه کې نسکوره شوه.

په L-410 ډوله الوتکه کې د موجودو کسانو د شمېر په اړه ضد او نقیض راپورونه ورکړل شوي وو.

چارواکو وروسته وویل چې په پېښه کې ۴ کسان مړه او ۱۵ نور ټپیان شوي دي.

د تحقیقاتو د فډرال ادارې یوې محلي څانګې ویلي، الوتکه هوايي اډې ته په ستنېدو وه چې یوه پېلوټه د ماشین د خرابۍ راپور ورکړ.

الوتکې ظاهراً یوه ونه په خپل وزر سره غوڅه کړه نسکوره شوه.

د پاکستان د کرکټ سوپرلیګ؛ د لومړي پړاو وروستۍ سیالۍ نن دي

د پاکستان د کرکټ د سوپر لیګ سیالۍ

نن شنبه به (د غبرګولي ۲۹مه) د پاکستان د کرکټ د سوپر لیګ سیالیو د لومړۍ پړاو دوه وروستۍ لوبې ترسره شي.

په دې سیالیو کې کراچۍ لوبډله د کویټې او اسلام اباد د ملتان پر وړاندې د سیالۍ ډګر ته ځي.

د دې سیالیو د تېرې شپې په لوبه کې ملتان لوبډلې لاهور لوبډلې ته ستره ماتې ورکړه.

لاهور لوبډلې پچه وګټله او مقابلې لوبډلې ته يې د منډو بلنه ورکړه.

ملتان لوبډلې په ټاکلو شلو اوورونو کې ۱۷۰ هدف وټاکه، خو لاهور لوبډلې ونه شو کړای دا هدف پوره کړي او دا سیالۍ د ۸۰ منډو په توپیر وبایلله.

د دې سیالیو د نیمه پایلوبو پړاو به د روانې میلادي میاشتې په ۲۱ مه نېټه پیلېږي چې د روانې اوونۍ د دوشنبې په ورځ راځي.

اوس مهال اسلام اباد او ملتان لوبډلې د نومرو په جدول کې لومړی او دوهم ځای لري، پېښور زلمي او لاهور قلندر لوبډلو بیا د جدول دوهم او درېیم ځای خپل کړی دی.

د ایران دولتي ټلوېزیون او سیالو کاندیدانو رییسي ته د بریا مبارکي وویله

د ولسمشرۍ کاندید ابراهیم رییسي

د ایران دولتي ټلوېزیون او سیالو کاندیدانو نن شنبه (د غبرګولي ۲۹مه) د ولسمشرۍ کاندید ابراهیم رییسي ته د بریا مبارکي وویله.

که څه هم په ټاکنو کې د خلکو ګډون اندازه کمه ښوول شوې او د رایو شمېرل روان دي، پرون د ټاکنو په ورځ هم اټکل دا و چې ۶۰ کلن ملا او د قضايیه قوې مشر ابراهیم رییسي به د دغو ټاکنو ګټونکی اعلانېږي.

د ولسمشرۍ کاندیدانو عبدالناصر همتي او محسن رضايي میرقاید، ابراهیم رییسي ته په ټاکنو کې د بریا مبارکي ورکړې ده.

انتخاباتي چارواکو او دولتۍ رسنیو تر غرمې مخکې وویل چې ابراهیم رییسي تراوسه د ایران د ولسمشرۍ ټاکنو ۶۰ فیصده رایې ګټلې دي.

که څه هم چارواکو په مشخص ډول نه دي ویلي چې څو رایې کارول شوي، خو ویلي یې دي چې ډېرې رایې شمېرل شوي دي.

د نهايي نتیجو اعلان ښايي څو ورځې وخت ونیسي.

بامیان کې د ۵۰ ورزشکارانو ترمنځ د بایسکل چلونې سیالۍ پیلېږي

ارشیف، بایسکل ځغلونه

د بامیانو د بدني روزنې امریت په دې ولایت کې د بایسکل چلونې د سیالیو خبر ورکوي.

د دې ولایت د بدني روزنې امر سید اسحق هاشمي ازادي راډيو ته وویل چې په روانه اوونۍ کې به په دې ولایت کې د ۵۰ ورزشکارانو ترمنځ چې ۳۰ يې هلکان او پاتې نورې يې نجونې دي د بایسکل چلونې سیالي پیلېږي.

دا سیالۍ 'پایډل وهل د سولې لپاره' په نوم جوړېږي.

په دې سیالۍ کې به ورزشکاران په بایسکل ۵۰ کیلو متره چې د دره صوف له سړکه پیلیږي د بامیانو تر مرکزه پورې مزل وکړي.

مسوولین وايي چې ورزشکاران به په دې سیالۍ سره له طالبانو وغواړي چې تاوتریخوالی پای ته ورسوي او سوله وکړي.

افغانستان: د روان کال لومړیو ۳ میاشتو کې ۱۸۴۰۰ کورنۍبې ځایه شوي

ارشیف، یو شمېر بې ځایه شوي افغان کډوال

د افغانستان د کډوالو او راستنېدونکو چارو وزارت وايي، د روان لمریز کال په لومړیو درېیو میاشتو کې ۱۸۴۰۰ کورنۍ له خپلو مېنو بې ځایه شوي دي.

د دغه وزارت یوه ویاند عبدالباسط انصاري نن شنبه (د غبرګولي ۲۹مه) ازادي راډیو ته وویل، دغه شمېر کورنۍ شااو خوا ۱۲۸۸۰۰ کسان کېږي: "سږکال ۱۸۴۰۰ کورنۍ بې ځایه شوي دي. که پر ۷ ضرب کړو، شمېر یې ۱۲۸۰۰ کسان کېږي. دوی د جګړو او ناامنیو له کبله په بېلابېلو ولایتونو لکه کندهار، هلمند، فراه، کندز، لغمان، بغلان او ځینو نورو ولایتونو کې بې ځایه شوي دي."

د کډوالو او راستنېدونکو چارو وزارت د ډېرو کورنیو د بې ځایه کېدو علت په افغانستان کې د ناامنیو زیاتېدل ګڼي.

دغه وزارت وايي، تېر لمریز کال په افغانستان کې ۹۲،۰۰۰ کورنۍ د جګړو او نورو ستونزو له کبله بې ځایه شوې وې.

المپیک کمېټه: افغانستان د تکواندو سیالیو کې د بُرونز مډال ګټلی

ارشیف، عکس تزئیني بڼه لري

د افغانستان د المپیک ملي کمېټې د تکواندو په اسیايي سیالیو کې د بُرونزو د مډال د ګټلو خبر ورکړی دی.

د المپیک ملي کمېټه وايي، د افغانستان د تکواندو ملي لوبغاړي حکمت الله زین په دې سیالیو کې وتوانېدو خپل دوه تاجیکستاني او عربستاني سیالانو ته ماتې ورکړي او دا مډال خپل کړي.

دا په روانو سیالیو کې د افغانستان لپاره دوهمه بریا ده.

له دې وړاندې محمد حسن رضايي په ۵۸ کیلو ګرامه وزن خپلو ۴ پاکستاني، کویټي، کوریایي او چین ته په ماتې ورکولو سره د سرو زرو مډال ګټلی وو.

د اسیا د تکواندو د ۲۴ مې دورې سیالۍ د لبنان پلازمېنه بیروت ښار کې له درې ورځو راهیسې پیل شوي دي.

په دې سیالیو کې له ۲۱ اسیایي هېوادونو نه ۱۸۹ د تکواندو لوبغاړي سره سیالي کوي.

په دې سیالیو کې شپږو افغان لوبغاړو چې پنځه يې نارینه او یوه يې نجلۍ ده هم برخه اخیستې ده.

ستر جنرال بسم الله محمدي د افغانستان د دفاع وزارت سرپرست شو

ستر جنرال بسم الله محمدي

د افغانستان د چارو اداره وايي ستر جنرال بسم الله محمدي د اسد الله خالد پرځای، د افغانستان د دفاع وزارت د سرپرست په توګه وګمارل شو.

د چارو ادارې په یوه اعلامیه کې ویلي، د کندز والي عبدالستار میرزکوال، د حیات الله حیات پرځای، د کورنیو چارو وزارت د سرپرست او ښاغلی حیات د کلیو پراختیا وزارت د سرپرست په توګه ګمارل شوی دی.

دا لا نه ده معلومه چې دغه سرپرست وزیران به د باور رایې اخېستو لپاره کله ولسي جرګې ته معرفي کېږي؟

بل خوا ملي راډیو ټلویزیون راپور ورکړی چې ډګر جنرال ولي محمد احمدزی د محمد یاسین ضیا پرځای د لوی درستیز په توګه ټاکل شوی دی.

دا تازه ګمارنې داسې وخت کېږي چې د افغانستان په بېلابېلو برخو کې د جګړو شدت زیات شوی دی.

غور چارواکي: په لعل او سرجنګل ولسوالۍ کې ۲ ولسي پاڅونوال وژل شوي

د افغانستان په نقشه کې د غور ولایت

د غور ولایت د لعل او سرجنګل ولسوالۍ سرپرست وايي، د دې ولسوالۍ پر ځینو برخو د وسله والو طالبانو په حمله کې دوه ولسي پاڅونوال وژل شوي دي.

علي فایق ازادي راډیو ته وویل، دغه حمله چې پرون جمعه(د غبرګولي ۲۸مه) ماسپښین پیل شوې وه، تر شپې روانه وه او په نتیجه کې یې بل پاڅونوال ټپي شوی دی.

بل خوا د پروان امنیه قومانداني وايي، په شینواري او سیاه ګرد ولسوالیو کې تېره شپه پر څو پوستو د وسله والو طالبانو په حمله کې دوه پوځیان وژل شوي دي.

د پروان امنیه قوماندان عبدالرؤوف ارزګاني ازادۍ راډیو ته وویل، وسله والو طالبانو ته هم مرګ ژوبله اوښتې، خو ده یې دقیق شمېر په ډاګه نه کړ.

په وروستیو ورځو کې وسله والو طالبانو د شینواري ولسوالۍ پر دره نمک اب سیمه ولکه ټینګه کړې ده.

همداراز د کونړ امنیه قوماندان وايي، په شلتن او غازي اباد ولسوالیو کې تېره شپه د وسله والو طالبانو ډله ییز بریدونه په شا تمبول شوي چې په نتیجه کې یې ۷ وسله والو طالبانو ته مرګ ژوبله اوښتې ده.

سمونوال محمد یوسف مظلومیار د افغان امنیتي ځواکونو د مرګ ژوبلې په اړه څه ونه ویل.

هلمند چارواکي: د افغان ځواکونو په عملیاتو کې ۵۹ طالبان وژل شوي

هلمند کې د افغان امنیتي ځواکونو ځانګړي عملیات

د هلمند د امنیې قوماندانۍ مطبوعاتي دفتر ادعا کوي، په ګرشک ولسوالۍ کې د افغان امنیتي ځواکونو په تصفیوي عملیاتو کې ۵۹ وسله وال طالبان وژل شوي او ۲۷ تنه نور ټپیان شوي دي.

په دې اعلامیه کې چې نن شنبه (د غبرګولي ۲۹مه) خپره شوې راغلي چې په دغو عملیاتو کې ځینې وسایط او مهمات هم تخریب شوي دي.

هاخوا د ننګرهار ولایت مطبوعاتي وايي، په هسکه مېنه او خوګیاڼو ولسوالیو کې په تېرو ۲۴ ساعتونو کې د ۲ پاکستاني اتباعو په ګډون ۱۵ وسله وال وژل شوي او ۹ نور ټپیان شوي دي.

په اعلامیه کې چې نن خپره شوې ویل شوي چې ملکیانو او امنیتي ځواکونو ته زیان نه دی اوښتی.

ایران کې ټاکنې؛ ابراهیم رییسي ته د بریا مبارکي ورکړل شوه

ابراهیم رییسي

که څه هم د ایران د ولسمشرۍ ټاکنو رسمي نتایج نه دي اعلان شوي، خو د ولسمشرۍ کاندیدانو عبدالناصر همتي او محسن رضايي میرقاید، ابراهیم رییسي ته په ټاکنو کې د بریا مبارکي ورکړې ده.

د ازادي راډیو د ایرانۍ څانګې، راډیو فردا د راپور له مخې دغو دوو کاندیدانو رییسي ته په جلا- جلا پیغامونو کې د بریا مبارکي ویلې ده.

په ایران کې د ولسمشرۍ د پرونیو ټاکنو د رایو شمېرنې له بهیره د اوو ساعتونو له تېرېدو وروسته هم د نتایجو په اړه رسمي ارقام نه دي خپاره شوي.

لا معلومه نه ده، د څلورو کاندیدانو: محسن رضايي میرقاید، ابراهیم رییسي، امیر حسین قاضیزاده هاشمي او عبدالناصر همتي له منځ څخه به کوم یو د ایران نوی ولسمشر شي؟

د ازادۍ راډیو د خبر مرکزي څانګې په حواله، په پام کې ده ابتدايي نتایج نن پر ځایي وخت ماسپښین او نهايي نتیجه سبا علان شي.

ننګرهار چارواکي: سره رود ولسوالۍ کې ۸ طالبان وژل شوي

ننګرهار کې امنیتي ځواکونه د عملیاتو پر مهال

د ننګرهار چارواکي د دغه ولایت په سره رود ولسوالۍ کې د دوه افغان ځواکونو او ۸ وسله والو طالبانو د وژل کېدو خبر ورکوي.

د ننګرهار مطبوعاتي دفتر ازادي راډیو ته په را استول شوېو معلوماتو کې ویلي چې د ننګرهار سره رود ولسوالۍ شمشپور سیمه کې د غازي بابا پوستو کې د مېشتو امنیتي ځواکونو په ځوابیه برید کې ۸ وسله وال طالبان وژل شوي او ۴ نور ټپيان دي.

د معلوماتو له مخې، همدا راز د مخالفینو وسلې او مهمات هم د امنیتي ځواکونو لاس ته ورغلي دي.

د ننګرهار مطبوعاتي دفتر وایي، په یاده نښته کې دوه سرتیري هم وژل شوي دي.

وسله والو طالبانو دغلته د ۲ امنیتي پوستو د نیولو، ۴ افغان ځواکونو د وژلو، ۴ افغان ځواکونو د ټپي کېدو او ګڼو وسلو او مهماتو د نیولو ادعا کړې ده.

کونړ چارواکي: شلتن او غازي اباد کې د طالبانو بریدونه په شا شوي

کونړ کې امنیتي ځواکونه د عملیاتو پر مهال

په کونړ کې امنیتي مسوولین وايي، په شلتن او غازي اباد ولسوالیو کې يې د وسله والو طالبانو ډله ییزو بریدونه په شا تمبولي او یو شمېر کسانو ته يې مرګ ژوبله هم اړولې ده.

د کونړ امنیه قوماندان سمونوال محمد یوسف مظلوم یار د شنبې په ورځ (د غبرګولي په ۲۹مه) ازادي راډیو ته په غازي اباد او شلتن ولسوالیو کې د تېرې شپې جګړې په اړه وویل: "تېره شپه دښمن د غازي اباد ولسوالۍ کې ډله ییز بریدونه پلان کړي وو چې هلته ورته درنه مرګ ژوبله اوښتې ده او همدا راز يې په شلتن ولسوالۍ کې هم غټ برید کړی و چې حمله يي په شا تمبول شوې او په کې ۷ وسله والو طالبانو ته مرګ ژوبله اوښتې ده."

قوماندان وايي، تېره ورځ هم په غازي اباد کې د افغان ځواکونو او وسله والو طالبانو ترمنځ نښتې شوې وې چې په کې له لسو زیاتو مخالفینو ته مرګ ژوبله اوښتې ده.

تر اوسه وسله والو طالبانو په شلتن او غازي اباد کې د شوېو جګړو او د حکومت د ادعاوو په اړه څه نه دي ویلي.

نور راوښيه

XS
SM
MD
LG