د لاسرسۍ وړ لېنکونه

تازه خبر
جمعه ۴ چنګاښ ۱۴۰۰ کابل ۰۹:۳۰

افغانستان

عبدالقیوم: د ناامنیو له امله د لرګیو د برخې یو شمېر صنعتکاران له نورستانه تللي دي

د نورستان سیمه ييز چارواکې وایې، په دغه ولایت کې د ناامنیو له امله د لرګیو د برخې یو شمېر صنعتکاران له دغه ولایت څخه تللي او د لرګیو صنعت اوس په نورستان کې د له منځه تلو په حال کې دی.

د نورستان والې حافظ عبدالقیوم د یکشنبې په ورځ ازادي راډیو ته وویل، په نورستان کې د لرګیو صنعتکاران د ناامنیو سربیره د کاري زمینو او د دوی جوړ شویو شیانو ته د بازارونو د نه شتون له امله پاکستان او یا نورو ولایتونو ته تللي دي.

ښاغلی عبدالقیوم وایې، اوس دوی هڅه کوي د یاد صنعت د بیرته ژوندي کولو لپاره په مرکز پارون کې د لرګیو صنعتکارانو ته ځای او د کار وسایل د برابرو په هدف مالې منابع پیدا کړي:

((د وروستیو کلونو ناامنیو هغه صنعتکاران چې پخوا یې په نورستان کې کار کاوه، هغوی یې د افغانستان په مختلفو ساحو کې خواره واره کړي دي.

د هغوی بیرته راټولو او هغوی ته بیرته د نورستان په مرکز پارون کې د کار زمینه برابرول هغوی ته د کارځای او د هغوی تولید شوي شیانو ته بازار پیدا کول زموږ په پلان کې دي.))

ښاغلی عبدالقیوم وایې، له دې مخې له دغه ولایته د لرګیوڅخه جوړ حکاکي شوي او انتیک شیان یې بهرته ته هم استول کیده او ځینو کورنیو او بهرنیو سوداګرو به هم دغه ډول شیان اخیستل.

د ورځې تازه خبرونه دلته ولولئ

مچ مککانل: له افغانستانه دې د بهرنیو ځواکونو وتل وځنډیږي 

د امریکا د سنا د جمهوريپالو مشر مچ مککانل

د امریکا د سنا د جمهوريپالو مشر مچ مککانل غوښتي چې له افغانستانه دې د بهرنیو ځواکونو وتل وځنډیږي.

ښاغلي مککانل له افغان ولسمشر محمد اشرف غني سره تر لیدنې وروسته دا خبره په یوه اعلامیه کې کړې.

هغه ویلي چې طالبان د بهرنیو ځواکونو په وتلو سره زړور شوي او د کلونو لاسته راوړنې په تېره بیا د ښځو د حقونو په برخه کې پرمختګونه په اوبو لاهو کوي.

مککانل ویلي، هیله من دی چې د بایډن اداره په افغانستان کې روان وضعیت او د ترهګرۍ ګواښ ته په کتو د ځواکونو د را ایستلو پروسه وځنډوي.

افغان ولسمشر د پنجشنبې په سهار امریکا ته ورسېد. لومړني بحثونه یې د امریکا د سنا جرګې له غړیو سره وو.

تمه ده ولسمشر غني نن د امریکا په وخت د ماسپښین په شااوخوا درېیو بجو چې د افغانستان د شپې دولس بجې کېږي په سپینه ماڼۍ کې له ولسمشر جوبایډن سره وګوري.

کابل او شااوخوا سیمو کې یوه زوروره زلزله وشوه

کابل ښار

د افغانستان پلازمېنې کابل او شااوخوا سیمو کې نن جمعه (د چنګاښ ۴مه) سهار وختي یوه زوروره زلزله وشوه.

د احتمالي زیانونو په اړه راپورونه نه دي ورکړل شوي.

د دې زلزلې کچه پنځه اعشاریه یو راپور شوې او مرکز یې له کابله شااوخوا ۶۰ کیلومتره لېرې چاریکارو ته نږدې یاد شوی.

د خواله رسنیو ګڼو افغان کاروونکو د دې زلزلې په اړه لیکلي چې ټکانونه یې زورور وو او دوی یې ویرولي.

په افغانستان کې چې ګڼ خلک یې په خټینو او غیر معیاري کورونو کې اوسي دغو ډول زلزلو پخوا خلکو ته زیانونه اړولي دي.

پکتیا چارواکي: د سیدکرم ولسوالۍ له طالبانو تصفیه شوه

د پکتیا سیدکرم ولسوالۍ کې د افغان ځواکونو عملیات

په پکتیا کې امنیتي چارواکي وايي، د دې ولایت د سقوط شوېو ولسوالیو د بېرته نیولو عملیات پیل شوي دي.

په پکتیا کې د ۲۰۳ تندر قول اردو ویاند ایمل مومند نن شپه ازادي راډیو ته وویل، افغان ګډو ځواکونو چې د ضربتي یا کمپاین په نوم مشهور د 'کي.پي.اېف' ځانګړي ځواکونه یې هم ملتیا کوي، په پکتیا کې د سقوط شوېو ولسوالیو د بیا نیولو علمیات پیل کړي.

مومند وایي، د عملیاتو په لړ کې د سیدکرم ولسوالۍ د وسله والو طالبانو له موجودیت پاکه شوې چې پر مهال یې د لومړنیو مغلوماتو له مخې ۱۲ وسله وال طالبان وژل شوي او ۷ نور ټپیان شوي دي.

مومند وایي، افغان ځواکونه د مېرزاکې په نوم د یوې بلې سقوط شوې ولسوالۍ د نیولو په تکل مخکې روان دي او په خبره یې جزییات به یې وروسته له رسنیو سره شریک کړي.

د پکتیا والي محمد حلیم فدایي وایي، وسله والو طالبانو د سیدکرم ولسوالۍ د ودانۍ یو شمېر اداري توکي مات کړي، ځینې برخې یې سوځولي او اسنادو ته یې زیان رسولی دی.

وسله والو طالبانو تر اوسه په دې اړه رسنیو ته څه نه دي ویلي.

د پکتیا والي: وسله والو طالبانو یو دیني عالم وژلی

د پکتیا والي محمد حلیم فدایي

د پکتیا والي محمد حلیم فدایي وایي، وسله والو طالبانو د دې ولایت په څمکنیو ولسوالۍ کې یو تن دیني عالم نیولی او وروسته یې په ډزو وژلی دی.

دی وایي، مولوي فقیر محمد څمکنی د سیمې یو مشهور عالم و چې چهارشنبې په ورځ د وسله والو طالبانو له لوري ووژل شو.

په همدې ورځ وسله والو طالبانو د یادې ولسوالۍ د نیولو ادعا هم کړې وه.

د سیمې اوسیدونکي وایي، وسله والو طالبانو یاد دیني عالم ځکه په نښه کړ چې د افغان سرتېرو جنازې یې کولې او د طالبانو د روان جنګ مخالف و.

دا دیني عالم وروسته له هغې د وسله والو طالبانو له لوري وژل کېږي چې د وسله والو طالبانو مشر په یوه خپاره کړي اعلامیه کې خپلو جنګیالیو ته امر وکړ چې ملکي خلکو، عامه ځایونو او له جګړې لاس په سر شویو سرتېرو ته زیان و نه رسوي.

وسله والو طالبانو تر اوسه په دې اړه رسنیو ته څه نه دي ویلي.

چارواکي: ننګرهار کې د برښنا د پايي ویجاړونکی د خپل ماین ښکار شو

ارشیف، عکس تئزیني بڼه لري

د ننګرهار چارواکي وایي، د دغه ولایت په سره رود ولسوالۍ کې تېره شپه د برښنا پايې ته یو تن ماين خښوونکی د خپل ماين په چاودنه کې ووژل شو.

د ننګرهار د والي مطبوعاتي دفتر ازادي راډیو ته په را استول شوېو معلوماتو کې ویلي، د سره رود ولسوالۍ پير صيب زيارت ته څېرمه يو کس چې غوښتل يې د برښنا پايې ته ماين ځای پرځای کړي، د خپل ماين په چاودنه کې وژل شوی دی.

که څه هم په دې اړه نور معلومات نه دي شریک شوي، خو تر دې وړاندې هم په ننګرهار سربېره په مرکز کابل او ځینو نورو سیمو کې د برښنا له لسو ډېرې پایې ویجاړې او الوځول شوي چې ورسره د ګڼو ولایتونو برښنا له له ستونزو سره مخ شوې ده.

دا په داسې حال کې ده چې له تیرو درې ورځ راهیسې په جلال اباد ښار کې په هرو ۲۴ ساعتونو کې یوازې خلک له دوه تر درې ساعتونو پورې له برښنا برخمن دي.

امریکا د خپل پوځ لسګونه زره افغان ژباړونکي له افغانستانه باسي

ارشیف، هلمند کې یو شمېر امریکايي سرتیري له خپل افغان ژباړونکو سره

د امریکا حکومت په پام کې لري چې د امریکا د پوځ لسګونه زره ژباړونکي او نور هغه کسان چې د جګړې پر مهال یې په افغانستان کې له امریکايي سرتېرو سره کار کړی له افغانستانه وباسي.

اسوشیټېډ پرېس خبري اژانس د یوه جګپوړي امریکايي چارواکي له قوله چې نه غواړي نوم یې افشا شي خبر ورکوي چې وايي، په دې وروستیو کې بهر ته د هغو افغانانو د اېستلو کار چټک شوی چې په تېرو دوو لسیزو کې یې له امریکايي ځواکونو سره مرسته کړې ده.

یوې بلې سرچینې ویلي، د بایډن اداره په پام کې لري چې د سږني دوبي په پای کې او ښايي په اګسټ میاشت کې دا افغانان بهر ته ولېږدوي.

رویټرز خبري اژانس د امریکا د استازو جرګې د جمهوریپال غړي مایک مککاول له قوله خبر ورکوي چې وايي، دا افغانان ښايي متحده عربي اماراتو، بحرین، قطر او کوېټ ته ولېږدول شي.

په داسې حال کې چې ټاکل شوې د امریکا او ناټو پوځي ځواکونه د سېپټمبر تر ۱۱مې نېټې پورې له افغانستانه ووځي، د بایډن اداره له افغانستانه د دې افغانانو د اېستلو په برخه کې د کانګرس د غړو، پخوانیو پوځيانو او نورو له پرله پسې فشار سره مخامخ ده.

چارواکي: بلخ کې ۲ کانالونه استفادې ته چمتو دي

په بلخ ولایت کې د یولمرب او ګذرګلدره کانال پیاوړتیا او سوپر پسیچ پروژه ګټې اخستنې ته وسپارل شوه.

د افغانستان د اوبو د تنظیم ملي اداره وايي چې په بلخ ولایت کې د دوو کانالونو د تحکیماتو د پروژې چارې بشپړې شوي او دا کانالونه استفادې ته چمتو دي.

د دې ادارې ویاند نظام خپلواک تېره شپه(پنجشنبه-د چنګاښ ۳مه) په دې اړه ازادي راډیو ته وویل: "په بلخ ولایت کې د یولمرب کانال او د ګذره ګلدرې د سواحلو تحکیماتو پروژو چارې بشپړې شوي او ګټې اخیستنې ته وسپارل شوه. دا پروژه د اکټېد دفتر په مالي مرسته تطبیق شوه."

د ښاغلي خپلواک په وینا دا پروژه د شااوخوا ۴۰ زره هکتاره ځمکې د خړوبولو وړتیا لري او له پنځوس زرو زیاتې کورنۍ ګټه ترې اخلي.

چین کې د افغانستان سفارت افغان کلتوري خونه پرانیسته

د افغانستان او چین بیرغونه

په چین کې د افغانستان سفارت په پیکېنګ کې افغان کلتوري خونه پرانیسته.

افغان سفیر جاوېد قایم ازادي راډیو ته وویل چې د دې خونې د جوړولو لپاره له یو کال راهیسې کار روان و.

افغان سفیر همداراز وویل چې د دې کلتوري خونې ترڅنګ د افغاني غالیو یو نندارتون د نندارچیانو لپاره پرانیستل شوی دی.

د ښاغلي قایم په وینا، د افغانستان د کلتوري خونې په پرانیستونکو مراسمو کې د چینايي چارواکو ترڅنګ د ۱۵ هېوادونو سفیرانو هم ګډون کړی و.

تمه ده جوبایډن سبا جمعه له ولسمشر غني سره وګوري

ارشیف، ولسمشر غني او ولسمشر بایډن، عکس تزئیني بڼه لري

ټاکل شوې ده چې د امریکا ولسمشر جو بایډن سبا د افغانستان له ولسمشر محمدا شرف غني سره په سپینه ماڼۍ کې وویني.

ولسمشر غني، لومړی مرستیال یې امرالله صالح، د ملي مصالحې د عالي شورا رييس عبدالله عبدالله، د بهرنیو چارو وزیر محمد حنیف اتمر، د ملي امنیت سلاکار حمدالله محب او یو شمېر چارواکي تېره شبه له کابله له ولسمشر غني سره واشنګټن ته روان شول.

د ولسمشرۍ د چارو د ادارې رييس فضل محمود فضلي امریکا ته د ولسمشر د سفر په اړه د افغانستان ملي تلویزیون ته وویل: "هغه ژمنې چې په تېرو دوو – درېيو میاشتو کې د امریکا د بهرنیو چارو وزارت او ولسمشرۍ په اعلامیو کې خپرې شوي، زموږ د ولسمشر او د امریکا د ولسمشر ترمنځ د پراختیا، بشري مرستو او د هېواد د امنیتي او دفاعي ځواکونو د مالي او دیپلوماتیک ملاتړ د عملي کولو او نهايي کولو په اړه د نظرتبادله کېږي."

وسله والو طالبانو امریکا ته د ولسمشر غني سفر بې ګټې بللی دی.

د لوګر چارواکي: د ازرې ولسوالۍ د سقوط خبر ناسم دی

د افغانستان په نقشه کې د لوګر ولایت

د لوګر ځایي چارواکي وایي، د ازرې ولسوالۍ د سقوط خبر ناسم او تبلیغاتي دی.

د لوګر د پولیسو ویاند ګل حیدر احمدي ازادي راډیو ته وویل چې د دې ولایت په ازرې ولسوالۍ کې د افغان سرتېرو او وسله والو طالبانو تر منځ سخته نښته روانه ده او تر دې مهاله یادې ولسوالۍ سقوط نه دی کړی.

دی وایي، ولسوالۍ له افغان ځواکونو سره ده او دښمن تبلیغاتي جنګ پیل کړی دی.

په پکتیا کې د ۲۰۳ تندر قول اردو ویاند ایمل مومند وایي، تېره ورځ یې هم په یاده ولسوالۍ کې هوایي عملیات ترسره کړي چې په ترڅ کې یې ۲۰ وسله وال طالبان وژل شوي او ۷ نور ټپیان شوي دي.

د وسله والو طالبانو ویاند ذبیح الله مجاهد نن پنجشنبه (د چنګاښ ۳مه) سهار ادعا وکړه چې یاده ولسوالي یې سقوط کړې او ۵۰ سرتیري یې ژوندي نیولي دي.

په ختیځ کې د درېیمې لوا درستیزوال 'نورجان' ووژل شو

د ملي اردو د درېیمې لوا درستیزوال نورجان

په ختیځ کې د ملي اردو د درېیمې لوا درستیزوال نورجان ووژل شو.

د ننګرهار یوې حکومتي سرچینې تائید کړه چې ډګروال نورجان نن پنجشنبه (د چنګاښ ۳مه) سهار شااوخوا ۷ بجې د شېرزادو ولسوالۍ په پټلو کلي کې د نښان ویشتونکي ټوپ په مرمۍ لګېدلی او وژل شوی دی.

ازادي راډیو ته د رسېدلو معلوماتو له مخې، نورجان تر دې وړاندې د سرحدي لومړۍ لوا درستیزوال و چې بیا تقاعد شو، خو د نوموړي د ښو خدمتونو، زړورتیا او د جګړه ېیزې منصبدارۍ د وړتیا درلودو له کبله رفع تقاعد او د بیا ځل لپاره د درېیمې لوا درستیزوال وګومارل شو.

تر اوسه په ښکاره توګه د دې پېښې مسؤلیت چا نه دی منلی، خو په سیمه کې له تېرو څو میاشتو راهیسې د وسله والو طالبانو پر ضد د افغان حکومت نظامي عملیات روان دي چې د دواړو لوریو ترمنځ د نښتو او یو بل ته د مرګ ژوبلو او زیانونو خبرونه ورکول کېږي.

د یکاولنک-دره صوف واټ د جوړولو چارې ۶۰ سلنه بشپړې شوي

ارشیف، عکس تئزیني بڼه لري

د بامیان یکاولنګ او د سمنګان د دره صوف واټ د جوړولو کار ٦٠ سلنه بشپړ شوی دی.

دغه واټ چې د شمال او جنوب دهلېز شمېرل کېږي په ګټې اخیستنې سره به بازارونو ته د خلکو د کرنیزو محصولاتو د لېږد کې اسانتيا برابره کړي.

د افغانستان د فواید عامې وزارت نن پنجشنبه (د چنګاښ په ۳مه) په یوه خبرپاڼه کې ویلي چې دغه واټ د ۱۸۳ کیلومترو په اوږدوالي او ١٠ مترو په سور د بامیان یکاولنګ ولسوالۍ د سمنګان له دره صوف ولسوالۍ سره نښلوي او د شمال – جنوب دهلیز شمېرل کېږي.

د اسیايي پرمختیايي بانک د دغه واټ د جوړولو لګښت ورکوي.

د دغه واټ د جوړولو کار څه نا څه شپېته سلنه بشپړ شوی دی او ټاکل شوې ده تر راتلوونکو شپږو میاشتو کې ګټې اخېستنې ته وسپارل شي.

د افغانستان د سوداګرۍ خونه د امریکا تازه ژمنو ته هیله منه ده

د امریکا او افغانستان ګډ بیرغونه

د افغانستان د سوداګرۍ او پانګونې خونه هېله منده ده چې امریکا ته د ولسمشر غني د سفر په لړ کې په اقتصادي او سوداګریزو برخو کې هم تازه ژمنې ترلاسه شي.

د دغې خونې مرستیال یونس مومند نن پنجشنبه (د چنګاښ په ۳مه) ازادي راډیو ته وویل چې تر سېپټمبر میاشتې وروسته چې بهرني ځواکونه افغانستان پرېږدې د امریکا د مرستو دوام یوه مهمه مساله ده.

جمهوري ریاست هم تمه ښودلې چې افغان ولسمشر محمد اشرف غني امریکا ته د دوه ورځني سفر په لړ کې به له افغانستان سره د امریکا په اقتصادي او انکشافي برخو کې د همکاریو په را جلبولو کې هم بحث او خبرې وکړي.

جمهوري ریاست نن پنجشنبه (د چنګاښ ۳مه) په یو بیان کې ویلي چې ولسمشر غني به د دغه دوه ورځني رسمي سفر په لړ کې په بېلابېلو کتنو کې د دواړو هېوادونو ترمنځ د اړېکو په نوي فصل او د اقتصادي همکاریو په دوام ټینګار وکړي.

دا په داسې حال کې ده چې امریکا تر دې وړاندې له افغانستان سره د ۳ سوه میلیونه ډالرو مرستې اعلان کړې.

امریکایي چارواکو ټېنګار کړی چې د سېپټمبر تر ۱۱مې نېټې وروسته چې له افغانستانه د امریکا او ناټو ځواکونو وتل بشپړیږي امریکا به له افغانستان سره خپلو مرستو ته دوام ورکړي.

د تاجکستان ولسمشر خپل ازبک او قزاق سیالانو سره پر افغانستان غږیدلی

د تاجکستان ولسمشر له خپل ازبک سیال سره

د تاجکستان ولسمشر امام علي رحمان د قزاقستان او ازبیکستان له ولسمشرانو سره د افغانستان پر حالاتو ټېلفوني خبرې کړي دي.

د تاجکستان د ولسمشرۍ د رسمي وېبپاڼې پر اساس، رحمان له خپلو ازبک او قزاق سارو سره پرون په ځانګړي ډول د افغانستان د شمالي ولایتونو د وضعیت په اړه خبرې وکړې.

د افغانستان شمالي ولایتونه د منځنۍ اسیا له تاجکستان، ازبیکستان او ترکمنستان سره پوله لري.

دوی وویل، په افغانستان کې اوسنی حالت د کړکېچ د زیاتېدا او د سیمې پر امنیت د منفي اغېز سبب کېږي.

دوی د خبرو له لارې د افغانستان د جګړې پر پای ته رسېدا ټېنګار وکړ.

قطر: ۳ برخو کې افغانستان سره همکاریو ته ژمن و

د قطر د بهرنیو چارو وزیر شیخ محمد بن عبدالرحمن بن جاسم آل ثاني

د قطر د بهرنیو چارو وزیر وایي چې هېواد یې په سیاسي، اقتصادي او تجارتي برخو کې له افغانستان سره همکاریو ته ژمن دی او د دې هدفونو لپاره د سولې د خبرو بریالیتوب مهم دی.

د قطر د بهرنیو چارو وزیر او د دغه هېواد د صدراعظم مرستیال شیخ محمد بن عبدالرحمان بن جاسم ال ثاني دا خبرې پرون چهارشنبه (د چنګاښ ۲مه) د افغانستان له بهرنیو چارو وزیر محمد حنیف اتمر سره د ټیلیفوني مکالمې پرمهال وکړې.

د قطر د بهرنیو چارو وزیر تېره اوونۍ له رویټرز اژانس سره په مرکه کې ویلي و چې د سولې د خبرو هدف دا دی چې د افغانستان حکومت او طالبان اوربند وکړي او د افغانستان د راتلونکې په اړه یوې اجماع ته سره ورسېږي، خو د نژدې نهه میاشتو په ترڅ کې د سولې په خبرو کې د پام وړ پرمختګ نه دی راغلی.

نور راوښيه

XS
SM
MD
LG