د افغانستان د حکومت د اجرايې ریس دوهم مرستیال محمد محقق وايي، افغانستان په یمن کې د روان بحران په اړه د بې طرفي غوره ګڼي او د لانجې د سوله ییز حل پلوي کوي.
خو ښاغلي محقق پرون [پنجشنبه] له ازادۍ راډیوسره په ځانګړي مرکه کې څرګنده کړه چې د سعودي عربستان خاورې ته د ګواښ په وړاندې دریدل، د هرمسلمان مسولیت دی:
″په نړۍ کې د ټولو جګړو په اړه افغانستان د بې طرفۍ دریځ لري او د نړۍ په هیڅ کونج کې د جګړې پلوي نه کوي.″
د افغانستان حکومت روانه اونۍ وویل چې د سعودي عربستان خاورې ته د هرډول امنیتي ګواښ د پيښیدو په صورت کې به افغانان د سعودي عربستان له خلکو سره ولاړ وي.
د ارګ په اعلامیه کې ویل شوي وو چې د افغانستان حکومت په یمن کې د شیعه حوثي ملیشوله خوا د له واکه لیرې شوي ولسمشر عبد ربه منصور هادي ملاتړ کوي.
داسې ګڼل کیږي چې ایران په یمن کې د شیعه حوثي ملیشو پلوي کوي.
ښاغلی محقق وايي، افغان حکومت په نړېوالو مسایلوکې د خپلو ګټو او متقابل درناوي پراساس او خپلواک عمل کوي.