د لاسرسۍ وړ لېنکونه

تازه خبر
پنجشنبه ۳۰ مرغومی ۱۴۰۰ کابل ۱۱:۵۵

افغانستان

په بغلان کې یوه مېرمن او ۷ میاشتنی ماشوم یې د ګاونډي له خوا په ډزو وژل شوي

د بغلان په اندراب ولسوالۍ کې یوه ۳۰ کلنه میرمن او اوه میاشتنی ماشوم یې د ګاونډي له خوا په ډزو وژل شوې ده.

د اندراب ولسوال عبدالولي حمیدي آزادۍ راډیو ته وویل؛ چې دغه پېښه تیره شپه د شخصي دښمنۍ له امله شوې ده.

نوموړي زیاته کړه چې، د دغې پېښې سره د تړوا په تور ۳ تنه نیول شوی دي.

د یوه بل خبر له مخې، تیره شپه د بغلان په "کیله ګي" زندان کې یوه ۲۲ کلن زنداني ځان وژنه کړې.

د دې ولایت د امنیت امر عبدالرشید آزادۍ راډیو ته وویل؛ چې دغه زنداني د تېرو ۲ نیمو کلونو راپدېخوا دغه زندان کې بندي و.

نوموړي زیاته کړه چې، د وژل شوی زنداني د وژل کېدو لامل معلوم نه دی.

د ورځې تازه خبرونه دلته ولولئ

د خوست د سپیرې ولسوالۍ اوسیدونکي: د سپېرې سړک دې اساسي جوړ شي

د خوست د سپیرې ولسوالۍ سړک

د خوست د سپیرې ولسوالۍ اوسیدونکي غوښتنه کوي چې یادې ولسوالۍ ته غځېدلی سړک چې خوست او پکتیکا ولایتونه هم سره نښلوي، په اساسي ډول ورغول شي.

دوی زیاتوي، وروستیو ورښتونو د دې سړک ځینې برخې ویجاړې کړي او که ژر جوړ نه شي، نو د موټرونو د تګ او راتګ په مخ به وتړل شي.

د سپیرې ولسوالۍ اوسیدونکی نور محمد ازادي راډیو ته وویل، په تېرو شلو کالونو کې نه یوازې د یادې ولسوالۍ بیارغونې ته پام نه دی شوی، بلکې اساسي سړک يې هم تر ډېره خام پاتې شوی دی.

دی زیاتوي: "د سپيرې د تنګي اوسېدونکو دې سړک ته په تیرو شلو کالونو کې هېڅ کار نه دی شوی، که هر څومره مو غوښتنه کوله، غږ مو چا نه اورېده، یوازې دا لویدلی ځای نه دی چې دا جوړ شي، اساسي غوښتنه مو دا ده چې دې سړک ته باید استنادي دیوالونه جوړ شي، څو چې دا خلک له دې ستونزو او مشکلاتو څخه خلاص شي."

بل لوري ته طالب چارواکي د سپېرې ولسوالۍ د اوسیدونکو ستونزې پرځای بولي او زیاتوي چې د سړک د ویجاړو شوېو برخو په رغولو يې کار پیل کړی او د ټول سړک د اساسي جوړولو سروې هم ترسره شوې ده.

ددې ولایت لپاره د طالبانو د ټولګټو چارو رئیس مولوي احمدالله احمد وايي، له ښاره بهر د سړکونو ساتنه او رغونه د دوی له دندو څخه دي، خو په اوس وخت کې د وسایطو د نشتون ستونزه لري.

ده وویل، که وسایط ورکړل شي، نو دوی به د سړکونو هرې زیانمنې برخې رغونې ته ژر، ژر رسېدنه کوي.

دی وايي: "د خوست ولایت د ټولګټو چارو ریاست وسایط په تېر نظام کې سوځیدلي دي، نو موږ وسایل نه لرو، په اړه مو په کراتو د ولایت مقام څخه هم غوښتنه کړې ده او له دې سره-سره مو د وزارت څخه هم غوښتنه کړې ده، وزارت موږ سره وعده کړې ده، انشاالله وسایط به راکړي او انشاالله په اینده کې به د ښه خدمت جوګه وګرځو. "

د سپیرې ولسوالي شااوخوا پنځوس کیلومتره لېرې د خوست ښار په سویل لویدیځ لوري کې پرته ده چې ډېری سیمې يې غریزې دي او خلک يې د غرونو په نارو او درو کې اوسېږي.

د کابل هوایي ډګر ته څېرمه پر یوه کور برید؛پنټاګون یې ویډیو خپره کړې

ارشیف، عکس تزئیني بڼه لري

پنټاګون هغه ویډیو له محرمیت څخه ایستلې او خپره کړې چې د کابل هوایي ډګر ته څېرمه پر یوه کور د امریکا د بې پیلوټه الوتکې د برید څرنګوالي ښکاره کوي.

په دې برید کې چې له افغانستانه د امریکایي ځواکونو د وتلو په وروستیو ساعتونو کې وشو، لس ملکي وګړي ووژل شول.

نیویارک ټایمز ورځپاڼې د دغې ویډیو یوه کاپي د امریکا د مرکزي قواوو د قوماندانۍ پر وړاندې د حقوقي دعوا د معلوماتو د ازادي د یوه قانون له مخې ترلاسه کړې او هغه یې په خپله وېب پاڼه کې ایښي.

دا لومړی ځل دی چې د دغه برید په اړه چې د اګسټ په ۲۹ وشو، ویډیویي تصاویر خپریږي. پنټاګون چې په لومړي سر کې یې د دغه برید دفاع کوله وروسته یې هغه یوه تراژیکه تېروتنه وبلله.

د اسوشیټېډ پرېس اژانس د راپور له مخې دغه ۲۵ دقیقه یي ویډیو کې دوه MQ-9 ریپر ډرون الوتکې، له برید مخکې، د برید په حال کې او له هغه وروسته د برید د ځای صحنې ښکاري. په دې کې ښکاري چې توغندي د یوه کور په حویلي کې پر یوه موټر لګیږي. په تصاویرو کې د حملې ځای ته نژدې یو شمېر کسان هم ښکاري چې ګرځي راګرځي.

د امریکا پوځ ویلي و چې حمله یې په هغه سخت دریځي کړې وه چې دوی ګومان کاوه په افغانستان کې به د اسلامي دولت ډلې یا داعش پورې تړلی وي او ممکن د کابل هوایي ډګر ته نژدې چې ورڅخه د خلکو د ایستلو بهیر لا روان و، بم چاودنه وکړي.

تر دغه برید درې ورځې مخکې په دې هوایي دګر کې په یوه انتحاري حمله کې چې مسولیت یې د اسلامي دولت ډلې یا داعش اخیستی و، ۱۳ امریکایي سرتیري او له ۱۶۰ زیات افغانان ووژل شول.

د امریکا د مرکزي قواوو قوماندانۍ وروسته ومنله چې پر هغه ډریور یې چې د بې پیلوټه الوتکې برید کړی هغه د اسلامي دولت ډلې یا داعش سره اړیکه نه ده درلوده بلکې د زمري احمدي په نوم له یوې امریکایي موسسې سره یې کار کاوه.

بایډن له افغانستانه د خپلو ځواکونو د وتلو په اړه د پرېکړې دفاع وکړه

د امریکا ولسمشر جو بایډن

د امریکا ولسمشر جو بایډن یو ځل بیا له افغانستانه د خپلو ځواکونو د وتلو په اړه د خپلې پرېکړې دفاع وکړه او ویې ویل چې له دې پرته بله هېڅ لاره نه وه.

بایډن چې پرون چهارشنبې (د مرغومي ۲۹مه) یې په سپینه ماڼۍ کې د ولسمشر په توګه د دندې د یوه کال د پوره کېدو په لومړني خبري کنفرانس کې څرګندونې کولې، هغو انتقادونوته چې پرده د دغو ځواکونو د ایستلو په خاطر شوي وویل، د خپلو اقداماتو په خاطر به بښنه ونه غواړي.

دی وايي: "له شلو کلونو وروسته له افغانستانه د وتلو لپاره هېڅ ساده لاره نه وه او نه هم ممکنه وه چې دغه کار به کله وکړئ. زه د هغه څه په خاطر چې کړي مې دي بښنه نه غواړم. زه خپلو هغو سرتیرو، ښځو او سړیو ته ډېر اندیښمن وم چې د کابل هوایي ډګر کې په لیکه کې په یوه تروریستي برید کې ووژل شول."

جو بایډن زیاته کړه، د مخکیني ولسمشر ډونالډ ټرمپ د پرېکړې له مخې باید دغه ځواکونه د ۲۰۲۱ کال د مې د میاشتې تر پایه له افغانستانه وتلي وای او که موږ غوښتي وای چې هلته پاتې شي نو باید د شلو زرو او ۲۵ زرو ترمنځ نور ځواکونه مو باید دې هېواد ته استولي وای.

د امریکا د ولسمشر بایډن د پرېکړې له مخې ټول امریکایي ځواکونه د تېرکال د اګسټ تر۳۱مې پورې له افغانستانه ووتل، خو تر وتلو دوه اوونۍ مخکې یعنې د اګسټ په پنځلسمه یې طالبانو کابل ونیو.

د افغانستان د کرکټ تر ۱۹ کلونو کشره لوبډله نن پاکستان سره مخ کیږي

د افغانستان د کرکټ تر نولسو کلونو کشره لوبډله

د افغانستان د کرکټ تر نولسو کلونو کشره لوبډله به نن پنجشنبه (د مرغومي ۳۰مه) د پاکستان پر وړاندې د مسابقې میدان ته راووځي.

دا په وېسټ انډیز کې د کرکټ تر نولسو کلونو د کشرو لوبډلو په نړیوال جام کې د افغانستان دوهمه سیالي ده.

وړمه ورځ (سې شنبې) افغان لوبډلې پاپونیوګینې ته په ۱۳۳ منډو ماتې ورکړه.

د افغانستان او پاکستان د کرکټ تر نولسو کلونو د کشرو لوبډلو سیالي به د افغانستان په وخت د مازدیګر په ۵ بجې د وېسټ انډیز په تاروبا لوبغالي کې پیل شي.

تر نړیوال جام مخکې د پاکستان تر نولسو کلونو کشرې لوبډلې په اسیايي جام کې افغان لوبډلې ته ماتې ورکړې وه.

کابل کې د ایران سفیر له حامد کرزي او عبدالله عبدالله سره ولیدل

حامد کرزی او عبدالله عبدالله

په کابل کې د ایران سفیر د افغانستان له پخواني ولسمشر حامد کرزي او د ملي مصالحې د عالي شورا له مخکیني مشر عبدالله عبدالله سره په تهران کې د ایراني چارواکو او طالبانو د وروستۍ کتنې په اړه خبرې وکړې.

ښاغلي عبدالله پر خپله فیسبوک پاڼه کښلي چې د ایران له سفیر سره یې په تهران کې د طالبانو د بهرنیو چارو وزیر امیرخان متقي او ایراني چارواکو ترمنځ د تېرې اوونۍ د کتنې په اړه خبرې وکړې.

د طالبانو د بهرنیو چارو وزیر د شنبې په ماښام له یوه پلاوي سره تهران ته لاړ او د ایران له بهرنیو چارو وزیر حسین امیرعبداللهیان او د افغانستان لپاره د ایران د ولسمشر له ځانګړي استازي حسن کاظمي قُمي سره سره وکتل.

طالب پلاوي د ایران په منځګړیتوب د هرات له پخواني والي اسماعیل خان او د ملي مقاومت جبهې له مشر احمد مسعود سره هم خبرې وکړې، خو راپورونه وايي چې کوم جوړجاړي ته ونه رسېدل.

کونړ کې د یوه طالب قوماندان په ګډون۴ تنه ووژل شول

د افغانستان په نقشه کې د کونړ ولایت

په کونړ کې پرون چهارشنبې(د مرغومي ۲۹مه) د طالبانو د یوه قوماندان په شمول ۴ تنه ووژل شول.

د کونړ ولایت لپاره د طالبانو د اطلاعاتو او کلتور رييس مولوي نجیب الله د جرمني خبري اژانس ته وویل، په نرنګ ولسوالۍ کې پر یوه موټر چې د طالبانو یو قوماندان او ملکیان په کې سپاره وو، د یوه سړي په ډزو د ۴ تنو د وژل کېدو ترڅنګ ۹ تنه نور ژوبل شول.

طالبان وايي چې حمله کوونکی د سیمې یوه کور ته پناه یووړه او کله چې د کور خاوند د قاتل له ورسپارلو ډډه وکړه، هغه ووژل شو او حمله کوونکی ونیول شو.

طالب چارواکي وايي چې له حمله کوونکي څخه تحقیقات روان دي.

ویل کېږي چې ممکن د دې برید انګېزه شخصي دښمني وي.

د کونړ یوه قومي مشر بیا ویلي، دې پېښه کې د ۴ طالبانو په شمول ۶ تنه وژل شوي او ۸ نور ژوبل شوي دي.

یوه بل قومي مشر ویلي چې حمله کوونکي تر دې پخوا څو ځلي داعش او بیا طالبانو ته اوښتی، خو په وروستیو کې طالبانو ته تسلیم شوی و.

دغه قومي مشر چې نه یې غوښتل نوم یې واخیستل شي، دا خبره رد کړه چې ګنې حمله د شخصي دښمنۍ پر اساس شوې ده. د ده په باور که حملې د شخصي دښمنۍ انګېزه لرله، نو پر یوه تن به یې ډزې کړې وې نه پر ګڼو.

ملګري ملتونه: د افغان مېرمنو بې روزګاري ۱۶ سلنه زیاته شوې

افغان مېرمنې

د ملګروملتونو د کار نړیوالې ادارې په یوه راپور کې ویلي چې د طالبانو له واک ته رسېدو وروسته د افغان مېرمنو بې روزګاري په سلو کې ۱۶ زیاته شوې ده.

د دې ادارې پر اساس، اټکل کېږي چې په روان ۲۰۲۲ کې د افغان ښځو بې روزګاري ۲۲ سلنې ته زیاته شي.

د کار د نړیوالې ادارې په وینا، د ۲۰۲۱ کال په وروستیو درېيو میاشتو کې په افغانستان کې نژدې ۵ سوه زره کاري فرصتونه له لاسه وتلي او اټکل کېږي چې د روان ۲۰۲۲ تر نیمايي پورې به ۹ لکه نور کاري فرصتونه له منځه لاړ شي.

د طالبانو له واک ته رسېدو وروسته ښځې له کاره منع شوې او په دې هېواد کې اقتصادي او بشري بحران پراخ شو.

د کونړ په مرورې ولسوالۍ کې ماین چاودنه؛ یو کس مړ او بل ټپي دی

د افغانستان نقشه

د کونړ مرورې ولسوالۍ کې د سړک غاړې ماین چاودنې یو تن وژلی او یو يي ټپي کړی دی

په کونړ کې د اطلاعاتو او کلتور ریاست لپاره د طالبان سرپرست رئیس مولوي نجیب الله حنیف د پېښې په اړه تېر ماخوستن ازادۍ رادیو ته وویل، ماین په مرورې ولسوالۍ کې د سورلیو په یو سراچه موټر چاودېدلی او په کې ۲ کسانو ته مرګ ژوبله اوښتې.

حنیف وایي:" د مرورې ولسوالۍ کې د سورلۍ پر یو موټر ماین چاودلی دی،یو تن په کې مړ دی او بل په کې ټپي دی.تراوسه موږ دغه معلومات ترلاسه کړي دي."

په کونړ کې دا دوهمه پېښه ده چې د نهو ساعتونو په جریان کې رامنځ ته کېږي،لومړۍ پېښه تېره ورځ لس نیمې بجې په نرنګ کې د شخصي دښمنۍ له امله پر یو موټر وسله وال برید و چې په کې د طالبانو په ګډون ۱۳ کسانو ته مرګ ژوبله واوښته او ماښام اوو بجې بیا په مرورې ولسوالۍ کې پر یو سراچه ډوله موټر د سرک غاړي ماین چاودنه وه چې په کې یو تن وژل شوی او بل ټپي دی.

کونړ کې د ۲ وسله والو په ډزو کې ۴ طالبان او یو ملکي وګړی وژل شوی

د افغانستان په نقشه کې د کونړ ولایت

په کونړ کې د دوو وسله والو کسانو په ډزو کې څلور طالبان او یو ملکي وګړی وژل شوی او ۹ تنه نور ټپیان شوي چې طالبان او عام وګړي په کې دي.

دا پیښه نن "چهارشنبه" په نرنګ ولسوالۍ کې شوې ده او د اسعداباد روغتون ازادي راډیو ته تایید کړې چې دوی ته همدومره مړي او ټپیان ور وړل شوي دي.

په کونړ کې د طالبانو د اطلاعاتو او فرهنګ رییس نجیب الله حنیف ازادي راډیو ته وویل، بریدګرو "په دې نیت" په یوه موټر ډزې کړي چې ګواکې د هغوی شخصي دښمنان په کې ناست دي.

د ده په خبره، موټر کې ۱۳ کسان ناست و چې طالبان او ولسي وګړي وو.

حنیف وايي، یو بریدګر یې په ټپی حالت کې نیولی او د بل د نیولو هڅې روانې دي.

د سیمې خلکو هم ازادۍ راډيو ته ویلي چې پیښه د شخصي دښمنۍ له کبله شوې، خو خپلواکو سرچینو لا په دې اړه څه نه دي ویلي.

چارواکي د کندهار مسوولینو ته: دې ولایت کې پانګه وال پانګونې ته وهڅوئ

د کندهار ښار یوه څنډه

د سوداګرۍ او پانګونې خونې په کندهار کې د خونې له مسوولینو غوښتي چې پانګه وال وهڅوي څو په دې ولایت کې پانګونه وکړي.

په هغه خبرپاڼه کې چې تېر ماښام د دې خونې له خوا خپره شوې ده، راغلي دي چې د سوداګرۍ او پانګونې خونې مرستیال یونس مومند دا غوښتنه د کندهار د سوداګرۍ او پانګونې خونې د مدیره پلاوي د رئیس د معرفي کولو پر مهال وکړه.

ښاغلي مومند د کندهار د سوداګرۍ او پانګونې خونه د جنوبي حوزې او ان د سیمې په اقتصادي وده کې مهم او ګټوره وبلله او وېې ویل چې د سوداګرو ستونزې باید حل شي چې د هغوی لپاره په دې ولایت کې د سوداګریزې راکړې ورکړې زمینه برابره شي.

د صادراتو او وارداتو ستونزې، له بانکو د پیسو اخیستل او د ویزو اخیستل هغه ستونزې وې چې د کندهار د سوداګرۍ او پانګونې خونې د مسوولینو او کندهاري پانګه والو او سوداګرو له خوا ورته اشاره وشوه او د حل غوښتنه یې وشوه.

خبرپاڼه وايي، د ناستې په پای کې د ښاغلي مومند له خوا د کندهار سوداګرو او پانګه والو ته ډاډ ورکړل شو چې ستونزې به یې ژر حل شي.

طالبان: کنګلې پیسې د نظامیانو لپاره نه، افغانانو لپاره ازادې کړئ

د طالبانو د حکومت رئیس الوزرا ملا محمد حسن اخُند

د طالبانو د حکومت رئیس الوزرا ملا محمد حسن اخُند نن په لومړنۍ یو ورځنۍ اقتصادي غونډه کې له نړیوالې ټولنې او امریکا وغوښتل چې د افغانستان کنګل شوې پانګه ازاده کړي.

نوموړي په دې ناسته کې وویل چې کنګل شوې پیسې د نظامیانو لپاره نه، بلکې د افغانانو لپاره ازادې کړئ.

د طالبانو د حکومت رئیس الوزرا غوښتنه وکړه چې له افغانانو سره دې بشري مرستې وشي.

ملا محمد حسن اخند دغه شان وویل چې که اقتصادي پروګرامونه په افغانستان کې په سم ډول عملي شي، دا هېواد له اقتصادي اړخه په ځان بسیا کېدلای شي.

د طالبانو د حکومت د رئیس الوزرا مرستیال مولوي عبدالسلام حنفي هم دې ناستې ته وویل چې د اقتصادي ستونزو حل د طالبانو د حکومت لومړیتوب دی او د اقتصادي ودې لپاره به د هېواد په کرنې، کانونو او بانکونو تمرکز وکړي.

نوموړي پانګه والو ته ډاډ ورکړ چې په سوداګریزو چارو کې به یې سیاسي مداخلې نه کېږي او کولی شي په افغانستان کې پانګونه وکړي.

د کارګرانو سازمان: نیم میلیون افغانانو خپلې دندې له لاسه ورکړي

ارشیف، جوزجان کې ځینې کارګران

د کارګرانو نړیوال سازمان ILO وايي، پر افغانستان د طالبانو له واکمنېدو وروسته له نیم میلیون زیاتو افغانانو خپلې دندې له لاسه ورکړي دي.

د ملګرو ملتونو اړوند دا سازمان ټولو وګړو ته د معیاري او مناسب کار د برابرولو لپاره هڅه کوي.

د اسوشیټېډ پرېس خبري اژانس د خبر له مخې ILO په یو راپور کې چې نن خپور شو ویلي، دې بحران د افغانستان اقتصاد له پښو غورځولی او د کار مارکېټ یې زیانمن کړی دی.

راپور زیاتوي چې روان وضعیت په تېره د ښځو او هغو خلکو لپاره سخت دی چې په کروندو، دولتي ادارو او د عامه خدماتو او رغنیزو چارو په برخو کې یې کار کاوه ځکه دې خلکو خپلې دندې له لاسه ورکړي او ډېرو یې خپلې تنخواه ګانې هم نه دي اخیستي.

د راپور له مخې په افغانستان کې ډېر شرکتونه په معلق حالت کې دي ځکه زرګونه افغانان هره ورځ له هېواده وځي.

د ILO د اټکل له مخې ښايي تر جون میاشتې پورې په افغانستان کې د ۷ لکو او نهو لکو ترمنځ دندې له لاسه ولاړې شي ځکه چې د کار فرصتونه له منځه تللي دي.

بدخشان کې واورو ښوئیدنې ۳ کسان وژلي

ارشیف، عکس تزئیني بڼه لري

په بدخشان ولایت کې برفکوچ درې کسان وژلي دي.

د بدخشان ولایت لپاره د طالبانو د اطلاعاتو او فرهنګ رییس معزالدین احمدي نن ازادي راډیو ته وویل چې دا پېښه پرون شپه د راغستان ولسوالۍ په خمبیل او پطیر سیمو کې شوې ده.

هغه زیاته کړه چې په پېښه کې پنځه نور کسان هم ټپیان شوي دي.

ښاغلی احمدي وايي چې د سیمې د اوسېدونکو او د طالبانو امنیتي ځواکونو د هڅو په نتیجه کې یو شمېر کسان چې تر واورو لاندې ټپیان شوي وو، هم ژغورل شوي او د ولسوالۍ کلینیک ته د درملنې لپاره لېږدول شوي دي.

باشلې: امنیت شورا دې افغانستان کې د بشري حقونو سرغړوونکو سره حساب وکړي

د ملګروملتونو د بشري حقونو کمېشنره میشل باشلې

د ملګروملتونو د بشري حقونو کمېشنره د دې سازمان له امنیت شورا غواړي چې په افغانستان کې د بشري حقونو له سرغړوونکو- په تېره له هغو کسانو سره چې د ښځو او ماشومانو حقوق تر پښو لاندې کوي، حساب کتاب وکړي.

میشل باشلې Michelle Bachelet دا څرګندونې پرون سې شنبه (د مرغومي ۲۸مه) د ملګرو ملتونو د امنیت شورا هغې ځانګړې غونډې ته وکړې چې د ناروې په بلنه د ښځو پر وړاندې د تشدد په اړه د بحث لپاره جوړه شوې وه.

هغې یادونه وکړه چې د ښځو او نجونو بنسټیزو حقونو ته نه پاملرنې، د افغانستان اقتصاد ته سخت زیان اړولی، په داسې حال کې چې دا هېواد له یوه بې ساري بشري بحران سره لاس ګرېوان دی.

مېرمن باشلې زیاته کړه چې پر افغانستان د طالبانو له واکمنېدو وروسته د بشري حقونو فعالانې، ژورنالېستانې، مدافع وکیلانې او قاضیانې له پرله پسې ګواښونو وروسته یا له هېواده وتلو ته اړې شوي دي او یا پټې ګرځي.

د ملګرو ملتونو د بشري حقونو لویې کمېشنرې له امنیت شورا وغوښتل چې افغانستان کې د ملګرو ملتونو د مرستو د سمون د دفتر یا یوناما په تشکیل کې د بشري حقونو یوه ځواکمنه څانګه رامنځته کړي.

تر ۱۹ کلونو کم عمره افغان کرکټ لوبغاړو پاپوا نیوګیني ته ماته ورکړه

د افغانستان یو کرکټ لوبغاړی

تر نولس کلونو کم عمره افغان کرکټ لوبغاړو په نړیوال جام کې پرون سې شنبه (د مرغومي ۲۸مه) ناوخته پاپوا نیوګیني لوبډلې ته د یو سل او پنځه دیرش منډو په توپیر ماتې ورکړه.

د افغانستان د کرکټ بورډ د رسنیو د برخې مسوول فرید هوتک د دې لوبې په اړه ازادي راډیو ته وویل: "د افغانستان نولس کلنو څخه کم عمره لوبډلې د نړیوال جام سیالیو په لړ کې په خپله لومړۍ لوبه کې پاپو نیوګیني لوبډلې ته ستر توپیر ماتې ورکړه او انشاالله په را روانو لوبو کې به هم د افغانستان لپاره د پام وړ لاسته راړونې ولري تر دې وروسته له پاکستان او زیمبابوې سره خپلې لوبې ترسره کوي."

افغان لوبډله به سبا له پاکستان سره او د شنبې په ورځ له زیمبابوې سره مسابقه وکړي.

د یو ورځنیو لوبو دا نړیوال جام په ویسټ انډیز کې د جنوري په ۱۴مه پیل شو چې د فبروري تر پنځمې دوام کوي.

نور راوښيه

XS
SM
MD
LG