د لاسرسۍ وړ لېنکونه

تازه خبر
یکشنبه ۳ سلواغه ۱۴۰۰ کابل ۰۸:۲۰

افغانستان

د فاریاب والي: په غورماچ او قیصار ولسوالیو کې بهرني طالبان د جګړو مشري کوي

د فاریاب والي وايي ددغه ولایت په غورماچ او قیصار ولسوالیو کې بهرني طالبان د جګړو مشري کوي. محمد الله بتاش آزادي راډیو ته وویل چې؛ افغان طالبان د بهرنیو وسله والو په همکارۍ سره د دغو سیمو د نا امنه کولو هڅي کوي.

"بهرني طالبان لکه ازبکان، پاکستانیان، چیچني او داسې نور له دوی سره شته. په دې وروستیو درېیو ورځو کې وسله والو مخالفینو هڅه کړې چې؛ د قیصار غورماچ لویه لاره د ترافیک لپاره وتړي؛ د پولیسو پوستې کلابند کړي او په دې توګه غورماچ ولسوالۍ له ګواښ سره مخامخ کړي."

بتاش زیاته کړه چې، په غورماچ او قیصار ولسوالیو کې د وسله والو مخالفینو شمیر تر امنیتي ځواکونو ډیر دی.

پر فاریاب سربیره په دې وروستیو کې په جوزجان او کندز ولایتونو کې هم د حکومت د وسله والو مخالفینو د هڅو راپورونه ورکړل شوي دي.

د ورځې تازه خبرونه دلته ولولئ

مسؤلین: د هرات-بادغیس پر لار هغه مسافر ژغورل شوي چې واوره کې ایسار وو

ارشیف؛ د سالنګ لویه لار

د طالبانو چارواکي وایي چې د هرات-بادغیس پر لویه لار هغه مسافر ژغورل شوي چې واوره کې ایسار پاته وو.

د طالبانو مرستیال ویاند احمدالله وثیق تېره شپه پر خپله ټویټرپاڼه لیکلي، د سبزک کوتل په سیمه کې بند دغه کسان د دوی د اړوندو مسؤلینو او د خلکو په مرسته ژغورل شوي او لار هم د تګ را تګ لپاره خلاصه شوې ده.

د دغو مسافرو شمېر ۲۰ تنه ښودل شوی و چې پرون یې موټر د واورو په توپانونو کې بند شوي وو.

طالبان لا هم وایي چې د ښځینه فعالانو د نېول کېدو په اړه خبر نه دي

د ښځو د حقونو فعالانې

په داسې حال کې چې په کابل کې د دوو ښځینه فعالانو په توقیفېدو نړیوالې ټولنې اندېښنې ښودلي، خو طالبان لا هم وایي چې پر دې پېښې خبر نه دي.

د طالبانو ویاند ذبیح الله مجاهد پرون فرانس پرېس اژانس ته ویلي:" موږ هم کابل کې د ځينو ښځو د توقيفېدو خبر اورېدلی او له ټولو امنیتي ارګانونو سره په تماس کې شوي یو، خو هېڅ ښځه توقیف شوې نه ده، ځیني وخت متاسفانه یو شمېر ښځې د دې لپاره داسې اوازې خپروي چې لوېدیځو هېوادونو کې پناه واخلي."

ښاغلي مجاهد بیا فرانس پرېس ته ویلي، دوی د هغو معترضانو د ځپلو او زنداني کولو حق لري چې قانون تر پښو لاندې کوي.

د بښنې نړیوال سازمان وړمه ورځ له طالبانو وغوښتل چې د ښځینه زندان د یوې لوړپوړې ښځینه کارکوونکې د توقیف په اړه څېړنه وکړي او که له دوی سره وي، خوشې دې کړي.

طالبان: د بادغیس سبزک سیمه کې ۲۵ کسان په واورو کې ګېر پاتي

ارشیف، عکس تزئیني بڼه لري

په بادغیس ولایت کې د طالبانو چارواکي وايي، په سبزک سیمه کې له تېرماښام لږ تر لږه ۲۵ کسان په واورو کې راګېر پاتې دي.

د بادغیس لپاره د طالبانو د اطلاعاتو او فرهنګ رئیس او د والي ویاند، مولوي باز محمد سروري، ازادي راډیو ته وویل، دغه کسان د بادغیس هرات پر یوه لار بند پاتې شوي.

نوموړي وویل: "پر دې لویه لار شااوخوا ۲۵ مساپر په څلورو موټرو کې راګېر پاتې دي چې همدا اوس له ځمکنۍ او هوايي لارې د ژغورنې عملیات روان دي."

ښاغلي سروري وویل، دغه کسان چې غوښتل یې له بادغیس څخه هرات ته لاړ شي، پر هغه لویه لار راګیر پاتې دي چې بادغیس له شمالي ولایتونو سره تړي.

په ځینو رسنیو کې د راګیرو پاتې شوېو کسانو شمېر ۶۰ ښوولی، خو د بادغیس چارواکي دغه شمېر نه تاییدوي.

وروستیو ورښتونو، سېلابونو او زلزلې افغانستان کې ۳۸ کسان مړه کړي

بادغیس کې یو کور د زلزلې له امله نړیدلی

د طبيعي پېښو پر وړاندې د مبارزې وزارت وايي، په بېلابېلو ولایتونو کې د مرغومي/جدي له ۱۳مې د ورښتونو، سېلابونو او زلزلې له کبله ۳۸ کسان مړه شوي دي.

د دغه وزارت ویاند، محمد نسیم حقاني نن رسنیو ته په لیږلي ویډیويي پیغام کې وویل: "تر اوسه تر لسو په زیاتو ولایتونو کې د زلزلې، توپانونو، ورښتونو او سېلابونو له کبله تر اوسه ۳۸ کسان شهیدان، ۵۴ تنه ټپیان او تر ۸۰۰۰ زیات استوګنځایونه قسمي یا بشپړ تخریب شوي دي. د طبیعي پېښو پر وړاندې د مبارزې وزارت له خوا د هر شهید کورنۍ ته ۵۰زره افغانۍ او د ټپیانو کورنۍ ته ۲۵زره افغانۍ ورکړل شوي دي."

ښاغلی حقاني وايي، د بادغیس- هرات لویه لار هم د درنو واورو له کبله تړل شوې چې د پرانیستلو هڅې یې روانې دي.

د طالبانو حکومت خلکو ته خبرداری ورکړی چې د وروستیو ورښتونو او سېلابونو له کبله له ضرورت پرته سفرونه ونه کړي، ځکه په زیاتو ولایتونو کې لویې لارې تړل شوي دي.


په بلخ کې وزلوبه وشوه

آرشیف- عکس تزئیني بڼه لري

په بلخ ولایت کې وزلوبه وشوه.

د افغانستان د بدني روزنې او ورزش ریاست په خپل فیسبوک پاڼه کې لیکلي چې یادې سیالۍ له بلخ ولایت د پنځو ولسواليو لوبغاړو په ګډون د یوې ورځې لپاره 'پرون' ترسره شوې.

د دې ریاست د معلوماتو له مخې، عبدالصبور پهلوان او ګلبدین پهلوان د دې سیالیو اتل چاپندازان ونومول شول او د نغدي جایزیو ترڅنګ ورته ستاینلیکونه هم ورکړل شول.

د بدني روزنې او ورزش ریاست د دغو سیالیو موخه د کابل لیګ ته د بلخ ولایت د چاپندازانو چمتو والی ښودلی دی.

ټاکل شوې د کابل لیک د سړې هوا په کمېدو سره د راتلونکي یو میاشت په لړ کې په کابل کې پیل شي.

د افغانستان کرکټ بورډ غوره لوبغاړو ته په افغانیو جایزې ورکړې

د دې لوبې غوره لوبغاړی د افغان لوبډلې لوبډل مشر حشمت الله شاهدي ونومول شو

د افغانستان کرکټ بورډ له هالنډ سره په پرونۍ سیالۍ کې د لوبې غوره لوبغاړو ته په افغانیو جایزې ورکړې.

د کرکټ بورډ دغه ګام په ټولنیزو رسنیو کې د ورزشکارانو له خوا ستایل شوی او د ورزش نورې ادارې هم ورته ګام ته تشویق کړی.

د افغانستان د کرکټ بورډ‌ ویاند فرید هوتک د شنبې په ورځ(د سلواغې ۳مه) ازادي راډيو ته وویل، دا ګام د افغانیو د دودولو لپاره پورته شوی.

افغانستان د جمعې په ورځ له هالنډ سره درېیو پنځوس اووریزو نړېوالو لوبو لوبړلۍ پیل کړه.

افغانستان په خپله لوموړنۍ لوبه کې هالنډ ته په ۳۶ منډو ماتې ورکړه او لومړۍ بریا یې په خپل نوم کړه.

د دې لوبې غوره لوبغاړی د افغان لوبډلې لوبډل مشر حشمت الله شاهدي ونومول شو چې د دې لوبړلۍ د ملاتړي 'سپانسر' له خوا ورته ۴۰ زره افغانۍ جایزه ورکړل شوه.

د نورستان ځینې اوسېدونکي: د مرستو وېش کې توپيریز چلند کېږي

نورستان کې له ځینو خلکو سره شوې مرسته

د نورستان یو شمیر اوسېدونکي شکایت کوي چې د مرستو په وېش کې ورسره توپيریز چلند کېږي.

دوی وايي، د سروې مامورین چې څوک پېژني د هغوی نومونه لیکي او مرستې ورسره کوي او په وینا یې د چا واسطه او پېژندګلوي نه وي هغوی له هر ډول مرستو بې برخې کیږي.

د منډول ولسوالۍ قومي مشر خان محمد خان یې په اړه وايي: "زموږ ولسوالۍ کې۴۰ سلنه هغو کسانو مرستې اخستي چې د کورونو سړک سره نږدې پراته دي او یا هم د سروې کوونکو سره پېژندګلوې لري. د سړک له غاړې بل خوا نه دي تللې."

د منډول په څېر د نورستان له نورو سیمو هم د سروې کوونکو او د مرستو له وېشونکو ورته شکایتونه کېږي.

دوی له طالب چارواکو او موسساتو غواړي چې داسې کسان په دندو وګماري چې خپلې دندې په سمه توګه ترسره کړي او د خپل پردي توپیر ونه کړي.

نورستان کې طالب چارواکي هم مني چې په ترسره شوېو سروې ګانو کې یاده ستونزه موجوده وه.

د دې ولایت لپاره د طالبانو مطبوعاتي مسول مولوی سمیع الحق حق بیان ازادي راډیو ته وویل: "نورستان کې د بېلابېلو موسساتو له خوا مرستې شوي، د وېش په اړه یې ډېر شکایتونه راغلي، زموږ له خوا ټاکلي پلاوي ته معلومه شوه چې ځینو سیمو کې توپيرېز چلند شوی او د دغه ډول چلند د بندیدو امر يې کړی."

په نورستان کې په داسې حال کې د مرستو په وېش کې د توپیر چلند څخه خلک شکایت کوي چې په یاد ولایت کې د یونېسف له خوا په ترسره شوې سروې کې ۱۵۰۰۰کورنۍ مستحقې ګڼل شوي چې هرې کورنۍ ته ۲۷۵ ډالر ورکول کېږي او د یادې مرستې وېش اوس مهال دوام لري.

نورستان د هېواد په ختیځ کې لېرې پروت، غرنی او یخ ولایت دی چې اوسېدونکي يې لږه ځمکه لري او تل د خوراکي موادو کمي سره مخ وي.

یوناما د دوو افغان ښځینه فعالانو پر لادرکۍ اندېښنه وښوده

پرون د بښنې نړیوال سازمان له طالبانو د عالیې عزیزي په نوم د نیول شوې پخوانۍ چارواکې د بې قید و شرطه خوشې کېدو غوښتنه وکړه.

د ملګرو ملتونو مرستندوی ماموریت یا یوناما د دوو افغان ښځینه فعالانو پر لادرکۍ اندېښنه وښوده.

یوناما نن په خپل ټویټر کې لیکلي، ملګري ملتونه د دوو ښځینه فعالانو تمنا زریابي پریاني او پروانې ابراهیمخېل پر لادرکۍ سخته اندېښنه لري.

د یوناما په ټویټ کې ویل شوي چې د راپورونو له مخې دغه دوې ښځینه فعالانې د چهارشنبې ناوخته له خپلو کورونو نیول شوي دي.

د ملګرو ملتونو دغې ادارې له طالبانو غوښتنه کړې ده چې د دغو ښځینه فعالانو د ځای ځایګي په اړه معلومات ورکړي او د ټولو افغانانو حقونه خوندي کړي.

طالبانو د دغو ښځینه فعالانو د برخلیک په اړه تازه تبصره نه ده کړې، خو پرون د بښنې نړیوال سازمان له طالبانو د عالیې عزیزي په نوم د نیول شوې پخوانۍ چارواکې د بې قید و شرطه خوشې کېدو غوښتنه وکړه.

عالیه عزیزي چې په تېر حکومت کې د هرات د ښځینه زندان مشره وه، د ۲۰۲۱م کال د اکتوبر میاشتې پر دویمه نېټه کار ته پر لار ونیول شوه.

یونېسف: افغانستان کې د اساسي توکو د وېش لپاره زموږ هڅې روانې دي

ارشیف، عکس تزئیني بڼه لري

د ماشومانو د ملاتړ لپاره د ملګرو ملتونو مرستندوی صندوق یا یونېسف وايي، په افغانستان کې د اساسي توکو د وېش لپاره د دوی هڅې روانې دي.

یونیسف نن شنبه په خپل رسمي ټویټر کې له یوه متن سره یوه ویډیو هم خپره کړې چې وايي، د ژمي له سختېدو سره د دوی ټیمونه د خیمو، کالیو او بړستونو په ګډون د ضروري مرستو په رسولو بوخت دي.

دغه اداره وايي، یوازې یې په هرات ولایت کې پر ۱۷۰۰ کورنیو دغه مرستې وېشلي دي.

د ملګرو ملتونو سرمنشي انتونیو ګوتیریش د پنجشنبې په ورځ په یوه مرکه کې وویل، دا ډېره مهمه ده، چې له افغانستان سره بشري مرستې لا زیاتې شي، ځکه افغانان په داسې وضعیت کې دي، چې د لوږې له کبله یې ژوند ته د مرګ خطر پېښ دی.

انتونيو ګوتیریش په خپلو خبرو کې وویل، د افغانستان نیمايي وګړي بشري مرستو ته سخته اړتیا لري او په کاد ده چې د اقتصادي پیاوړتیا لپاره له دغه هېواد سره د نقدو پیسو مرستې وشي.

د پکتیا سید کرم ولسوالۍ کې د ځنګلونو ۵۰۰ هکتاره سیمه رغول کېږي

د افغانستان په نقشه کې د پکتیا ولایت

د پکتیا ولایت په سید کرم ولسوالۍ کې د ځنګلونو پنځه سوه هکتاره سیمه رغول کېږي.

د طالبانو د کرنې اوبو لګولو او مالدارۍ وزارت ویاند مستعین عمري رسنیو ته په استول شوي خبرپاڼه کې ویلي چې د پکتیا ولایت د سیدکرم په ولسوالۍ کې د ځمکې او ځنګلونو د تلپاتې مدیریت پروژې له لوري د ځنګلونو ۵۰۰ هکتاره له منځه تللې سیمه بېرته رغول کېږي.

دغه خبرپاڼه چې د جمعې په ورځ ناوخته خپره شوې، په کې ویل شوي چې یاده سیمه به د ځڼغوزيو, چهار مغزو او بادامو نيالکيو په ایښودلو سره بېرته ورغول شي.

په خبرپاڼه کې ویل شوي، د دې پروژې په پلي کېدو سره به د سیمې زیات شمېر اوسېدونکو ته لنډ مهاله د کار زمینه هم برابره شي.

د سالنګ لویه لار، درنو واورو او توپانونو بنده کړې

آرشیف، د سالنګ لویه لار

د سالنګ لویه لار، درنو واورو او سخت توپان له تېرې شپې راهیسې بنده کړې ده.

د سالنګونو د ساتنې او څارنې د ریاست ویاند سمیع الله ولي زاده نن شنبه (د سلواغې ۳مه) سهار ازادي راډیو ته وویل چې خلکو ته د سر او مال د زیان اوښتو په پار دا لار د وړو او غټو موټر پر مخ تړل شوې ده.

ولي زاده زیاته کړه، د هوا د وړاندوینو له مخې به د ورځې په اوږدو کې په سالنګونو کې وضعیت همداسې وي او تر هغو چې هوا ښه نه شي لار به بنده وي.

د افغانستان د کرکټ ملي لوبډلې هالنډ ته ماتې ورکړه

د افغانستان د کرکټ ملي لوبډلې د هالنډ له لوبډلې سره

د افغانستان د کرکټ ملي لوبډلې پرون جمعه (د سلواغې ۱) له هالنډ (نېدرلنډ) سره د یو ورځنیو لوبو د لړۍ لومړۍ سیالي وګټله.

د قطر په پلازمېنه دوحه کې د دې یو ورځنیو نړیوالو ۵۰ اووریزو لوبو د لړۍ کوربه افغانستان دی.

د افغانستان د کرکټ بورډ ویاند فریدهوتک له بېګانۍ لوبې وروسته له ازادي راډیو سره په خبرو کې دا بریا مهمه وبلله: "د افغانستان د کرکټ ملي لوبډلې په لومړۍ پنځوس اوویزه لوبه کې د نيدرلنډ لوبډلې ته د شپږو ویکټو په توپیر ماتې ورکړه. د یادونې وړ ده چې دا لوبې د دواړو هېوادونو لپاره خورا مهمې دي. ځکه له همدې لوبو څخه لوبډلې کولی شي چې نېغ په نېغه نړیوال جام ته لاره پیدا کړي."

له هالنډ سره د افغانستان دوه نورې پنځوس اووریزې سیالۍ سبا او بل سبا په پام کې دي.

په همدې حال کې له ۱۹ کلونو د کم عمره لوبغاړو په نړیوال جام کې افغان لوبډله نن د زیمبابوې پر وړاندې لوبه کوي. افغانستان او زیمبابوې دواړه په دې جام کې یوه بریا او یوه ناکامي لري.

د غره ښوېیدنې خطر؛ طالبان:د کابل‌-جلال اباد لار وتړل شوه

آرشیف- عکس تزئیني بڼه لري

په ننګرهار کې د طالبانو سیمه ییز چارواکي د کابل- جلال اباد د لویې لارې د بندېدو خبر ورکوي.

د ننګرهار د امنیه قوماندانۍ ویاند حافظ عبدالبصیر زابلي تېر ماښام ازادي راډیو ته وویل، د څو ورځو مخکې په څېر د سروبي ولسوالۍ په ورېښمين تنګي سیمه کې د غره د ښوییدو خطر و، نو ځکه دوی دا لاره بنده کړه.

زابلی وايي: "د دې امکان شته چې غر بیا راوښویېږي نو ځکه مو خلکو، موټر چلوونکو او د لویې لارې مسافرو ته خبر ورکړ چې تاسو انتظار شئ ترڅو مشکل حل شي او له هغه وروسته به اجازه درکړو چې پر دې لاره تګ راتګ وکړئ."

ښاغلي زابلي زیاته کړه چې د کابل، جلال آباد او لغمان د لویو لارو په دروازو کې هم کسان ګومارل شوي دي چې د لویې لارې د جوړېدو تر وخته پر دې لاره د موټرو تګ راتګ ته اجازه ورنه کړي.

د وریښمین تنګي د سورۍ تیږې په سیمه کې څو ورځې مخکې هم غر وښویید چې یو موټر یې لاندې کړ او پنځه کسان یې ووژل.

اروپايي ټولنه: کابل زموږ د دفتر د پرانیستې هدف پر بشري وضعیت څارنه ده

د اروپايي ټولنې بیرغ

اروپايي ټولنه وايي چې په کابل کې یې د دفتر پرانیستل، د طالبانو د سرپرست حکومت د رسمیت پېژندنې په معنی نه دی.

د اروپايي ټولنې د بهرني کمیسیون ویاند پیتر ستانو پرون جمعه (د سلواغې په لومړۍ نېټه) وویل، په کابل کې د اروپايي ټولنې ډپلوماتیک ماموریت د ډېر لږ فزیکي حضور په بڼه یوازې د مرستو د رسولو او د افغانستان پر بشري وضعیت د څارنې په هدف پرانیستل شوی دی.

د ښاغلي ستانو په وینا د اروپايي ټولنې دې اقدام ته باید د طالبانو د حکومت د رسمیت پېژندنې په سترګه ونه کتل شي.

د کابل له سقوط وروسته دا لومړی ځل دی چې په افغانستان کې د لویدیځو هېوادونو استازولي پرانیستل کېږي.

اروپايي ټولنې چې ۲۷ غړي لري، د سې شنبې په ورځ د مرغومي په ۲۸مه اعلان وکړ چې افغانستان کې له بې وزلو خلکو سره د مرستې په هدف د څه باندې ۳۰۰ میلیونه ډالرو په ارزښت رغنیزې پروژې عملي کوي.

دې ټولنې ویلي چې دا بسپنه به تر ډېره د روغتیا، پوهنې او له بې ځایه شوېو کورنیو سره د مرستې برخو ته ځانګړې وي او د ملګرو ملتونو د دوو اړوندو ادارو- د خوړو د نړیوال پروګرام او د روغتیا د نړیوال سازمان له خوا به ولګول شي.

د بښنې نړیوال سازمان: طالبان دې عالیه عزیزي خوشې کړي

عالیه عزیزي

د بښنې نړیوال سازمان له طالبانو د عالیې عزیزي په نوم د نیول شوې پخوانۍ چارواکې د بې قېد او شرطه خوشې کېدو غوښتنه وکړه.

عالیه عزیزي چې په تېر حکومت کې د هرات د ښځینه زندان مشره وه، د ۲۰۲۱م زیږديز کال د اکتوبر میاشتې پر دوهمه نېټه کار ته پر لار ونیول شوه.

د بښنې نړیوال سازمان نن جمعه په یوه اعلامیه کې د طالبانو له چارواکو وغوښتل چې ژر تر ژره د عالیې عزیزي د نیول کېدو موضوع وڅېړي.

دغه سازمان له طالبانو وغوښتل چې مېرمن عزیزي ژر تر ژره به کوم شرط پرته له توقیفه خوشې کړي.

د طالبانو حکومت نه ده منلې چې مېرمن عزیزي دې د دوی له خوا نیول شوي وي.

تردې مخکې په کابل کې ځینو ښځو د اعتراضیه غونډو پر مهال هم د عالیې عزیزي د خوشې کېدو غوښتنه کړې وه.

د عالیې عزیزي ورور، بشیر عارفي ازادي راډیو ته ویلي چې خور یې له ۱۴ کلونو راهیسې د پولیسو په بېلابېلو څانګو کې کار کړی دی.

نور راوښيه

XS
SM
MD
LG