د لاسرسۍ وړ لېنکونه

تازه خبر
شنبه ۹ سلواغه ۱۴۰۰ کابل ۰۶:۴۷

افغانستان

اوریاخېل: د پکتیا په ډنډ پټان ولسوالۍ کې ۲۰ وسله وال وژل شوي

د پکتیا چارواکي وايي، چې په ډنډ پټان ولسوالۍ کې پر یوې سرحدي پوستې د وسله والو مخالفینو په حمله کې څه باندې شل مخالفین وژل شوي دي.

د پکتیا امنیه قومندان مل پاسوال زلمي اوریاخیل آزادي راډیو ته وویل؛ چې شاوخوا سلو وسله والو نن سهار څلور بجې پر یادې پوستې حمله وکړه.

د یو بل خبر له مخې، دفاع وزارت وايي په تیرو ۴۸ ساعتونو کې په بیلابیلو تصفیوي عملیاتو کې پنځه ویشت وسله وال مخالفین وژل شوي او اوولس نور ټپیان دي.

د دفاع وزارت مطبوعاتي دفتر وايي؛ دغه عملیات په لغمان، لوګر، میدان وردګو، کندز او کابل ولایتونو کې شوي.

اعلامیه زیاتوي چې په همدې موده کې د ملي اردو پنځه منسوبین هم د ماینونو په چاودنو کې وژل شوي.

اخوا د فاریاب چارواکي وايي، په قیصار او غورماچ ولسوالیو کې د وسله والو طالبانو پر ضد په عملیاتو کې اته وسله وال مخالفین وژل شوي او دیارلس نور هم ټپیان دي.

وسله والو طالبانو د دغو نښتو او حملو په اړه تر اوسه څه نه دي ویلي.

د ورځې تازه خبرونه دلته ولولئ

'نړیوال خوراکي پروګرام' خوست کې ځوانان په مسلکي زده کړو سمبالوي

خوست کې د نړیوال خوراکي پروګرام پرانیستنه

د جنوري په ۲۹مه د نړیوال خوراکي پروګرام WFP په مالي مرسته خوست کې ۵۰۰ نارینه او ښځینه وو ته د حرفوي او مسلکي زده کړو ۶ میاشتنۍ پروګرام پیل شو.

د دې پروګرام ۳۵۰ ځوانان د خوست د مرکز اوسیدونکي او ۱۵۰ تنه يې په ګلان کېمپ کې مېشت وزیرستاني کډوال دي چې د دې پروګرام د ټولو ګډوالو له ډلې ۲۴۰تنه ښځې دي.

د خوست اقتصاد رئیس شهزاده پېر یې په اړه وايي:"د WFP په مالي ملاتړ ۵۰۰ خوستي ځوانانو او خویندو ته د حرفوي زده کړو د مراسمو افتتاح ده، په دې پروګرام کې به په مختلفو برخو کې خویندو او وروڼو ته زده کړې ورکول شي، لکه موټر سایکل جوړونه، موبایل جوړونه، اچارجوړونه، خیاطي او نورو برخو کې دوی ته حرفوي زده کړې ورکړل شي، دا پروګرام به د ۶ میاشتو لپاره وي، خو دوامداره به وي. "

مسوولین وايي، د برنامې ټولو ۵۰۰ ګډونوالو ته د میاشتې ۷ زره افغانۍ معاش په پام کې نیول شوی او د روزنې لپاره يې ۵۰ تنه استادان هم ګمارل شوي دي.

د دې برنامې پلي کېدنه افغان پرمختیايي او مسلکي موسسې پرغاړه ده، مسوول يې رشاد طاهري د برنامې د پرانېستې ګډونوالو ته په خپلو خبرو کې وویل، دا برنامه په اصل کې د فقر د کچې د ټیټولو لپاره طرحه شوې ده.

د خوست اوسیدونکي او د کلیوالي شوراګانو غړي یاده برنامه د خلکو د اوږدمهاله ځان بسیاینې پر لور یو ښه ګام بولي او زیاتوي چې دې برنامې ته مستحق کسان جذب شوي دي.

د یوې کلیوالي شورا مشرظاهر شاه وايي، د برنامې د ګډونوالو په خاطر دقیقه سروې شوې او ټاکلی پلاوی کلي په کلي او کور په کور ګرځیدلي او تر وسه يې مستحق کسان جذب کړي دي.

په خوست کې د خوړو نړیوال پروګرام داسې مهال سلګونو کسانو ته د حرفوي زده کړو او د ۶ میاشتو لپاره د یوه اندازه معاش برنامه پیلوي چې د یاد پروګرام مشر د افغانستان روان اقتصادي وضعیت کړکېچن بللی دی.

نوموړي ویلي، لوږه او قحطي د شااوخوا ۲۳ میلیونه افغانانو تر کورونو رسیدلې چې د افغانستان د وګړو څه باندې نیمايي برخه جوړوي.

هغه د نړۍ له شتمنو هېوادونو غوښتي چې د یوه بشري بحران د مخنیوي په پار له افغانستان سره مرستې زیاتې کړي.

د کرکټ له ۱۹کلونو نه کم عمره افغان لوبغاړي هند او بنګلدیش سره مخ کېږي

د کرکټ له ۱۹کلونو نه کم عمره افغان لوبغاړي

د افغانستان د کرکټ د ۱۹ کلونو څخه د کم عمره لوبغاړو د نړیوال جام په وروستي منځ لوبه کې هندوستان او بنګلدیش لوبډلې سره مخامخ کېږي.

د نن ورځې ګټونکې لوبډله به د نیمه پایلوبې لپاره له اسټرالیا سره مخ کېږي.

اسټرالیا پرون پاکستان ته د ۱۱۹منډو په توپیر ماتې ورکړه او پاکستان یې له دغه سیالیو بهر کړ.

افغانستان او انګلستان له وړاندې نیمه پایلوبې ته لاره کړې ده او د دواړو ترمنځ لوبه به د راتلونکې فبرورۍ په لومړۍ نېټه ترسره شي.

بدخشان کې وزلوبه پای ته ورسېده

وزلوبه

په بدخشان ولایت کې وزلوبه پای ته ورسېده.

د طالبانو د ملي المپېک کمېټې په یوې خبرپاڼه کې ویلي، دغه سیالۍ چې د بهارک ولسوالۍ په ورزشي لوبغالي کې د څلورمې دورې تر سرلیک لاندې پیل شوې وې، د جمعې په ورځ ناوخته پای ته ورسېدې.

د دې کمېټې د معلوماتو له مخې، دې سياليو کې د کشم، ارګو، تاشکان، خواب، يفتل، بهارک، شهدا، جرم، وردوج او فيض اباد ولسواليو ورزشکارانو برخه اخېستې وه، د بهارک لوبغاړو ته د ښې لوبو په کولو سره جایزې هم ورکړل شوې.

د طالبانو د ملي المپیک کمېټې د خبرپاڼې په حواله، یادې سيالۍ د وزلوبې د غوره ليګ سياليو ته چاپندازانو د چمتو کولو په موخه پيل شوې وې.

د وزلوبې غوره لیګ ټاکل شوې د همدې لمریزې میاشتې تر پایه په کابل کې پیل شي.

کندز کې د ۸ ولایتونو د ورزشکارانو ترمنځ د رزمي ورزشونو سیالۍ وشوې

په کندز ولایت کې د اتو ولایتونو د ورزشکارانو ترمنځ د رزمي ورزشونو سیالۍ وشوې

په کندز ولایت کې د اتو ولایتونو د ورزشکارانو ترمنځ د رزمي ورزشونو سیالۍ وشوې.

د طالبانود بدني روزنې او ورزش ریاست په خپل فیسبوک پاڼه کې لیکلي، یادې سیالۍ د کابل، پروان، بلخ، سمنګان، بغلان، تخار، بدخشان او کندز ولایتونو د ورزشکارانو ترمنځ د 'اېم.اېم.اې' په سبک کې ترسره شوې.

د دې ریاست د معلوماتو له مخې، دغه سیالۍ د اماتور او پروفېشنل په برخه کې د ۳۴ لوبغاړو ترمنځ په دوو کټګوريو 'ځوانان او لويان' په کچه د عقابان نوري په تمریني کمپ کې د يوې ورځې لپاره ترسره شوې.

د یاد ریاست د معلوماتو پر بنسټ، د دې سیالیو په پای کې د کندز ولايت ورزشکارانو د درې کمربندونو او ۸ مډالونو په اخیستلو سره لومړی مقام او ورپسې د کابل او بغلان ولایتونو په ترتيب سره دوهم او درېيم ځایونه خپل کړ .

د دې لوبو هدف ورزش ته د ځوانانو هڅول په ګوته شوي دي.

معید یوسف په کابل کې له عبدالسلام حنفي او امیرخان متقي سره وکتل

معید یوسف د یوه لوړ پوړي پاکستاني دولتي پلاوي په مشرۍ نن کابل ته ورسېد

د پاکستان د ملي امنیت سلاکار معید یوسف په کابل کې د طالبانو د حکومت د رییس الوزرا له مرستیال عبدالسلام حنفي او د بهرنیو چارو له سرپرست وزیر امیرخان متقي سره وکتل.

په کابل کې د پاکستان سفیر منصور احمد خان د دې غونډو په اړه پر خپل ټوېټر جزییات خپاره کړي.

هغه زیاته کړه چې دغه لوړپوړي پاکستاني چارواکي د طالبانو له مشرانو سره د دوه اړخیزو اړیکو په پياوړتیا، سوداګرۍ او اقتصادي مسالو خبرې کړي دی.

معید یوسف د یوه لوړ پوړي پاکستاني دولتي پلاوي په مشرۍ نن کابل ته ورسېد او په هوايي ډګر کې یې د طالبانو د سوداګرۍ د وزیر نورالدین عزیزي له خوا یې هرکلی وشو.

نوموړي د پنجشنبې په ورځ کابل ته تر سفر مخکې ویلي و چې د افغانستان خاوره لا هم د پاکستان پر ضد کارول کېږي.

خو د طالبانو د حکومت د ویاند مرستیال بلال کریمي د یوسف د پرونیو څرګندونو په غبرګون کې نن ازادي راډیو ته وویل، د افغانستان خاوره به د هېڅ هېواد پر ضد ونه کارول شي.

ښاغلي کریمي زیاته کړه چې د پاکستان اندېښنه د هغوی د کورنیو ستونزو له امله ده.

امریکا افغانانو ته د فولبرایټ بورسیې لغوه کړې

ارشیف، عکس تزئیني بڼه لري

د امریکا د بهرنیو چارو وزارت د ۲۰۲۲ او ۲۰۲۳ تحصیلي کال لپاره افغانانو ته د فولبرایټ بورسیې لغوه کړي.

امریکایي رسنیو د بهرنیو چارو وزارت په حواله راپور ورکړی چې جمعه ناوخته هغو ۱۴۰ افغان محصلینو ته چې څو میاشتې یې د بورسیو کار ځنډيدلی و، د دې پروسې د درېدو ایمیل کړی دی.

دغو بورسیو ته په تمه د افغان ځوانانو له ډلې عبیدالله کریمي ازادي راډیو ته وویل: "دوی نه غواړي چې دا پروګرام مخته یوسي. دا موضوع یې سیاسي کړې ده. دوی دې باید د ځوانانو له راتلونکې سره لوبې ونه کړي. دا زحمتونه چې ځوانانو ایستلي باور وکړئ ډېر مشکل دي."

د امریکا د بهرنیو چارو وزارت په ایمیل کې راغلي: "د لویو خنډونو له امله چې د تجربو د خوندي تبادلې په برخه کې زموږ مخه نیسي د ۲۰۲۲ او ۲۰۲۳ کال په مخه د افغانستان لپاره د فولبرایټ پروګرام مخته نه ځي."

د پاکستاني صدراعظم د ملي امنیت سلاکار کابل ته تللی

د پاکستاني صدراعظم د ملي امنیت سلاکار معید یوسف

د پاکستاني صدراعظم د ملي امنیت سلاکار معید یوسف له یوه‌ پلاوي سره کابل ته تللی.

د طالبانو د حکومت یوه چارواکي ازادي راډیو ته د ښاغلي معید سفر تایید کړ او ویې ویل، هغه به په بېلابېلو موضوعاتو له حکومتي چارواکو سره خبرې وکړي.

ښاغلي یوسف پاکستاني رسنیو سره خبرو کې کابل ته د خپل سفر د هدف په اړه ویلي و، طالب چارواکو سره به په ډېورنډ کرښه د اغزن تار د غځولو، سیاسي او اقتصادي اړیکو او د بشري مرستو په دوام خبرې وکړي.

نږدې دوه اوونۍ وړاندې کابل ته د معید‌ی وسف سفر لغوه شو.

کابل ته د هغه له سفر وړاندې لاریون هم وشو او لاریون کوونکو له طالبانو غوښتل چې معید یوسف ته په هوايي ډګر د ښکته کېدو اجازه ور نه کړي.

خو وروسته طالبانو د دې لاریون څو مخکښ مشران ونیول او زنداني یې کړل.

جوزجان کې ۲۵۰ کورنۍ د څښاک له پاکو اوبو برخمنې شوې

ارشیف، عکس تزئیني بڼه لري

په جوزجان ولايت کې ۲۵۰ کورنۍ د څښاک له پاکو اوبو برخمنې شوې.

د طالبانو د کليو او پراختيا وزارت په يوه خبرپانه کې چې د جمعې په ورځ ناوخته يې خپره کړې ويلي، ياده پروژه د'اکټېد' او'يونېسف' ادارو په مالي همکارۍ د ياد ولايت په مرکز شبرغان کې پلې شوې.

په خبر پاڼه کې ويل شوي چې په يادې پروژې شااوخوا ۲ ميلیونه افغانۍ لګښت راغلی.

دا په داسې حال کې ده چې اکټېډ او يونېسف له دې وړاندې په ياد ولايت کې شااوخوا ۴۰۰۰ کورنیو ته د څښاک پاکو اوبو زمینه برابره کړې او د وزارت د‌ معلوماتو له مخې، په روان کال کې به هم يادې ادارې لس زره کورنیو ته د څښاک پاکې اوبو زمينه برابره کړي.

له جوزجان ولايت نه د څښاکو اوبو د کمښت راپورونونه تل ورکړل شوي او دليل يې هم دغه ولايت کې د نفتي مواد څاګانې په ګوته شوي.

له بلې خوا بيا د يادې ستونزې د حل لپاره په تېر حکومت هم په ځلونو د اقدام خبره وشوه، خو پايله یې روښانه نه وه.

طالبان: کندز کې پر ۵۱۵ جريبه ځمکه ميوه لرونکي بڼونه جوړ شوي

ارشیف، عکس تزئیني بڼه لري

په کندز ولایت له تېرو پنځو مياشتو راهيسې شااوخوا پر ۵۱۵ جريبه ځمکه ميوه لرونکي بڼونه جوړ شوي دي.

د طالبانو د کرنې مالدارۍ او اوبو لګولو وزارت بېګاه ناوخته په يوه خپره کړې اعلاميه کې ويلي چې د کرنې سرپرست وزير دغه ولايت ته په خپل رسمي سفر کې له ياد ولايت څخه په تېرو ۵ مياشتو کې د حکومت خزانې ته د شااوخوا ۹۰ ميليونه افغانۍ د عوايد د ورتک خبره هم کړې.

په خبرپاڼه کې د وزير په حواله ويل شوي چې ياد ولايت کې د ځمکو له غاصبينو سره د چټکې مبارزې په ترڅ کې شااوخوا ۵۰۰۰ جريبه ځمکه له غصبه خلاصه شوې او د حکومت په واک کې راغلې.

د کرنې وزير په داسې کې په کندز ولايت کې د کرنې برخه کې د‌ پرمختګ خبره کوي چې له ياد ولايته په تېره کې د خپاره شوېو راپورونو پر بنسټ کروندګر اصلاح شوېو تخمونو او لازمې ماشينرۍ ته د نه لاسرسي په صورت کې له سختې ستونزې سره مخ دي.

معید یوسف: د افغانستان سرحدي سیمو کې منظمې ترهګرې ډلې فعالیت کوي

د ډیورنډ کرښه

د پاکستان د ملي امنیت سلاکار معید یوسف ادعا کړې چې افغان خاوره لا هم د دوی په ضد کارول کېږي.

یوسف پرون د پاکستان د ملي شورا د بهرنۍ کمېټې په یوه غونډه کې دا تور پورې کړی.

هغه زیاته کړې چې د افغانستان په سرحدي سیمو کې منظمې ترهګرې ډلې فعالیت کوي او زیاته کړې یې ده چې د پاکستان دولت جنګ ځپلي افغانستان ته د طالبانو د بیا راتګ په اړه بشپړ خوښ نه دی.

د طالبانو مرستیال ویاند بلال کریمي بیا د یوسف د څرګندونو په غبرګون ازادي راډیو ته وویل، د افغانستان خاوره د هېچا په ضد نه کارول کېږي او د پاکستان دا اندېښنې د کورنیو ستونزې پایلې دي.

د افغان خبریالانو په اړه له طالبانو د رینا امیري غوښتنه

د افغانستان د ښځو او بشري حقونو په برخه کې د امریکا ځانګړې استازې رینا امیري

د افغانستان د ښځو او بشري حقونو په برخه کې د امریکا ځانګړې استازې رینا امیري ویلي، طالبان دې هغسې چې بهرنیو ژورنالېستانو سره ښه چلېږي افغان خبریالانو سره هم مخکې لاړ شي.

اغلې امیري په دې اړه څو ساعته مخکې ټويټ کړی دی.

هغې زیاته کړې چې افغان خبریالانو پر وړاندې د طالبانو دا چلند به وښيي چې هغوی افغانانو ته له حساب ورکونې نه ډاریږي.

د افغانستان د ښځو او بشري حقونو په برخه کې د امریکا ځانګړې استازې رینا امیري د افغانستان ازادې رسنۍ د تېرو شلو کلونو یوه ښه لاسته راوړنه بللې ده او ټینګار یې کړی چې هغوی باید له کومې وېرې پرته ازادانه فعالیت وکړي.

رینا امیري دا ټويټ د هغو غبرګونو په دوام کړی چې د طالبانو له خوا تېره اوونۍ د یوه ډله افغان خبریالانو د غونډې مخه ونیول شوه.

مایکل کېټېنګ: د افغانستان هېرول به افغان ملت په سوالګرو بدل کړي

آرشیف-کابل کې یو شمېر مېرمنې

د افغانستان لپاره د بریتانیا پخواني مرستیال استازي مایکل کېټېنګ خبرداری ورکړ، که نړیوال افغانستان هېر کړي نتیجه به یې ډېره بده وي.

اسوشیټېډ پرېس اژانس د مایکل کېټنېګ هغه خبرې رااخیستې دي چې د بریتانیا سکای نیوز ته یې کړي.

دی وایي: "زما په فکر د افغانستان د خلکو پرېښودل او خوشې کول به دا ملت په سوالګرو بدل کړي چې دا نه د خپله افغانانو په ګټه دی، نه د سیمې او نه هم د نړیوالې ټولنې. دا به نه یوازې په بشري برخه کې بلکې په امنیتي برخه کې هم بدې پایلې ولري."

ښاغلي کېټېنګ زیاته کړه، افغانانو ته شا اړول به د لا زیاتو مهاجرتونو سبب شي او د مخدرو موادو کاروبار به دغه هېواد کې زیات شي. د ده په باور داسې لارې چارې باید ولټول شي چې د افغانستان اقتصادي څرخ ورسره وګرځي.

د خوړو نړیوال پروګرام د چهارشنبې په ورځ د روان کال په ترڅ کې د افغانستان لپاره د دوه اعشاریه شپږ میلیارډه دالرو غوښتنه وکړه چې دا له اټکل سره سم یوه کس ته د ورځې یوازې دیرش سنټه رسیږي.

امریکايي قاضي: بایډن دې د افغانستان د کنګلو پیسو په اړه پرېکړه وکړي

آرشیف

د امریکا یوې محکمې د ولسمشر جو بایډن ادارې ته دوه اوونۍ نور مهلت ورکړی چې د افغانستان د کنګل شوېو بانکي شتمنیو په اړه پرېکړه وکړي.

د راپورونو له مخې د نیویارک د منهاټن د محکمې قاضي سارا نیتبورن د امریکا د عدلیې وزارت ته د فبروري تر ۱۱مې پورې وخت ورکړی، څو د افغانستان د دې شتمنیو په برخه کې خپلې سپارښتنې ور وسپاري.

تمه وه چې د امریکا حکومت د افغانستان د دې شتمنۍ په اړه خپلې سپارښتنې پرون (د سلواغې په اتمه نېټه) سپارلې وای.

د افغانستان بانک دا مالي شتمني د زمري په ۲۴مه نېټه پر افغانستان د طالبانو له واکمنېدو سره سم د نیویارک په فدرال بانک کې کنګل شوې.

د رویټرز خبري آژانس د راپور له مخې مېرمن نیتبورن د دې پیسو اندازه ۷ میلیارډه ډالره ښودلې ځکه د نوموړې په وینا پر متحدو ایالاتونو د ۲۰۰۱م زیږدیز کال د سېپټمبر د ۱۱مې نېټې د پېښې د یو شمېر قربانیانو کورنیو د تاوان غوښتنه کړې،

په داسې حال کې چې د دې شتمنۍ اصلي ارزښت ۹،۵ میلیارد ډالر اټکل شوی.

ایراني مظاهره چیانو له پولې هاخوا د افغان سوداګرو موټرونه زیانمن کړل

د افغانستان او ایران ګډه پوله

په نیمروز کې د طالبانو د حکومت سیمه ییز چارواکي تاییدوي چې پرون له ایران سره په ګډ سرحد کې ایراني معترضانو د لاریون پر مهال له پولې هاخوا د افغان سوداګرو موټر زیانمن کړل.

په نیمروز کې د طالبانو د اطلاعاتو او فرهنګ د ریاست سرپرست رییس مفتي حبیب الله الهام ازادي راډیو ته وویل، د ایران له سیستان بلوچستان ایالت څخه یو شمېر معترضان چې د هلمند له اوبو یې د اوبه خور د برخې د زیاتېدو غوښتنه کوله د لاریون پر مهال د ایران په زابل سیمه کې د افغان سوداګرو د ټرکونو (لاریو) پر تم ځای برید وکړ او د څو لاریو شیشې یې ماتې کړې.

ښاغلي الهام په دې اړه نور جزییات ورنه کړل، خو ویې ویل چې دا موضوع به د دواړو هېوادونو د چارواکو له خوا حل شي.

په همدې حال کې یو شمېر موټر چلوونکو چې لارۍ یې د لاریون پر مهال زیانمنې شوې دي د ایران له حکومته د تاوان غوښتنه وکړه.

د هلمند د سیند اوبه تل د افغانستان او ایران ترمنځ لانجمنه مساله وه، خو پخوانیو حکومتونو له ایران سره د یو تړون په اساس دا موضوع حل کړې وه مګر په افغانستان کې د حکومتونو له کمزوري کېدو او د وچکالیو له زیاتېدو وروسته په دې برخه کې لانجې پرځای پاتې دي.

هند وايي، افغانستان ته یې ۳،۶ ټنه روغتیايي مرستې او درمل استولي

ارشیف، د هند مرسته

هند وايي، افغانستان ته یې په تېرو څو اونیو کې ۳،۶ ټنه روغتیايي مرستې او همدا راز د کووېډ-۱۹ ناروغۍ ضد واکسین پنځه لکه ډوزه استولي دي.

نوې ډېلي همدا راز وايي چې افغانستان ته د هغو غنمو د استولو پر چاره هم کار روان دی چې مخکې یې له افغانانو سره ژمنه کړې وه.

د هندي رسنیو د راپورونو له مخې د هند د بهرنیو چارو وزارت ویاند پرون یوې خبري غونډې ته وویل، هند د غلې، د کرونا ضد واکسین او ضروري درملو په ګډون د افغانستان له خلکو سره بشري مرستو ته ژمن دی.

هند ډېر پخوا د پاکستان له لارې افغانستان ته د پنځوس زره ټنه غنمو او درملو د استولو ژمنه کړې وه.

ویل کېږي چې نوي ډېلي او اسلام آباد، افغانستان ته د دې مرستې د استولو د څرنګوالي په اړه وروستۍ پرېکړې ته نژدې شوي دي.

نور راوښيه

XS
SM
MD
LG