د لاسرسۍ وړ لېنکونه

تازه خبر
سه شنبه ۵ سلواغه ۱۴۰۰ کابل ۰۷:۲۶

افغانستان

امریکا: افغانستان دې د یو امریکايي خبریال د ایستلو پریکړه بدله کړي

د امریکا متحدوایالتونو پرافغانستان ټینګارکړی دی چې د دې هېواد څخه د یو امریکايي خبریال د ایستلو پریکړه دې بدله کړي.

پرون د افغانستان لوی څارنوالۍ وویل، چې د نیویارک ټایمز خبریال ماتیو روزینبرګ ته یې په څلورویشت ساعتونو کې له افغانستانه د وتلو امرکړی.

لوی څارنوالۍ وايي، نوموړي ته یې ځکه له افغانستانه د وتلو امروکړ، چې هغه د نیویارک ټایمزلپاره د یولیکلي راپورټ په اړه په څیړنو کې همکاري ونه کړه.

روزینبرګ په نیویارک ټایمزکې د هغه راپورد خپرولو وروسته د افغانستان لوی څارنوالۍ د تحقیقاتو لپاره ور وغوښت چې؛ نوموړې په کې د یوشمېر بې نومه لوړپوړو افغان چارواکو له خولې ویلي وو، که چېرې انتخاباتي شخړه هواره نه شي نو د یو موقت حکومت د جوړولو پرطرحه خبرې روانې دي.

خو روزینبرګ وايي، نوموړي او ورځپاڼې یې په دې اړه له څیړنو سره بشپړه همکاري کړې ده.

د امریکا د بهرنیو چارو د وزارت ویاندې ماري هارف ویلي، د افغان حکومت دا پریکړه په دې هېواد کې د رسنیو له ازادۍ څخه د په شاتګ یو د پام وړګام دی او باید چې سمدستي یې بدله کړي.

د ورځې تازه خبرونه دلته ولولئ

ناروې: طالبانو ته مشخصې غوښتنې وړاندې کوو او ګورو چې منل کېږي که نه؟

په ناروې کې د طالبانو او بهرنیو استازو ترمنځ خبرې

ناروې وایي، طالبانو ته به مشخصې غوښتنې وړاندې کړي او وبه ګوري چې ایا طالبان یې عملي کوي، که نه؟

دا خبره په بهرنیو چارو کې د ناروې د دولت وزیرې ینریک تون نن د ناروې خبري اژانس اNTB ته کړې او ویلي دې چې دا د یوې بې پایه پروسې پیل نه دی.

نوموړي دغه څرګندونې نن مخکې له دې چې د ناروې د پلاوي په ترکیب کې د طالبانو د بهرنیو چارو د سرپرست وزیر امیرخان متقي په مشرۍ له پلاوي سره خبرې ترسره کړي، وکړې.

د ناروې د خبري اژانس د راپور له مخې له طالبانو بشري حقونو په تېره بیا د ښځو او اقلیتونو حقونو ته درناوی چې زده کړې او روغتیایي خدمتونو، دکار کولو او ازاد تګ راتګ ته د لاسرسي غوښتنې شاملې دي.

په دغو غوښتنو کې دا غوښتنه هم شامله ده چې بشري مرستې به مستقیماً افغانانو ته رسول کېږي.

د ناروې د پلازمېنې اوسلو په دغه درې ورځنۍ غونډه کې چې نن یې وروستۍ ورځ ده، د طالبانو پلاوي، د لوېدیځو هېوادونو استازیو او د ښځو په ګډون د افغاني ټولنې مختلفو قشرونه ګډون کړی دی.

په خوست کې 'یو.اېن.اېچ.سي.ار' لسګونو کورنیو ته نغدي مرسته ورکړه

خوست کې د نغدو پیسو وېش

د جنوري په ۲۵مه د کډوالو لپاره د ملګرو ملتونو د لويې کمېشنری UNHCR له خوا په خوست کې پر نږدې درې سوه غریبو کورنیو باندې د ژمنیو توکو د رانیولو په خاطر نغدي مرستې ووېشل شوې.

د مسوولانو په وینا، یادې کورنۍ د سپېرې او تڼیو ولسوالیو همدارنګه د مرکز اړوند سیمو څخه انتخاب شوې او هرې کورنۍ ته ۲۶۵ امریکايي ډالر په نغدي ډول ورکول شول.

د خوست په ولایت مقام کې 'یو.اېن.اېچ.سي.ار' همکار محمدایوب اندیال د یادو مرستو په باب ازادي راډیو ته وویل، په راتلونکې کې به هم په ورته توګه بې وزلو کورنیو باندې نغدي مرستې ووېشل شي.

نوموړي زیاته کړه: "په خوست ولایت کې د 'یو.اېن.اېچ.سي.ار' په مالي ملاتړ ډېرو اړمنو کورنیو ته د ژمنیو توکو په خاطر مرسته ویشل کېږي چې هرې کورنۍ ته به ۲۶۵ ډالر ورکړل شي، د مرستو دا لړۍ به نورو کورنیو ته هم وغځیږي، په دې سره به هغه اړمنې کورنۍ چې په روان ژمي کې د سختو مشکلاتو سره مخامخ دي، د دوی ستونزې به تر یو څه سرحده راکمې کړای شي. "

هغو ښځو او نارینه وو چې د 'یو.اېن.اېچ.سي.ار' له خوا يې نغدي مرستې ترلاسه کړې، خوښي څرګندوله او غوښتنه يې کوله چې دوی سره دې ورته نورې مرستې هم وشي.

په دې وروستیو کې د مرستو په وېش کې د شفافیت پر بهیر نیوکې کېږي او ویل کېږي چې مرستې اصلي مستحقینو ته نه رسیږي.

د خوست د اقتصاد رئیس شهزاده پیر وايي، ولایتي اداره شفافیت ته ژمنه ده او د همدې په خاطر يې یو لس کسیزه هیات ګمارلی دی.

همداراز د کاروان خیریه بنسټ له خوا د بهر مېشتو خوستوالو په مالي ملاتړ پر سلو بې وزلو او غریبو کورنیو باندې د خوراکي توکو بستې ووېشل شوې.

د کاروان د خیریه بنسټ مشر بادشاه ولي کاروان په هره بسته کې د ۶۲۵۰ افغانیو په ارزښت د پوښاک او خوراک توکي په کې دي او له دې مخکې هم یاد بنسټ د سلو نورو کورنیو سره ورته مرسته کړې وه.

پر افغانستان د طالبانو له واکمنېدو را وروسته په دغه هېواد کې لوږه، بې کاري او اقتصادي ستونزي ډیرې شوي او نړیوالې ټولنې هم دې ناوړه وضعیت ته په کتو له افغانانو سره بشري مرستې پیل کړي، خو د شویو مرستو اندازه لږه بلل شوې ده.

سبا چهارشنبه د ملګرو ملتونو د امنیت شورا د افغانستان پر وضعیت غږیږي

د ملګرو ملتونو د امنیت شورا

ټاکل شوې چې د ملګرو ملتونو د امنیت شورا سبا چهارشنبې (د سلواغې ۶مه) د افغانستان د روان وضعیت په اړه غونډه وکړي.

د افغانستان لپاره د ملګرو ملتونو مرستندویه ماموریت یوناما نن په یوه خبرپاڼه کې ویلي چې دا غونډه به د افغانستان پر وخت د ماښام ۷نیمې بجې پیل شي. رسنۍ هم کولی شي چې دغه غونډه په ژوندۍ بڼه تعقیب کړي.

یوناما ویلي چې د ملګرو ملتونو سرمنشي انتونیو ګوترېش، د افغانستان لپاره د ملګرو ملتونو د سرمنشي ځانګړې استازې ډیبرا لاینز او د ناروې د بهرنیو چارو وزیره انیکین هویتفیلډ به هم د امنیت شورا دې غونډې ته معلومات وړاندې کړي.

ناروې چې د افغانستان په اړه د یکشنبې له ورځې راهیسې د درې ورځنۍ غونډې کوربه دی، په اوس وخت کې د ملګرو ملتونو د امنیت شورا دوره یي مشري په غاړه لري.

دې غونډې ته د طالبانو د حکومت یوپلاوی، د لویدیځو هېوادونو استازي او د ښځو په ګډون د افغاني ټولنې مختلف قشرونه وربلل شوي دي.

د کلیو او کرنې د پراختیا موسسه: لغمان کې د بېرو ۳لکه ونې کینول کیږي

د افغانستان په نقشه کې د لغمان ولایت

د کلیو او کرنې د پراختیا موسسې په لغمان ولایت کې خپل فعالیت له سره پیل کړ.

د کرنې، اوبو لګولو او مالدارۍ وزارت ویاند مستعین عمري نن سې شنبه (د سلواغې ۵مه) ازادي راډیو ته وویل چې د یادې موسسې د فعالیت په پیل سره به په لغمان ولایت کې د بېرو درې لکه ونې کېنول شي.

د ښاغلي عمري په خبره، د کلیو او کرنې د پراختیا موسسه به سږکال د 'WFP' موسسې په مرسته به لغمان ولایت کې د بېرو د ونو شته ځنګلونه هم بیاورغوي.

د کرنې وزارت د معلوماتو پر بنسټ، د دغو ځنګلونو په بیارغېدو سره به ۵۲۲ کسانو ته د کار زمینه برابره شي.

د بېرو ونې د اقلیمي ګټو ترڅنګ، اقتصادي ګټې هم لري او د شاتو مچیو د روزلو لپاره مناسبې بلل شوي دي.

د کندهار د سوداګرۍ او پانګونې خونه: د انارو صادرات راکم شوي

ارشیف، د کندهار انار

د کندهار د سوداګرۍ او پانګونې خونه بهر ته د انارو صادراتو د را کمېدو خبر ورکوي.

د کندهار د سوداګرۍ او پانګونې خونې عامل رییس عبدالباقي نن سې شنبه (د سلواغې ۵مه) ازادي راډیو ته وویل، د روان لمریز کال په ۹ میاشتو کې یوازې ۶۹۸ ټنه انار بهر ته صادر شوي، په داسې حال کې چې تېرکال دا اندازه ۳۴ زره و ۴۰۸ ټنه وه.

د ښاغلي باقي په وینا، د ټرانزیټي لارو د تړل کېدو او دغه شان د هوایي دهلیز له لارې د صادراتو بندېدل د دې لامل شوه چې د کندهار ولایت ډېر انار له منځه لاړ شي چې بڼوالو ته یې لوی اقتصادي زیانونه اړولي دي.

د کندهار د سوداګرۍ خونې د دغه چارواکي په خبره، د اقتصادي ستونزو له امله سږکال د کندهار انارو کورنی بازار هم سوړ وو.

ښاغلی باقي وایي، تېر کال دوی دوبۍ، هند، پاکستان او ایران ته انار صادر کړي و، خو سږ کال یوازې هند او پاکستان ته صادر شوي دي.

یونېسف: اندراګاندي روغتون کې د ماشومانو وضعیت د اندېښنې وړ دی

د کابل اندراګاندي روغتون

د ملګرو ملتونو د ماشومانو د ساتنې صندوق، یونېسف یوه چارواکي د کابل په اندراګاندي روغتون کې د ماشومانو او روغتیا پالانو وضعیت ډېر د اندېښنې وړباله.

د دې ادارې د ارتباطاتو مسول پراوران مهات چې له دغه روغتونه یې کتنه کړې د یونېسف پر ټویټر پاڼه په یوه ویډیویې پیغام کې له ټولو لورو وغوښتل چې په افغانستان کې پر خوار ځواکۍ او نورو ناروغیو د اخته ماشومانو د ملاتړ لپاره زیاتې مرستې وکړي.

دی وايي: "یونېسف اټکل کوي چې له عاجل اقدام پرته به روان کال له یو میلیون زیات ماشومان له سختې خوارځواکۍ سره مخامخ شي. د دې لپاره موږ، یونېسف له خپلو هېوادونو، شریکانو او نورو مرستندویانو غواړو چې افغانستان کې د ماشومانو د ملاتړ له هڅو سره یوځای شي. دوی مرستې ته اړتیا لري. دوې دغې مرستې ته اوس اړتیا لري."

ښاغلي مهات زیاته کړه، ده ولیدل چې د اندارګاندي په روغتون کې روغتیاپالان تر ډېره فشار لاندې وو او میندې خپلو خوارځواکو او پر نورو ناروغیو اخته ماشومانو ته ډېرې اندېښمنې وې.

د ماشومانو د ملاتړ یوې بلې ادارې سیف دې چلډرن تېره اوونۍ په یوه راپور کې ورته خبرداری ورکړ او ویې ویل چې که له افغانستان سره زیاتې مرستې ونه شي نو په دې هېواد کې به شااوخوا ۱۴ میلیونه ماشومان د خوارځواکۍ له ګواښ سره مخامخ شي.

براون افغانستان سره د مرستو لپاره د یو کمپاین په پیلېدو کې مرسته کړې

د بریتانیا پخوانی صدراعظم ګورډن براون

د بریتانیا پخواني صدراعظم ګورډن براون له افغانستان سره د بشري مرستو لپاره د یو کمپاین په پیلېدو کې مرسته کړې چې پر اساس یې د بریتانیا حکومت هڅوي چې په افغانستان کې د بشري بحران د مخنیوي لپاره د بسپنې راټولولو یو بېړنۍ نړیوال کنفرانس را وبولي.

د مارنینګ سټار ورځپاڼې د راپور له مخې ښاغلي براون خبرداری ورکړی چې په راتلونکو میاشتو کې به پنځه میلیونه ماشومان او څلور میلیونه لویان په افغانستان کې د خطرناکې سختې خوارځواکۍ له خطر سره مخامخ شي او د دې هېواد ۲۳ میلیونه وګړي هم له قحطۍ سره.

په دغه کمپاین کې له خلکو غوښتنه شوې چې د افغانانو د ژوند ژغورلو د اقدام لپاره خپل غږ اوچت کړي.

ښاغلي بروان د نړۍ له ۴۰ هېوادونو چې په افغانستان کې د امریکا په مشرۍ ایتلاف کې شامل و، غوښتي چې د هغو څه باندې څلور میلیارډه ډالرو مرستې د تامین مساله یقیني کړي چې ملګرو ملتونو په افغانستان کې له قحطۍ څخه د میلیونونو افغانانو د ژغورلو لپاره غوښتي دي.

د بریتانیا پخواني صدراعظم ټینګار کړی چې هېوادونو ته اوس په کار ده چې له سولې سره مرسته وکړي.

د تېرکال د اګسټ له ۱۵مې راهیسې چې طالبانو کابل نیولی او نړیوال ځواکونه له افغانستانه وتلي، دا هېواد که له یوې خوا نسبتاً امن شوی خو په میلیونونو وګړي یې له سختو اقتصادي او نورو ستونزو سره مخامخ دي.

د کابل هوايي ډګر په اړه ترکیه او قطر طالبانو سره مقدماتي هوکړې ته رسیدلي

د کابل هوايي ډګر

ترکیه او قطر د طالبانو د حکومت له چارواکو سره د کابل د نړیوال هوایي ډګر د امنیت په اړه یوې مقدماتي هوکړې ته رسیدلي دي.

د ترکي رسنیو د راپورونو له مخې دا خبره ډپلوماټیکو سرچینو چې له طالبانو سره په خبرو کې ښکېل دي، کړې ده.

د دغو سرچینو په حواله ویل شوي چې انقره او دوحه د کابل د نړیوال هوایي ډګر د امنیتي چوکاټ په اړه موافقې ته رسیدلي، خو د مالي تمویل په ګډون پر یو لړ نورو مسالو خبرې لا روانې دي.

یوې ډپلوماټیکې سرچینې د خپل هویت پټ ساتلو په شرط په انقره کې رسنیو ته ویلي چې له طالبانو تمه ده دا ده چې د کابل د هوایي ډګر شااوخوا او د هغوی چې دننه امنیتي چارې به سمبالوي، امنیت یقیني کړي. هغه موضوع چې ویل کېدل طالبانو ورسره مخالفت کاوه.

د راپور له مخې د قطر دولتي خبري اژانس ویلي، د طالبانو د حکومت یوپلاوی به راتلونکې اوونۍ دوحې ته لاړ شي چې د کابل د هوایي ډګر د فعالیت او د چارو د تنظیم په اړه یې له قطر او ترکیې سره خبري بشپړې کړي.

د طالبانو د حکومت چارواکو د دغه نوي پرمختګ په اړه څه نه دي ویلي، خو له دې مخکې یې ویلي و چې د کابل په ګډون د افغانستان د پنځو هوایي ډګرونو د فعالولو په اړه له قطر او ترکیې سره په خبرو بوخت دي.

طالبان: نن مازدېګر د کابل – جلال اباد لویه لار تړل کېږي

د کابل - جلال اباد لویه لار د ماهیپر سیمه

د طالبانو د حکومت د ټولګټو وزارت نن مازدېګر د کابل – جلال اباد د لویې لارې د بندېدو خبر ورکوي.

دې وزارت په یوه خبرپاڼه کې ویلي چې نن سې شنبه (د سلواغې ۵مه) به دغه لاره په سروبي سیمه کې د غرونو په بیړنو څوکو کې د کار کولو له امله د مازدېګر له څلورو بجو د ټرافیکو پرمخ وتړل شي.

د ټولګټو وزارت له ټولو مسافرو غوښتنه کوي چې پر دغه لاره دې تر بلې خبرتیا پورې له سفر کولو ډډه وکړي.

د سره صلیب کمېټې سکرتر جنرال برنټ اپېلانډ کابل ته تللی 

آرشیف، د سره صلیب نښان

د سره صلیب کمېټې سکرتر جنرال برنټ اپېلانډ کابل ته تللی او هلته یې له طالب چارواکو سره لیدلي.

د افغاني سرې میاشتې ټولنې دا خبره نن په یوه اعلامیه کې کړې.

د اعلامیې له مخې سره صلیب کمېټې سکرتر جنرال ښاغلي اپېلانډ د سرې میاشتې ټولنې له سرپرست مرستیال ملا نورالدین ترابي سره کتلي او له افغاني سرې میاشتې ټولنې سره یې په روغتیايي برخه کې د همکاریو ژمنه کړې ده.

اعلامیه زیاتوي سره صلیب کمېټې دې چارواکي ویلي چې په ۲۰۲۲کال کې د افغاني سرې میاشتې ۴۶ ثابتو کلینیکونو ته د اړتیا وړ هر ډول درمل ورکوي او له افغاني سرې میاشتې سره به د نورو ثابتو کلینیکونو په جوړولو کې رغنده مرکزي رول ترسره کوي.

ښاغلي برنټ اپیلاند ژمنه کړې چې سږکال به د افغاني سرې میاشتې د ټولو کلینیکونو د کارکوونکو معاش ورکوي.

دېبورا لاینز د طالبانو کورنیو چارو وزیر ته: افغان ښځینه فعالانې پیدا کړئ

دېبورا لاینز

د افغانستان لپاره د ملګرو ملتونو د سرمنشي ځانګړې استازې دېبورا لاینز د طالبانو د کورنیو چارو له وزیر غوښتي چې تري تم شویو افغان ښځینه فعالانو د لټون لپاره لاس په کار شي.

دا خبره د یوناما په یوه ټوېټر بیان کې راغلې ده.

په بیان کې زیاته شوې چې دېبورا لاینز نن د طالبانو د کورنیو چارو وزارت له سرپرست سراج الدین حقاني سره په کابل کې کتلي دي.

د بیان له مخې دېبورا لاینز سراج الدین حقاني هڅولی چې د تري تم شویو افغان ښځینه فعالانو لپاره چې ویل کېږي تېره اوونۍ په کابل کې له خپل کوره وړل شوي اقدامات وکړي او د هغوی ازادي خوندي کړي.

طالبانو که څه هم رد کړې چې د پروانه ابراهیم خېل او تمنا زریاب پریاني په نوم فعالانې دوی بندیانې کړي خو د راپورونو له مخې طالبان تورن شوي چې دا دوه فعالانې یې نیولي او له شااوخوا پنځو ورځو راهیسې لادرکه دي.

په خپله تمنا زریاب پریاني په هغه شپه چې نیول کېده یوه ویډیويي پیغام کې د مرستې غوښتنه کوي او وايي چې د طالبانو کسان یې د کور تر شاه ورغلي.

له دې مخکې د بشري حقونو ګڼو مدافع ډلو هم د پروانه ابراهیم خېل او تمنا زریاب پریاني د خوشې کولو غوښتنه کړې ده.

اوسلو کې طالبانو د امریکا او ځینو نورو هېوادونو استازو سره خبرې پيل کړې

اوسلو؛ طالب پلاوی او د یو شمېر هېوادونو استازي

نن د ناروې پلازمېنه اوسلو کې د امریکا په شمول د یو شمېر هېوادونو استازیو له طالب پلاوي سره خبرې پيل کړې دي.

دا خبره د طالبانو د حکومت د بهرنیو چارو وزارت ویاند قهار بلخي په خپل ټویټر خپره کړې ده.

هغه زیاته کړې چې د مولوي امیرخان متقي په مشرۍ د طالبانو له پلاوي سره په دې خبرو کې د امریکا، بریتانیا، جرمني، ناروې، ایټالیا، قطر، فرانسې او اروپايي ټولنې استازي حضور لري.

د بلخي په ټوېټر کې راغلي چې تر دې دمه د اقتصاد، بشري مرستو، امنیت، مرکزي بانک په فعالیت، روغتیا او نورو اړوندو مسئلو باندې خبرې وشوې.

بلخې زیاته کړې چې بحثونه لا هم روان دي او جزئیات به یې وروسته خپاره کړي.

د امریکا په پلاوي کې د افغانستان لپاره د امریکا ځانګړی استازی ټوماس وېسټ او د افغانستان د بشري حقونو او ښځو لپاره د امریکا استازې رینا امیري او ځیني نور چارواکي شامل دي.

مخکې رینا امیري لیکلي و چې په دې حساس وخت کې غواړي له طالبانو سره د افغانستان په بشري وضعیت او بشري حقونو باندې خبرې وکړي.

توماس وېسټ هم ویلي چې له طالبانو سره به د باثباته افغانستان او خپلو اندېښنو په تړاو د پرانېستو سترګو ډیپلوماسي کوو.

طالبان وایي له امریکايي او اروپايي ډیپلوماټانو سره به د افغانستان د کنګل شویو اسعاري زېرمو د خلاصون او له افغانستان سره د بشري مرستو پر دوام خبرې وکړي.

طالب مسؤلین: په کابل کې مو ۱۱ کلن ماشوم له انسان تښتوونکو وژغوره

طالبان

په کابل کې د طالبانو امنیتي چارواکو ویلي چې یو ۱۱ کلن ماشوم یې له انسان تښتوونکو ژغورلی دی.

د راپورونو له مخې انسان تښتوونکو د شعېب په نوم ماشوم د کابل له درېیمي حوزې تښتولی وو.

د درېیمې حوزې مرستیال محب الله مشفق د دوو انسان تښتوونکو د نیولو او د ماشوم د خوشې کولو په اړه په یوه ویډیويي پیغام کې ویلي:" څلور ورځې مخکې یو ورور مراجعه وکړه چې وراره یې لا درکه دی. بیا موږ خپل اقدامات پيل کړل او په نتیجه کې مو دا دوه تنه انسان تښتوونکي ونیول."

اخوا په دې ویډیو کې چې د طالبانو د کورنیو چارو وزارت خپره کړې په خپله ژغورل شوی ماشوم شعیب هم وایي چې انسان تښتوونکو څلور ورځې ساتلی وو او کار یې هم ورباندې کاوه.

د ملګرو ملتونو د نقدو پیسو پنځمه کڅوړ؛ ۳۲ ملیونه ډالر افغانستان ته ورسېدل

ډالر

د بشری مرستو په دوام، ۳۲ میلیونه ډالر نقدی پیسې افغانستان ته انتقال شوې.

د افغانستان بانک له لوري په دې اړه یوه خپره شوې خبرپاڼه کې ویل شوي چې له افغانستان سره د بشري مرستو په دوام، پرون دوشنبه ۳۲ میلیونه امریکایي ډالر کابل ته انتقال او د افغانستان نړیوال بانک «AIB» ته وسپارل شوې.

د افغانستان بانک له لوري په خپره شوې اعلامیه کې ویل شوي، یاد بانک د هر هغه اقدام هرکلی کوي چې له اړمنو افغانانو سره د مرستې لامل کېږي.

له افغانستان سره د بشري مرستو په دوام دا د نقدو پیسو د مرستی پنځمه کڅوړه ده چې د عقرب میاشتی له وروستۍ اوونۍ راپدېخوا هره اوونۍ افغانستان ته انتقال او د افغانستان نړیوال بانک ته سپارل کېږی.

که څه ملګرو ملتونو ویلي و چې په افغانستان کې د بشري مرستو لپاره به له دې وروسته او د ۲۰۲۲ کال تر مارچ میاشتۍ، هره اوونۍ نږدې ۲۰ ملیونه امریکایی ډالر افغانستان ته انتقالوي خو په تېرو دوو اوونیو کې دغه پیسې افغانستان ته نه وې سپارل شوې چې اوس دا دی ویل شوي ۳۲ ملیونه ډالر یوځای وسپارل شوې.

د سوداګرۍ خونه د طالبانو له حکومته غواړي چې د سوداګرو بانکي ستونزې حل کړي

بانک ته د خلکو ولاړ کتارونه

د افغانستان د سوداګرۍ او پانګونې خونه د طالبانو له حکومته غواړي چې د افغان سوداګرو بانکي ستونزې هوارې کړي.

د افغانستان د سوداګرۍ او پانګونې خونې له لوري په خپره شوې خبرپاڼه کې راغلي چې د یادې خونې مرستیال محمد یونس مهمند او ګڼو سوداګرو یاده غوښتنه د افغانستان بانک له رئیس سره په لېدنه کې کړې.

په خبر پاڼه کې د ښاغلی مهمند له خولې ویل شوي چې افغان سوداګر د بانکي ستونزو له امله په منظم او عادي ډول سوداګري نه شي کولي.

د افغانستان بانک رئیس له سوداګرو سره ژمنه کړې چې هڅه به وکړي ترڅو ډېر ژر د سوداګرو بانکي ستونزې هوارې کړي.

پر افغانستان د طالبانو له واکمنۍ راورسته په ټول افغانستان کې د بانکونو فعالیته له ستونزو سره مخ شوي او دې چارې د عامو افغانانو ترڅنګ، سوداګر او پانګه وال هم له ګڼو ستونزو سره مخ کړي.

نور راوښيه

XS
SM
MD
LG