د لاسرسۍ وړ لېنکونه

تازه خبر
سه شنبه ۵ سلواغه ۱۴۰۰ کابل ۰۷:۳۰

نړۍ

د ایران پارلمان د امنیدوارۍ ضد درملو بندیز ته رایې ورکړې

د ايران پارلمان د دې لپاره چې د هېواد نفوس زيات شي؛ پرون د اميندوارۍ ضد درملو بنديز ته رايې ورکړې.

د دې لايحې تصويب به درملو او هغو طريقو مخه ونيسي چې؛ د تل لپاره د ماشوم زېږولو مخه نيسي.

لايحه به د ايران محافظه کاره جرګې؛ شوراي نګهبان ته ولېږل شي چې؛ ايا د پارلمان پرېکړه له اسلامي اصولو سره سمه ده او کنه ده؟

د دې لايحې ملاتړ کوونکي وايي، دا کار به په ايران کې د نفوس، چې اوس مخ په کمېدو دی؛ له زياتېدو سره مرسته وکړي.

خو د دې طرحې مخالفان يا اصلاح غوښتونکي پرې انتقاد کوي؛ وايي چې، محافظه کاران په دې توګه غواړي چې؛ د لوړو زده کړو خاوندې ښځې له کوره اورګازه نه شي او په دوديز ډول يوازې د کور مېرمنې وي.

د ورځې تازه خبرونه دلته ولولئ

یو پاکستانی خبریال حسین شاه لاهور ښار کې په ډزو ووژل شو

ارشیف،

یو پاکستانی خبریال حسین شاه چې له یوه سیمه ییز ټلوېزیون سره یې کار کاوه تېره شپه د پاکستان په لاهور ښار کې په ډزو ووژل شو.

پولیسو وویل، دوه وسله وال چې پر یوه موټر سایکل سپاره و، پر حسین شاه د لاهور پرېس کلب ته نژدې ډزې وکړې او د پېښې له ځایه وتښتېدل.

د پولیسو یوه جګپوړي چارواکي صفدر رضا کاظمي وویل، په دې اړه چې نوموړی د چا له خوا وژل شوی؟ څېړنه کوي.

تراوسه چا یا کومې ډلې د هغه د وژلو مسولیت نه دی اخیستی.

د حسین شاه له وژل کېدو وروسته یو شمېر قهر وړو خبریالانو په لاهور کې لاریون وکړ، د هغه وژل یې وغندل او د عاملانو د نیولو غوښتنه یې وکړه.

د پاکستان د خبریالانو ټولنې په ټول هېواد کې د مظاهرو غوښتنه کړې ده.

په پاکستان کې خبریالان له ډېرې مودې راهیسې په حملو کې په نښه شوي.

دا هېواد د خبریالانو د خوندیتوب د نړیوالې کمېټې او د نړیوال معافیت انډېکس له خوا په نړۍ کې نهم هېواد بلل شوی چې په کې په منظم ډول خبریالان وژل کېږي او قاتلان یې ازاد ګرځي.

بایډن: امریکا او اروپا اوکراین کې د روسیې پر وړاندې موافقې ته رسیدلي

د امریکا ولسمشر جو بایډن

د امریکا ولسمشر جو بایډن وایي، متحده ایالاتونه او اروپایي متحدان یې د اوکراین پولې ته نژدې د روسیې د "پوځي ګواښ" پر وړاندې بشپړې موافقې ته رسیدلي دي.

بایډن دا څرګندونې پرون له اروپایي متحدانو سره تر ویډیویي غونډې وروسته خبریالانو ته وکړې.

د بریتانیا صدر اعظم بورېس جانسن هم د امریکا، ایټالیا، پولنډ، فرانسې، جرمني او دغه راز اروپایي شورا، اروپایي کمېسیون او ناټو له چارواکو سره تر لیدو کتو وروسته ورته څرګندونې کړي دي.

دغو لویدیځو هېوادونو هوکړه کړې چې که پر اوکراین د روسیې د یرغل امکانات ډېریږي، دوی به غچ اخیستونکې لارې چارې سنجوي چې دې اقداماتو کې د بندیزونو یوه مجموعه هم شامله ده.

له دې وړاندې د ناټو غړو هېوادونو ویلي چې ختیځه اروپا کې یې ځواکونه د تیار سی حالت کې دي.

ریچارد نیفیو د هغو مرکچیانو له ډلې ووت چې ایران سره اټمي تړون ارزوي

ریچارد نیفیو

د تهران لپاره د امریکا یو لوړپوړی استازی د هغو مرکچیانو له ډلې ووت چې له ایران سره اټمي تړون ارزوي.

ریچارد نیفیو داسې حال کې له دې ډلې ووځي چې د دغه تړون بیا ژوندي کېدو ته هڅې ګړندۍ شوي، خو مرکچیان یې د نظر اختلاف لري.

د امریکا د بهرنیو چارو وزارت یوه لوړپوړي چارواکي د ازادې اروپا/ازادي راډیو ته ویلي چې ریچارد له دې وروسته د ایران لپاره د امریکا د ځانګړي استازي مرستیال نه دی.

دغه وزارت د خپل دې اقدام لامل څرګند نه کړ، خو والسټریټ ژورنال ویلي، ریچارد نیفیو له نورو امریکایي مرکچیانو سره د ایران د اټمي تړون په اړه د نظر اختلاف درلود.

د ایران او د نړۍ د سترو قدرتونو، چین، فرانسې، بریتانیا، روسیې او جرمني ترمنځ د اترېش په پلازمېنه ویانا کې د ایران د اټمي تړون د بیا فعالولو په اړه خبرې روانې دي، خو د پام وړ پرمختګ نه تر سترګو کیږي.

ایران: امریکا سره په دې شرط خبرو ته تیار یم چې ښه موافقه ترلاسه شي

د ایران د بهرنیو چارو وزیر حسین امیرعبداللهیان

ایران وایي، د ۲۰۱۵م زیږدیز کال اټمي موافقې د را ژوندي کولو لپاره د امریکا له متحدو ایالاتونو سره مخامخ خبرو ته په دې شرط تیار دی چې یوه ښه موافقه ترلاسه شي.

د ایران د بهرنیو چارو وزیر حسین امیرعبداللهیان پرون دوشنبې (د سلواغې ۴مه) په تهران کې په یوه خبري غونډه کې هغه راپورونه چې وایي، حکومت یې د اروپا په منځګړیتوب له امریکا سره خبرو ته اماده شوی، رد کړل.

عبداللهیان زیاته کړه: "که د خبرو په جریان کې دې مرحلې ته ورسېږو چې یوې ښې او له لوړو تضمینونو سره یوې موافقې ته د رسېدو لپاره اړتیاوې چې په یوه سطحه له امریکایانو سره خبرې وکړو، د بندیزونو د لېرې کولو لپاره د خبرو په کاري چوکاټ کې به دا مساله له پامه ونه غورځوو."

د ایران او د نړۍ د سترو قدرتونو، چین، فرانسې، بریتانیا، روسیې او جرمني ترمنځ د اتریش په پلازمېنه ویانا کې روانې خبرې د تیر کال په جون میاشتې کې پیل شوې وي، خو وروسته له هغې چې په دې کال کې تُندلاری ابراهیم ریسي د ولسمشرۍ انتخابات وګټل، په ټپه دریدلې وې.

واشنګټن په دغو خبرو کې په غیر مستقم ډول ګډون کړی خو ویل کېږي چې ایراني او امریکایي مرکچیانو د اروپایانو په منځګړیتوب خبرې مخ ته وړې دي.

ناټو ختیځه اروپا کې خپل ځواکونه د تیارسۍ په حالت کې راوستي

د ناټو ځواکونه

د ناټو غړیو هېوادونو هغو اندېښنو ته په پام چې د اوکراین له پولې سره د روسي ځواکونو د ځای پرځای کیدا پر سر زیاتې شوي، په ختیځه اروپا کې خپل ځواکونه د تیارسۍ په حالت کې راوستي.

مسکو دا یو پارونکی اقدام بللی دی.

ناټو ویلي چې ډنمارک، هسپانیا، فرانسه او هالنډ په پام کې لري یا هم دا مساله څیړي چې ځواکونه، الوتکې او کښتۍ ختیځې اروپا ته ولېږي.

د ناټو سرمنشي ینس سټولټنبرګ پرون دوشنبې(د سلواغې ۴مه) په یوه اعلامیه کې وویل چې دا تړون د خپلو متحدینو د ساتنې او دفاع لپاره هر ډول اقدام ترسره کوي.

د راپورونو له مخې د امریکا ولسمشر جو بایډن هم په ختیځه اروپا او بالتیک سیمه کې د امریکايي ځواکونو د غښتلي کېدو پر لارو چارو غور پیل کړی دی.

بایډن له خپلو د ملي امنیت له جګ پوړو چارواکو سره د شنبې او یکشنبې په ورځو په دې اړه پر لارو چارو بحثونه وکړل.

د نیویارک ټایمز د راپور له مخې یو انتخاب دا دی چې له زرو نه تر پنځو زرو پورې امریکایي سرتیري د ختیځې اروپا هېوادونو ته واستول شي.

د مسکو او لویدیځ ترمنځ کړکېچ وروسته له هغې زیات شو چې امریکایي او اروپایي چارواکو وویل چې روسیې له سل زرو زیات سرتیري له اوکراین پولې سره نژدې ځای پرځای کړي دي.

لویدیځ اندېښنه لري چې ښایي روسیه پر اوکراین برید وکړي، خو مسکو دغه اندېښنه بې ځایه بولي.

نن په پاکستان کې د سترې محکمې یواځېنۍ ښځينه قاضي عایشه ملک لوړه وکړه

عایشه ملک

نن په پاکستان کې د سترې محکمې د یواځېنۍ ښځينه قاضي عایشه ملک لوړه وکړه.

دا د پاکستان لپاره چې د فعالانو په خبره قوانین یې د ښځو لپاره سخته دي بې ساری اقدام بلل کېږي.

عایشه ملک د امریکا په هاروارد پوهنتون کې درس ویلی او دوه لسیزه یې د پنجاب په عالي محکمه کې د قاضي په توګه دنده مخته وړې.

د پاکستان د سترې محکمې د غړې په توګه د هغې ټاکل کېدو وار دمخه د یو شمېر مذهبي ګوندونو او ځینو قاضیانو غبرګونونه پارولي وو.

قاضي عایشه ملک هغه وخت مشهوره شوه چې تېرکال یې په لاهور عالي محکمه کې د ښځو د پېغلتوب یا ورجېنېټي طبي معاینه لغوه کړه او دا یې سپک کار وباله ځکه د هغې په خبره په دې عمل سره د جنسي تېریو ښکار شویو ښځو او د تورنو ښځو عزت ته زیان اوړي.

د ارمنستان ولسمشر له خپلې دندې استعفی وکړه

د ارمنستان ولسمشر

د ارمنستان ولسمشر، ارمن سرکیسیان له خپلې دندې چې تر ډېره تشریفاتي بڼه لري، استعفی وکړه.

ده ویلي د ملي بحران پر مهال پر پالېسیو د نفوذ نه درلودلو له کبله له خپلې دندې استعفی کوي.

د هغه د دفتر وېب سایټ پرون په یوه یوه اعلامیه کې د ده په وینا ویلي، ولسمشر په اوسنیو بحراني شرایطو کې چې ملت او هېواد ورسره مخامخ دی، پر محلي او بهرنۍ پالېسۍ د نفوذ اړتیا وړ ابزارونه نه لري.

۶۹ کلن سرکیسیان ویلي، دا پرېکړه یې د احساساتو له مخې نه ده کړې، بلکې یو مشخص منطق ورته لري.

سرکیسیان د ځینو مسایلو له کبله د صدراعظم نیکول پاشینیان له منتقدانو و، په ځانګړي ډول د بېلتونپالې سیمې نګرنو-قره باغ پر سر له اذربایجان سره د شپږو اوونیو د جګړې پر مهال.

د ۲۰۲۰کال هغه جګړه د روسیې په منځګړیتوب د سولې د یوې موافقې له کبله پای ته ورسېده.

په سوریه کې د کرد ځواکونو او داعش ډلې په نښته کې ۱۳۶ کسان وژل شوي

کردي ځواکونه

په سوریه کې د امریکا له ملاتړ برخمن کرد ځواکونو او داعش یا اسلامي دولت ډلې په یوه تازه نښته کې د وژل شویو کسانو شمېر ۱۳۶ ته پورته شوی.

دا خبره د سوریې د وضعیت یوې څارونکې ډلې چې مرکز یې لندن کې دی راپور کړې ده.

څلور ورځې مخکې د سوریې په حسکه ښار کې د داعش ډلې د بندي جنګیالیو د خلاصون لپاره د دې ډلې وسله والو په یوه زندان ډله ییز برید وکړ.

د زندان ساتونکو کرد پوځیانو چې د امریکا ملاتړ ورسره دی په بریدګرو باندې عملیات وکړل.

په نښتو کې د داعش څلور اتیا غړي او ۴۵ کرد جنګیالي چې په کې د زندان داخلي امنیتي کسان هم شامل دي وژل شوي.

له کله چې د اسلامي دولت ډلې خلافت ړنګ شو دا لومړی وار و چې د دې ډلې جنګیالي په سوریه کې یو لوی برید وکړ.

د راپورونو له مخې د سوریې په حسکه ښار کې په زندان باندې د برید پر مهال لږ تر لږه اووه ملکیان هم وژل شوي.

امریکا هغه بېړۍ نیولې چې له ایرانه یې "چاودېدونکي اومه مواد" لېږدول

ایراني نظامي کښتۍ

د امریکا سمندري ځواکونو یوه بېړۍ نیولې چې له ایرانه یې"چاودېدونکي اومه مواد" لېږدول.

سمندري ځواکونو پرون اعلان وکړ چې د عمان په خلیج کې یې دا کښتۍ له څلوېښت ټنه کیمیاوي سرې سره نیولې.

دغو ځواکونو زیاته چې له دې سرې نه د چاودیدونکو توکو په جوړولو کې کار اخیستل کېدای شي.

د امریکا سمندري ځواکونو ویلي چې دې کښتۍ له ایرانه حرکت کړی و او په هغه لوري روانه وه چې مخکې د یمن حوثي یاغیانو ته وسلې وړل کېدې.

ایرانی چارواکو تر اوسه په دې اړه کوم غبرګون نه دی ښودلی.


امریکا، اسراییل او ځینو عربي هېوادونو ایران تورن کړی چې په عراق، سوریې او یمن کې خپلې نیابتي جنګي ډلې تمویلوي.

په روسیې د کرونا ویروس؛ په تېرو ۲۴ ساعتونو کې نږدې ۶۳ زره پېښي ثبت شوي

روسیه

په روسیه کې نن یکشنبه د کرونا ویروس د مثبتو پېښو بې ساری لوړ شمېر ثبت شوی دی.

په دغه هېواد کې د ۲۴ ساعتونو پر مهال د کرونا ویروس ۶۳ زره ۲۰۵ مثبتې پېښې ثبت شوي دي.

د دولتي ارقامو له مخې پرون بیا دغه شمېر ۵۷ زره ۲۱۲ او وړمه ورځ ۴۹ زره ۵۱۳ وو.

په روسیه کې دا شمېر په داسې حال کې په بې ساري ډول زیاتېږي چې د کرونا ویروس اومیکرون بڼه چې په چټکۍ په خلکو کې خپرېږي، د روسیې بېلابېلو برخو ته رسېدلې ده.

د کرونا ویروس په وړاندې د مبارزې لپاره د روسیې ګمارل شوې ډلې نن په ۲۴ ساعتونو کې په کرونا ویروس د ۶۷۹ کسانو مړینه ثبت کړې ده.

قرغزستان پر تحقیقاتي خبریال بولوت تیموروف د مخدره موادو د لرلو تور ولګاوه

د قرغزستان پولیس

د قرغزستان چارواکو پر پېژندل شوي تحقیقاتي خبریال بولوت تیموروف د غیرقانوني مخدره موادو د لرلو تور ولګاوه.

تر دې څو ساعته مخکې امنیتي ځواکونو د دغه خبریال دفتر تالاشي کړ چې د تیموروف په وینا په دې وخت کې امنیتي ځواکونو د ده جېب ته غیرقانوني مخدره مواد واچول.

پر بولوت تیموروف دغه تور نن داسې مهال ولګول شو چې ده د یوه زورور سیاستوال د کار و بارونو په اړه یوه څېړنه خپره کړه.

دغه خبریال پرون ناوخته د ده پر دفتر د پولیسو تر چاپې وروسته ونیول شو، خو د کورنیو چارو وزارت له ودانۍ دباندې تر اعتراضونو وروسته خوشې کړای شو.

د اعتراضونو پر مهال خبریالانو، د بشري حقونو او نورو فعالانو د دغه خبریال د خوشې کېدو غوښتنه وکړه.

پولیسو په یوه اعلامیه کې ویلي تیموروف او د هغه همکار نظروف د غیرقانوني مخدره موادو د لرلو په تور نیول شوي دي.

امریکا: په عمان خلیج کې مو د کیمیاوي سرې د لېږد کښتۍ ضبط کړي

ارشیف؛ عمان خلیج

د امریکا د متحدو ایالاتونو سمندري ځواکونو نن وویل، په عمان خلیج کې یې هغه کښتۍ ضبط کړې چې کیمیاوي سره یې لېږدوله.

د دغو ځواکونو په خبره، له دې سرې د منفجره موادو په جوړولو کې هم کار اخیستل کېږي او کښتۍ له ایرانه پر هغه لار روانه وه چې مخکې ترې د یمن حوثي یاغیانو ته وسلې قاچاق شوي دي.

د امریکا سمندري ځواکونو وویل، تېره سه شنبه یې د عمان خلیج په نړیوالو اوبو کې هغه کښتۍ ضبط او تالاشي کړې چې تېرکال د یمن ساحلي ساتونکو ته د زرګونو میله وسلې د لېږد پر مهال نیول شوې وه.

په بحرین کې دېره د امریکا سمندري ځواکونو وویل، د امریکا د ګزمې یوې کښتۍ هغه بې نښانه کښتۍ ودروله، چې له ایرانه تېرېده او پر هغه لار روانه وه چې پخوا د یمن حوثي یاغیانو ته د وسلو د لېږد لپاره کارول شوې ده.

د امریکا سمندري ځواکونو ویلي چې د ۲۰۲۱کال په فبرورۍ میاشت کې یې هم د کب نېولو همدغه بې نښانه کښتۍ چې په زرګونو میله وسله، لاسي بمونه، راکټ لانچرونه او نور مهمات یې لېږدول، کشف او ضبط کړې وه.

دا تحول داسې وخت راځي چې سعودي عربستان او امریکا پر ایران تور لګولی چې د یمن حوثي یاغیانو ته د بې پېلوټه الوتکې او میزاییلو د پرزو په ګډون نور پوځي تجهیزات لېږدوي، خو تهران دا تورونه ردوي.

په جرمني کې د کرونا ویروس د اومیکرن بڼې پېښي زیاتې شوې

جرمني 

جرمني وايي چې په دغه هېواد کې د کرونا ویروس د اومیکرون بڼه ډېره خپره شوې ده.

د راپورونو له مخې، تر ټولو ډېرې پېښې په پلازمېنه برلین کې ثبت شوي او له یوې اوونۍ راهیسې د ورځې په متوسط ډول یولک تنه په دې ناروغۍ اخته شوي دي.

د جرمني رابرت کوخ انستیتیوت ویلي چې له دې سره په یو وخت د دغه هېواد نیمايي وګړو تقویتي واکسین کړی دی.

د جرمني یوه وتلي ویروس پېژاند اولیور کیپلر ویلي چې ژر به د هېواد روغتونونه له هغو ناروغانو ډک شي چې د کرونا په اومیکرون بڼې اخته شوي دي.

که څه هم د کرونا اومیکرون بڼه ژر خپرېږي خو ویل کېږي چې شدت یې د کرونا تر نورو ډولونو کم دی.

د ۲۰۱۹ په پای کې د کرونا وبا د خپرېدو له پیله تراوسه پورې په جرمني کې څه باندې ۸ ملیونه او ۶ لکه تنه په دې ویروس اخته شوي دي.

امریکا او ایران د دواړو لورو د موقتي موافقې په اړه د روسیې وړاندیز رد کړ

ارشیف: د اتومي تړون خبرې

امریکا او ایران د ایران د اتومي موافقې په اړه د دواړو خواوو ترمنځ د موقتي موافقې په اړه د روسیې وړاندیز رد کړ.

راپورونه وايي چې روسیې په وروستیو کې د ایران د اتومي موافقې د احیا کېدو لپاره وړاندیز کړی چې د اوس وخت لپاره دې یوه موقتي موافقه وشي.

اېن بي سي نیوز ټلوېزیوني شبکې د دوو امریکايي چارواکو او د کانګرېس د یوه غړي په قول وویل چې روسیې وړاندیز کړی چې د ایران پر اتومي پروګرام د ځینو محدودیتونو د بیا لګېدو په بدل کې دې پر دغه هېواد بندیزونه لېرې شي.

د روسیې له لوري دا وړاندیز په داسې وخت کې شوی چې د ولسمشر بایډن حکومت چارواکو په وروستیو ورځو کې څو ځلې خبرداری ورکړ چې د ایران د اتومي موافقې د احیا کېدو وخت په پای ته رسېدو دی.

نورو امریکايي چارواکو اېن بي سي نیوز ته ویلي چې نه یوازې امریکا بلکې ایران هم د موقتې موافقې په اړه د روسیې وړاندیز رد کړی دی.

روسیې د ځان په اړه د بریتانیې ادعاوې رد کړې

د روسیې بیرغ

د روسیې د بهرنیو چارو وزارت د بریتانیا دا ادعا رد کړه چې په اوکراین کې د یوه 'روسیه پلوه' مشر د نصبولو په اړه د روسیې له پلانه خبره ده.

بریتانیا د تېرې اوونۍ د دوشنبې په ورځ ویلي و چې کریمیلین په اوکراین کې د یوه لاسپوڅي مشر د واک ته رسولو هڅه کوي او د روسیې امنیتي افسرانو د اوکراین له یو شمېر پخوانیو سیاستوالو سره تماس نیولی دی.

د بریتانیا د بهرنیو چارو وزارت د خپل دې تور د ثابتولو لپاره شواهد نه دي وړاندې کړي.

روسیې د اوکراین پولو ته نږدې تر ۱ لک ډېر پوځیان ځای پر ځای کړي خو وايي چې پر اوکراین د یرغل نیت نه لري.

د روسیې د بهرنیو چارو وزارت د بریتانیا د تور د ردولو ترڅنګ ویلي چې بریتانیا باید دا ډول ناسم او بې معنی معلومات خپاره نه کړي.

دې وزارت پر خپله ټویټرپاڼه لیکلي:" د بریتانیا د بهرنیو چارو وزارت له لوري د تېرایستونکو معلوماتو خپرېدا ښيي چې د ناټو غړي د اوکراین پر سر کړکېچ ته لمن وهي."

روسیې له امریکا غوښتي چې تضمین ورکړي چې اوکراین ته به د ناټو غړیتوب نه ورکول کېږي خو واشنګټن دا غوښتنه رد کړې ده.

نور راوښيه

XS
SM
MD
LG