د لاسرسۍ وړ لېنکونه

تازه خبر
پنجشنبه ۷ سلواغه ۱۴۰۰ کابل ۱۰:۴۶

افغانستان

د کابل جلال اباد پر لویه لاره نن سهار په یوې ټرافیکي پیښه کې ۷ تنه ووژل شول

د کابل جلال اباد پر لویه لاره نن سهار په یوې ټرافیکي پیښه کې ۷ تنه ووژل شول او ۱۸ نور ټپیان شول.

د کابل د امنیې قومندانۍ ویاند حشمت الله ستانکزي آزادي راډیوته وویل، ددغه پیښې په وژل شویو کسانو کې چې د کابل په سروبي ولسوالۍ کې شوې درې ښځې او یو ماشوم هم شامل دی.

"د کابل جلال آباد پر لویه لاره د سروبي ولسوالۍ مربوطاتو د نغلو په ګولايي کې د درې موټرو په ټکر کې ۷ تنه ووژل شول او ۱۸ تنه نور ټپیان شول چې په وژل شویوکې څلور ښځې او یوماشوم شامل دي. "

ښاغلي ستانکزي زیاته کړه چې د دغه پیښې ټپیان روغتون ته وړل شوي.

پیښه د دوه تیز رفتاره او یوه ټانکر موټرد ټکر له امله شوې، چې علت یې هم د چلوونکو بې احتیاطي ښودل شوې.

د ورځې تازه خبرونه دلته ولولئ

راپور: مرستندویې موسسې افغانستان ته پیسې نه شي لېږدولی

ډالر

په یوه نوي راپور کې څرګنده شوې چې د طالبانو واک ته له رسېدو وروسته پر افغانستان د لوېدیځو هېوادونو د اقتصادي بندیزونو له کبله مرستندویې موسسې افغانستان ته پیسې نه شي انتقالولی.

د راپور له مخې، له دې امله ملیونونه افغانان د بیړنیو مرستو له ترلاسه کولو محروم شوي دي.

په دې راپور کې چې د ناروې د کډوالو شورا خپور کړی، راغلي چې ناممکنه ده هغو ملیونونو کسانو ته مرستې ورسول شي چې اړتیا ورته لري مګر دا چې د امریکا د خزانې وزارت او نورې مرستندویې ټولنې فوري اقدام وکړي او بانکونو ته د پیسو د انتقال اجازه ورکړي.

طالبان: سراج الدین حقاني امریکا او نړیوالې ټولنې ته ګواښ نه دی کړی

سراج الدین حقاني

د طالبانو د کورنیو چارو وزارت ویلي، د دوی وزیر سراج الدین حقاني امریکا او نړیوالې ټولنې ته ګواښ نه دی کړی.

دا خبره یاد وزارت نن په خپل ټوېټر لیکلې.

په ټويټ کې چې نن انګریزي او پرون پښتو باندې شوی ادعا شوې چې له الجزیرې ټلوېزیون سره د سراج الدین حقاني د خبرو په استناد ځینو رسنیو ناسم راپورونه خپاره کړي چې که طالبان په رسمیت ونه پېژندل شي امریکا او نړیوالې ټولنې ته به ګواښ پېښ کړي.

په دغه ټويټ کې زیاته شوې چې حقاني هېڅ ګواښوونکې کلمه نه ده کارولې.

د ټويت دوهمه برخه کې راغلي چې طالبان د دوحې تړون ته ژمن دي او د افغانستان خاوره به د هېچا پر ضد ونه کارول شي.

د طالبانو د کورنیو چارو وزیر سراج الدین حقاني د امریکا او ملګرو ملتونو په تور لېسټ کې دی.

دی د 'اېف.بي.ای' د تعقیب لاندې کسانو کې دی او د داسې معلوماتو په بدل کې چې د هغه د نیولو سبب شي لس میلیونه ډالره جایزه اېښودل شوې ده.

له کابله قطر ته په چارتر الوتکه کې له ۳۰ زیات امریکایان لاړل

آرشیف، د قطر یوه چارتر شوې الوتکه

امریکایي 'اېن.بي.سي' ټلوېزیون د ځینو سرچینو په حواله وایي چې له څو میاشتني ځنډ وروسته د کابل له نړیوال هوایي ډګره د قطر د هوایي شرکت په یوه چارټر الوتکه کې له ۳۰ زیات امریکایان قطر ته ولېږدول شول.

د راپور له مخې دا خبره د امریکا د کانګرس یوه چارواکي او له دغې موضوع باخبرو دوو نورو کسانو کړې او ویلې یې دي چې دغه چارټر الوتکه د قطر د بهرنیو چارو وزارت له خوا چمتو شوې او پیسې یې د امریکا د بهرنیو چارو وزارت ورکړي دي.

د امریکا د بهرنیو چارو وزارت ویاند نېډ پرایس روانه اوونۍ وویل، د بهرنیو چارو وزیر انتوني بلېنکن له خپل قطري سیال محمد بن عبدالرحمن الثاني سره په ټیلیفوني خبرو کې له هغه غوښتي چې د همکاریو په ترڅ کې دې د کابل له هوایي ډګره چارټر الوتنې بېرته پیل کړي.

دا د تېر کال د نوومبر له میاشتې راهیسې لومړی ځل دی چې د کابل له نړیوال هوایي ډګره د خلکو د اخیستلو لپاره یوه چارټر الوتنه ترسره کېږي.

د امریکا د حکومت یوه چارواکي هم دوحې ته د دغې الوتنې د ترسره کېدو خبره تایید کړې چې امریکایان یې لېږدولي، خو دقیق شمېر یې نه دی ښودلی.

دغه اقدام څو ورځې وروسته له هغې کېږي چې طالب چارواکو په مزار شریف کې د څلویښتو کسانو چې د دوی په خبره د مزارشریف د هوایي ډګر له لارې په غیر غیر قانوني توګه له هېواده وتل، د نیولو خبر ورکړ.

د ملګرو ملتونو سرمنشي: افغانستان له یوه ډېر بحراني حالت سره مخ دی

د ملګرو ملتونو سرمنشي انتونیو ګوترېش

د ملګرو ملتونو سرمنشي انتونیو ګوترېش وایي، افغانستان له یوه ډېر بحراني حالت سره مخامخ دی او له هېوادونو غواړي چې د طالبانو تر واکمنۍ لاندې دې هېواد کې د بشري فعالیتونو د ترسره کولو لپاره د پیسو ټولو اړینو لېږد رالېږد ته اجازه ورکړي.

ګوترېش دغه څرګندونې تېره شپه د ملګرو ملتونو امنیت شورا غونډې ته چې د افغانستان په اړه جوړه شوې وه، وکړې او زیاته یې کړه چې افغانان اوس مرستو ته اړتیا لري.

دی وايي: "د اخلاقي مسؤلیت په توګه او د سیمه ییز، نړیوال امنیت او سوکالۍ لپاره موږ نه شو کولی دوی 'افغانان' پرېږدو. دوی سولې ته اړتیا لري، دوی هیلې ته اړتیا لري، دوی مرستې ته اړتیا لري."

د ملګرو ملتونو سرمنشي دغه راز د هر ډول قوانینو یا شرطونو چې په افغانستان کې له سختې لوږې سره د مخامخ میلیونونو کسانو د ژوند ژغورنې، د زده کړې او ټولنیزو خدمتونو لپاره د مرستې عملیات محدودوي، پر ځنډولو یا تعلیق ټینګار وکړ.

هغه وویل، افغانستان کې ټول خدمات د سقوط په درشل کې دي او د نغدو پیسو نشتوالي اړو کسانو ته د مرستو رسولو په برخه کې د ملګرو ملتونو او مرستندویه ډلو وړتیاوې محدودې کړي دي.

تېره میاشت د ملګرو ملتونو امنیت شورا پر افغانستان د ملګرو ملتونو له لګول شوېو بندیزونو څخه د بشرپالنې مرستې استثنا کړې.

خو پر افغانستان د طالبانو له بیا واکمنېدو راهیسې تر اوسه په امریکا کې د افغانستان شااوخوا نهه نیم میلیار ډالره شتمنې کنګل ده.

په ملګرو ملتونو کې د امریکا استازې لیندا توماس ګرینفیلډ د امنیت شورا غونډې ته وویل، واشنګټن هڅه کوي، دا ډاډ ترلاسه کړي چې د امریکا بندیزونه د بشري فعالیتونو مخه ونه نیسي او پر مختلفو لارو غور کوي چې د نغدو پیسو د کمښت ستونزې کمې کړي.

د کندز د قلعه زال اوسېدونکي: پُل نړیدلی کښتیو کې تګ د سر په بیه تمامېږي

د کندز د قلعه زال او اقتپې ترمنځ پُل

د کندز د قلعه زال ولسوالۍ اوسېدونکي وايي، د عمومي پُل خرابوالي له ګڼو ستونزو سره مخ کړي دي.

د ځایي اوسېدونکو په خبره اوس خلک د کښتیو په وسیله قلعه زال او اقتپې ته تګ را تګ کوي، خو د اوبو د زیاتوالي او سیلابونو په موسم کې په کښتیو کې تګ را تګ د دوی د سر په بیه تمامېږي.

د دغې ولسوالۍ اوسېدونکی ۴۰ کلن خدای نور ازادي راډیو ته وویل: "کابو ۶ کاله وړاندې د دغې ولسوالۍ پُل د جګړو پر مهال پر بمونو الوځول شوی و، خلک اوس په کښتیو کې ځي راځي، دې مسالې د ۸۰ کلیو اوسېدونکي له ګڼو ستونزو سره مخ کړي. سل افغانۍ کښتۍ ته ورکوو، کله چې اوبه زیاتې شي، کښتۍ چپه شي، هر کال یو- دوه موټره په سیند کې غرقېږي."

د قلعه زال مېشتو د خبرو له مخې، د قلعه زال پُل د پخواني نظام له لوري په ۲۰۱۰م زیږدیز کال کې د ۱۲۰ مترو په اوږدوالي د څه باندې ۷ میلیونه ډالرو په ارزښت جوړ شوی و چې د قلعه زال سیمه یې د دغې ولسوالۍ له مرکز اقتپې سره نښوله.

د کندز سیمه ییز طالب چارواکي بیا ډاډ ورکوي چې راتلونکي کال به د قلعه زال ولسوالۍ د نړېدلي پُل د بیارغونۍ کار پیل شي.

د قلعه زال ولسوالۍ د ۶۰ کیلومتر واټن په درلودو سره د کندز ښار شمال لویدیځ لور ته موقعیت لري او د کندز له سرحدي ولسوالیو څخه شمېرل کېږي.

د دغې ولسوالۍ اوسېدونکي په کرنه، مالدارۍ او غالۍ اوبدلو بوخت دي او له همدې لارې د خپلو کورنیو لګښت پوره کوي.

امریکا: افغان ډپلوماټان دې واشنګټن کې د افغانستان سفارت بند کړي

واشنګټن کې د افغانستان سفارت

العربیه ټلوېزیون وايي، د امریکا حکومت په خپل هېواد کې افغان ډپلوماټانو ته خبر ورکړی چې دوی په واشنګټن کې د افغانستان سفارت او همدا راز په نیویارک او لاس انجلس کې کونسلګرۍ بند کړي.

العربیه ادعا کوي چې له موضوع خبرو سرچینو دا هم ورته ویلي چې امریکا د افغان ډپلوماټانو ډپلوماټیک مصونیت هم اخلي.

تراوسه پورې د امریکا حکومت په دې اړه رسماً څه نه دي ویلي، خو په امریکا کې افغان ډپلوماټانو چې د افغانستان د پخواني حکومت استازیتوب کوي، پرون وویل چې بانکي حسابونه یې تړل شوي دي.

د امریکا غږ انګلیسي څانګې پر خپله وېبپاڼه د دوو ډپلوماټانو په قول ویلي چې په امریکا کې د افغانستان د سفارت او دوو کونسلګریو حسابونه بند شوي دي.

امریکا غږ وايي چې دغو افغان ډپلوماټانو نه غوښتل چې نومونه یې څرګند شي.

ناروې: طالبانو سره د غونډې معنی دا نه ده چې دوی په رسمیت پېژنو

اوسلو کې له طالب پلاوي سره غونډه

د ناروې د بهرنیو چارو وزیرې انیکن هوینفیلډ په اوسلو کې د طالبانو له استازو سره د امریکا، اروپايي اتحادیې د استازو له درې ورځنیو خبرو وروسته وویل، هېواد یې د دې ډول خبرو لار هواره کړه او د دې معنی دا نه ده چې ناروې د طالبانو حکومت په رسمیت پېژني.

دې وویل، ناروې له کلونو راهیسې له طالبانو سره خبرې کوي.

د اوسلو له خبرو وروسته د ناروې د بهرنیو چارو وزارت په یوه اعلامیه کې ویلي چې د اوسلو خبرې د یو شمېر افغاني موسسو په غوښتنه او د لوېدیځو متحدانو په مشوره وشوې.

د طالبانو د بهرنیو چارو وزیر امیرخان متقي په مشرۍ پلاوي د یکشنبې په ورځ په اوسلو کې خبرې پیل کړې او تر پرون چهارشنبې پورې یې دوام وکړ.

د طالبانو د بهرنیو چارو وزارت پرون په یوه اعلامیه کې له ناروې د دې خبرو د کوربه توب په خاطر مننه وکړه او د امریکا او نورو هېوادونو له لوري د افغانستان د کنګل شوېو پیسو د ازادولو او له افغانستان سره د بشري مرستو د دوام غوښتنه یې وکړه.

د طالبانو د بهرنیو چارو وزارت ویلي، په اوسلو کې د کنګل شوېو پیسو، اقتصادي او بشري مرستو په اړه ګټورې خبرې وشوې، خو د ناروې د بهرنیو چارو وزیره وايي، له طالبانو څخه یې ځینې غوښتنې په زغرده کړي او اوس باید انتظار وکړل شي چې ایا طالبان پر خپلو خبرو عمل کوي او که نه؟

د افغانستان د کرکټ تر نولسو کلونو کشره لوبډله نن سریلانکا سره مخ کیږي

د افغانستان د کرکټ تر نولسو کلونو د کشرې لوبډلې یو تن توپ اچوونکی

د افغانستان د کرکټ له نولس کلنو کم عمره لوبډله نن په نړیوال جام کې له سریلانکا سره مخ کېږي.

د دوی لوبه د کوارټر فاینل یا یو څلورم وروستي دور له سیالیو ده چې ګټونکی یې نیمه پایلوبې ته وځي.

لوبه د کربین په انټیګوا کې ده چې د کابل په وخت نن ماښام په پنځه نیمو پیلېږي.

افغان لوبډلې تردې دمه د نولس کلنو کرکټ نړیوال جام کې د ګروپي دور دوه سیال ټیمونه 'پي.اېن.جي پاپوا نیو ګينې' او زیمبابوې مات کړي، خو پر پاکستان یې بایللې.

هاخوا نن د پاکستان د کرکټ غوره لیګ پیلېږي.

ګڼ مشهوره افغان لوبغاړي لکه راشد خان، محمد نبي او رحمن الله ګربز دې لیګ کې ګډون کوي.

راشد خان پرون لیکلي چې د ملي ټیم لوبې یې پوره کړې او اوس د 'پي.اېس .اېل' یا پاکستان سوپر لیګ نوبت دی.

دی د لاهور له ټیم سره دی، خو اولنۍ لوبه کې د محمد نبي دوی ټیم کراچۍ کېنګز د ملتان سلطان سره لوبېږي.

په امریکا کې د تېر حکومت د ډیپلوماتانو بانکي حسابونه تړل شوي

په امریکا کې کپیټل ون بانک

په امریکا کې د افغانستان د پخواني حکومت ځینو دیپلوماتانو ویلي چې رسمي بانکي حسابونه یې تړل شوي دي.

د امریکا غږ انګلیسي څانګې پر خپله وېب پاڼه د دوو دیپلوماتانو په حواله ویلي چې په واشنګټن کې د افغانستان د سفارت او امریکا کې د افغانستان د دوو قونسلګریو حسابونه بند شوي دي.

امریکا غږ سره دغو ډیپلوماتانو د نوم نه ښودو په شرط خبرې کړې دي.

یوه ډيپلومات ویلي، دوی د امریکا بهرنیو چارو وزارت ته مراجعه کړې، خو تراوسه کوم پرمختګ نه دی شوی.

دې ډيپلوماتانو دا هم ویلي چې امریکا ورڅخه د چوپتیا غوښتنه کړې ده.

د سیټي بانک مسؤلانو هم چې د افغانستان د سفارت او قونسلګریو حسابونه په کې دي، له تبصرې کولو ډډه کړې ده.

لویدیځ ډپلوماټانو اوسلو غونډه له طالب پلاوي سره وکتل

طالب پلاوی

لویدیځ ډپلوماټان وایي، دوی د ناروې په کنفرانس کې له افغانستان سره بشري مرستې د بشري حقونو د وضعیت په ښه والي پورې وتړلې.

دغو ډپلوماټانو پرون د غونډې په وروستۍ ورځ د بندو دروازو ترشا په اوسلو کې د طالبانو له پنځلس کسیز پلاوي سره وکتل.

د ناروې د بهرنیو چارو وزیر هنریک تونې ( Henrik Thune ) تر دې غونډې مخکې وویل، لویدیځ ډپلوماتان به له طالبانو د پام وړ غوښتنې وکړي او وروسته به یې تعقیب هم کړي چې طالبان یې عملي کوي او که نه؟

معلومه نه ده چې دغو ډپلوماټانو له طالبانو څه غوښتنې کړې، خو ناروې د طالبانو له پلاوي د بشري حقونو او د ټولنې د نورو لږکیو د حقونو ټینګښت غوښتی دی.

دغه کانفرانس ته وربلل شوېو ښځینه فعالانو او د بشري حقونو ملاتړو هم له طالبانو غوښتي چې په عمل کې بشري حقونو او د ښځو او نجونو د کار او تعلیم حق تامین کړي.

د امریکا او قطر مشران به پر افغانستان هم وغږیږي

د امریکا ولسمشر جو بایډن

د امریکا ولسمشر جو بایډن او د قطر امیر شیخ تمیم بن حمد الثانی پر نورو مسالو سربیره د افغانستان پر روان وضعیت خبرې کوي.

ټاکل شوې چې دا دواړه مشران نن چهارشنبه(د سلواغې ۶مه) سپینه ماڼۍ کې سره وګوري.

د سپینې ماڼۍ ویاندې جن ساکي ویلي چې د دوی خبرې به د منځني ختیځ پر امنیت، د نړۍ د انرژۍ د تدارکاتو د ثبات پر ساتنه او د افغانستان پر وضعیت ور ټولې وي.

په افغانستان کې بشري وضعیت وروسته تر هغه ډېر کړکیچن شوی چې د تېرکال د اګسټ په ۱۵مه پخوانی حکومت ړنګ او طالبان واک ته ورسېدل.

د امریکا او قطر مشران داسې مهال سره ګوري چې متحده ایالاتونه او اروپایي متحدان یې پر دې غور کوي که روسیه پر اوکراین برید وکړي او اروپا ته د روسیې تدارکات کم شي، څنګه به د انرژۍ اړتیاوې پوره کوي.

قطر بیا د طبیعي ګازو پراخې زیرمې لري او امریکا هیله لري چې دا هېواد له اروپا سره د انرژۍ به برخه کې مرسته وکړي.

د افغانستان بانک: نغدې بشري مرستې د افغانیو پر ارزښت اغېز لري

د افغانستان بانک

د افغانستان مرکزي بانک وايي، له افغانستان سره نغدې بشري مرستې د ډالرو پر وړاندې د افغانیو د ارزښت په لوړولو کې نېغ په نېغه اغېز لري.

د دې بانک ویاند صابر مومند نن چهارشنبه (د سلواغې ۶مه) ازادي راډيو ته وویل چې د بشري مرستو له پیله تراوسه د ډالرو پر وړاندې د افغانیو ارزښت لوړ شوی دی.

د صرافانو د ټولنې مرستیال حاجي دادګل هم دا مساله تائیدوي او وايي، له اړمنو سره شوې نغدې مرستې کله چې په بازار کې تبادله کېږي، د ډالرو پر وړاندې د افغانیو د ارزښت په لوړولو مستقیم تاثیر کوي.

دا څرګندونې داسې مهال کېږي چې د یکشنبې په ورځ ۳۲ میلیونه ډالره د افغانستان نړیوال بانک (AIB) حساب ته انتقال شول.

دا له افغانستان سره د بشري مرستو د لړۍ پنځمه دوره ده چې د لړم یا عقرب میاشتې له وروستۍ اوونۍ وروسته هره اوونۍ افغانستان ته انتقالېږي.

هرات کې د زعفران په کښت کې د پام وړ کموالی راغلی

آرشیف- په هرات کې د زغفرانو کښت

د هرات د سوداګرۍ او پانګونې خونه وايي، په دې ولایت کې د زعفران په کښت کې د پام وړ کموالی راغلی دی.

د دې خونې مرستیال توریالي غوثي نن چهارشنبه (د سلواغې ۶مه) ازادي راډيو ته وویل، په روان لمریز کال کې د وچکالۍ له امله د زعفرانو کروندو د تېرکال پرتله کم محصول درلود.

ښاغلی غوثي وايي، په روان لمریز کال کې ۱۵ټنه زعفران تولید شوي دي، په داسې حال کې چې دا رقم تېرکال ۲۰ ټنه و.

خو نوموړی زیاتوي چې د تېر کال پرتله د زعفرانو بیې لوړې شوې دي.

ښاغلی غوثي وايي، تېرکال یو کیلو زعفران له ۲۵ تر ۳۰ زرو افغانیو پلورل کیدل، خو سږ کال یو کیلو له ۹۰ تر ۱۰۰ زرو افغانیو پورې خرڅېږي.

د نوموړي په وینا، په روان کال کې د هرات زعفران چین، متحده عربي اماراتو، ترکیې او اروپايي هېوادونو ته صادر شوي دي.

د طالبانو د حکومت د کرنې او مالدارۍ وزارت د شمېرو پر بنسټ سږ کال په ۳۴ ولایتونو کې په ۸۰۰۰ هکتاره ځمکه زعفران کرل شوي دي.

په هلمند کې یو کس په مرموز ډول وژل شوی

هلمند کې وژل شوی کس

د هلمند د مرکز لښکرګاه ښار ۷مه حوزه صافیانو سیمه کې یو کس په مرموز ډول وژل شوی چې وروسته یې جسد موندل شوی دی.

یوه سرچینه چې نه غواړي هویت یې ښکاره شي ازادي راډيو ته وویل، وژل شوی کس اسدالله نومیږي چې د خپل کور څخه نا معلومه کسانو وړی و او بیا یې وژلي دی.

د هلمند چارواکي هم مني چې یاد کس په مرموز ډول وژل شوی دی.

د هلمند د اطلاعات او فرهنګ ریاست د یویې اعلاميې په خپرولو سره ویلي، د وژل شوي کس جسد د طالبانو له خوا د ګرشک د سامنار دښت سیمه کې موندل شوی.

اعلامیه زیاتوي یاده وژنه جنايي اړخ لري، خو تر اوسه یې دقیق معلومات نشته.

طالبان وايي، هڅه کوي ترڅو د پیښې عاملین ونیسي.

که څه هم طالبانو په هېواد کې د امنیت ډاډ ورکوي خو له ډیرو ولایتونو څخه خبرونه خپریږي چې مرموزي وژنې او د جنایي پېښو ګراف ورځ تر بلي د ډیريدو په حال کې دی.

د کونړ ماڼوګي ولسوالۍ کې ماین چاودنې د یوې کورنۍ ۴ غړي ټپیان کړي

د کونړ نقشه

د کونړ په ماڼوګي ولسوالۍ کې د ماین چاودنې د یوې کورنۍ څلور غړي ټپیان کړي.

د کونړ د اطلاعاتو او فرهنګ سرپرست رییس مولوي نجیب الله حنیف ازادي راډیو ته وویل، دا پېښه د سې شنبې په ورځ (د سلواغې ۵مه) د ماڼوګي په اړونده مټین سېمه کې د ماین د چاودنې په نتیجه کې وشوه.

حنیف زیاته کړه: "د محمد علي په نوم د مټين اوسېدونکی دی. هغه ته چا د کوهې خوا کې ماین ایښی و چې دی برسېرن ټپي دی او ورسره درې ماشومان دي چې لمسيان یې دي، هغوی هم ورسره ټپیان شوي. ټول روغتون ته رسول شوي خو حالت يي ښه دی."

خو د اسعداباد په روغتون کې یو ډاکتر د نوم نه ښودلو په شرط ازادي راډیو ته وویل، د پېښې له ځایه د یوه ماشوم جسد او دوه ټپیان روغتون ته ور وړل شوي چې د یوه ټپي روغتیايي حالت نازک و او د زیاتې درملنې لپاره يي د ننګرهار حوزوې روغتون ته لېږلی دی.

تر اوسه د دې چاودنې مسولیت چا په غاړه نه دی اخیستی او چارواکو هم نه دي ویلي چې پېښه سیاسي علت لري که د شخصي دښمنۍ له امله شوې ده.

نور راوښيه

XS
SM
MD
LG