د لاسرسۍ وړ لېنکونه

تازه خبر
دوشنبه ۲۷ مرغومی ۱۴۰۰ کابل ۰۸:۱۵

افغانستان

سپانتا: د ملي وحدت حکومت جوړول د افغانستان د دایمي ستونزو حل نه دی

رنګین دادفرسپنتا پرون په کابل کې له مدني ټولنو سره په خبرو کې ویلي چې اوس د دې لپاره باید دې توافق ته غاړه کیږدي چې د افغانستان د خلکو حقوقي موضوع په کې مطرح ده.

نوموړي دا یو تریخ واقعیت وباله او زیاته یې کړه چې اوس باید دا واقعیت داسې لوري ته سوق شي چې د ډیموکراسۍ ارزښتونه په کې خوندي شي او د ثبات او وحدت لامل شي.

ښاغلي سپنتا دغه راز د نړېوالو سازمانونو او ادارو له خوا د افغانستان په انتخاباتو کې پرګډون یو ډول انتقاد وکړ او ویي ویل، چې د افغانستان د دغو حقوقي ادارو مسولیتونه ترې اخستل شوي او د رایو تفتیش هم د انتخاباتي شکایتونو د اوریدو کمیسیون د معیارونو له مخې نه بلکه د دوو کاندیدانو د توافق له مخې کیږي او دا یې د افغانستان د انتخاباتي کمیسیونونو په وړاندې شرعي حیله وبلله.

د ورځې تازه خبرونه دلته ولولئ

ملګري ملتونه: طالبان د مېرمنو ضد تاوتریخوالی او تبعیض رسماً په یوه دود بدلوي

لاریون

د ملګروملتونو د بشري حقونو د څارونکو یوه ډله وايي چې طالب مشران د ښځو او نجونو پر وړاندې د جنسیت پربنسټ د پراخې کچې تاوتریخوالی او تبعیض رسماً په یوه دود بدلوي.

دې شنونکو په خپل راپور کې چې نن دوشنبې(د مرغومې په ۲۷مه) خپور شو ویلي دي" د طالبانو دا پالېسي د جنسیت پر بنسټ او د زیان رسوونکو اقداماتو په وسیله د ښځو او نجونو پر وړاندې د ډله ییز مجازات په معنا ده."

د ملګروملتونو د څارونکو ډله وايي چې په افغانستان کې په سیستماتیک او دوامدار ډول له ټولنیز، اقتصادي او سیاسي محیطه د ښځو د څنډې ته کولو د هڅو له کبله اندېښمن دي.

دا څارونکي د کم عمر او جبري ودونو په هدف د افغان ښځو پر وړاندې د انساني قاچاق د خطرونو یادونه هم کوي او وايي چې په افغانستان کې هغه بنسټونه او میکانیزمونه له منځه تللي دي چې پخوا د ښځو د خونديتوب او له هغوی سره د مرستې لپاره رامنځ ته شوي وو.

د ملګروملتونو کارپوهانو، له هغه مهاله چې طالبانو د ۲۰۲۱ کال په اګست میاشت کې پر واک ولکه ټینګه کړه په دې اړه خبرداری ورکړی و.

طالبانو د دې راپور په اړه تراوسه څه نه دي ویلي.

په بدخشان کې په یوې ترافیکي پېښه کې ۴ کسان مړه شوي

ارشیف؛ د کابل-جلال اباد لویه لار

په بدخشان ولایت کې په یوې ترافیکي پېښه کې څلور کسان مړه او درې نور تپيان شوي دي.

د بدخشان د اطلاعاتو او فرهنګ ریاست په یوه بیان کې وايي، پېښه نن سهار د شهر بزرګ ولسوالۍ په کره نومې سیمه کې د یوه کورولا ډوله موټر د اوښتو له کبله وشوه.

په بیان کې د پېښې علت د سړک خرابي بلل شوې.

د یوه بل خبر له مخې په بلخ ولایت کې نن په یوه ترافیکي پېښه کې نهه کسان ټپیان شول.

د بلخ امنیه قومانداني وايي چې پېښه د مزار- شبرغان د لویې لارې په اوږدو کې د ډرېوانو د بې احتیاطۍ له کبله شوې ده.

د بشر حقونو سازمان: طالبانو له کاره د ښځو اېستلو سره وضعیت نور هم کړکېچن کړی

افغانې مېرمنې

د بشري حقونو د څار سازمان هیومن رایټس واچ وايي طالبانو له کاره د ښځو د اېستلو او د ډېرو کورنیو د نفقې د ګټونکو د وزګارولو له لارې د افغانستان روان حالت نور هم کړکېچن کړی دی.

د هیومن رایټس واچ د ښځو د حقونو د څانګې مرستیالې هیدربار ازادۍ راډیو ته وویل، طالبان باید پر خپلو هغو ژمنو عمل وکړي چې په دوحه کې او پر افغانستان له واکمنېدو وروسته یې د ښځو د تعلیم او کار په برخه کې په یوه خبري غونډه کې وکړې.

د بشري حقونو د څار د سازمان دې چارواکې پر نړیوالې ټولنې غږ وکړ چې له افغانستان سره په مرستو او خپلو هڅو کې ښځو ته لومړیتوب ورکړي.

طالبانو پرون یوځل بیا ډاډ ورکړ چې نجونې به د نوي تعلیمي کال له پیل سره سم ښوونځيو ته ولاړې شي خو د ښځو د کار په برخه کې یې کومه ځانګړي تګلاره تراوسه نه ده اعلان کړې.

د طالبانو حکومت: که هېواد ته بې کیفیته نفتي مواد وارد کړئ سخته سزا به ووینئ

د تیلو ټانک

د طالبانو حکومت د استنډرډ ملي ادارې د نفتي موادو ټولو سوداګرو ته خبرداری ورکړی چې هېواد ته د بې کیفیته نفتي موادو له واردولو ډډه وکړي.

دې ادارې د یکشنبې په ورځ ناوخته په یوې خبرپاڼه کې ویلي، هغه سوداګر چې د تیلو او ګازو واردات کوي له دې وروسته دې د بې کیفیته موادو له واردولو ډډه وکړي او که د سرغوړنې په صورت کې ونیول شي سخته سزا به وویني.

د یادې ادارې د اعلامیې پربنسټ، د بې کیفیته نفتي موادو استعمال د چاپیریال ترڅنګ د انسانانو روغتیا ته هم زیان رسوي او د دغې چارې د مخنیوي لپاره یې د عامې روغتیا وزارت سره په ګډه کار پیل کړی دی.

دا اقدام په داسې حال کې کیږي چې له دې وړاندې د نفتي موادو په ځانګړي ډول د پترولو او ګازو د لوړې بیې ترڅنګ د کیفیت په اړه یې هم په ځلونو خلکو شکایت کړی و.

عبدالسلام حنفي: د رغنیزو پروژو چارې چټکې کړئ

عبدالسلام حنفي

د طالبانو حکومت اقتصادي کمېسیون پریکړه کړې چې د ټولو سوداګرو مهمو ستونزو او په هېواد کې دې د رغنیزو پروژو د چارو چټکتیا ته ځانګړي پاملرنه وشي.

د ارګ له لوري په خپره شوې خبرپانه کې ویل شوي چې د طالبانو د حکومت د رئیس الوزرا دویم مرستیال مولوي عبدالسلام حنفي چې د اقتصادي کمېسیون مشري په غاړه لري تېره ورځ ناوخته یې د یو شمېر سکټوري وزارتونو او پانګوالو سره په لیدنه کې د سوداګرو ورسیتو ستونزو او په دې برخه کې د اغیزمنو ګامونو خبره کړې.

د خبر ځای په حواله، ښاغلي حنفي ټول هغه وزارتونو ته چې د رغنیزو پروژو په تطبیق کې ونډه لري دنده سپارلې تر څو د دې پروژو چارو ته چټکتیا ورکړې.

دخپرې شوې خبرپانې پر بنسټ، پریکړه شوې چې په هلمند او کندهار کې د کجکي بند د ژر رغېدو لپاره دې ټول هغه الکترونیکي توکي چې ورته اړتیا ده له پېرېدلو وروسته ژر تر ژره واستول شي.

دا ناسته داسې مهال کیږي چې مخکې له دې یو شمېر سوداګرو او پانګوالو د خپلو چارو په وړاندې د ګڼو ستونزې خبرې کړي وې.

طالبان وایي د نشه یي موادو پر وړاندې د مبارزې قضایي مرکز نه دی تړل شوی

ارشیف؛ طالبان روږدي کسان ټولوي

طالبانو هغه راپورونه رد کړل چې ګواکې د نشه یي موادو په وړاندې د مبارزې لپاره عدلي او قضايي مرکز تړل شوی دی.

د طالبانو یوه مرستیال ویاند احمد اله وثیق پرون ناوخته په ټویټر کې لیکلي، د دغه مرکز د تړل کېدو راپورونه واقعیت نه لري.

هغه په خبره د لویې څارنوالۍ سرپرست او مالي او اداري مرستیال مولوي شاه محمد شاهد خلکو ته ډاډ ورکړی چې د مخدره موادو په وړاندې د مبارزې لپاره عدلي او قضايي مرکز فعال دی او سرپرست هم ورته ټاکل شوی دی.

تر دې مخکې ځینو رسنیو راپور ورکړی و چې طالبانو دغه مرکز منحل کړی دی.

دغه مرکز په ۱۳۸۴ کال کې د مخدره موادو اړوندو دوسیو د څېړنې او ښکېلو کسانو د محاکمې په هدف ایجاد شوی دی.

راپورونه: سږکال په کندهار کې ۷۵ ماشومان د خوارځواکۍ له امله مړه شوي

په کندهار کې خوارځواکی ماشوم

د راپورونو له مخې د سږکال له پیله په کندهار ولایت کې ۷۵ ماشومان د خوارځواکۍ له امله مړه شوي دي.

سیمه ییزو رسنیو د کندهار د میرویس روغتون د چارواکو له خولې ویلي چې تر دې مهاله ۱۹۵۰ خوارځواکي ماشومان روغتون ته ور وړل شوي چې ۷۵ یې مړه شوي دي.

د ماشومانو د خوندیتوب موسسې سیف دې چلدرن تېره اوونۍ په یوه نوي راپور کې ویلي و چې په افغانستان کې د خوارځواکۍ په ماشومانو کې ۷۰۰ زره نور ناروغان زیات شوي چې په دې سره په هېواد کې د خوارځواکو ماشومانو شمېر یو لک کم څلور میلیونو ته رسېدلی دی.

سیف دې چلدرن ویلي و چې که سمدستي مرسته ونه شي نو یو میلیون ماشومان د مرګ له خطر سره مخامخ دي.

د چین سفیر سراج الدین حقاني سره د خپل هېواد د بشري مرستو پر دوام ټینګار کړی

 د طالبانو د کورنیو چارو وزیر 

د چین سفیر وانګ یو د طالبانو د حکومت د کورنیو چارو له سرپرست وزیر سراج الدین حقاني سره په لیدنه کې له افغانستان سره د خپل هېواد د بشري مرستو پر دوام ټینګار کړی.

د طالبانو د کورنیو چارو وزارت د ویاند مرستیال عقیل جان عزام پرون رسنیو ته په یوه ویډیویي پیغام کې د دې لیدنې جزییات شریک کړي.

عزام ویلي:" ښاغلي وانګ د اسلامي امارت سره د هر ډول بشردوستانه مرستو او په هېواد کې د خپلې خوښې په دیني او کلتوري ارزښتونو ولاړ نظام جوړولو او د افغانستان په کورنیو چارو کې د نه لاسوهنې ډاډ ورکړ."

د چین د بهرنیو چارو وزارت تېره اوونۍ پر افغانستان د امریکا د یو اړخیز بندیزونو د لیرې کېدو غوښتنه هم کړې وه.

د طالبانو له بیا واکمنېدو راهیسې چین څو واره له افغانستان سره مرستې کړي چې د کرونا واکسینونه او روغتیايي بستې یې د یادولو دي.

مسؤلین: ژر به په بېلابېلو ولایتونو کې د کرونا ضد روغتونونه فعاله شي

افغان جاپان روغتون

د طالبانو د حکومت د عامې روغتیا وزارت وايي، ډېر ژر به په بېلابېلو ولایتونو کې د کرونا ضد روغتونونه فعاله شي.

د دغه وزارت ویاند جاوېد هژیر پرون ازادي راډیو ته وویل چې په بېلابېلو ولایتونو کې څو نړیوالو ادارو له کرونا وایروس سره د مبارزې د مرکزونو مسؤلیت په غاړه اخیستی.

'"IOM' په هرات، ننګرهار، کندهار او هلمند ولایتونو کې د څلورو روغتونو مسؤلیت منلی دی. یونېسف اعلان کړی چې په پنځو ولایتونو کې د روغتونونو تمویل په غاړه اخلي او د روغتیا نړیوال سازمان ډبلیو اېچ او هم اعلان کی چې څلور تر پنځه روغتونونه به په ځینو ولایتونو کې تمویل او مخته یوسي."

په همدې حال کې په افغانستان کې د کرونا وایروس د مثبتو پېښو د زیاتېدو خبر ورکړل شوی دی.

پرون د ۳۸ نویو پېښو راپور ورکړل شوی چې له ډلې یې یو کس مړ شوی هم دی.


د روغتیا وزارت په دې وروستیو کې وویل چې د کرونا وایروس د بدلې شوې بڼې اومیکرون د پیژندلو لپاره تجهیزات نه لري او له مرستندویه ادارو په ځانګړي توګه د روغتیا له نړیوال سازمانه یې د مرستې غوښتنه کړې ده.

افغانستان کې د کرونا ویروس ۳۸ مثبتې پېښې ثبت شوي

د کرونا ویروس د ازمایښت یوه اله

د طالبانو حکومت د روغتیا وزارت تازه شمېرې ښيې چې په افغانستان کې د څلورویشتو ساعتونو پرمهال د کرونا ویروس اته دېرش مثبتې پېښې ثبت شوي دي.

د دغه وزارت ویاند جاوید هژیر، نن ازادي راډیو ته وویل: "د هېواد په کچه د پرون وروستۍ شمېرې دا دي چې د ۸۲۹ سمپلونو له جملې ۳۸ یې مثبتې پېښې وې. یو تن هم مړ شوی. ۲۹ نور کسان پرون روغ شوي. د مثبتو پېښو له جملې ۲۹ یې په کابل، اته په هلمند او یوه هم په لغمان کې ثبت شوې ده. یو تن په کابل کې مړ شوی دی."

د رسمي شمېرو له مخې، د کرونا وبا له پیله په افغانستان کې د کرونا ویروس څه کم یو لک او شپېته زره مثبتې پېښې ثبت شوي، خو متخصصان وايي واقعي شمېر ښايي تر دې زیات وي.

لا معلومه نه ده چې په افغانستان کې په تازه ثبت شوېو پېښو کې د کرونا ویروس نوې بڼه اومېکرون هم شامله ده او که نه؟

خوست کې طالب چارواکي: د عواید په راټولولو کې ۵۱ سلنه ډېروالی راغلی

د خوست ښار

په خوست کې طالب چارواکي وايي چې د تېر پرتله د دې ولایت حکومتي عواید لوړ شوي دي.

دوی حکومتي مامورینو سره د مالیه ورکوونکو همکارۍ ستايي او وايي، نظام هغه مهال خپلو خلکو ته ښه خدمتونه وړاندې کولی شي چې مالیات په خپل وخت او شفافه بڼه راټول شي.

چارواکو یادې څرګندونې د جنوري په ۱۶ مه په دې ولایت کې د مالیاتو د اوونۍ د نمانځنې پرمهال وکړې.

د خوست مستوفي مولوي محمدشریف ازادي راډیو ته وویل، د روان لمریز کال په تېره ربع کې ۵۱ سلنه اظافي عواید راټول شوي دي.

نوموړي زیاته کړه: "په درېیمه ربع کې څه هم ۴۸ میلیونه افغانۍ راټول شوي او د روان لمریز کال په څلورمه ربع کې څه د پاسه ۹۴ میلیونه افغانۍ عواید د مستوفیت له خوا نه جمع شوي دي، د درېیمې او څلورمې ربعې تفاوت ۵۱ سلنه اضافه دی."

د ګمرک رئیس منظور احمد عمر هم وايي، د کال د اولو پنځو میاشتو د عوایدو پرتله چې هغه وخت کې تېر نظام واکمن وو، د نوي نظام په روانو پنځو میاشتو کې ۱۳۸۴ میلیونه افغانۍ زیات عواید راټول شوي دي.

د ده په وینا چې یاد عواید د ګمرک د مسوولینو له خوا په غلام خان بندر کې راټول شوي دي.

د خوست ګمرک رئیس وايي، د راټولو شوېو عوایدو نیمايي برخه يې له دې ځایه د توکو د صادراتو دي، چې پاکستان ته وړل کېږي.

بل لوري ته خوستي سوداګر او د خصوصي بنسټونو مسوولین وايي چې اوس خلک د مالیاتو د ورکولو په ارزښت پوه شوي او مسوولینو ته يې په سپارلو کې ځنډ نه کوي.

خوست د افغانستان له سرحدي ولایتونو څخه دی چې څه نا څه دوامدارې عایداتي سرچینې لري.

کتونکي وايي، که د افغانستان او پاکستان د حکومتونو له خوا د غلام خان بندر د ټرانزیټ کېدو کار بشپړ شي او د هر ډول قانوني توکو وړل راوړل ورباندې پیل شي، همدارنګه د خوست له هوايي ډګره کورني او نړیوال پروازونه پیل شي، نو د اوس پرتله به د دې ځای د حکومتي عوایدو کچه څو برابره لوړه شي.

غزني کې د سکي سیالۍ پای ته ورسیدې

په غزني کې د سکي لوبې

په غزني ولایت کې د سکي سیالیو لومړی دور پای ته ورسېد.

د المپیک د ملي کمېټې د مطبوعاتو غړي مجیب قاري زاده نن یکشنبه (د مرغومي ۲۶مه) ازادي راډيو ته وویل، دا سیالۍ چې پرون ناوخته پای ته ورسېدې، د سکي ۱۲ لوبغاړو په کې ګډون کړی وو.

ښاغلی قاري زاده وايي، په دې سیالیو کې ځوانانو او تنکیو ځوانانو ګډون کړی وو.

نوموړي زیاته کړه چې د ځوانانو په کټګورۍ کې محمد یاسر عزیزي لومړی، سیرت غزنوي دوهم او ناصر اصغري درېیم مقامونه ترلاسه کړل.

د تنکیو ځوانانو په کټګوري کې منصور عزیزي اول، ساحل اصفي دوهم او ادریس عزیزي درېیم مقامونه وګټل.

دا سیالۍ چې یوه ورځ یې دوام وکړ، د جوړولو هدف یې د سکي لوبې وده ښودل شوې ده.

کابل کې چاودنه شوې، یو ماشوم یې وژلی دی

ارشیف

په کابل کې یوې چاودنې یو ماشوم وژلی دی.

د طالبانو د کورنیو چارو وزارت وايي، دا چاودنه نن یکشنبه (د مرغومي ۲۶مه) د کابل ښار د دولسمې امنیتي حوزې اړوند بتخاک څلور لاري سره نږدې شوې ده.

د دغه وزارت مرستیال ویاند عقیل جان عزام رسنیو ته په استولي پیغام کې دا پېښه تاييد کړې او ویلي یې دي چې په دې اړه یې څېړنې روانې دي.

د پېښې مسوولیت تر اوسه کومې ډلې نه دی منلی.

ملګرو ملتونو افغانستان کې د سختې بې وزلۍ د زیاتېدو خبرداری ورکړ

د ملګرو ملتونو سرمنشي انتونیو ګوتیریش

د ملګرو ملتونو سرمنشي په افغانستان کې د سختې بې وزلۍ د زیاتېدو په باب خبرداری ورکړ.

انتونیو ګوتیریش پرون په ټویټر کې لیکلي، که نړیواله ټولنه نورې کوټلې هڅې ونه کړي، په افغانستان کې به تقریباً هر نارینه، ښځه او ماشوم له سختې بې وزلۍ سره مخامخ شي.

ګوتیریش لیکلي چې د اقتصادي او ټولنیز زوال د مخنیوي لپاره باید همدا اوس لاس په کار شو او داسې لارې چارې پیدا کړو چې د میلیونونو افغانانو د نور کړاو مخنیوی وشي.

د ملګرو ملتونو سرمنشي انتونیو ګوتیریش تېره اوونۍ یوه کنفرانس ته په خبرو کې د ځینو شرایطو له مخې د شااوخوا ۹،۵ میلیارډو ډالرو په ارزښت د افغانستان د کنګل شوېو اسعاري زېرمو او شتمنیو د ازادېدو غوښتنه کړې وه.

جوزجان کې د ښځنیه سوداګرو فعالیتونه بیا پیل شوي

آرشیف- په جوزجان کې ځینې سوداګرې مېرمنې

د جوزجان د سوداګرۍ او پانګونې خونه په دې ولایت کې د ښځنیه سوداګرو د فعالیتونو د بیا پیل خبر ورکوي.

د جوزجان د سوداګرۍ او پانګونې خونې مشر معلم تورخي نن ازادي راډيو ته وویل، له وروستیو سیاسي بدلونونو وروسته د ښځینه سوداګرو کارونه په ټپه درېدلي وو، خو له تېرو دوو میاشتو راهیسې دا فعالیتونه بیا پیل شوي چې اوس د دې سوداګرو تولیدات او محصولات د جوزجان او نورو ولایتونو په بازارونو کې پلورل کیږي.

ښاغلی تورخی وايي، له ۱۵۰ ډېرې مېرمنې په ۱۹ بېلابېلو ټولنو کې سوداګریز فعالېتونه کوي او لسګونه نورې ښځې په انفرادي ډول په تولیدي کارونو لکه خیاطي، غالۍ اوبدل، د خوراکو توکو برابرول او لاسي صنایع په برخو کې په کار مصروفې دي.

نوموړی زیاتوي، د سوداګرۍ او پانګونې خونه هڅه کوي چې د جوزجان ولایت د ښځینه سوداګرو د تولیداتو لپاره په هېواد کې دننه او بهر بازار موندنه وکړي.

نور راوښيه

XS
SM
MD
LG