وروسته له هغې چې د افغانستان د انتخاباتو خپلواک کمیسیون د رایو دبیا تفتیش په اړه د ځنډ خبر ورکړ؛ په افغانستان کې د ملګروملتونو سیاسي دفتر یا یوناما له نړیوالو څارونکو غواړي چې؛ خپل څارونکي ژر دې هیواد ته را ولیږي.
په کابل کې د دې ادارې ویاند نظیف الله سالارزي د سه شنبې په ورځ ازادي راډيو ته وویل چې؛ د افغانستان د انتخاباتو خپلواک کمیسیون باید د رایو تفتیش د ملي او نړیوالو څارونکو په حضور کې ترسره کړي.
"د ملګرو ملتونو سازمان له نړیوالو څارونکو غوښتنه کړې چې؛ د تفتیش پروسيې لپاره ژر تر ژره خپل څارونکي ولیږي؛ لکه څنګه چې تاسې خبر یاست د ملګرو ملتونو سازمان یو شمېر لارښوونې هم کړي چې، یو هم د رایو تفتیش دی، باید د انتخاباتو د خپلواک کمیسیون د رایو تفتیش د نړیوالو څارونکو، رسنیو، د ملګرو ملتونو د مشاورینو او کاندیدانو د استازو په حضور کې تر سره کړي."
د انتخاباتو د دویم پړاو پر سر د وروستیو جنجالونو په اړه د ملګرو ملتونو او د امریکا د بهرنیو چارو وزیر جان کري په مینځګړیتوب د تېرې یکشنبې په شپه پرېکړه وشوه چې؛ تر راتلونکو ۲۴ ساعتونو پوري به د ټولو رایو د تفتیش پروسه پیل شي.
خو د دوشنبې په ورځ د انتخاباتو خپلواک کمیسیون رییس احمد یوسف نورستاني د یوې خبرې غونډې پرمهال وویل چې؛ دا پرېکړه د کمیسیون له موافقې پرته د دواړو کاندیدانو؛ ملګرو ملتونو او امریکا په منځګړیتوب شوې.
نوموړي وویل چې، په کابل کې د رایو د څیړلو لپاره د یوه مناسب ځای نشتون ترڅنګ د ملګرو ملتونو استازي هم تري غوښتي چې؛ د نړېوالو څارونکو د راتګ پوري دا پروسه وځنډوي.
په عین حال کې د افغانستان د انتخاباتو د څارنې موسسې مشر جانداد سپین غر وايي چې؛ د ښه شفافیت د تامین لپاره د دې پروسیې ځنډ به کومه ستونزه رامنځ ته نه کړي.
"زما په نظر مهمه خبره دا ده چې؛ په پروسه کې شفافیت تامین شي، ترڅو د پروسې اعتبار بېرته ترلاسه شي؛ که چېرې دا پروسه څو ورځې ورځنډول شي؛ کوم مشکل به رامنځ ته نه کړي، خو باید چې د رایو تفتیش په پوره شفافیت ترسره شي."
له بلې خوا د افغانستان د جمهوري ریاست دواړو کاندیدانو هم د رایو د تفتیش پرمهال د نړیوالو څارونکو د حضور غوښتنه کړې.
سره له دې چې د انتخاباتو خپلواک کمیسیون وايي چې؛ د نړېوالو څارونکو د نه راتګ له امله د رایو د تفتیش په اړه ځنډ رامنځ ته شوی؛ اروپايي ټولنې له دې پروسې څخه د څارنې لپاره د پوره چمتووالي خبر ورکړی.
د دې ټولنې مسوولینو ژمنه کړې چې؛ د انتخاباتو تر وروستۍ مرحلې پورې به د څارنې لپاره په افغانستان کې حضور ولري.
فیفا یا د افغانستان د ازادو او عادلانه انتخاباتو بنسټ هم ویلي؛ چې د انتخاباتو د بیا تفتیش له پروسې نه به پوره څارنه وکړي.
راپور: ناجیه ساپۍ