د لاسرسۍ وړ لېنکونه

تازه خبر
سه شنبه ۱ چنګاښ ۱۴۰۰ کابل ۰۸:۵۴

نړۍ

په جنیوا کې د سوریې د سولې په بهیر کې ډېر لږ پرمختګ شوی دی

د سوریې لپاره د ملګرو ملتو او عربي ټولنې ځانګړي استازي په جنیوا کې خبریالانو ته وویل؛ د سوریې د سولې په وروستیو خبرو کې ډیر لږ پرمختګ شوی دی.

لخضر ابراهیمي وویل، د سې شنبې د ورځې خبرې داسې سخته وې لکه د تیرې میاشتې د لومړۍ اونۍ خبرې.

د سوریې د حکومت او اپوزسیون استازیو پرون سره مخامخ غونډه وکړه. د اپوزسیون ویاند لويي صافي وویل؛ د حکومت استازیو ټینګار کاوه چې؛ خبرې باید د ټروریزم د درېدو لپاره وشي. حکومت ټولو یاغي ډلو ته ترورستان وایي.

لخضر ابراهیمي له ټولو خواوو وغوښتل چې؛ له سوریې سره مرسته وکړي څو د سوریې خلک له دغه مصیبته چې دا یې درېیم کال دی رابهر شي.

بل لور ته د جنیوا په خبرو کې چې پر یو څو ټکیو موافقه شوې ده؛ په هغو کې یو هم د حمص له ښاره د ملکیانو راایستل دي؛ خو دغه هڅې د سې شنبې په ورځ د دې لپاره ځنډنۍ شوې چې؛ دې ښار ته د موټرو د تګ لپاره پر لارو پراته خنډونه لرې شي.

د ورځې تازه خبرونه دلته ولولئ

بایډن د ایران له نوي مشرتابه سره د لیدنې کوم پروګرام نه لري

د امریکا ولسمشر جوبایډن

د امریکا ولسمشر د ایران له نوي مشرتابه سره د لیدنې کوم پروګرام نه لري.

دا خبره د سپېنې ماڼۍ ویاندې جین ساکي بېګا د ایران د نوي منتخب جمهور رییس ابراهیم رئیسي د خبرو په غبرګون کې وکړه چې ویلي یې و له جو بایډن سره نه ګوري.

مېرمن ساکي زیاته کړې، د امریکا د جمهور رییس او دولت له نظره د اټمي چارو په اړه وروستۍ پرېکړه د ایران د رهبر په لاس کې ده، نو ځکه هم ولسمشر بایډن د ایران له نویو مشرانو سره د لیدنې کوم پروګرام نه لري.

د ایران نوي منتخب جمهور رییس ابراهیم رئیسي پرون دوشنبه (د غبرګولي ۳۱مه) لومړی مطبوعاتي کنفرانس ورکړ او ویې ویل، د اټمي خبرو ملاتړ کوي، خو هغه خبرې چې د ایران ملي ګټې په کې تضمین وي.
هغه وویل، که له ایرانه ټول بندیزونه لېرې هم شي بیا هم دی له بایډن سره نه ګوري.
۶۰ کلن رئیسي د قضایه قوې مشر پاتې شوی او د ایران رهبر ایت الله علي خامنه اي ته چې د دغه هېواد تر ټولو مهمې پرېکړې یې په لاس کې دي له نږدې او باوري کسانو څخه دی.

په ویانا کې د ایران او د اټمي تړون لاسلیکوونکو هېوادونو تر منځ د ۲۰۱۵ میلادي کال د اټمي تړون د احیا په سر شپږم دور خبرې وړمه ورځ پای ته رسېدلي او مرکچیانو ویلي د هوکړې د بشپړولو په لټه کې دي.

د تاجیکستان سترې محکمې ۳ پولیس افسران په اوږده حبس محکوم کړل

د تاجیکستان ستره محکمه

د تاجیکستان سترې محکمې د دغه هېواد درې پولیس افسران د یوه کس د شکنجې په تور په اوږده حبس محکوم کړل.

د تاجیکستان یوه مدني اییتلاف دا خبره پرون دوشنبه (د غبرګوي ۳۱مه) رسنیو ته کړې ده.

د پولیسو دا افسران شیرعلي عزیزوف، سعدي دولت مرادزاده او ایرج نعیموف نومېږي.

دوی تورن شوي چې د حسن یادګاروف په نوم یو تاجکی وګړی یې د تاجیکستان په لویدیځ کې شکنجه کړی دی.

د پولیسو افسران له لسو تر دیارلسو کلونو په بند محکوم شوي دي.

اروپایي ټولنې د بلاروس پر ځینو چارواکو او ادارو نوي بندیزونه تصویب کړل

د اروپايي ټولنې بیرغونه

د اروپایي ټولنې د بهرنیو چارو وزیرانو د الکساندر لوکاشینکا د کورنۍ د غړو په ګډون د بلاروس پر یو شمېر چارواکو او ادارو نوي بندیزونه تصویب کړل.

په دغو بندیزونو چې نن به د اروپایي ټولنې په رسمي ژورنال کې خپاره شي، د پارلمان د غړو، څارنوالانو، قاضیانو او نورو چارواکو په ګډون ۷۱ افراد او ادارې په نښه شوې دي.

اروپایي ټولنې دغه افراد او ادارې پر مدني ټولنې او ډیموکراتیک اپوزېسیون د فشارونو د راوستو په ګډون له بشري حقونو څخه په سرغړونو او د قانون د واکمنۍ پر کمزوري کولو تورن کړي دي.

په دغو افرادو کې د لوکاشینکا زوی او یوه نګور هم شامل دي.

د دغو نویو بندیزونو له مخې به د اروپایي ټولنې د غړو هېوادونو په بانکونو د په نښه شویو افرادو او ادارو شتمنۍ کنګل کېږي او پر سفر به‌یې بندیز لګول کېږي.

د بلاروس پر خلاف دغه اقدامات د مېنسک له‌خوا د راین ایر هوایي شرکت د یوې الوتکې د جبري کېنولو او د اپوزېسیون د یوه فعال رامان پراتاسیویچ د نیولو په عکس‌العمل کې کېږي.

جرمني یو روسی څېړونکی د جاسوسۍ په تور ونیوه

ارشیف، جرمني پولیس

د جرمني چارواکي وایي، یو روسی څېړونکی یې د جاسوسۍ په تور نیولی دی.

د چارواکو په خبره دغه روسی تورن دی چې د جرمني له یوه پوهنتون څخه‌یې حساس معلومات د پیسو په بدل کې مسکو ته لېږدولي دي.

د جرمني د څارنوالۍ دفتر نن په یوه خبرپاڼه کې وویل چې ګومان کوي د ایلنور په نوم دغه تورن کس به د تېر کال د اکټوبر میاشتې له لومړیو د روسیې د جاسوسۍ ادارې لپاره کار پیل کړی وي.

د خبرپاڼې له مخې دغه مشکوک کس درې ورځې مخکې زندان ته لېږدول شوی دی.

قطر کې د نړیوال جام سیالیو ته ورتلونکي د کرونا ضد واکسین کولو ته اړ دي

قطر کې د ۲۰۲۲م کال د نړیوال جام سیالیو سټډیوم

قطر کې د ۲۰۲۲م کال د نړیوال جام سیالیو مینه‌وال اړ دي چې د کرونا ضد واکسین‌یې کړی وي.

د قطر صدراعظم شېخ خالد بن خلیفه بن عبدالعزیز الثاني پرون دولتي رسنیو ته وویل، قطر چې د دغو مسابقو کوربه دی، د دغه تورنمنټ د هغو مینه‌والو د خوندیتوب لپاره چې د لوبو نندارې ته ورځي، د یو ملیون ډوز واکسین د ترلاسه کولو هڅه کوي.

شېخ خالد ویلي: "کله چې په قطر کې د فیفا د ۲۰۲۲م کال نړیوال جام سیالیو وخت رسېږي، د نړۍ په زیاتو هېوادونو کې به خلک واکسین شوي وي او خوندي به وي."

په پام کې ده د نړیوال جام دغه مسابقې د ۲۰۲۲م کال د نومبر پر ۲۱مه پیل شي.

نیکول پاشینیان په پارلماني ټاکنو کې د بري اعلان وکړ

د ارمنستان سرپرست صدراعظم نیکول پاشینیان

د ارمنستان سرپرست صدراعظم نیکول پاشینیان په پرونیو تر وخت مخکې پارلماني ټاکنو کې د بري اعلان وکړ.

لومړنۍ نتیجې ښيي چې د پاشینیان ګوند د پام وړ بریا خپله کړې، خو د اپوزېسیون عمده اتحاد د ټاکنو نتیجه رد کړې او ادعا لري چې درغلي شوې ده.

د پرونیو ټاکنو د درې پر څلورمه برخه شمېرل شویو رایو لومړنۍ نتیجې ښيي چې د پاشینیان د مدني تړون ګوند ۵۵،۶ فیصده رایې خپلې کړي.

د دغو نتیجو له مخې د پخواني ولسمشر روبرټ کوچاریان په مشرۍ د ارمنستان اتحاد یوازې ۲۰ فیصده رایې ګټلې دي.

پاشینیان نن سهار وختي د خپلې بریا د اعلان پر مهال وویل چې د ارمنستان خلکو د مدني تړون ګوند ته د رهبرۍ واګې په لاس کې ورکړې.

هندوستان د کرونا ضد واکسین کمپاین بیا پیل کړ

هند کې د کرونا ویروس ضد واکسین د تطبیق بهیر

هندوستان په دغه هېواد کې چې د 'کووېډ-۱۹' په وړاندې مقابله کوي نن دوشنبه د کرونا ضد واکسین کمپاین بیا پیل کړ.

که څه هم د واکسین شمېر خورا کم دی، بیا هم هر بالغ کس کولای شي په وړیا ډول دغه واکسین ترلاسه کړي.

که څه هم دغه هېواد نړۍ ته د کرونا ضد واکسین له لویو صادروونکو و، خو په کور دننه د ستونزو له کبله نورې نړۍ ته د کرونا ضد واکسین صادرات ودرول شول.

په هندوستان کې چې ۱،۴ میلیارده وګړي لري، تر اوسه یوازې درې نیم فیصده خلک په بشپړ ډول واکسین شوي دي.

جرمني د بلاروس په وړاندې د پراخو اقتصادي بندیزونو غوښتنه وکړه

د جرمني د بهرنیو چارو وزیر هایکو ماس

د جرمني د بهرنیو چارو وزیر هایکو ماس، د بلاروس په وړاندې د پراخو اقتصادي بندیزونو غوښتنه وکړه.

دا غوښتنه د اروپايي ټولنې د هغې غونډې په درشل کې شوې چې په پام کې ده د دیکتاتور الکساندر لوکاشینکا د رژیم په وړاندې پر مجازاتوونکو اقداماتو په‌کې بحث وشي.

د اروپايي ټولنې د بهرنیو چارو وزیران نن په لوکزامبورګ کې سره غونډه کوي چې د بلاروس په وړاندې د بندیزونو پر لارو چارو بحث وکړي.

ښاغلي ماس له دي ویلټ ورځپاڼې سره په هغه مرکه کې چې نن دوشنبه خپره شوه ویلي: "فکر کوم چې د بلاروس په وړاندې له اضافي بندیزونو ډډه نه‌شي کېدای."

د بلاروس پر خلاف دغه اقدامات د مېنسک له‌خوا د راین ایر هوایي شرکت د یوې الوتکې د جبري کېنولو او د اپوزېسیون د یوه فعال رامان پراتاسیویچ د نیولو په عکس‌العمل کې کېږي.

ویانا د ایران د اټمي تړون د احیا لپاره د شپږم دور خبرو کوربه و

ارشیف، ویانا کې د ایران د اټمي تړون د احیا لپاره خبرې

د اتریش په پلازمېنه ویانا کې د ایران، روسیې، چین، فرانسې، بریتانیا، جرمني او اروپايي ټولنې استازو د ایران د اټمي تړون د احیا لپاره د شپږم ځل لپاره مستقیمې خبرې وکړې.

د امریکا استازی د ایران د مخالفت په خاطر مستقیماً په خبرو کې حضور نه‌لري، خو په غیر مستقیم ډول‌یې استازیتوب کېږي.

مرکچیانو ویلي چې په یو لړ مسایلو توافق شوی او اوس د دوی د هېوادونو په مشرانو پورې اړه لري چې پرېکړه وکړي.

دې خبرو کې د اروپايي ټولنې استازې انریکا مورا ویلي په یو لړ تخنیکي مسئلو موافقه شوې او اوس چې کله مرکچیان بېرته راستنیږي په دې پوه دي چې څنګه هوکړه بشپړه کړي.

د ایران د اټمي تړون د بیا راژوندي کولو په سر دا خبرې په ایران کې د ولسمشر په توګه د سخت‌دریځه ابراهیم رئیسي د ټاکل کېدو سره هم‌مهاله شوي.

د اروپايي ټولنې د بهرني سیاست مشر جوزف بورېل بیا ویلي د رئیسي ټاکنه به په دې خبرو باندې کومه اغېز ونه‌کړي.

هغه یکشنبه ویلي د رئیسي ټاکنه د هوکړې مخه نه‌نیسي، خو فُرصت په ختمېدو دی.

د اروپا فوټبال جام؛ سویس ترکیې ته ماته ورکړه او ایټالیا له وېلزه وګټله

د باکو المپيک سټډيوم

د اروپا د فوټبال جام په سیالیو کې بېګا سویس ترکیې ته ماته ورکړه او ایټالیا له وېلزه وګټله.

ایټالیا او وېلز دواړه د ۱۶ ټیمونو پړاو یا پري کوارټرفاینل ته هم وتلي دي.

د باکو په المپيک سټډيوم کې د سویس ټيم درې پر یو ترکیه له مخې لیرې کړه. د سویس لپاره دوه ګولونه جردان شقیري او یو ګول هم هاریس سیفاروویچ وواهه.

اخوا د اې ګروپ په بله لوبه کې بېګا شپه ایټالیا خپل مېلمه ټیم وېلز ته یو ګول ورکړ او ماته‌یې ورکړه.

تمه ده د اروپا د فوټبال جام په سیالیو کې د دوشنبې په ماښام څلور لوبې وشي.

فنلنډ له بلجیم سره مخ کېږي، روسیه له ډنمارک سره لوبه لري اوکرائین او اتریش مخ دي او شمالي مقدونیه هم له هالند سره لوبه لري.

د اروپا د فوټبال جام سیالۍ د جون په ۱۱مه پيل شوي او د جولای تر ۱۱مې دوام کوي.

برازیل کې په کرونا ویروس د مړینو شمېر تر ۵۰۰،۰۰۰ واوښت 

برازیل کې د کرونا له امله د وژل شویو کسانو ډله ییز قبرونه

په برازیل کې په کرونا ویروس د مړینو رسمي شمېر تر ۵۰۰،۰۰۰ واوښت.

له دې سره برازیل د امریکا تر متحدو ایالاتونو وروسته دویم هېواد شو چې په کرونا ویروس ډېر کسان په کې مړه شوي دي.

په برازیل کې د مړو شمېر پرون په داسې حال کې تر ۵۰۰زرو واوښت چې په زرګونو کسانو د کرونا وبا د مهارولو لپاره د ولسمشر ژایر بالسونارو پر اقداماتو د اعتراض لپاره لاریون وکړ.

په برازیل کې په کرونا ویروس د اخته کسانو شمېر ۱۸ میلیونو ته رسېدلی دی.

د ایران د اټمي تړون د بیا برحاله کېدو لپاره خبرې بیا پیلېږي

ویانا کې مذاکره کوونکي

مذاکره کوونکي د نړۍ له پیاوړو قدرتونو سره، د ۲۰۱۵میلادي کال د اټمي تړون د بیا برحاله کېدو لپاره خپلې خبرې بیا پیلوي.

دا په داسې حال کې ده چې راپورونه وايي، لا هم پر ګڼو عمده مسایلو اختلافات پرځای پاته دي.

نننۍ خبرې د هغو مذاکرو لړۍ ده چې ایران او د نړۍ شپږ پیاوړي هېوادونه په کې ښکېل دي او له اپرېل میاشتې په ویانا کې روانې دي.

د امریکا متحدو ایالاتونو له اټمي تړونه په ۲۰۱۸میلادي کال کې د وتلو اعلان وکړ او پر ایران یې بېرته بندیزونه ولګول.

د هغه تړون له مخې ایران د اقتصادي بندیزونو کمېدو په بدل کې خپل اټومي پروګرام محدود کړی و.

د روسیې مذاکره کوونکي میخایل اولیانوف خپل یوه ټویټ کې ویلي، د اټمي تړون د بیابرحاله کېدو لپاره ګډ کمیسیون نن بیا سره ګوري.

ارمنستان کې خلک نن پارلماني ټاکنو کې خپلې رایې کاروي

ارمنستان کې ټاکنې

په ارمنستان کې خلک نن یکشنبه (د غبرګولي ۳۰مه) تر وخت مخکې پارلماني ټاکنو کې خپلې رایې کاروي.

وروسته له هغې چې ارمنستان له اذربایجان سره د لانجمنې سیمې نګرنو قره باغ پر سر د شپږو اوونیو لپاره جګړه وکړه، په دغه هېواد کې له څو میاشتو کړکېچ اوج ته رسېدلی و.

د ارمنستان صدراعظم نیکول پاشنیان، د اپوزیسیون د لاریونونو او مخالفتونو له کبله تر وخت مخکې پارلماني ټاکنو اعلان وکړ.

دا لاریونونه او مخالفتونه د پاشنیان له خوا له اذربایجان سره د هغې جګړې په تړاو پیل شول چې بالاخره په نوومبر میاشت کې د روسیې په منځګړیتوب د اوربند موافقې تر لاسلیک وروسته پای ته ورسېده.

د ارمنستان تر وخت مخکې پارلماني ټاکنو ته د رایې ورکولو تر ۲۰۰۰ زیات مرکزونه پرانیستل شوي دي.

په دغه هېواد کې دوه میلیونه او شپږ لکه کسان د رایې ورکولو پر شرایطو برابر دي. اټکل کېږي د دغو ټاکنو لومړنۍ نتیجه نن ناوخته اعلان شي.

د بښنې نړیوال سازمان: د ایران له نوي ولسمشره دې د جرمونو څیړنه وشي

ابراهیم رييسي

د بښنې نړیوال سازمان د ایران د ولسمشر په توګه د ابراهیم رييسي د بریالیتوب د اعلان په غبرګون کې وویل، له نوموړي څخه باید د جرمونو تحقیقات وشي.

دې ډلې د ۱۹۸۸ کال په دوبي کې د زرګونو سیاسي بندیانو اعدام کېدو ته په اشاره ویلي، د ایران راتلونکی ولسمشر ابراهیم رييسي باید د نړیوالو جرمونو په خاطر تر جنايي تعقیب لاندې راوستل شي.

د بښنې نړیوال سازمان یا ایمنسټي انترنیشنل پرون شنبه (د غبرګولي په ۲۹مه) په یوه اعلامیه کې د ۱۹۸۸ کال پېښې د بشریت پر ضد جنایتونه بللي دي.

د ۱۹۸۸ کال په دوبي کې د روح الله خمیني په امر ډېر شمېر سیاسي بندیان په داسې حال کې اعدام شول چې ابراهیم رييسي د تهران د څارنوالۍ مرستیال او د هغه پلاوي غړی و چې د مرګ په پلاوي مشهور و. دغه پلاوي د بندیانو د اعدامونو په اړه پرېکړې کولې.

د سعودي ایتلاف د حوثي یاغیانو ۱۱ بې پیلوټه الوتکې ویجاړې کړي

ارشیف، ویجاړه شوې بې پیلوټه الوتکه

د سعودي عربستان په مشرۍ ايتلاف وايي، په یمن کې د ایران له ملاتړه د برخمنو حوثي یاغیانو له لوري ورلېږل شوې ۱۱ بې پېلوټه الوتکې یې ویجاړې کړي دي.

د سعودي عربستان دولتي ټلوېزیون پرون شنبه (د غبزګولي په ۲۹مه) د پوځي ايتلاف په قول وویل چې ۸ انتحاري بې پېلوټه الوتکې د سعودي عربستان په جنوب لوېدیځ کې د نجران ښار لورته او دوه د خمیس مشیط ښار خوا ته توغول شوې وې.

نور راوښيه

XS
SM
MD
LG