د لاسرسۍ وړ لېنکونه

تازه خبر
دوشنبه ۴ زمری ۱۴۰۰ کابل ۰۶:۵۵

افغانستان

کونړ: د چپې درې ولسوالۍ د خلاصولو لپاره پوځي عملیات پیل شول

د کونړ امنیتي مسوولین وایي چې؛ له محاصرې د دې ولایت د چپې درې ولسوالۍ د خلاصولو لپاره یې نن سهار پوځي عملیات پیل کړل.

په دې ولایت کې د ملي اردو د ۲۰۱ سیلاب قول اردو د قومندانۍ ویاند محمد هارون یوسفزي ازادي راډیو ته وویل چې؛ دا عملیات یې د طوفان په نوم پیل کړي دي.

هغه وایي چې؛ دغه عملیات ملي اردو، ملي پولیسو او ملي امنیت ځواکونه په ګډه ترسره کوي.

یوسفزی وایي چې؛ د چپې درې ولسوالی لیرې پرتې سیمې او د امنیتي ځواکونو ځینې پوستې له شاوخوا یو کال راهیسې د وسله والو مخالفینو له خوا محاصره دي.

د ورځې تازه خبرونه دلته ولولئ

د ننګرهار والي: جګړو کې د وژل شویو ۳۹ پاکستانيانو جسدونه پاکستان ته یوړل شول

په جګړو کې د وژل شویو پاکستاني جنګیاليو تابوتونه

د ننګرهار والي وايي په جګړو کې د وژل شویو ۳۹ پاکستاني وګړو جسدونه رسماً د سرې میاشتې له لارې پاکستان ته وړل شوي.

د افغان ولسمشر ستر سلاکار او د ننګرهار والي ضياءالحق امرخېل نن ویلي دغو پاکستانیانو د وسله‌والو طالبانو په لیکو کې جګړه کوله.

هغه زیاته کړې په دغو ۳۹ پاکستانیانو سربېره چې رسماً یې جسدونه سرې میاشتې وړي د لسګونه نورو پاکستاني جنګیالیو مړي هم له نورو بېلابېلو لارو پاکستان ته لېږدول شوي.

امرخېل ویلي افغان پوځیان د خپل هېواد دفاع کوي او که څوک د وژنو او لوټماریو لپاره راځي د ده په خبره همداسې به‌یې جسدونه لېږدول کېږي.

تر دې مخکې هم افغان چارواکو ادعاوې کړي چې د لسګونه پاکستاني جنګیالیو مړي پاکستان ته انتقال شوي.

پاکستاني چارواکي که څه هم نه‌مني چې د دوی اتباع په افغان جګړه کې ښکېل دي، خو هره ورځ په خواله رسنیو د دغه هېواد له بېلابېلو سیمو د هغو خلکو د جنازې اعلانونه کېږي چې د افغانستان په جګړه کې وژل شوي.

کندهار کې '۳۳ مدني فعالان، قومي مشران او خبریالان' وژل شوي

ارشیف، د کندهار یوه روغتون کې بستر شوي ټپيان

د بشر حقونو خپلواک کمېسیون وايي، په کندهار کې د جون له ۲۴مې د جولای تر ۶مې پورې ۳۳ مدني فعالان، قومي مشران او خبریالان وژل شوي.

دا خبره د یاد کمېسیون ویاند ذبیح‌الله فرهنګ نن ازادي راډیو ته کړې.

هغه ویلي د راپورونو په اساس چې د بشر حقونو خپلواک کمېسیون ټول کړي دا هدفي وژنې په دواړو هم د طالبانو او هم د حکومت تر کنټرول لاندې سیمو کې شوي.

د بشري حقونو خپلواک کمېسیون په دغو وژنو جدي اندېښنه ښودلې او له طالبانو او هم حکومتي چارواکو یې غوښتي چې د ملکیانو خوندیتوب ته پوره پام وکړي.

تر دې څو ورځې مخکې د افغانستان د کورنیو چارو وزارت هم طالبان تورن کړي و چې د سپین بولدک د نیولو پر مهال‌یې ۴۰۰ کسان له کورونو ایستلي او له ډلې یې له ۱۰۰ زیات وژلي دي.

طالبانو په کلکه رد کړې چې د دوی ډلې دې دا وژنې کړې وي او د افغان چارواکو تورونه‌یې بې‌ځایه بللي دي.

د افغانستان دفاع وزارت: تېر یوه شپه او ورځ کې ۱۷۵ طالبان وژل شوي

ارشیف، د افغان هوايي ځواکونو حمله

د افغانستان دفاع وزارت ادعا کړې چې تېر یوه شپه او ورځ کې ۱۷۵ طالبان وژل شوي او ۸۴ نور ټپیان دي.

د دغه وزارت مرستیال ویاند فواد امان نن په خپل ټوېټر په دې اړه یو بیان ورکړی.

د امان په خبره وسله‌والو طالبانو ته دا مرګ‌ژوبله په ننګرهار، پکتیکا، لوګر، غزني، کندهار، هرات، بلخ، جوزجان، سمنګان، سرپل، هلمند، بدخشان، کندز او بغلان کې د افغان دفاعي او امنیتي ځواکونو په بریدونو کې اوښتې ده.

د دفاع وزارت دغه ویاند همداراز ویلي چې افغان پوځیانو د سړک غاړې نهه ماینونه هم شنډ کړي دي.

وسله‌والو طالبانو په دې لوی شمېر د افغان ځواکونو له‌خوا د وراوښتې مرګ‌ژوبلې په تړاو د افغان حکومت د ادعا په غبرګون تر اوسه څه نه‌دي ویلي.

د راپورونو له مخې جګړو د اختر تر لنډې وقفې وروسته چې په‌کې بریدونه لږ څه کم شوي وو یو وار بیا زور اخیستی دی.

د امریکا دفاع وزیر: افغان ځواکونه دې د طالبانو د پرمختګونو مخنیوی وکړي 

د امریکا دفاع وزیر لوید استېن

د امریکا دفاع وزیر ویلي افغان ځواکونه په دې برلاسي دي چې د طالبانو د پرمختګونو مخه ونیسي.

لوید استېن چې په الاسکا ښار کې د افغانستان د وضعیت په تړاو خبریالانو ته غږېده دا خبره وکړه.

ده وویل: "هغوی وړتیاوې لري. دا ظرفیت لري چې پرمختګ وکړي او واقعاً په دې وتوانېږي چې د طالبانو د ځینو پرمختګونو مخه ډب کړي، خو وبه ګورو چې څه کېږي."

هغه زیاته کړه افغان مشرتابه په دې لګیا ده چې د ګڼ مېشتو سیمو شاوخوا خپل پوځ ځای پر ځای کړي.

د استېن په خبره مهمه دا ده چې د طالبانو د مخنیوي لپاره ډاډ حاصل شي چې د دې ډلې سرعت کم کړای شي.

هغه داسې وخت دا خبره کړې چې افغان پوځيان د راپورونو له مخې په ۲۸ ولایتونو کې له طالبانو سره په جګړو بوخت دي.

کابل کې د اختر په لومړۍ ورځ د راکټي بریدونو طراح او ملګري یې ونیول شول

نیول شوي کسان

د افغانستان کورنیو چارو وزارت وایي، د اختر په لومړۍ ورځ د راکټي بریدونو طراح‌یې نیولی دی.

دا خبره د یاد وزارت ویاند میرویس ستانکزي نن په پيغام کې رسنیو ته کړې ده.

ښاغلی ستانکزی وايي: "د کورنیو چارو وزارت د پولیسو ځانګړي ځواکونه وتوانېدل چې د پنځمې ناحیې په مربوطاتو کې د طالبانو د ترهګرې ډلې یو سرګروپ د مومن په نامه سره له درېیو تنو نورو همکارانو یې ونیسي. دا ترورېستان د اختر په ورځ د راکټي بریدونو له طراحانو او ترسره کوونکو څخه دي. دوی د پغمان ولسوالۍ په نورو هدفي وژنو او ترهګریزو بریدونو کې هم لاس درلود."

د اختر په لومړۍ ورځ د کابل ښار په درېیو سیمو باندې راکټي بریدونه وشول، خو د معلوماتو له مخې چا ته په‌کې مرګ‌ژوبله ونه‌رسېده.

د اسلامي دولت ډلې یا داعش، د دغو راکټي حملو مسؤلیت ومانه.

د فرانسې خبري اژانس په حواله، داعش ډلې په خپل ټلګرام کې د دې حملې مسؤلیت منلی دی.

دغه راکټي حملې داسې وخت وشوې چې په جمهوري ریاست کې د لوی اختر لمونځ روان و.

د اختر د لمانځه له ترسراوي وروسته ولسمشر اشرف غني د دغو راکټي بریدونو په غبرګون طالبانو ته په خطاب وویل چې د راکټونو په زور واک ته نه‌شئ رسېدلی.

طالبانو لا په دې تړاو څه نه‌دي ویلي.

المپيک لوبې؛ د افغانستان لومړني استازي مهدي یاوري ماته وخوړه

د توکیو په المپيکي لوبو کې د افغانستان لومړنی استازی مهدي یاوري

د توکیو په المپيکي لوبو کې د افغانستان لومړني استازي مهدي یاوري ماته وخوړه.

یاوري د ۱۰ متره بادي ټوپک په نښې ویشتلو کې ګډون کړی و.

هغه له نورو نه کمې نمرې واخیستې او وروستیو پړاوونو ته له ورتګه پاتې راغی.

د توکیو په المپیکي لوبو کې پنځو افغان لوبغاړو برخه اخیستې. تمه ده سې شنبه فرزاد منصوري د تکواندو په برخه کې سیالۍ پيل کړې.

د جولای په ۳۰مه فهیم انوري لامبو کوي او کیمیا یوسفي هم په ۱۰۰ متره منډو کې برخه اخلي. د جولای په ۳۱مه به شاه محمود نورزی د ځغاستې یا اتلتیک لوبو کې ګډون وکړي.

المپیک سیالۍ؛ افغان لوبغاړی مهدي یاوري د نښې ویشتنې برخه کې سیالۍ ته وځي

افغان لوبغاړی مهدي یاوري

ټاکل شوې ده چې نن د توکیو د ۲۰۲۰ کال په المپیک سیالیو کې افغان لوبغاړی مهدي یاوري د نښې ویشتنې په برخه کې سیالۍ ته ووځي.

د افغانستان د المپیک ملي کمېتې ویاندې بنفشې فیضي ازادي راډیو ته وویل، له افغان لوبغاړي مهدي سره سیالۍ ته د بېلابېلو هېوادونو ۴۵ نور لوبغاړي ولاړ دي.

دا سیالۍ چې وړمه ورځ پيل شوې د راتلونکې اګسټ میاشتې تر ۸مې نېټې دوام کوي.

د افغانستان د المپیک ملي کمېټې د معلوماتو له مخې، په دې سیالیو کې به د افغانستان په ګډون له ۲۰۷ هېوادونو څخه ۱۱ زره ۳۰۰ لوبغاړي په بېلابیلو سیالیو کې ولوبېږي.

له افغانستانه پنځه لوبغاړي د المپیک په سیالیو کې ګډون لري چې يوه‌یې مېرمن ده.

روس او تاجکستاني چارواکي د 'طالبانو د ګواښ' د مخنیوي پر اقداماتو غږېدلي

د افغانستان او تاجکستان پوله کې ځای پر ځای شوي روسي ټانکونه

تاس خبري اژانس راپور ورکړی چې د روسیې او تاجکستان د دفاع وزیرانو د هغو ګډو اقداماتو په اړه خبرې کړې دي چې هدف‌یې د دوی په وینا د افغانستان او تاجکستان له ګډ سرحد څخه د طالبانو د ګواښ مخنیوی دی.

تاس د روسیې د دفاع وزارت د سرچینو په حواله وايي، سرګي شوېګو او شېر علي میرزا پرون شنبه د افغانستان او تاجکستان په ګډ سرحد کې د روان وضعیت او د افغانستان د ناامنیو له کبله د احتمالي ګواښونو د مخنیوي لپاره د ګډو تدابیرو په اړه بحث وکړ.

په داسې حال کې چې له افغانستانه د نړیوالو ځواکونو د پوره وتلو د وخت له نږدې کېدو سره د افغانستان امنیتي وضعیت په خرابېدو دی، روسیې د جمعې په ورځ ژمنه وکړه چې له تاجکستان سره به مرسته وکړي څو د افغانستان په سرحد کې یوه نوې سرحدي قرارګاه جوړه کړي.

روسیه او تاجکستان همداراز په پام کې لري چې په راتلونکې میلادي میاشت کې د ګډ سرحد په اوږدو کې پراخ پوځي تطبیقات وکړي.

شاه محمود قریشي له چینايي مشرانو سره د 'افغانستان سولې' په اړه بحث کوي

د پاکستان د بهرنیو چارو وزیر شاه محمود قریشي (ښی) او د چین د بهرنیو چارو وزیر وانګ یي

د پاکستان د بهرنیو چارو وزیر وايي چې پیکېنګ ته د سفر پر مهال به له چینايي مشرانو سره د افغانستان د سولې په اړه بحث وکړي.

شاه محمود قریشي پر ټویټر په یوه بیان کې لیکلي، خوشحاله دی چې په چین کې دی او له خپل ورور د چین د بهرنیو چارو له وزیر وانګ یي سره د ستراتېژیکو دوه اړخیزو اړیکو، اقتصادي او امنیتي همکاریو، د افغانستان د سولې او پخلاینې او نورو مسایلو په اړه د بحث لپاره ګوري.

ښاغلي قریشي په یوه جلا ټویټ کې سوله او ثبات د افغانستان د ټولنیز اقتصاد د پرمختګ او سوکالۍ لپاره مهم بللی او لیکلي یې دي، دی له ټولو ښکېلو اړخونو غواړي چې اوربند وکړي او په ګډه کار وکړي څو هر اړخیز، ټول‌شموله او د خبرو له لارې سیاسي حل ته ورسېږي.

پاکستان ته چې د طالبانو په ملاتړ تورن دی، د افغانستان سولې په بهیر کې د یوه مهم لوبغاړي په سترګه کتل کېږي. همداراز چین د افغانستان د سولې په مسئله کې ډېره لېوالتیا ښودلې.

د شبرغان ښار د جامع جومات خطیب ووژل شو

ارشیف، شبرغان ښار کې یو وژل شوی کس

د شبرغان ښار د جامع جومات خطیب په ډزو ووژل شو.

د جوزجان د امنیه قوماندانۍ ویاند مسعود ندیم تېر ماښام ازادي راډیو ته وویل، مفتي رفیع‌الله پرون شنبه ماښام مهال د څو وسله‌والو کسانو له‌خوا چې په سیمرغ ډوله موټرو کې سپاره وو، په جومات کې دننه د کلاشنیکوف په ډزو ووژل شو.

ښاغلي ندیم زیاته کړه چې د دې قتل علت تر اوسه نه‌دی معلوم، خو د تحقیقاتو لپاره یوه ډله مؤظفه شوې ده.

د امنیه قوماندانۍ ویاند زیاته کړه چې بریدکوونکي له سیمې څخه تښتېدلي دي او د پېښې په تړاو تر اوسه څوک نه‌دي نیول شوي.

د جوزجان د ارشاد، حج او اوقافو د ریاست چارواکي وايي چې د شبرغان ښار د مولانا جلال‌الدین مېنې د جامع جومات خطیب یو بې‌پرې سړی و او له چا سره‌یې دښمني نه‌لرله.

مفتي رفیع‌الله په دې وروستیو کې په خپل مالي لګښت د نجونو او هلکانو لپاره یوه دیني مدرسه جوړه کړې وه.

د غزني چارواکي: مرکز کې ۶ وسله وال مخالفین وژل شوي او ۳ ټپیان دي

ارشیف، د غزني ښار

د غزني ولایت سیمه ییز چارواکي وايي، ددې ولایت د مرکز دوهمې امنیتي حوزې اړوند سیمه کې د ځانګړو عملیاتو په ترڅ کې شپږ وسله وال مخالفین وژل شوي.

د دې ولایت د والي ویاند واحدالله جمعه زاده د شنبې په ورځ د (زمری ۲ مه) رسنیو ته په لېږلي پیغام کې ویلي، دا عملیات نن تر غرمې وروسته د امنیه قوماندانۍ پولیسو ترسره کړي دي.

جمعه زاده زیاتوي: "دغه عملیات د تحویلدار کلا او اهنګرانو سیمه کې شوي چې په ترڅ کې یې درې تنه ټپیان شوي هم دي."

نوموړی زیاتوي، دغه عملیات به دوام وکړي.

وسله والو طالبانو تر اوسه په دې اړه څه نه دي ویلي.

د افغان ترجمانانو د نه ­خوندیتوب په اړه د امریکا اندېښنه

ارشیف، له امریکايي ځواکونو سره یو تن افغان ترجمان

د امریکا د متحدو ایالاتونو د بهرنیو چارو وزارت د افغان ترجمانانو او نورو وګړو د نه ­خوندیتوب په اړه اندېښنه وښوده.

د CNN خبري شبکې په حواله، طالبانو د مې میاشتې پر ۱۲ مه په افغانستان کې د امریکايي ځواکونو د یوه پخواني ترجمان سهیل پردیس سر پرې کړی و.

د امریکا د بهرنیو چارو وزارت مرستیال ویاندې جولیانا پورټر پرون یوه ټیلیفوني کنفرانس ته وویل: "د ترجمانانو او نورو افغانانو پر وړاندې د طالبانو د تاوتریخوالي او ظلمونو تازه راپورونه ښيي چې دغه ډله په عمل کې بشري ژوند او بشري حقونو ته چندان درناوی نه لري. موږ دا هدفي حملې، د اساسي پروژو ویجاړول او د افغانانو په وړاندې نورې حملې په کلکه غندو.»

په همدې حال کې د کاناډا حکومت ویلي، کاناډا ته د افغان ترجمانانو، د خپل سفارت د کار کوونکو او د هغوی د کورنیو غړو د انتقال بهیر ګړندی کوي.

کاناډا ویلي چې دغه افغانان ښايي د طالبانو د غچ اخیستنې د وژنو ښکار شي.

د ازادي راډیو د خبر مرکزي څانګې په حواله، په وروستیو کلونو کې وسله والو طالبانو په لسګونو افغانان او د هغوی خپلوان چې په افغانستان کې یې نړیوالو ځواکونو ته کار کاوه، وژلي دي.

کاناډا د افغان ترجمانانو د کورنیو غړو د انتقال بهیر ګړندی کوي

د افغانستان او کاناډا ګډ بیرغونه

د کاناډا حکومت ویلي، کاناډا ته د افغان ترجمانانو، د خپل سفارت د کار کوونکو او د هغوی د کورنیو غړو د انتقال بهیر ګړندی کوي.

کاناډا ویلي چې دغه افغانان ښايي د طالبانو د غچ اخیستنې د وژنو ښکار شي.

د کاناډا د کډوالو چارو وزیر مارکو میندي­سینو (Marco Mendicino) پرون جمعه وویل، د هغو کسانو ملاتړ کوي چې د دوی ملاتړ یې کړی او په زرګونو کسان به پر شرایطو برابر وي.

د ازادي راډیو د خبر مرکزي څانګې په حواله، په وروستیو کلونو کې وسله والو طالبانو په سلګونو افغانان او د هغوی خپلوان چې په افغانستان کې یې نړیوالو ځواکونو ته کار کاوه، وژلي دي.

د CNN خبري شبکې په حواله، طالبانو په مې میاشت کې په افغانستان کې د امریکايي ځواکونو د یوه ترجمان سر پرې کړی و.

خو طالبانو په جون میاشت کې ویلي وو، هغه افغانان چې پخوا یې له نړیوالو ځواکونو سره کار کړی، که پر خپلو پخوانیو کارونو پېښماني وښيي، له حملو به معاف شي.

چارواکي: ارزګان کې ترافیکې پېښې یو خبریال وژلی

د ارزګان ولایتي روغتون

د ارزګان د اطلاعاتو او فرهنګ رئیس وايي، په دې ولایت کې د یوې محلې راډیو خبریال تېره شپه په ټرافیکي پېښه کې مړ شوی دی.

احمد ځلاند نن ازادي راډیو ته وویل، دغه خبریال د تعلیم الاسلام په نوم د محلي راډیو کارمند و: "​تېره شپه د تعلیم اسلام راډيو د محلي راډيو د دیني خپرونو چلوونکی سمیع الله عبرت په نوم په یوه ترافیکي پېښه کې چې د موټر سایکل د ټکر له امله رامنځته شوی، وژل شوی دی."

چارواکي وايي، په پېښه کې درې نور کسان ټپیان شوي دي.

د ازادي راډیو خبریال وايي، د تعلیم اسلام راډیو له مسوولانو سره تر اوسه په دې اړه په تماس نه دی بریالی شوی.

هرات چارواکي: پر کرخ ولسوالۍ او سلمان بند بریدونه په شا تمبیدلي

د سلما د اوبو بند

د هرات والي وايي، امنیتي او دفاعي ځواکونو تېره شپه پر کرُخ ولسوالۍ د وسله والو طالبانو حمله په شا تمبولې ده.

عبدالصبور قانع، نن رسنیو ته وویل، د بادغیس له خوا د طالبانو په پلان حمله کې دې ډلې ته مرګ­ ژوبله اوښتې ده: "د نښتې په پایله کې د درېیو سرګروپانو په ګډون ۷۰ وسله وال طالبان مړه یا ټپیان دي. دوه هاموې، دوه رنجر او ۲۵ موټر سایکلونه یې د امنیتي ځواکونو لاس ته ورغلي دي."

د افغانستان امنیتي او دفاعي ځواکونو پرون سهار له وسله والو طالبانو د کرخ ولسوالۍ د مرکز د نیولو خبر ورکړی و.

په بل خبر کې د هرات محلي چارواکي ادعا کوي، پر سلما بند یې د وسله والو طالبانو حمله په شا تمبولې ده.

د هرات ولایت د مطبوعاتي دفتر په اعلامیه کې راغلي چې طالبانو پر دغه بند پراخه حمله پلان کړې وه، خو د دولتي ځواکونو په کمین کې دوه طالبان وژل شوي او ۵ نور ټپیان دي.

طالبانو په دې اړه څه نه دي ویلي.

نور راوښيه

XS
SM
MD
LG