د لاسرسۍ وړ لېنکونه

تازه خبر
پنجشنبه ۷ زمری ۱۴۰۰ کابل ۱۱:۲۴

نړۍ

قرغزستان تر ۲۰۱۴ کال وروسته د مناس هوايي ډګر تړون نه تمدیدوي

د قرغزستان حکومت پرېکړه کړې ده؛ چې د مناس هوایي اډې تړون د دوه زره څوارلسم کال د جولای له یولسمې وروسته تمدید نه کړي.

دغه اعلان د سې شنبې په ورځ د قرغزستان د کابینې په ویب پانه کې خپور شو. په دې اعلان کې ویل شوې دي، چې مسوده به د تایید لپاره ډیر ژر پارلمان ته واستول شي.

د امریکا د بهرنیو چارو د وزارت یوه ویاند ازادي راډیو ته وویل؛ چې د راتلونکي احتمالي ګامونو په اړه اوس څه نه شي ویلي؛ خو د مناس له هوایي ډګره نړیوال ځواکونه د یوه تړون له مخې په افغانستان کې د خپلو ځواکونو ملاتړ کوي.

د مناس په هوایي ډګر کې نژدې زر امریکایي پوځیان دېره دي او یو شمېر امریکایي الوتکې هم هلته شته.

د قرغزستان ولسمشر الماس بیک اتمبایف څو ځلې مخکې ویلي وو؛ چې وروسته تر دې چې د ناټو ځواکونه په دوه زره څوارلسم کال کې له افغانستانه وځي؛ د مناس په هوایي ډګر کې به یو بهرنی عسکر هم پرې نه ږدي.

د ورځې تازه خبرونه دلته ولولئ

اوکراین کې د الوتکې د لوېدو پېښې یو پیلوټ او ۳ امریکایان ووژل

اوکراین کې لویدلې الوتکه

د اوکراین په لویدېځ کې د یوې وړې الوتکې د لوېدو په پېښه کې یو ځایي پیلوټ او درې امریکایان وژل شوي دي.

پولیسو ویلي چې دا الوتکه په ځایي وخت غرمه مهال په ایوانو فرنکیوسک سیمه کې له یوه کور سره ولګېده.

وژل شوي امریکایي مسافر د امریکا هسدیک یهودان بلل شوي دي، دا خبره د اوکراین د یهودانو متحدې ټولنې کړې ده.

د پولیسو په وینا له هغه کوره چې دا الوتکه پرې لګېدلې، یوه مېرمن او دوه ماشومان روغ وتلي دي.

جو بایډن د بلاروس د اپوزسیون له مشرې سره وکتل

د امریکا د متحد ایالاتونو ولسمشر جو بایډن او د بلاروس د اپوزسیون مشره سویتلانا څخانوسکایا

د امریکا د متحد ایالاتونو ولسمشر د بلاروس د اپوزسیون له مشرې سره چې په جلاوطني کې ژوند کوي، په سپینه ماڼۍ کې وکتل.

جوبایډن تر دې غونډې وروسته وویل، امریکا د بلاروس له ولس سره ولاړه ده.

ترغونډې وروسته سویتلانا څخانوسکایا وویل چې خپل پيغام یې د امریکا تر ولسمشره ورساوه: "د دې لپاره چې د ولسمشر کاري پروګرام ډېر بوخت دی. موږ ډېر وخت نه درلود، شااوخوا پنځلس دقیقې مو خبرې وکړې، خو دا ډېر تود هرکلی و. ما داسې څوک ولیدل چې بې تفاوته نه دی، هغه څه چې په بلاروس کې پېښیږي هغه ته بې تفاوته نه دی."

څخانوسکایا زیاته کړه چې ولسمشربایډن ورته ویلي دي چې په بلاروس کې مبارزه د سیاسي جغرافیې لپاره نه ده، هلته د شخړو او بې قانوني پرضد مبارزه ده.

په بلاروس کې وروسته تردې کړکېچ رامنځته شو چې الکساندرلوکاشینکا پروسږکال د اګست د میاشتې په انتخاباتو کې د شپږم ځل لپاره د ولسمشر په توګه اعلان شو.

د ده مخالفان وایي چې دې انتخاباتو کې درغلۍ شوي دي او څخانوسکایا په کې بریالۍ شوې وه.

مېرمن څخانوسکایا غواړي چې بیا انتخابات وشي.

امریکا او هند ژمنه وکړه چې خپل امنیتي مشارکت به پراخوي

انتوني بلېنکن او اېس جی شنکر پرون په نوي ډیلي کې سره وکتل

د امریکا د متحد ایالاتونو او هند د بهرنیو چارو وزیرانو ژمنه وکړه چې خپل امنیتي مشارکت به پراخوي.

انتوني بلېنکن او اېس جی شنکر پرون په نوي ډیلي کې سره وکتل. ښاغلي بلېنکن وویل، د افغانستان په ثبات کې د هند ونډه مهمه ده.

د بلېنکن او شنکر ترمنځ دا غونډه په داسې حال کې وشوه چې له افغانستانه د نړیوالو ځواکونو له وتلو سره چین په سیمه کې د خپل نفوذ د پراختیا هڅو ته مخه کړې ده.

د امریکا د بهرنیو چارو وزیرخبریالانو ته وویل، د امریکا او هند اړیکي د اهمیت له پلوه په نړۍ کې بې ساري دي.

ده زیاته کړه چې امریکا او هند به د افغانانو د لاسته راوړنو د خوندیتوب او په سیمه کې د ثبات لپاره خپلو هڅو ته له افغانستانه د نړیوالو ځواکونو تر وتلو وروسته هم ادامه ورکوي.

د هند د بهرنیو چارو وزیر اېس جی شنکر بیا وویل چې نړیواله ټولنه یو خپلواک، ډموکراتیک او باثباته افغانستان غواړي چې له ګاونډیانو سره په سوله کې وي.

د شمالي او جنوبي کوریاوو ترمنځ بیا تماسونه پیل شول

د شمالي کوریا مشر

د شمالي او جنوبي کوریاوو ترمنځ له ۱۴ میاشتې وروسته تماسونه بیا پیل شول.

د شمالي کوریا مشرانو تېرکال په یوه غونډه کې چې د دغه هېواد د مشر خور هم په کې ګډون درلود، له جنوبي کوریا سره د اړیکو لیکه او له سیول سره تماسونه پرې کړل.

خو اوس شمالي کوریا بیا پرېکړه کړې چې له جنوبي کوریا سره تماسونه پیل کړي.

د جنوبي کوریا خبري اژانس یونهاپ پرون راپور ورکړ چې د دوو هېوادونو ترمنځ د تماسونو د بیا پیلېدو پرېکړه د دوو هېوادونو د مشرانو له موافقې وروسته شوې ده.

د شمالي کوریا رسمي خبري اژانس هم د دوو هېوادونو ترمنځ د تماسونو بیا پیلېدا تایید کړې ده.

د پیسو نړیوال صندوق امریکا کې د اقتصادي ودې د زیاتوالي اټکل وکړ

ارشیف، عکس تزئیني بڼه لري

د پیسو نړیوال صندوق په شتمنو هېوادونو کې د کرونا پرضد د واکسیناسیون د چټکوالي په خاطر په دغو هېوادونو په تېره بیا په امریکا کې د اقتصادي ودې د زیاتوالي اټکل وکړ.

د دې صندوق په باور په وروسته پاتې هېوادونو کې به چې د واکسیناسیون بهیر په کې ورو دی، اقتصادي وده نوره هم کمه شي.

د دې ادارې له اټکل سره سم، په ۲۰۲۱ میلادي کال کې د نړۍ اقتصادي وده په متوسط ډول ۶ سلنه زیاته شوې چې د تېرکال پرتله، خورا زیاته ده.

تېر کال د کرونا وبا په نړۍ کې اوج ته ورسېده او اقتصادي وده یې منفي ۳ اعشاریه ۲ ته ټیټه کړه.

بایډن: لویه سایبري حمله په یوه رښتیني توده جګړه بدلېدلای شي

د امریکا ولسمشر جو بایډن

د امریکا ولسمشر جو بایډن خبرداری ورکړی چې یوه لویه سایبري حمله په یوه رښتیني توده جګړه بدلېدلای شي.

ښاغلي بایډن پرون سې شنبې د امریکا د امنیتي ادارو چارواکو ته د وینا پر مهال د امریکا د ملي امنیت لپاره د روسیې او چین د ګواښونو یادونه وکړه.

ولسمشر بایډن د امریکا پر دولتي ادارو او خصوصي شرکتونو د سایبري حملو زیاتېدو ته چې امریکايي چارواکو یې پړه پر چین او روسیې اچولې ده اشاره وکړه او ویې ویل چې که توده جګړه ونښلي نو دا به یوه حقیقي جګړه وي چې علت به یې وروستۍ نفوذي سایبري حملې وي.

د بایډن د کار په لومړیو شپږو میاشتو کې د سایبري حملو له لړۍ وروسته هغه سایبري امنیت د خپلو اجراآتو لومړیتوب بللی دی.

د اوکراین ولسمشر د وسله والو ځواکونو مشر بدل کړ

د اوکراین ولسمشر ولادمیر زلنسکي

د اوکراین ولسمشر ولادمیر زلنسکي د وسله والو ځواکونو مشر بدل کړ.

دا اقدام داسې وخت کېږي چې کییف هڅه کوي، د روس-پلوه بېلتون غوښتونکو په وړاندې په اووه کلنه جګړه کې له ناټو سره خپل ارتباطات ژور کړي.

دغه جګړه د اوکراین په ختیځ کې د اوکراییني ځواکونو او روس- پلوه بېلتون غوښتونکو ترمنځ روانه ده.

د جمهوري ریاست ویاند سرهي نیکيفوروف پرون وویل چې جنرال والري زالژني به د جنرال روسلان خومچاک پرځای د اوکراین د دوه نیم لکه فعالو پوځیانو قومانده پرغاړه واخلي.

د جمهوري ریاست ویاند وايي، د دې بدلون هدف د دفاع وزارت او وسله والو ځواکونو ترمنځ د همږغۍ بهتري ده.

د المپيک سیالۍ؛ د جاپان تنس لوبغاړې چکۍ لوبغاړې ته لوبه بایلوده

د جاپان تنس لوبغاړې نې اومي اوساکا چې تمه‌یې لرله د المپیک د سرو زرو مډال به ګټي.

د جاپان تنس لوبغاړې نې اومي اوساکا چې تمه‌یې لرله د المپیک د سرو زرو مډال به ګټي له چکۍ لوبغاړې مارکتا وندروسووا څخه نن په درېیم رونډ کې، شپږ-یو او شپږ-څلور، لوبه بایلوده.

اوساکا چې څلور ځله‌یې د ګرانډ سلم لوبو اتلولي خپله کړې ده د المپیک د پرانیستونکو مراسمو پر مهال د المپیک د لوی مشعل د لګولو لپاره غوره شوې وه.

چکۍ لوبغاړې مارکیتا وندروسووا به اوس له اسپانوۍ لوبغاړې پاولا بادوسا یا نادیا پودروسکا سره چې د ارجنټاین ده، بله لوبه کوي.

د المپیک لوبې د جاپان په پلازمېنه توکیو کې د جولای په ۲۳مه پیل شوې او د اګسټ تر اتمې به روانې وي.

د قرغزستان د اپوزېسیون مشر په زندان کې د نه‌خوړو اعتصاب کړی

د قرغزستان د اپوزېسیون، توران ګوند مشر جینیش مولدوکماتوف

د قرغزستان د اپوزېسیون، توران ګوند مشر جینیش مولدوکماتوف په زندان کې د نه‌خوړو اعتصاب کړی دی.

د مولدوکماتوف همکار ایرلان بیکچورو ازادي راډیو ته وویل چې مولدوکماتوف د جولای په ۲۶مه وروسته تر دې اعتصاب پیل کړ چې خبر شو چې دا تور هم پرې لګول شوی دی چې ده د عامه ګډوډیو چارې تنظیم کړې دي.

مولدوکماتوف چې په ښکاره به‌یې پر ولسمشر سادیر جباروف انتقاد کاوه د مې په میاشت کې په دې تور ونیول شو چې تېر اکټوبر یې د مظاهرو په وخت حکومتي ودانۍ نیولې وې. دا مظاهرې د پارلماني انتخاباتو د نتیجو پر ضد وې.

مولدوکماتوف وایي چې د سیاسي مخالفتونو له کبله پرې دا تور لګېدلی دی.

مولدوکماتوف هم د اکټوبر په ټاکنو کې پارلمان ته ځان کاندید کړی و، خو د دولتي نتیجو له مخې ده په دې انتخاباتو کې ماتې خوړلې ده.

بایډن: عراق کې د امریکايي سرتیرو ماموریت د پای ته رسېږي

د امریکا ولسمشر جوبایډن

د امریکا ولسمشر جوبایډن وایي، عراق کې یې د سرتیرو پوځي ماموریت د روان کال په وروستیو کې پای ته رسېږي.

بایډن پرون سپینه ماڼۍ کې د عراق له صدر اعظم مصطفی الکاظمي سره د کتنې پر مهال وویل، د عراقي ځواکونو د روزنې او سلا مشورې ماموریت به یې دوام ولري.

د دې لیدو کتو ګډه اعلامیه د امریکا بهرنیو چارو وزارت خپره کړې چې په کې راغلي، د عراق او امریکا راتلونکې اړیکې به د عراقي ځواکونو د روزنې او استخباراتي معلوماتو په شریکولو ورټولې وي.

امریکا داسې مهال عراق کې خپل پوځي ماموریت پای ته رسوي چې لا هم دغه هېواد کې د داعش وسله والې ډلې ګواښ پاتې دی.

د تېر اختر په شپه داعش د بغداد له ګڼې ګوڼې یوه ډک مارکیټ کې برید وکړ چې لسګونه تنه یې مړه او ټپیان کړل.

د سعودي د بهرنیو چارو وزیر پاکستان ته ځي

د سعودي عربستان د بهرنیو چارو وزیر شهزاده فیصل بن فرحان السعود

د سعودي عربستان د بهرنیو چارو وزیر نن پاکستان ته سفر کوي.د پاکستان د بهرنیو چارو وزارت په دې تړاو پرون یو لنډ بیان ورکړی.

په بیان کې راغلي چې د شاه محمود قریشي په بلنه د سعودي عربستان د بهرنیو چارو وزیر شهزاده فیصل بن فرحان السعود د جولای پر ۲۷مه له یوه لوړپوړي پلاوي سره اسلام اباد ته ورځي.

تمه ده شهزاده فیصل له خپل پاکستاني سیال شاه محمود قریشي او نورو پاکستاني چارواکو سره پر دوه اړخیزه اړیکو او د سیمې پر حالاتو غږېږي.

ملګرو ملتونو تونس کې د ارامۍ د برقرارېدو غوښتنه کړې

تونس

ملګرو ملتونه په تونس کې د ارامۍ د برقرارېدو غوښتنه کړې ده.

دا وروسته له هغه چې د تونس جمهور رییس قیس سعید صدراعظم هشام المشیشي له دندې لېرې کړ او پارلمان یې هم وځنډاوه.

ولسمشر سعید وروسته له هغه صدراعظم لېرې کړ چې خلکو د کرونا وبا په تړاو د حکومتي د مدیریت په غبرګون مظاهرې وکړې.

د ملګرو ملتونو د سرمنشي انتونیو ګوتیریش یوه ویاند فرهان حق ویلي چې ټولې خواوې باید له زغمه کار واخلي، تاوتریخوالی پرېږدي او ډاډمنه کړي چې وضعه ارامیږي.

هغه زیاته کړې هر راز جنجال باید د خبرو له لارې هوار شي.

د تونس د منحل شوي پارلمان مخې ته نښتې وشوې

د تونس د پارلمان مخ ته اخ‌وډب

وروسته له دې چې د تونس ولسمشر قیس سعید د حکومت صدراعظم لیرې او پارلمان‌یې منحل کړ، نن د دې هېواد د پارلمان مخې ته د نښتو راپورونه ورکړل شول.

په همدې حال کې پوځ ته دنده سپارل شوې چې د دولتي ودانیو ساتنه وکړي.

ولسمشر سعید، صدراعظم هشام المشیشي نن له دندې ګوښه او پارلمان‌یې د یوې میاشتې لپاره بند کړ، خو د تونس تر ټولو لوی اسلام‌پال سیاسي ګوند النَهضه دې اقدام ته د پوځي کودتا نوم ورکړ.

د وروستیو راپورونو له مخې پوځیانو د پارلمان ودانۍ بنده کړې او دولتي ودانۍ یې کلابندې کړې دي او په عین حال کې د ولسمشر سعید او د النهضه ګوند سلګونه پلویان له یو بل سره ونښتل او پر یو بل‌یې د کاڼو ګوزارونه وکړل.

د تونس ولسمشر، صدراعظم نن سهار وروسته له هغه له دندې ګوښه کړ چې یوه ورځ مخکې د النهضه او د هغه د حکومت پر ضد پراخې مظاهرې وشوې. مظاهره‌چیانو د کرونا ویروس د مخنیوي په برخه کې د حکومت د اقداماتو پر وړاندې د اعتراض غږ اوچت کړ.

د المپیک اړوند ۱۵۳ کسان په کرونا ویروس اخته شوي

د توکیو المپیک سیالۍ

د توکیو د المپیک تنظیموونکي وايي، د دې لوبو له پیل راهیسې د ۱۹ لوبغاړو په ګډون د المپیک اړوند ۱۵۳ کسان په 'کووېډ-۱۹' اخته شوي دي.

د المپیک نړیوالې کمېټې نن د جولای په ۲۶مه نېټه وویل چې له دې ډلې څخه ۱۶ کسان په تېرو ۲۴ ساعتونو کې په دې ناروغۍ اخته شوي دي.

چارواکو ویلي دي چې په ویروس اخته کسان د توکیو د قرنطین مرکز ته بیول شوي دي.

د المپیک د ۲۰۲۰ کال لوبې له یو کال ځنډ وروسته د جولای په ۲۳مه د جاپان په پلازمېنه توکیو کې پیل شوې.

دا لوبې سږ کال د کرونا ویروس د مخنیوي لپاره د نندارچیانو له حضور پرته ترسره کېږي.

پیکېنګ: امریکایان له چین سره د 'خیالي دښمن' په څېر چلند کوي

د چین ملي نښان او د امریکا متحده ایالاتو ملي بیرغ

د چین د بهرنیو چارو وزارت مرستیال وايي، د امریکا او چین په اړیکو کې د کړکېچ عمده علت دا دی چې امریکایان له چین سره د "خیالي دښمن" په څېر چلند کوي.

شي فانګ د امریکا د بهرنیو چارو وزارت مرستیالې وینډي شرمن (Wendy Sherman) ته نن ویلي چې د امریکا متحده ایالات هڅه کوي چې چین د اهریمن په توګه وښيي او په کار ده دا چلند یې بدل شي.

د چین د بهرنیو چارو وزارت د ښاغلي شي او مېرمن شرمن سره تر کتنې وروسته په یوه اعلامیه کې ویلي، امریکا دې د خپلو جوړښتي ستونزو ملامتي پر چین نه‌اچوي.

وروسته له هغې چې واشنګټن په هانګ کانګ کې پر ډیموکراسۍ پلوه اعتراضونو د چین د فشارونو له کبله پر چین ځیني بندیزونه ولګول، په ځوابي اقدام کې چین تېره اوونۍ د امریکا د سوداګرۍ پخوانی وزیر ویلبر روز (Wilbur Ross)، ځیني نور اشخاص او کمپنۍ د خپلو بندیزونو په لېست کې شامل کړل.

نور راوښيه

XS
SM
MD
LG