په باسټن ښار کې غبرګو چاودنو لسګونه تنه ټپیان کړل
د امریکا په باسټن ښار کې پرون غبرګو چاودنو د ځغاستې د یوې ډله ییزې مسابقې لوبغاړو او نندارچیانو ته مرګ ژوبله واړوله. د امریکا ولسمشر بارک اوباما که څه هم دا پېښه یو تروریستي عمل نه دی بللی، خو ژمنه یې کړې چې عاملان به یې د قانون منګولو ته وسپارل شي. د امریکا د تحقیقاتو د فدرال ادارې کارپوهانو د هغو تصویرونو په اړه څېړنه پیل کړې، چې په باسټن ښار کې د ځغاستې په پرونۍ لوبه کې د بمي چاودنو پر مهال د خلکو له خوا اخیستل شوي، څو د دې چاودنې عاملان ومومي.