د لاسرسۍ وړ لېنکونه

تازه خبر
چهارشنبه ۱۹ سلواغه ۱۴۰۱ کابل ۰۶:۴۹

نړۍ

روسیې امریکا د دوی په کورنیو چارو کې په ښکاره لاسوهنې تورن کړ

روسیه وايي، په دې هیواد کې د متحده ایالاتو له خوا د غیر حکومتي سازمانونو مالي ملاتړ د روسيې په کورنیو چارو کې ښکاره لاسوهنه ده.

د روسيې د بهرنیو چارو د وزارت ویاند "الکسنډر لوکاشیویچ" پرون په خپلو څرګندونو کې د امریکا د بهرنیو چارو د وزارت اعلامیه ته اشاره وکړه چې؛ په کې ویل شوي، امریکا به د دې لپاره چې د روسيې قوانین مات نه کړي؛ د منځګړي هیواد له لارې په روسیه کې له فعالو اینجوګانو سره مالي مرستې ته دوام ورکړي.

روسي مقاماتو په دې وروستیو کې تحقیقات پیل کړي؛ څو معلومه کړي چې، غیر حکومتي سازمانونه له بهر څخه د مالي مرستو د ترلاسه کولو په اړه د دې هېواد نوی جوړ شوی قانون عملي کوي او که ترې سرغړونه کوي.

د امریکا د بهرنیو چارو د وزارت ویاندې "ویکټوریا نولانډ" تېره اونۍ وویل؛ داسې ښکاري چې روسيې د غیر حکومتي سازمانونو یا انجوګانو په نښه کول پیل کړي دي.

د ورځې تازه خبرونه دلته ولولئ

جو بايډن: له ننګونو سره امريکا کې ډيموکراسي پياوړې شوې

د امریکا د متحدو ایالتونو ولسمشر جو بایډن

د امریکا د متحده‌ایالتونو ولسمشر جو بایډن وایي، متحده ایالات په نړۍ کې له ډېرو جدي چلنجونو سره مخ دی خو په تېرو دوو کلونو کې ډیموکراسي پیاوړې شوې او دیکتاتوري ډېره کمزورې شوې ده.

بایډن دغه څرګندونې تېره شپه د کانګرس له لارې ملت ته په وینا کې وکړې.

هغه په دې وینا کې د بهرني سیاست په برخه کې د ستونزو او بریاو یادونه وکړه او ډېر تمرکز یې د چین پر کمونیست ګوند او د روسیې پر ولسمشر ولادمیر پوتن و، چې لحن یې هم خوشبینانه او هم مخالفتي بڼه درلوده.

بایډن ملت ته پخوانۍ وینا ته په اشاره چې د تېرې فبرورۍ میاشتي په ۲۴مه پر اوکراین د روسیې له یرغل څو ورځې وروسته یې کړې وه، د پوتین یرغل یې د امریکا لپاره یو ازمون بللی و چې د ده په خبره ویې ښوده دا هېواد به له ډیموکراسۍ څخه دفاع وکړي.

هغه وویل، دا ډول دفاع زموږ لپاره مهمه ځکه ده چې، هغه سوله ډاډمنوي او نه پرېږدي چې احتمالي یرغلګر په خلاص لاس زموږ امنیت او سوکالي وګواښي.

یو شمېر جمهوریپال اوکراین ته د پوځي مرستو په اړه یو څه بدبین و خو هغه تود ملاتړ ته په پام چې په تالار کې د استازیو جرګې د مشر کیوین مککارټي په ګډون جمهوري غوښتونکو د بایډن له څرګندونو وکړ، وضعیت داسې نه و.

جوبایډن په دې وینا کې د افغانستان یادونه ونه کړه چې جمهوري غوښتونکو یې د افغانستان په اړه د ادارې پر پالیسۍ انتقاد کړی او له دې هېواده وتل یې ناسم بللي دي.

ولسمشر بایډن د پخواني جمهوریپال ولسمشر ډونالډ ټرمپ د هغې موافقې له مخې چې په ۲۰۲۰ کال کې یې په دوحه کې له طالبانو سره لاسلیک کړې وه، له افغانستانه ټول ځواکونه د ۲۰۲۱ کال د اګسټ میاشتې تر پایه وایستل او پر دې هېواد طالبان بېرته واکمن شول.

په زلزله‌ځپلیو سیمو کې د سوریې د کډوالو په اړه اندېښنې په زیاتېدو دي

سوريه کې د زلزلې يو انځور

د سوریې د شمال لوېدیځو سیمو یوه برخه، چې د دوشنبې د ورځې مرګونې زلزلې ځپلې ده، د دغه هېواد د حکومت د مخالفانو په لاس کې ده او هلته ملیونونه سوري کډوال دېره دي چې د سوریې له نورو سیمو ورغلي دي.

ملګروملتو پرون (سې شنبې) اعلان وکړ چې دغو سیمو ته د مرستو رسولو لپاره یې هڅې زیاتې کړي خو په عین حال کې یې خبرداری ورکړ چې د بودجې د کموالي له کبله له زلزله‌ځپلیو کډوالو سره اوسنۍ بشري مرستې کافي نه‌دي.

پر دې سربېره څه باندې درې نیم میلیونه سوري کډوال په ترکیه کې اوسي چې د هغو نیمايي د ترکیې د جنوب په زلزله ځپلیو سیمو کې مېشت دي.

جرمني اوکراين ته د ۱۸۷ ليوپارډ ټانکونو د ورکولو موافقه تصويب کړې

د جرمني د اقتصاد او دفاع وزارتونو پرون (سې شنبې) په یوه ګډ بیان کې وویل، چې اوکراین ته یې د ۱۷۸ لیوپارډ ۱ ټانکونو ورکړه تصویب کړه.

د جرمني حکومت تېره اوونۍ اوکراین ته د ترمیم او نویو شویو ټانکونو له صادرولو سره موافقه کړې وه.

لیوپارد ۱ د جګړې د میدان لومړنی اصلي ټانک دی چې، له دوهمې نړیوالې جګړې وروسته د جرمني د پوځ لپاره جوړ شوی و.

کتونکي اټکل کوي چې، له ۱۹۶۵ څخه د نولس سوه اتیایمې لسیزې تر منځو پورې دا ډول کابو ۴ زره ۷۰۰ ټانکونه جوړ شوي دي.

اوکراين کې تر زرو د ډېرو روسي سرتېرو د وژنې ادعا شوې

اوکراین پرون (سې شنبې) اعلان وکړ چې تېر ۲۴ ساعتونه د روسي ځواکونو لپاره د جګړې له پیله تر اوسه تر ټولو خونړي وو.

دا په داسې حال کې ده چې روسیې د اوکراین پر ختیځ بریدونو ته زور ورکړی او لسګونه زره تازه دمه ځواکونه یې د جګړې جبهې ته لېږلي دي.

خو د رویټرز خبري اژانس د مالوماتو پر اساس، اوکراین ادعا کوي چې په وروستۍ یوه ورځ کې یې د روسیې تر زرو ډېر سرتېري وژلي دي.

اژانس وايي چې، دا ادعاوې په خپلواک ډول تایید یا ردولی نه‌شي.

د جګړې له پیله تر اوسه پورې د روسیې ټولټال ۱۲۳ زره ۱۹۰ پوځیان وژل شوي دي.

روسیه بیا وايي چې، یوازې یې د جنورۍ په میاشت کې نژدې شپږنیم زره اوکرایني پوځیان وژلي دي.

ترکيه او سوريه کې د زلزلې له امله د قربانيانو شمېر تر ۸زره واوښت

ترکيه کې د زلزلې له امله د نړېدلو ودانيو انځور چې له ډرون اخيستل شوی دی.

په ترکیه او سوریه کې د وروستۍ ویجاړوونکې زلزلې له کبله د مړینو شمېر تر ۸زره او سل تنو واوښت.

د (ډي پي اې) خبري اژانس د راپور له‌مخې، د ترکیې مرستیال ولسمشر فواد اونکې نن (چهارشنبه) وویل چې، په دغه هېواد کې ۵ زره ۸۹۴ تنه مړه شوي دي.

د ده په وینا په ترکیه کې ۳۴ زره تنه نور ټپیان شوي دي.

پر دې سربېره ۵ زره ۷۷۵ ودانۍ نړېدلي دي.

د ترکیې په ګاونډي هېواد سوریې کې بیا ۲ زره ۲۷۰ تنه مړه شوي دي.

په همدې منځ کې د روغتیا نړیوال سازمان اټکل کوي چې ممکن د ترکیې او سوریې د مرګونې زلزلې د مړینو شمېر تر ۲۰ زرو ورسیږي.

د پاريس ښارواله: هيله ده د المپيک لوبو کې روسي هيئت ګډون ونه‌کړي

ارشيف

د پاریس ښارواله وايي، دوی نه‌غواړي چې د ۲۰۲۴م کال د دوبي په المپیک لوبو کې د روسي هیئت د ګډون شاهدان وي.

ان هیدالګو پرون د المپیک نړیوالې کمېټې وروستۍ اعلامیې ته په عکس العمل کې ویلي: "البته هیله مې دا ده چې روسي هیئت حضور ونه‌لري. تاسې ښه پوهېږئ، تر هغو چې په اوکراین کې د روسیې جګړه او یرغل روان وي، تصور نه‌شو کولی چې روسي ورزشکاران دې په پرېډ کې برخه واخلي، چې ګواکې هېڅ نه دي پېښ شوي، له یوې خوا دې پر اوکراین بمونه اوري او روسي هیئت دې په پاریس کې پرېډ کې برخه واخلي."

د المپیک نړیوالې کمېټې په وروستیو کې اعلان کړی، چې روسي او بېلاروسي ورزشکاران د بې‌طرفۍ په ساتلو سره کولی شي د ۲۰۲۴م کال د دوبي د المپیک سیالیو کې چې په پاریس کې کېږي، برخه واخلي.

فرانسه؛ تقاعد پروګرامونو کې د اصلاحاتو په غبرګون کې اعتراضونه پيل شوي

فرانسه کې د خلکو اعتراضونه

په زرګونو کسانو یو وار بیا د فرانسې په بېلابېلو ښارونو کې د تقاعد په پروګرامونو کې د اصلاحاتو په اړه اعتراض وکړ.

د ولسمشر ایمانویل مکرون منځلاری حکومت په پام کې لري، چې په تدریجي ډول د تقاعد عمر له ۶۲ څخه ۶۴ ته لوړ کړي.

پرون سې‌شنبه په زرګونو کسانو په بوردو، رن، مونپلیه او تولوز کې ډله ییز لاریون وکړ.

ویل شوي، چې اعتراض کوونکو د فرانسې عامه ټرانسپورټ، د ښوونځیو درسي بهیر او نور کارونه ټکني کړي وو.

د فرانسې د کارګرانو ټولنې (CGT) ویلي، یوازې په پلازمېنه پاریس کې پنځه لکه کسانو په دغو اعتراضونو کې ګډون کړی و.

د فرانسې ولسمشر ایمانویل مکرون تېره دوشنبه په خپلو خبرو کې د تقاعد په پروګرام کې اصلاحات مهم وبلل.

د فرانسې صدراعظمې الیزابیت بورن ټینګار وکړ، چې ۶۴ کلنۍ د تقاعد د عمر پر لوړولو نور مذاکره نه شي کېدای.

سوماليا کې د يوې نښتې پر مهال ۲۰ کسان وژل شوي

د سوماليا پوليس

ملګري ملتونه وايي، د سومالیا د امنیتي ځواکونو او د سومالیلنډ د خپلسري جمهوریت د قبیلوي وسله‌والو ترمنځ شخړو کې لږ تر لږه ۲۰ کسان وژل شوي دي.

ملګرو ملتونو پرون سې‌شنبه دا شمېرې اعلان کړې او د دغو شخړو په اړه یې د بې پرې څېړنو غوښتنه وکړه.

د ملګرو ملتونو د بشري حقونو د برخې مشر ولکر تُرک په یوه اعلامیه کې ویلي: د ۲۰ کسانو د وژل کېدو تر څنګ په دغو شخړو کې د ماشومانو په ګډون ۱۱۹ کسان ټپیان شوي هم دي.

سوماليلنډ په ۱۹۹۱م کال کې له سومالیا جلا شو، خو تر اوسه پورې په نړیواله سطحه په رسمیت نه‌دی پېژندل شوی.

د سوېډن صدراعظم ترکيې سره د خبرو د بيا پيل چمتووالی ښودلی

د سویډن صدراعظم اولف کریسټرسن

د سویډن صدراعظم اولف کریسټرسن نن سې‌شنبې وویل، هرڅومره ژر چې ترکیه خبرو ته حاضره شي، دی چمتو دی چې له ناټو سره د سویډن د غړیتوب د غوښتنلیک په اړه په ټپه درېدلې خبرې پیل کړي.

فنلنډ او سویډن په ناتو تړون کې د غړیتوب غوښتنه وروسته له هغې وکړه چې روسیې پر اوکراین نوی یرغل پیل کړی و.

د ناتو اکثره غړیو هېوادونو د شمالي اروپا د دغو دواړو هېوادونو غوښتنلیکونه منلي خو ترکیې تر اوسه هغه نه‌دي تایید کړي.

تېر کال سویډن، فنلنډ او ترکیې د دغې پروسې د پر مخ وړلو لپاره موافقه وکړه خو انقرې تېره میاشت په دې اړه خبرې وروسته له‌هغې وځنډولې چې په ستاکهولم کې په یوه اعتراضي لاریون کې یوه ښي اړخي سیاستوال د قرانکریم یوه نسخه وسوځوله.

په ترکیه او سوریه کې د پرونۍ زلزلې د مړو شمېر ۵۰۰۰ کسانو ته ورسېد

د اسوشېټېډپرېس خبري اژانس د راپور له مخې یوازې په ترکیه کې له ۶۰۰۰ زیاتې ودانۍ نړېدلي چې لا یې هم تر لاندې د پاتې کسانو د ژغورنې عملیات روان دي.

په ترکیه او سوریه کې د پرونۍ زلزلې د مړو شمېر ۵۰۰۰ او د ټپیانو زرګونو ته ورسېد.

د رویټرز خبري اژانس د راپور له مخې په ترکیه کې د دې خونړۍ زلزلې د مړیو شمېر ۳۴۰۰ او د ټپیانو شمېر ۲۰ زرو ته رسېدلی.

په سوریه کې د مړو شمېر له ۱۶۰۰ اوښتی او زرګونه نور ټپیان شوي دي.

د اسوشېټېډپرېس خبري اژانس د راپور له مخې یوازې په ترکیه کې له ۶۰۰۰ زیاتې ودانۍ نړېدلي چې لا یې هم تر لاندې د پاتې کسانو د ژغورنې عملیات روان دي.

اژانس د ملګروملتونو په حواله ویلي چې په سوریې کې هم ۲۲۴ ودانۍ نړېدلي او ۳۲۵ نورې زیانمنې شوي دي.

پرونۍ زلزله د ۱۹۹۹ کال له زلزلې وروسته چې له ۱۷ زره زیات کسان یې ووژل، د ترکیې تر ټولو خونړۍ زلزله ده.

نور راوښيه

XS
SM
MD
LG