د لاسرسۍ وړ لېنکونه

تازه خبر
جمعه ۱۴ سلواغه ۱۴۰۱ کابل ۰۸:۳۶

خبرونه

په ننګرهار کې د ماين چاودنې درې ملکي کسان ټپيان کړل

په بټي کوټ ولسوالۍ کې د ماین یوې چاودنې درې تنه ملکي وګړي زخمیان کړي .

د ننګرهار ولایت مقام څخه په راستول شوې خبر پاڼه کې ویل شوي،چې نن سهار شاوخوا ۹ بجې د بټي کوټ ولسوالۍ اړوند ډاګه سیمه کې پر ملکي وګړو ځای پرځای شوی ماین چاودلی،چې له امله يي درې تنه زخمیان شوي.

د ولایتي چارواکو په خبره زخمیان د ولسوالۍ روغتون ته لیږدول شوي او روغتیايي وضعیت يي ښه بلل شوی.

د یو بل خبر له مخې، تیره ورځ د ننګرهار په اچین ولسوالۍ کې یو ساعت سخته ګلۍ شوې،چې د ننګرهار د ولایتي چارواکو په خبره په شاوخوا څلور سوه جریبه ځمکه ولاړ فصلونه يي خراب کړي دي.

دارنګه د هسکې مینې ولسوالۍ بزګرو هم ازادۍ راډيو ته ویلي،چې په دې ولسوالۍ کې هم د ګلۍ د ورښت له امله د دوی فصلونو ته سخت زیان اوښتی دی.

د ورځې تازه خبرونه دلته ولولئ

ريچارد بېنيټ د استاد اسماعيل مشعل پر نيول کېدو اندېښنه ښودلې

د پوهنتون استاد اسماعيل مشعل چې خلکو ته يې وړيا کتابونه وېشل، د طالبانو له لوري نيول شوی دی.

د افغانستان د بشري حقونو لپاره د ملګرو ملتونو ځانګړي راپور ورکوونکي، ریچارد بېنیټ په کابل کې د پوهنتون د یوه استاد اسماعیل مشعل پر نیولو اندېښنه وښوده.

ښاغلي بېنیت نن په یوه ټویټ کې ویلي، د سوله‌ییزو مدني حرکتونو په نښه کول او مخنیوی د نه منلو او د افغانستان له تعهداتو سره په ټکر کې عمل دی.

د طالبانو حکومت یوه چارواکي اسماعیل مشعل، چې د طالبانو په توقیف کې دی، د نظام په تخریب تورن کړ.

د طالبانو د اطلاعاتو او فرهنګ وزارت د خپرونو مشر عبدالحق حماد پرون ناوخته په خپل ټویټر کې لیکلي: استاد مشعل «په ډېر مهارت د نظام پر ضد پاروونکي کړنې ترسره کولې، ګڼ خبريالان یې پر ځان راټول کړي وو او پر عمومي سړک يې ګڼه ګوڼه جوړه کړې وه، امنيتي ادارو د تحقيقاتو لپاره بېولی دی.»

استاد مشعل چې څه موده مخکې په یو مدني حرکت کې د نجونو او ښځو په وړاندې د پوهنتونونو د دروازو له تړل کېدو وروسته د یوه خصوصي ټلوېزیون په پروګرام کې خپل تحصیلي اسناد څيرلي وو، پرون په وړیا ډول د کتابونو د وېش پر مهال ونیول شو.

بنګله‌دېش غوره لیګ؛ کریم جنت په هره لوبه کې ښه ځلېدلی

ارشي

د افغانستان کرېکټ ملي لوبډلې لوبغاړي کریم جنت د بنګله‌دېش په غوره لیګ سیالیو کې تر دې دمه ښې لوبې کړي دي.

ښاغلی جنت چې د الراونډر په توګه لوبیږي، په توپ اچونه او توپ وهنه کې د خپلې لوبډلې لپاره ښه لوبېدلی دی.

نوموړی چې د فارټن باریشال لوبډلې غړی دی، نن(د فبرورۍ ۳مه) د خولنا ټایګرز لوبډلې پر وړاندې ۱۶ منډې وکړې او ۴ وېکټې یې ترلاسه کړې.

کریم جنت تر دې دمه په یاد لیګ کې ۱۰ لوبې ترسره کړي دي چې ټولټال یې ۱۳۹ منډې کړي دي او ۱۰ وېکټې یې اخستي دي.

هغه تر ډېره د لوبې په وروستیو شېبو کې توپ وهنې ته راځي او تر ډېره یې د خپلې لوبډلې ملا ورتړلې ده.

د دوی لوبډله اوس مهال د نومرو په جدول کې دویم ځای لري.

د یادونې وړ ده چې د بنګله‌دېش په غوره لیګ سیالیو کې نور افغان لوبغاړي عثمان غني، ابراهیم ځدراڼ او عظمت الله عمرزی هم ښه لوبېدلي دي.

اوکراين د پيسو له نړيوال صندوق د پور ورکولو د يو پروګرام د تصويب غوښتنه کړې

د پيسو نړيوال صندوق ودانۍ

د کییف متحدان د پیسو له نړیوال صندوق یا (IMF) غواړي چې اوکراین ته د پور ورکولو یو پروګرام تصویب کړي.

فایننشل ټایمز ورځپاڼې په دې اړه نن په یوه راپور کې ویلي، ټاکل شوې په دې باب د پیسو نړیوال صندوق استازي له اوکرایني چارواکو سره شا و خوا دوې اوونۍ وروسته د پولنډ په پلازمېنه وارسا کې وګوري او دغه پروګرام تر پسرلي پورې نهايي شي.

د ورځپاڼې په راپور کې د ځینو چارواکو په حواله چې له دې موضوع خبر دي ویل شوي، د دې پور اندازه به د ۱۴ او ۱۶ ملیارد ډالرو ترمنځ وي.

اوکراین ویلي چې، روان میلادي کال د ۳۸ ملیارد ډالرو په ارزښت د بودجې له کسر سره مخامخ دی.

بل‌خوا نړیوال بانک اټکل کړی، چې د اوکراین د انرژۍ تر نیمايي زیات بنسټونه د روسیې په حملو کې ویجاړ شوي دي، چې د اوکراین پر اقتصاد یې فشار زیات کړی دی.

د فرانسې ولسمشر: د ايران د اټومي پروګرام دوام به جدي عواقب ولري

د فرانسې ولسمشر امانویل مکرون

د فرانسې ولسمشر امانویل مکرون د اسرائیل له صدراعظم بنیامین نتنیاهو سره تر خبرو وروسته د ایران د اټومي پروګرام چټک تشدید وغانده.

نتنیاهو په پاریس کې دی او د تهران په وړاندې د اروپا د دریځ د سختېدو هڅه کوي.

مکرون د تېر ماښام تر کتنې وروسته په یوه اعلامیه کې خبرداری ورکړ، د تهران د اټومي پروګرام دوام به جدي عواقب ولري.

اسرائیل له اودې مودې ایران د اټومي وسلو د جوړولو په هڅه تورنوي، خو تهران ټینګار کوي، چې اټومي پروګرام یې یوازې د انرژۍ د تولید لپاره دی.

شمالي وزيرستان کې د پاکستاني پوځيانو او ټي‌ټي‌پي ترمنځ نښته شوې

پاکستاني پوځيان

د پاکستان پوځ وايي، ډیورنډ کرښې ته څېرمه یې د پاکستاني طالبانو پر یوه مرکز چاپه اچولې چې وروسته ډزې تبادله شوي او په نتیجه کې یې دوه وسله‌وال وژل شوي دي.

پوځ یوه اعلامیه کې ویلي، پوځیانو نن جمعه په شمالي وزیرستان کې د افراطي وسله‌والو د وسلو یوه زېرمه هم کشف او ضبط کړې ده.

دا پېښه داسې وخت شوې، چې د پاکستان صدراعظم شهباز شریف د دغه هېواد د اپوزیسیون رهبر عمران خان او نور چارواکي د نا امنیو د زیاتېدو په وړاندې د اقدام پر لارو چارو د بحث لپاره وربللي.

د نا امنیو په دوام تېره دوشنبه د پېښور په یوه جومات کې بمي چاودنې ۱۰۱ کسان ووژل.

پاکستاني چارواکي: د طالبانو له حکومت ترهګرۍ سره مبارزې برخه کې د همکارۍ تمه لرو

د طالبانو د حکومت او پاکستان هېواد بيرغونه

د پاکستان د بهرنیو چارو وزارت ویلي، په افغانستان کې د طالبانو له حکومته د ترهګرۍ په وړاندې د مبارزې په برخه کې د صادقانه همکارۍ تمه لري.

د بهرنیو چارو وزارت ویاندې ممتاز زهرا بلوچ پرون په اسلام اباد کې د اوونیزې خبري غونډې پر مهال د یوې پوښتنې په ځواب کې وویل، پاکستان هیله لري چې د طالبانو حکومت به د ترهګرۍ پر ضد هغه ژمنې پوره کړي چې له نړیوالې ټولنې سره یې کړې دي.

نوموړې دا څرګندونې تر هغې یوه ورځ وروسته وکړې چې د طالبانو د حکومت د بهرنیو چارو سرپرست وزیر امیر خان متقي هغه ادعاګانې ناسمې وبللې چې ګواکې د پېښور پر یوه جومات په برید کې د افغانستان خاوره کارول شوې وه.

د پاکستان د دفاع وزیر خواجه اصف د جنورۍ پر ۳۱مه د ملي اسمبلۍ غونډې ته ویلي، طالبانو د ۲۰۲۰ز کال د فبرورۍ پر ۲۹مه له امریکا سره د دوحې موافقه کې ژمنه کړې وه چې افغانستان به د نورو هېوادونو پرضد کارېدو ته نه‌پرېږدي، خو د پېښور په برید کې د هغه په وینا د افغانستان له خاورې کار اخیستل شوی دی.

طالبانو استاد اسماعيل مشعل د نظام پر تخريب تورن کړی دی

د پوهنتون استاد اسماعيل مشعل خپل زرګونه ټوکه کتابونه ډالۍ کوي.

د طالبانو حکومت یوه چارواکي د کابل پوهنتون استاد اسماعیل مشعل، چې د طالبانو په توقیف کې دی، د نظام پر تخریب تورن کړ.

د طالبانو د اطلاعاتو او فرهنګ وزارت د خپرونو مشر عبدالحق حماد پرون ناوخته په خپل ټویټر کې لیکلي، استاد مشعل «په ډېر مهارت د نظام پر ضد پاروونکي کړنې ترسره کولې، ګڼ خبريالان یې پر ځان راټول کړي وو او پر عمومي سړک يې ګڼه ګوڼه جوړه کړې وه، امنيتي ادارو د تحقيقاتو لپاره بېولی دی.»

استاد مشعل چې څه موده مخکې په یو مدني حرکت کې د نجونو او ښځو په وړاندې د پوهنتونونو د دروازو له تړل کېدو وروسته د یوه خصوصي ټلوېزیون په پروګرام کې خپل تحصیلي اسناد څيرلي وو، پرون په وړیا ډول د کتابونو د وېش پر مهال ونیول شو.

کابل کې د نهه ولايتونو د لوبغاړو ترمنځ د تکواندو سيالۍ ترسره شوي

ارشيف

په کابل کې د نهه ولایتونو د څه باندې ۱۵۰ لوبغاړو تر منځ د تکواندو سیالۍ شوي.

د تکواندو د ملي فدراسیون چارواکو ویلي، دا سیالۍ یې د تکواندو د ملي ټیم د پخواني سر روزونکي کوریايي ماستر مین سین هاک د هڅو د درنښت په خاطر د هغه په نوم پلان او ترسره کړي.

په دې سیالیو کې اتل لوبغاړي د تکواندو د فدراسیون په رده بندي کې ځای پیدا کوي چې بیا په نورو سیالیو کې د ګډون چانس ترلاسه کولای شي.

مین سین هاک څو کاله د افغانستان د تکواندو د ملي ټیم سر روزونکی وو او د هغه د هڅو په مټ روح الله نیکپا وتوانېد په بیجینګ او لندن کې د المپيک له لوبو د برنزو مډالونه وګټي.

ښاغلي هاک د ګڼو نورو مډالونو او لاسته راوړنو په ګټلو کې هم د افغان لوبغاړو لاس‌نیوی کړی دی او هغوی یې روزلي دي.

خېبر پښتونخوا کې د ترافيکي پېښې له امله ۱۷ کسان مړه شوي دي

د کوهاټ تونل ترافيکي پېښه

د خیبر پښتونخوا په کواټ کې په یوه ترافیکي پېښه کې د ښځو او ماشومانو په ګډون ۱۷ کسان مړه شوي دي.

د کواټ د پولیسو ویاند فضل نعیم تېر ماښام ازادي راډیو ته وویل، یو مساپر وړونکی (فلاینګ کوچ های اېس) ګاډی په تونل کې له بار وړونکې لارۍ سره لګېدلی.

په پېښه کې د نعیم په خبره اولس کسان مړه شوي او یو تن ټپي دی.

دی وايي، د مرستندویه ادارې کارکوونکي سمدستي د پېښې ځای ته ورسېدل او ژوبل کس او د وژل شویو جسدونه یې د کواټ لوی روغتون ته ولېږدول.

د پاکستان دولتي خبري اژانس وايي، مساپر وړونکی ګاډی له لکي مروته د پېښور پر لوري روان وو چې د پېښې ښکار شو.

تر اوسه په تونل کې د ټرافیکي پېښې لامل معلوم نه‌دی خو نعیم زیاتوي چې د پېښې پلټنې روانې دي.

کواټ سرنګ یا تونل د جاپان په مالي مرسته جوړ شوی وو او په ۲۰۰۳ز کال کې د ګاډو تګ راتګ لپاره پرانیستل شو.

د غره په لمن کې د هغه تونل یوه برخه په کواټ او بله یې له ادم‌خېل درې سره نږدې پرته ده.

په دغه شاوخوا دوه کېلومیټره اوږد تونل کې دوه طرفه سړک دی چې په‌کې د رفتار حد ټاکل شوی دی.

د جنورۍ پر ۲۹مه هم د کواټ په تانده بند کې د یوې کښتۍ اوښتو په پېښه کې د مدرسې د زده‌کوونکو ماشومانو په ګډون ۵۲ کسان وژل شوي وو.

هغه ماشومان په مدرسه کې د حفظ تر بشپړولو وروسته ښوونکو په چکر بند ته بیولي وو.

پر هماغه ورځ د بلوچستان په لسبېله کې له پله څخه د مساپر وړونکي ګاډي پرېوتو په پېښه کې ۴۱ کسان ووژل شول.

صالح: پاکستان د افغانستان له وضعيت ډېره ناوړه استفاده وکړه

امر الله صالح

د افغانستان د پخواني ولسمشر لومړي مرستيال امرالله صالح ملګرو ملتونو کې د پاکستان استازي څرګندونو ته غبرګون ښودلی.

نوموړي پاکستان په دې تورن کړ چې، د افغانستان له حالاتو یې خورا ناوړه استفاده وکړه او د ای ایس ای تر څارنې لاندې مدرسو کې یې افغان هلکان، چې اکثره یې پښتانه وو، د عصري توب او زده‌کړو خلاف و روزل.

په ملګروملتو کې د پاکستان سفیر منیر اکرم د چهارشنبې په ورځ په نیویارک کې وویل، د طالبانو له لوري د ښځو د زده‌کړو او تعلیم مخالفت د پښتنو له کلتور سره تړاو لري.

د منیر اکرم دا څرګندونې د یو شمېر افغان او پاکستاني سیاستوالو له توند غبرګون سره مخامخ شوي او د پاکستان د ملي جرګې د بهرنیو اړیکو کمېټې منیر اکرم د خپلو خبرو د سپیناوي لپاره دې کمېټې ته احضار کړی دی.

نور راوښيه

XS
SM
MD
LG