د لاسرسۍ وړ لېنکونه

تازه خبر
شنبه ۱۸ زمری ۱۳۹۹ کابل ۰۱:۲۶

افغانستان

روسیه د ناټو د اړوندې کارګو د وتلو حجم په اصطلاح د شمال د دهلېز له لارې زیاتوي

روسیه غواړي له افغانستانه بهر ته د ناټو د اړوندې کارګو د وتلو حجم په اصطلاح د شمال د دهلېز له لارې زیات کړي. یوه روسي ډيپلومات ویلي دي چې دا پرېکړه له افغانستانه د نړیوالو ځواکونو د وتلو لپاره د تیاریو په درشل کې کېږي.

په ناټو کې د روسیې دایمي استازي الکساندرګروشکو تېره ورځ په بروکسل کې په یوه ویډیوکنفرانس کې وویل، روسیه په دې مقصد د افغانستان د شمال لاره پراخوي.

تمه ده چې په ۲۰۱۴ کال کې د نړیوالو ځواکونو د وتلو پرمهال له افغانستانه د انتقال وړ کارګو اندازه هم زیاته شي. روسیې مخکې دا منلې وه چې په اولیانوفسک ښار کې د ناټو د غیرمحاربوي وسایلو لپاره د ترانزیت یو مرکز جوړ کړي.

ګروشکو دا احتمال رد نکړ چې روسیه به له ۲۰۱۴ کال وروسته په افغانستان کې د ناټو له ماموریت سره همکارۍ ته دوام ورکړي، خو ده وویل، دا همکاري به له ۲۰۱۴ کال وروسته په افغانستان کې د ناټو د ماموریت په څرنګوالي پورې اړه ولري.

دې روسي مقام دا هم وویل، چې په افغانستان کې د ناټو ماموریت د امنیت شورا یوه نوي پرېکړه لیک ته اړتیا لري.

د ورځې تازه خبرونه دلته ولولئ

امریکايي او پاکستاني چارواکو پر افغان سوله خبرې کړي

ښي لورته پومپیو او چپ لور ته قریشي

د امریکا د متحدو ایالتونو او پاکستان د بهرنیو چارو وزیرانو د افغانستان د سولې په پروسه کې د اسلام اباد پر همکارۍ خبرې وکړې.

د امریکا د بهرنیو چارو وزارت تېره شپه په یوه اعلامیه کې وویل، چې مایک پومپیو او د هغه پاکستاني ساري شاه محمود قریشي د نورو موضوعاتو تر څنګ د افغانستان د سولې په پروسه کې د امریکا او پاکستان د همکارۍ پر اهمیت بحث وکړ.

په اعلامیه کې د افغانستان سوله د سیمې له ثبات سره تړلې بلل شوې ده.

دواړه مشران په داسې حال کې دا خبرې کوي، چې د افغانستان چارواکو تر دې مخکې پاکستان په وار- وار د افغانستان د سولې په مسئله کې په دوه مخي سیاست تورن کړی، خو اسلام اباد دا تورونه رد کړي دي.

عبدالله عبدالله له بلقیس روش بخښنه وغوښته

د مشورتي جرګې انځور

د ملي مصالحې عالي شورا مشر په ولسي جرګه کې د فراه د استازې بلقیس روشن په وړاندې د مشورتي لویې جرګې په لومړۍ ورځ د شوي چلند له کبله بخښنه وغوښته.

عبدالله عبدالله، چې د درې ورځنۍ مشورتي لویې جرګې مشري هم کوي، پرون ناوخته له ملي ټلویزیون نه په مرکه کې وویل، له مېرمن روشن سره شوي چلند خواشیني کړی دی.

هغه زیاته کړه: "د دغه ټربیون له لارې له مېرمن روشن نه بخښنه غواړم، دا چلند له هغو ارزښتونو او چلند سره چې دا نظام ورباندې ولاړ دی، په ټکر کې دی، د منلو وړ نه دی او باید وڅېړل شي."

مشورتي لویې جرګې ته د ولسمشر د پرانیستونکې وینا پر مهال بلقیس روشن هغه شعار اوچت کړ چې ورباندې لیکل شوي وو: "وحشي طالبانو ته باج ورکول ملي خیانت دی."

افغان ولسمشر محمداشرف غني د وینا پروخت بلقیس روشن ته وویل چې چا ته باج نه ورکوي او پرېکړه د جرګې په غړیو پورې تړلې ده.

مېرمن روشن وروسته د یوې ښځې له خوا په ټېلو- ټېلو د جرګې له تالاره بهر وایستل شوه.

خوست کې د کرکټ سیالۍ پیلېږي

ارشیف

د افغانستان د کرکټ بورډ وايي، د داخلي کرکټ د ودې لپاره به ډېر ژر په خوست ولایت کې د کرکټ سیالۍ پیل شي.

د کرکټ بورډ ویاند فرید هوتک، پرون جمعه ازادۍ راډیو ته وویل: "ټاکل شوې ډېر ژر د افغانستان د کرکټ بورډ له لوري په خوست ولایت کې د کرکټ لوبې پیل شي. دغه لوبې به د اتو ولایتونو ترمنځ وي او ګرېډ ون سیالۍ دي. د لوبغاړو لپاره دغه لوبې خورا مهمې دي."

دغه مسابقې راروانه پنج شنبه (د اګست پر ۱۳مه) پیلېږي او د اګست میاشتې تر ۲۲مې دوام کوي.

په مسابقو کې به د دغو اتو ولایتونو ټیمونه په خپلو کې مسابقه کوي، چې پایلوبه یا نهايي مسابقه به یې په کابل کې وشي.

کندز کې ۲ کسان د هیرویینو د قاچاقو پر مهال نیول شوي

ارشیف

دوه کسان کندز ولایت ته د هیرویینو د قاچاقو پر مهال ونیول شول.

د کندز ولایت د امنیه قومندانۍ ویاند هجرت الله اکبري ازادۍ راډیو ته وویل، له نشه يي موادو سره د مبارزې پولیسو د اسد د میاشتې په ۱۴ نېټه دوه کسان هغه مهال ونیول چې څه د پاسه یو کیلوګرام هیرویین یې په ۵۹ کپسولونو کې په خپلو خېټو کې پټ کړي او کندز ولایت ته یې قاچاق کول.

عبدالله عبدالله له بلقیس روشن سره د فزیکي چلند د پلټنې غوښتونکی شو

د افغانستان د ملي مصالحې عالي شورا مشر عبدالله عبدالله

د افغانستان د ملي مصالحې عالي شورا رئیس عبدالله عبدالله له بلقیس روشن سره په جرګه کې د ننني چلند د پلټنې جدي غوښتنه کړې ده.

ښاغلي عبدالله نن ملي ټلوېزیون سره په خبرو کې د بلقیس روشن په وړاندې په جرګه کې په چلند خپګان وښود او ویې‌ویل چې دا پېښه باید وڅېړل شي.

بلقیس روشن ازادي راډیو ته وویل چې د سولې مشورتي لویې جرګې منتظمینو نن په دې لاس پورته کړ.

مېرمن روشن زیاتوي: "ما خپله غوښتل ووځم، خو چې امنیتي کسان راغلل او لږ چې د رسنیو له لیده لیرې شول زه‌یې ټېله کړم. کوښښ مې وکړ چې ځان کلک ونیسم، خو ولوېدم او بیا یې وهل هم شروع کړل. مخصوصاً یوه ښځه وه هغه هم د امنیتي کسانو وه. خلکو ویلي چې کومه وکیله وه، خو وکیله نه‌وه، بلکې هغې له مخکې همالته د تشریفاتو په برخه کې کار کاوه."

اغلې روشن د ولسمشر اشرف غني د خبرو پر وخت له خپل ځایه پاڅېده او په یوه ټوکَري بنر یې لیکلي و چې: "وحشي طالبانو ته باج ورکول ملي خیانت دی."

افغان ولسمشر اشرف غني بلقیس روشن ته وویل چې چاته باج نه‌ورکوي او پرېکړه د جرګې په غړو پورې تړلې ده.

عبدالله عبدالله: د مشورتي جرګې پرېکړه د هېواد له برخلیک سره تړلې

د افغانستان د ملي مصالحې عالي شورا مشر عبدالله عبدالله

د افغانستان د ملي مصالحې عالي شورا رئیس عبدالله عبدالله وايي د ۴۰۰ طالب بندیانو د خلاصون په تړاو د مشورتي جرګې پرېکړه د هېواد له برخلیک سره تړلې ده.

ښاغلي عبدالله چې د جرګې مشري هم ور په غاړه ده نن‌یې دا خبره وکړه.

ښاغلی عبدالله زیاتوي: "موږ په یوه حساس پړاو کې یو. زموږ پرېکړې د هېواد په برخلیک تړلې دي. د طالبانو د ۴،۶۰۰ بندیانو او ۵۰۰ نورو بندیانو د خلاصون پرېکړه اسانه نه‌وه، خو دا سولې ته د رسېدو په لار کې د پرتو خنډونو د لیرې کولو لپاره د افغانستان د اسلامي جمهوریت هوډ او اراده ښيي."

د سولې مشورتي لویه جرګه نن په کابل کې پیل شوه.

دا جرګه د سولې په اړوندو مهمو مسئلو په تېره بیا د ۴۰۰ هغو طالب بندیانو په خلاصون سلا مشوره کوي چې درنې جرمي دوسیې لري او اکثر یې په اعدامونو او عمر بند محکوم شوي دي.

طالبانو له اول سره د دې جرګې له دایرېدو سره خپل مخالفت ښودلی و.

د طالبانو د سیاسي دفتر ویاند سهیل شاهین نن ازادي راډیو ته وویل چې ۴۰۰ طالب بندیان باید د مستقیمو خبرو د ژر پیل لپاره د دې جرګې له دایرېدو پرته خوشې شوي وی.

د پکتیا مدني فعالان: د کمزوري مدیریت له امله ګڼې پروژې نېمګړې پاتې دي

د پکتیا مرکز ګردېز

په پکتیا کې له سلو پورته داسې پروژې شته، چې د بنسټ ډبرې یې کلونه وړاندې ایښودل شوي، خو د ځینو چارې نه دي پیل شوي او د ګڼو نورو چارې په نیمایي کې پاتې دي.

په پکتیا کې د اقرا برنامې په چوکاټ کې د ۱۰۳ ښوونځیو جوړېدل، چې پرانېسته یې تېر کال وشوه، ګڼې نورې پروژې شته، چې د بنسټ ډبرې یې کلونه وړاندې اېښودل شوي، خو تر اوسه یې د جوړېدو چارې هم نه دي پیل شوي او یا هم د ځینو چارې تر نیمایي نه دي رسېدلي.

د دې ولایت اوسېدونکي ولایتي اداره ګرموي، چې زیاتره پروژې یې له ژمنې سره سمې پر وخت نه بشپړېږي.

د دې ولایت یو تن اوسیدونکی لطف الله بېنوا وایي: "د مچلغو بند، د ډنډ پټان سرک، د ګردېز زرمت سرک، د ۱۰۳ ښوونځیو جوړېدل چې تر اوسه یو ښوونځي هم نه دی جوړ شوی، او کډوالو ښارګوټی چې بنسټ ډبرې یې کلونه کېږي ایښودل شوي خو ځینې یې هېڅ پیل شوي نه دي او ډېرې نورې پروژې اوس هم په ټپه ولاړې دي."

د پکتیا مرستیال والي عبدالوالي سهي د یو شمېر پروژو پر وخت نه بشپړېدل د امنیت نشتوالی بولي، خو د ۱۰۳ ښوونځيو د کار نه پیلیدلو ستونزهپه مرکز کابل د کلیو پراختیا وزارت اړوند بولي.
دی وایي: "له بده مرغه زموږ یو شمېر پروژې د امینت او بودیجې د نشتوالي له امله ونشوې او یا یې هم کارونه وځنډېدل چې خوشبختانه د ګردېز زرمت او مچلغو بند چارې بیا پیل شوې، او ۱۰۳ ښوونځیو کارونه بیا په مرکز کې دي چې په ولایتي کچه هېڅ ربط نه لري او هیله من یم ژر خلاص شي."

په پکتیا کې د ژمي په راتلو د درنو واورو اورښت او سوړ اقلیم یوه بله هغه ستونزه بلل کېږي، چې د ساختماني پروژو د چارو په ځنډیو کې رول لوبوي، خو د دې ولایت اوسېدونکي او مدني فعالان وايي که د فساد، د ادارې کمزورتیا او پر وخت د پروژو تعقیب ته پاملرنه وشي، ټولې پروژې به په خپل وخت پیل او بشپړې شي.

د سولې مشورتي جرګې څخه یوه ګډونواله ایستل شوې

د مشورتي لویې جرګې د تالار عمومي انځور

د سولې مشورتي جرګې لومړۍ ورځ د ځینو لانجو او فزیکي شخړو شاهده وه.

د سولې مشورتي لویې جرګې منتظمینو نن د ولسي جرګې او د سولې مشورتي جرګې غړې بلقیس روشن د اعتراض پر مهال له جرګې وایستله.

اغلې روشن د ولسمشر د خبرو پر وخت له خپل ځایه پاڅېده او په یوه ټوکَري بنر یې لیکلي و چې: "وحشي طالبانو ته باج ورکول ملي خیانت دی."

افغان ولسمشر اشرف غني بلقیس روشن ته وویل چې چاته باج نه‌ورکوي او پرېکړه د جرګې په غړو پورې تړلې ده.

د ولسمشر غني او بلقیس روشن تر لنډو خبرو وروسته د خواله رسنیو د تصویرونو له مخې ښکاري بلقیس روشن د یوې بلې ښځې له‌خوا په داسې حال کې چې شعار یې په لاس کې و او مخته روانه وه په ځمکه ووهل شوه.

په جرګه کې د بلقیس روشن وهل کېدو او له جرګې د هغې ایستلو ګڼ غبرګونونه هم پارولي دي.

د بشري حقونو په چارو کې د دولت وزیرې سیما سمر په خپله ټویټر لیکلي چې د معترض وهل ټکول ځورونه حسابېږي او ځورونه جرم دی چې باید عامل‌یې ځواب ورکړي.

اخوا په فېسبوک باندې یوه بله وېډیو هم خپره شوې چې د جرګې یو بل غړی او ځوان فعال غورځنګ سیال د جرګې د ترسراوي مسؤلینو له تالار وایسته.

ولسمشر غني د سولې مشورتي جرګې په اړه د امریکا د ملاتړ هرکلی وکړ

ولسمشر غني

د افغانستان ولسمشر محمد اشرف غني د سولې مشورتي لویې جرګې له دایرېدو د امریکا د ملاتړ هرکلی وکړ.

ښاغلي غني نن د جرګې په پرانیستونکې وینا کې وویل مهمه ده امریکا هغه څه چې دوی ته ویلي و نن یې افغان ولس ته هم په ښکاره اعلان وکړ.

هغه زیاته کړه: "زه د امریکا متحده ایالتونو د لویې جرګې په هکله د نن ورځې له اعلامیه څخه هرکلی کوم چې په هغه کې د افغانستان د راتلونکي لپاره د مطلوب هدف د سولې د تامین، اقتصادي پرمختیا او زموږ د اوسني ټولنې د ارزښتونو څخه ملاتړ اعلان شوی دی."

د امریکا د بهرنیو چارو وزارت په یوه خبرپاڼه کې د جرګې رابلل ستایلي او ویلي یې دي، دوی پوهېږي چې ګډونوال به یې د پاته طالب زندانیانو پر خوشې کېدو مصلحت وکړي.

د افغانستان د سولې لپاره د امریکا ځانګړی استازی زلمی خلیلزاد هم ویلي مشورتي لویه جرګه یو تاریخي فرصت دی چې د سولې د مخامخ خبرو په وړاندې وروستی خنډ لرې کړي.

زلمي خلیلزاد نن سهار پر خپله ټویټرپاڼه ولیکل چې له جرګې نه یوه مثبته نتیجه ترلاسه کول د تاوتریخوالي د کمښت او د بین الافغاني خبرو د ژر تر ژره پیل په معنا ده.

غني: د سولې مشورتي جرګه سختې پرېکړې مخ کې لري

د سولې مشورتي جرګې عمومي تصویر

ولسمشر محمد اشرف غني نن د سولې مشورتي لویه جرګې په پرانیستونکې وینا کې وویل چې دا جرګه سختې پرېکړې مخ کې لري.

هغه وویل د طالبانو ۴۰۰ بندیان چې جرګه به‌یې د خلاصون په اړه بحث کوي درنې دوسیې لري او دی یې د خوشې کولو صلاحیت نه‌لري.

افغان ولسمشر وویل یوازې دوه لارې موجودې دي.

هغه زیاته کړه: "طالبانو ژمنه کړې که دغه ۴۰۰ زندانیان خوشې شي دوی به په درې ورځو کې دولت سره مخامخ مذاکرات پيل کړي او د مذاکراتو اوله موضوع به د تلپاتې اوربند په سر موافقې ته رسېدل وي، په عین حال کې یې تهدید کړی که دا (بندیان) خوشې نه‌شي نه‌یوازې جنګ او تاوتریخوالي ته دوام ورکوي، بلکې لا یې زیاتوي."

د طالبانو د سیاسي دفتر ویاند سهیل شاهین نن ازادي راډیو ته وویل چې ۴۰۰ طالب بندیان باید د مستقیمو خبرو د ژر پیل لپاره د دې جرګې له دایرېدو پرته خوشې شوي وی.

د سولې مشورتي لویه جرګه نن د درېیو ورځو په مخ پیل شوې چې مشري یې د ملي مصالحې عالي شورا رئیس عبدالله عبدالله ته سپارل شوې ده.

خلیلزاد: لویه جرګه د سولې د مخامخ خبرو پر وړاندې وروستی خنډ لرې کوي

زلمی خلیلزاد

د افغانستان د سولې لپاره د امریکا ځانګړی استازی وايي، مشورتي لویه جرګه یو تاریخي فرصت دی چې د سولې د مخامخ خبرو په وړاندې به وروستی خنډ لرې کړي.

زلمي خلیلزاد نن سهار پر خپله ټویټرپاڼه ولیکل چې له جرګې نه یوه مثبته نتیجه ترلاسه کول د تاوتریخوالي د کمښت او د بین الافغاني خبرو د ژر تر ژره پیل په معنا ده.

خلیلزاد هیله څرګنده کړې چې د جرګې ګډونوال خپلو بحثونو کې بریالي شي او له ګډونوالو یې غوښتنه کړې چې د هغو کسانو په وړاندې ودرېږي چې اوسنی حالت غواړي او سولې ته د رسېدو لاره پیچلې کوي.

د امریکا د بهرنیو چارو وزارت هم په یوه خبرپاڼه کې د جرګې رابلل ستایلي او ویلي یې دي، دوی پوهېږي چې ګډونوال به یې د پاته طالب زندانیانو پر خوشې کېدو مصلحت وکړي.

دا جرګه چې نن د دریو ورځو په مخه پيلېږي، شاوخوا درې زره کسان په کې برخه اخلي.

د نورم او سټنډرډ ملي ادارې د رئیس دوسیه محکمې ته استول شوې

آرشیف

د افغانستان لویه څارنوالي وايي، د نورم او سټندرډ د ملي ادارې د عمومي رئیس دوسیه له څېړنو وروسته محکمې ته استول شوې ده.

د دې ادارې مشر شاوخوا درې اونۍ مخکې له یوه نړیوال شرکت څخه د یولک ډالره بډو د اخیستو په تور ونیول شو.

د لویې څارنوالۍ ویاند جمشید رسولي تېره شپه آزادۍ راډیو ته وویل چې د نورم او سټنډرډ د ملي ادارې دوه مرستیالان او د پروژو مدیر هم په دې قضیه کې په لاس لرلو تورن دي.

ښاغلي رسولي زیاته کړه: "د څېړنو په پای کې تورن کسان د ۱۲ لکه امریکايي ډالرو په غوښتنه تورن وپېژندل شول او دوسیه یې محکمې ته واستول شوه."

د ښاغلي رسولي په وینا د نورم او سټنډرډ د ملي ادارې مالي او اداري مرستیال تراوسه نه دی نیول شوی خو لویې څارنوالۍ یې د نیولو امر کړی دی.

یو استرالیايي شرکت د افغانستان کانونو کې پانګونو ته لیوالتیا ښودلې

ولسمشر غني د فورڅیکو میتل ګروپ د کمپنۍ مشر اندریو فوریست سره د خبرو پرمهال.

افغانستان جمهوري ریاست وايي چې د آسټرالیا یوه لوی شرکت د افغانستان د کانونو او د تجدید وړ انرژۍ په برخو کې پانګونو ته لېوالتیا ښودلې.

ارګ پر خپله رسمي ویبپاڼه په یوه بیان کې چې پرون پنجشنبې خپور شو، دا خبر ورکړی دی.

په بیان کې راغلي چې د فورڅیکو میتل ګروپ د کمپنۍ مشر اندریو فوریست له ولسمشر اشرف غني سره د ویډیو کنفرانس له لارې په خپله پرونۍ کتنه کې وویل چې د ده کمپنۍ په سیمه کې د وسپنې د تولید، د کانونو د اېستلو او د تجدید وړ انرژۍ د تولید په برخو کې پراخه تجربه لري او په هغو هېوادونو کې چې د دې ډول انرژۍ د تولید ظرفیت لري پانګونه کوي.

د جمهوري ریاست بیان زیاتوي چې ولسمشر غني په افغانستان کې د کانونو او د تجدید وړ انرژۍ او په تېره له لمر او اوبو څخه د برېښنا د تولید په برخو کې د دې کمپنۍ مشر ته معلومات ورکړل.

د ارګ په بیان کې راغلي دي چې ښاغلي فوریست په افغانستان کې په یادو شویو برخو کې پانګونو ته چمتووالی څرګند کړ او ویې ویل چې ډېر ژر به افغانستان ته یو پلاوی واستوی څو د ګډ کار د پیل په برخه کې څېړنې پیل کړي.

د کارپوهانو په اند افغانستان د اوبو او برېښنا د بندونو د جوړولو لپاره مناسبه اراضي لري او همداراز د کانونو لویې زېرمې لري چې د متحدایالاتو د جیولوژۍ د سروې د ادارې د اټکل له مخې ارزښت یې درې تریلیون ډالرو ته رسېږي.

پکتیا، کاپیسا او بدخشان کې ۱۹ تنه وژل شوي

ارشیف، د افغان ځواکونو عملیات

لږ تر لږه ۱۹ تنه په پکتیا، کاپیسا او بدخشان ولایتونو کې د طالبانو په بریدونو او له حکومتي ځواکونو سره په نښتو کې وژل شوي دي.

په وژل شویو کې وسله‌وال طالبان، پولیس او ملکي وګړي شامل دي.

د پکتیا امنیه قوماندانۍ وایي نن سهار په احمدخېلو ولسوالۍ کې لومړی د ماین چاودنه وشوه او بیا د افغان ځواکونو او طالبانو ترمنځ نښتو کې ۷ طالبان وژل شوي دي.

د دغې سرچینې په خبره اووه نور طالبان نن د پکتیا په څمکنیو ولسوالۍ کې د جګړې پر مهال ووژل شول. پولیس او عامو وګړو ته په دې جګړو کې زیان نه‌دی رسېدلی.

له کاپیسا څخه ا منیتي سرچینو نن ازادي راډیو ته تأیید کړه چې طالبانو د ملي پاڅون د یوه سیمه‌ییز قوماندان پر کور یرغل وروړوی، په خپله قوماندان سیف‌الدین له خپلو درېیو ساتونکو او هم د کورنۍ درې ښځینه غړي یې وژل شوي دي.

ویل کېږي په متقابلو نښتو کې طالبانو ته هم مرګ‌ژوبله اوښتې، خو دقیق شمېر یې معلوم نه‌دی. هاخوا له بدخشانه هم راپورونه وایي چې افغان ځواکونو په جرم ولسوالۍ کې پر امنیتي پوستو د طالبانو د بریدونو مخه ونیوله او د جګړو پر مهال یو طالب وژل شوی، درې نور ټپیان شوي دي.

د ټولو پېښو په اړه طالبانو تبصره نه‌ده کړې.

د ننګرهار د بهسودو کرکټ لوبغالي د رغونې کار پیل شو

ارشیف

افغان کرکټ بورډ وايي د ننګرهار د بهسودو کرکټ لوبغالي د رغونې کار پیل شو.

د افغان کرکټ بورډ سرپرست اجرائیه رئیس نظیم جار عبدالرحیمزي په یو خبري کنفرانس کې وویل چې د دغه لوبغالي د لومړني پړاو رغنیزې چارې درې میاشتې وخت نیسي.

ښاغلي عبدالرحیمزي وویل: "د دغه لوبغالي په لومړي پړاو کې د لوبغالي د ډکون چارې شاملې دي چې اړوند شرکت به‌یې د نقشې ایستلو چارو له پای ته رسولو وروسته د درې میاشتو په موده کې بشپړ کړي او د ډکون چارې به‌یې پای مومي. همدارنګه باید وویل شي چې دوهم پړاو چارې به‌یې هم ډېر ژر د تدارکاتي لړۍ له بشپړېدو وروسته پیل شي چې په‌کې د دېوال او لوبغالي د چمن او نورې اړوند کارونه شامل وي."

د ننګرهار د بهسودو د کرکټ لوبغالی چې د ځمکې د انتقال په برخه کې يې ستونزې موجودې وې کرکټ بورډ وايي اوس‌يې له ډېرو هلو ځلو وروسته د ځمکې د انتقال پروسه پای ته ورسېده او ډېر ژر به د یاد لوبغالي ټولې چارې بشپړې شي.

دا په داسې حال کې ده چې کرکټ بورډ دوه ورځې وړاندې په ميدان وردګ ولایت کې هم د کرکټ د یوه لوبغالي د جوړولو چارې پیل کړې دي.

په دې اړه د کرکټ بورډ په یوه خپره شوې اعلامیه کې راغلي دي چې یاد لوبغالی په ۲۲ جریبه ځمکه کې جوړېږي چې د نورو اسانتیاوو ترڅنګ به د نږدې ۴ زره نندارچیانو د ځایېدو ظرفیت هم ولري.

نور راوښيه

XS
SM
MD
LG