د لاسرسۍ وړ لېنکونه

تازه خبر
سه شنبه ۱۶ لیندۍ ۱۴۰۰ کابل ۱۰:۵۷

افغانستان

"په افغانستان کې د ښځو سره د تاوتریخوالي پېښې د تیرو کلونو په مقایسه دوه برابره شوي"

د ښځو پر وړاندې د تاوتریخوالي د له منځه وړلو څارنوالۍ وایې، چې په هېواد کې د ښځو په وړاندې د تاوتریخوالي پيښې زیاتي شوي دي.

دوی وايي، چې وروستیو شمېرو ته په کتو سره په هېواد کې د تاوتریخوالې دا پېښې د تیرو کلونو په مقایسه دوه برابره شوي دي.

د لویې څارندوالۍ مدني، سوداګریز او ادارې مرستیال عبدالوکیل امیني خبریالانو ته په دې اړه داسې وویل:

(یوازې په کابل ښار کې په ۱۳۹۱ کال کې له ښځو سره د تاوتریخوالي څارنوالۍ، تقریبا اتلس سوه جرمي قضیې د ښځو په وړاندې د تاوتریخوالي په برخه کې د قانون په رڼا کې تعقیب کړ دي.)

د ښځو پروړاندې دتاوتریخوالي دله منځه وړلو څارونوالۍ مسئولان وایې له کابل وروسته هرات هغه ولایت دی ،چې د افغانستان په کچه دښځو پروړاندې دتاوتریخوالي زیاتې پېښې په کې ثبت شوې دي.

د ورځې تازه خبرونه دلته ولولئ

اندونیزیا خپل سفارت په کابل کې بېرته پرانیزي

آرشیف- په کابل کې د اندونیزیا سفارت

اندونیزیا په پام لري چې خپل سفارت په کابل کې بېرته پرانیزي.

د اندونیزیا رسنیو د اسیاـ فسفیک او افریقایي چارو لپاره د دې هېواد د بهرنیو چارو د وزارت د عمومي مدیر عبدالقدیر جیلاني له قوله دا خبر ورکړی.

نوموړي پرون دوشنبې په جاکارتا کې یوې خبري غونډې ته وویل چې په کابل کې خپل سفارت بېرته د دې لپاره پرانیزي چې له افغانستان سره د بشري چارو او له ښځو سره د مرستو او د نورو مسولو ترڅنګ د سکالرشیفونو د ورکړې د پروګرام لپاره رغنده همکاري مخ ته یوسي.

اندونیزیا د اګسټ د میاشتې په پای کې چې طالبانو کابل نیولی و، خپل سفارت د پاکستان پلازمېنې اسلام اباد ته په موقت ډول لېږدولی دی.

ښاغلي جیلاني ټینګار وکړ چې په کابل کې یې د خپل سفارت بیا فعالول دا معنی نه لري چې دا هېواد د طالبانو حکومت په رسمیت پیژني.

ملالې یوسفزۍ د افغان نجونو د تعلیم لپاره له امریکا څه غوښتي؟

د نوبل د سولې د جایزې ګټونکې ملاله یوسفزۍ

د نوبل د سولې د جایزې ګټونکې ملالې یوسفزۍ پرون دوشنبه په واشنګټن کې د امریکا له بهرنیو چارو وزیر انتوني بلېنکن سره د افغان نجونو پر تعلیم خبرې وکړې.

دې د متحدو ایالتونو د بهرنیو چارو وزیر ته وویل: "افغانستان اوس په نړۍ کې یوازینی هېواد دی چې نجونې په کې د ثانوي او لوړو زده کړو حق نه لري. دوی له زده کړو بې برخې کړای شوي دي."

اغلې یوسفزۍ همدا راز وویل، هیله لري چې د یوې پنځلس کلنې افغان نجلۍ لیک، چې ولسمشر جوبایډن ته په خطاب کې لیکل شوی دی، ور وسپاري.

ملاله یوسفزۍ وايي، دا لیک د طالبانو له لوري په افغانستان کې د نجونو د ښوونځیو د بندېدو له کبله پر افغان نجونو د اغېز په اړه دی.

ملاله یوسفزۍ چې د خېبر پښتونخوا د سوات سیمې اوسېدونکې ده، په ۲۰۱۲ میلادي کال د پاکستاني طالبانو په حمله کې سخته ټپي شوه.

دې په ۲۰۱۴ میلادي کال د ښځو او نجونو د تعلیم لپاره د هلو ځلو په خاطر د نوبل د سولې جایزه وګټله.

ذبیح‌الله مجاهد: د ځنګلونو د ساتنې لپاره یوه قطعه جوړیږي

د طالبانو ویاند او د اطلاعاتو او فرهنګ وزارت مرستیال ذبیح الله مجاهد

د طالبانو حکومت د افغانستان د ځنګلونو د ساتنې لپاره د یوې نوې شنې قطعې د جوړولو اعلان وکړ.

د طالبانو ویاند او د اطلاعاتو او فرهنګ وزارت مرستیال ذبیح الله مجاهد په خپله ټویټر پاڼه کې لیکلي چې د یوه ځانګړي پلاوي د وړاندیز او د رییس الوزرا د منظورۍ له مخې به په غیرقانوني توګه د ځنګلونو د وهلو او د قاچاق د مخنیوي لپاره یوه ۴۵۰ کسیزه قطعه جوړیږي.

د دغې قطعې سل غړي به په کابل او څنګلورو سیمو کې ځای پرځای کیږي او پنځوس، پنځوس غړي به یې د افغانستان په ۷ نورو ولایتونو لکه، کونړ، نورستان، خوست، لغمان، پکتیا، پکتیکا او ننګرهار کې چې ډېر ځنګلونه لري، ځای پرځای کیږي.

د طالبانو حکومت د ځنګلونو د ساتنې لپاره دغه اقدام داسې مهال کوي چې تېر حکومت کې د اکثرو ځنګل لرونکو ولایتونو څخه د ځنګلونو د غیرقانوني وهلو او ګاونډیو هېوادونو ته یې د قاچاق راپورونه ورکړل شوي دي.

کریم خان: د طالبانو او داعش د سرغړونو څېړلو ته دې لومړیتوب ورکړل شي

د جرمونو نړیواله محکمه

د جرمونو د نړیوالې محکمې څارنوال پرون دوشنبې د امریکا د متحدو ایالاتونو په اړه د هغې پرېکړې دفاع وکړه چې دا هېواد یې په افغانستان کې د ترسره شوېو جرمونو د ادعاوو په اړه له څیړنې غورځولی دی.

د دې محکمې څارنوال کریم خان ویلي، د امریکا په نسبت نورو لورو، طالبانو او د اسلامي دولت سخت دریځې ډلې یا داعش په دې هېواد کې ناوړه جرمونه ترسره کړي دي.

د فرانس پرېس اژانس د راپور له مخې د بشري حقونو ډلو د سېپټمبر د میاشتې د پرېکړې په خاطر پر هغه انتقاد کړی او ویلي یې وچې نوموړی په دې پرېکړې سره د امریکایي ځواکونو په اړه څېړنه له پامه غورځوي او پرځای یې د افغانستان پر نوېو واکمنانو او د هغوی پر سیالې ډلې، د اسلامي دولت ډلې پر خراسان څانګې تمرکز کوي.

کریم خان په هاګ کې کې یوې غونډې ته وویل، ده دا پرېکړه د اسنادو او شواهدو پر اساس کړې او هغه د دې څرګندونه کوي چې په افغانستان کې ډیرې جدي سرغړونې د داعش او طالبانو له خوا ترسره شوي دي.

نوموړي زیاته کړه چې ده دې مسالې ته لومړیتوب ورکړی او له قاضیانو یې غوښتنه کړې چې په دې اړه څېړنو ته اجازه ورکوي.

له دې مخکې د دې محکمې له خوا په افغانستان کې د امریکایي ځواکونو له خوا د ترسره شوېو جرمونو د ادعاوو په اړه څیړنې د واشنګټن سخت غبرګون را پارولی و چې د پخواني ولسمشر ډونالډ ټرمپ اداره یې دې ته اړه کړې وه چې په مخکینۍ څارنوالې فاتو بنسودا بندیزونه ولګوي.

ملګرو ملتونو د افغانستان او میانمر په اړه یو پرېکړه لیک تصویب کړ

ارشیف، عکس تزئیني بڼه لري

د ملګرو ملتونو عمومي اسامبلۍ پرون دوشنبې یو پرېکړه لیک تصویب کړ چې له مخې یې د افغانستان او میانمار د رژیمونو د هغو غوښتونو په اړه اقدامات شاته غورځوي چې د خپلو هېوادونو لپاره یې ملګرو ملتونو ته له خپل لوري نوي استازي ورپېژندلي دي.

د اسوشیټېډ پرېس اژانس د راپور له مخې د عمومي اسامبلۍ رییس عبدالله شهید اعلان وکړ چې دغه پرېکړه لیک له رای ګیرۍ پرته د عمومي اجماع پر اساس تصویب شو.

د ملګرو ملتونو د ۱۹۳ کسیزې عمومي اسامبلۍ دا پرېکړه دا معنی لري چې د افغانستان د پخواني حکومت استازی غلام محمد اسحاقزی به خپلې دندې ته دوام ورکوي.

دغې اسامبلۍ ته د دغه پرېکړه لیک مسوده، د ملګرو ملتونو د اعتبار ورکوونکې کمېټې مشرې، په ملګرو ملتونو کې د سویډن استازې اننا اینیسټروم تېره اوونۍ وړاندې کړې وه.

د طالبانو حکومت دغې چوکۍ ته په قطر کې د خپل سیاسي دفتر پخوانی ویاند سهیل شاهین ور پېژندلی دی.

د روسیې او هند د بهرنیو چارو وزیرانو د افغانستان پر روان وضعیت خبرې وکړې

(ښی-کین) د روسیې د بهرنیو چارو وزیر سرګي لاوروف او د هند د بهرنیو چارو وزیر اېس جې شنکر

د روسیې د بهرنیو چارو وزیر سرګي لاوروف له خپل هندي سیال اېس جې شنکر سره د نورو مسئلو ترڅنګ د افغانستان پر روان وضعیت هم خبرې کړې دي.

لاوروف نن په نوې ډېلي کې خبریالانو ته ویلي، د دوی او هند دواړو هوکړه دا شوه چې طالبان باید له قومي او سیاسي پلوه ګډ او پراخ‌بنسټه حکومت جوړ کړي.

لاوروف ویلي، د طالبانو حکومت باید بشري حقونه خوندي کړي او د ترهګرۍ او نشه‌یي توکو د قاچاق مخه ونیسي.

لاوروف وړاندیز کړی، که هند او ایران هم د افغانستان په اړه د ترویکا پلس ناستو غړي شي، ګټور اقدام به وي.

اوس په دې ټولنه کې متحده ایالات، روسیه، چین او پاکستان ځای لري چې مسکو او اسلام‌اباد کې یې د افغانستان په اړه غونډې هم کړې دي.

د روسیې او هند د بهرنیو چارو وزیرانو نن د دواړو هېوادونو د مشرانو تر ملاقات مخکې خپلو کې سره وکتل او یو شمېر هوکړې یې وکړې.

چین له افغانستان سره نوره بشري مرسته کوي

ارشیف، افغانستان سره د چین ځینې مرستې

چین له افغانستان سره د نورو بشري مرستو ژمنه کړې ده.

په کابل کې د چین سفیر وانګ یو نن پر خپله ټویټرپاڼه لیکلي چې دوی دا ځل د ۴،۷ ملیونه ډالرو په ارزښت بشري مرسته افغانستان ته لېږي.

وانګ یو ویلي، دغه مرسته به له هغو افغانو سره وشي چې ژمي یې ژوند له ستونزو سره مخ کړی دی.

د چین په بشري مرستو کې خوراکي مواد، کمپلې او نور لومړني توکي شامل دي.

د چین له‌خوا مرسته شوي او نور مرسته کېدونکي توکي په اورګاډي کې افغانستان ته لېږدول کېږي.

ملګري ملتونه افغانستان کې خپل 'عملیاتي پلان' پراخوي

د افغانستان لپاره د ملګرو ملتونو ځانګړې استازې دیبورا لاینز او د طالبانو حکومت د بهرنیو چارو وزارت له مرستیال شېر محمد عباس ستانکزي لیدنه

د افغانستان لپاره د ملګرو ملتونو ځانګړې استازې دیبورا لاینز ویلي، دغه هېواد کې خپل عملیاتي پلان پراخوي.

لاینز دا خبره نن د طالبانو د حکومت د بهرنیو چارو وزارت له مرستیال شېر محمد عباس ستانکزي سره په کتنه کې کړې ده.

نوموړې ویلي، دا مهال‌یې افغانستان کې ټولې څانګې پرانیستي او ځایي او نړیوال کارکوونکي یې دندو ته حاضر شوي دي.

د مېرمن لاینز او ښاغلي ستانکزي د لیدو کتو خبر د طالبانو د بهرنیو چارو وزارت ویاند عبدالقهار بلخي پر خپله ټویټرپاڼه خپور کړی دی.

د خبر له مخې لاینز ویلي، د افغانستان د کنګل شوې شتمنۍ د خلاصون لپاره به کار کوي او د نړۍ له هېوادونو به غواړي چې کابل کې بېرته خپل سفارتونه پرانیزي.

د افغانستان د موی‌تای لوبغاړي محمد یوسف جهانګیر خپل سنګاپوری سیال مات کړ

محمد یوسف جهانګیر له خپل سنګاپوري سیال د سیالۍ د ګټلو پر مهال

د افغانستان د موی‌تای لوبغاړي محمد یوسف جهانګیر د موی‌تای په نړیوالو اتلولیو کې خپل سنګاپوری سیال مات کړ.

دغه دواړه لوبغاړي نن په تایلنډ کې د مسابقې ډګر ته ښکته شول او افغان لوبغاړي په خپلې بریا سره د سیالۍ دوهم پړاو ته لاره ومونده.

د افغانستان موی‌تای فدراسیون ویلي چې د جهانګیر بله لوبه د جنوبي افریقا له یوه لوبغاړي سره ده او که چېرته هلته هم بریالی شي له ازبکستاني او قزاقستاني سیالانو سره به د سیالۍ رېنګ ته ښکته شي.

د موی‌تای په دې سیالیو کې د ۹۴ هېوادونو لوبغاړي برخه لري، خو له افغانستانه یوازې دوه لوبغاړي او یو لوبڅار ورغلي دي.

چین له افغانستان سره د کرونا ضد یو ملیون ډوز واکسین مرسته وکړه

ارشیف، په چین کې د افغانستان سفیر جاوېد احمد قایم د چین د کرونا ویروس ضد واکسین د تېرې مرستې د ترلاسه کولو پر مهال

چین له افغانستان سره د کرونا ویروس ضد د یو ملیون ډوز واکسین مرسته وکړه.

په چین کې د افغانستان سفیر جاوېد احمد قایم ازادي راډیو ته ویلي چې دا واکسین به تر دوو ورځو پورې کابل ته ورسېږي.

ښاغلی قایم زیاتوي: "پر یو ملیون ډوز واکسین سربېره ۱،۶ ملیونه سورنجونه هم مرسته شوي، موږ د چین له حکومت سره په اړیکه کې یو چې دوهم قدم کې د «کوېډ-۱۹» لپاره د طبي تجهیزاتو مرسته زیاته کړي، دوی ژمنه کړې چې نږدې راتلونکي کې به د نور واکسین مرسته هم وکړي."

په افغانستان کې د طالبانو د حکومت د روغتیا مسؤلان وایي، دوی چمتو دي چې د چین له‌خوا د مرسته شوي واکسین تطبیق ته زمینه برابره کړي.

د عامې روغتیا مسؤلان وایي، تر اوسه ۷ ملیون ډوزه واکسین افغانستان کې تطبیق شوي دي.

ملګري ملتونه: هرو ۱۰ افغان ښځو کې ۹یې لږ تر لږه یو ځل تاوتریخوالی تجربه کوي

ارشیف، د تاوتریخوالي قرباني یوه افغانه مېرمن

د ملګرو ملتونو سرمنشي وایي، په افغانستان کې هرو ۱۰ ښځو کې ۹ هغه لږ تر لږه یو ځل د خپل ژوند د ملګري له‌خوا تاوتریخوالی تجربه کوي.

انتونیو ګوترش نن پر خپله ټویټرپاڼه لیکلي چې د دوی د ښځو د ملاتړ ټیمونه په افغانستان کې دي او هغو مېرمنو ته مرسته رسوي چې له تاوتریخوالي سره مخامخې دي.

ګوترش دا څرګندونې د ښځو په وړاندې د تاوتریخوالي د له‌منځه وړلو د ۱۶ ورځني کمپاین په مناسبت کړي دي. دا کمپاین د نومبر په ۲۵مه پیل شوی دی.

دوی دا څرګندونې داسې مهال کوي چې د طالبانو حکومت بیا د ښځو حقونو ته ځان ژمن بولي او تازه‌یې د ښځو د کورني ژوند د خوندیتوب په اړه یو ۶ ماده‌ییز فرمان ورکړ.

له دې سره سره بیا پر دوی انتقادونه دي چې ملیونونه نجونې یې له ښوونځیو او لوړو زده‌کړو بې‌برخې کړې دي.

له تاوتریخوالي د متضررو افغان ښځو لپاره د 'ضروري خدماتو سیستم' له‌منځه تللی

ارشيف

د بخښنې نړیوال سازمان وايي، د طالبانو له واکمنېدو وروسته په افغانستان کې له تاوتریخوالي د متضررو ښځو لپاره د ضروري خدماتو سیستم له‌منځه تللی.

د تاوتریخوالي د پېښو قرباني ښځو د بخښنې نړیوال سازمان یا امنېستي انټرنشنل ته ویلي چې طالبانو د امن خونې بندې کړي او هغه بندیان‌یې له محبسونو څخه خوشې کړي دي چې له ښځو سره په تاوتریخوالي تورن وو.

امنېستي انټرنشنل له ۲۶ افغان مېرمنو سره د مرکو پر بنسټ په یوه راپور کې ویلي دي چې د تشدد قرباني مېرمنې او همداراز د امن خونو مسؤلان، مدافع وکیلان، قاضیان، د اړوندو ادارو چارواکي او د ښځو د خوندیتوب په دې پروسه کې شامل کسان اوس د مرګ له ګواښ سره مخامخ دي.

د بخښنې نړیوال سازمان سکرتر جنرالې انګېس کالامارد (Agnes Callamard) ویلي دي چې په افغانستان کې د جنسیت په اساس د تاوتریخوالي قرباني ښځې او نجونې اوس له پامه غورځول شوي، د خوندیتوب شبکه‌یې ویجاړه شوې او د دوی د امن ځایونه له‌منځه تللي دي.

د پخواني حکومت پر مهال هغه مېرمنې چې د تاوتریخوالي له کبله‌یې خپل کورونه پرېښودل، د امن په خونو کې ساتل کېدلې، خو د زمري په ۲۴مه په افغانستان کې د طالبانو له واکمنېدو وروسته د ښځو د خوندیتوب دا سیستم له‌منځه ولاړ.

بلېنکن د اماراتو وليعهد سره د افغانستان په شمول په یو لړ مسئلو خبرې وکړې

د امريکا د بهرنيو چارو وزير انتوني بلېنکن

د امریکا بهرنیو چارو وزیر انتوني بلېنکن د متحده عربي اماراتو له لوړپوړي چارواکي محمد بن زاید سره د افغانستان په شمول په یو لړ مسئلو خبرې کړي.

د بهرنیو چارو وزارت په یوه اعلامیه کې ویلي چې ښاغلي بلېنکن او د ابوظبي ولیعهد محمد بن زاید ال نهیان په مهمو سیمه‌ییزو مسایلو، دوه اړخیزو شراکتونو او د پراخ بنسټه همکاریو د لا زیاتېدو په تړاو بحث کړی.

ښاغلي بلېنکن هم په خپل ټویټر لیکلي: "له ولیعهد محمد بن زاید سره مې په مهمو سیمه‌ییزو مسئلو او د افغانستان په اړه په ګډ کار باندې خبرې وکړې."

محمد بن زاید له ۲۰۱۴ کال راهیسې د متحده عربي اماراتو ټولې رسمي دولتي چارې مخته وړي.

د اعلامیې له مخې د بهرنیو چارو وزیر انتوني بلېنکن له ولیعهد محمد بن زاید سره په خبرو کې د متحده عرب اماراتو له مخلصانه همکاریو څخه مننه کړې چې له افغانستانه‌یې د امریکا اتباعو، د سفارت کارکوونکو او د درېیمو هېوادونو ته د بهرنیانو د خوندي عبور لپاره زمینه برابره کړه.

بلېنکن همداراز له افغانستان سره د متحده عربي اماراتو د بشري مرستو هرکلی کړی دی.

اوچا: له اوو مليونو افغانانو سره بشري مرستې شوي

آرشیف- توزیع کمک های بشری به افراد نیازمند در ولایت هرات

د ملګرو ملتونو د بشري مرستو د همغږۍ ادارې یو اېن اوچا ویلي ملګرو ملتونو او همکارانو یې د ۲۰۲۱ کال له سپټمبر تر نومبر پورې له لږ تر لږه اووه ملیونه افغانانو سره مرستې کړي.

دا خبره یادې ادارې پرون په یوه ټويټ کې کړې ده.

د ټویټ په اساس ملګرو ملتونو او همکارانو یې په تېرو شااوخوا درېيو میاشتو کې له اووه مليونو افغانانو سره د خوړو مرسته کړې، نږدې نهو لکو افغانانو ته‌يې صحي خدمات رسولي او نږدې یو لک او ۸۰ زره خوارځواکو ماشومانو ته‌يې خواړه رسولي.

په دې سربېره بیا ملګرو ملتونو په ټینګار سره ویلي چې ۲۴ مليونه افغانان عاجلو مرستو ته اړتیا لري.

د اوچا د افغانستان څانګې مشرې ایسابیلا موسارد کارلسن ویلي چې ۲۴ ملیونه افغانان دمګړۍ خوړو، صحي خدماتو، واکسینونو او د ژمي پر مهال امکاناتو او نغدو پيسو ته سخته اړتیا لري.

د افغانستان د کرنې پخوانی وزیر عبیدالله رامین وفات شو

د افغانستان د کرنې پخوانی وزیر او د ولسي جرګې مخکېنی غړی عبیدالله رامین

د افغانستان د کرنې پخوانی وزیر او د ولسي جرګې مخکېنی غړی عبیدالله رامین د ورپېښې ناروغۍ له امله په ترکیه کې وفات شوی.

ګڼو رسنیو د ښاغلي رامین مړینه د سرچینو په حواله تأیید کړې.

د ښاغلي رامین یوه خپل او د افغانستان د دفاع وزارت مخکېني مرستیال تمیم عاصي هم په خپل ټویټر لیکلي چې د کرنې پخوانی وزیر عبیدالله رامین وفات شوی.

عبیدالله رامین له ۲۰۰۴ تر ۲۰۰۸ کال پورې د افغانستان د کرنې، مالدارۍ او اوبو لګولو وزیر و او وروسته د ولسي جرګې په ۱۶مه دوره کې د بغلان د خلکو استازی شو.

نور راوښيه

XS
SM
MD
LG