د لاسرسۍ وړ لېنکونه

تازه خبر
شنبه ۲۵ زمری ۱۳۹۹ کابل ۱۲:۲۳

شمالي کوریا: توغندیو مو په امریکا کې پوځي اډې په نښه کړي


شمالي کوریا وایي، توغندیو یي په امریکا کې پوځي اډې په نښه کړي دي.

دا هېواد دغه ګواښ وروسته له هغې کوي، چې د امریکا متحده ایالاتو او جنوبي کوریا په سیمه کې په ګډه پوځي عملیات چې د اپریل میاشتې تر پایه به دوام کوي، پیل کړی دی.

شمالي کوریا وایي، د دوي د ستراتېژیکو توغندیو قطعاتو په اوس وخت کې د امریکا د متحده ایالاتو په هاوایي، ګوام او دغه راز د امریکا د خاورې دننه پوځي اډې په نښه کړې دي.

د شمالي کوریا دولتي خبري اژانس وایي، دا اقدام یي د امریکا د متحده ایالاتو د بم غورځوونکو الوتکو د ګواښونو په بدل کې کړی دی.

د امریکا متحده ایالات او جنوبي کوریا په ګډه پوځي تمرینات پرمخ وړي. دغه تطبیقات به د اپریل د میاشتې ترپایه دوام کوي.

د راپورونو له مخې د شمالي کوریا د وسله والو ځواکونو عمومي قومندانۍ د توغندیو قطعاتو ته ویلي، چې د جګړې لومړۍ درجه احضاراتو ته باید چمتو وي.

د چېن د بهرنیو چارو وزارت په دواړو خواو غږ کړی چې له حوصلې کار واخلي.

د شمالې کوریا د سې شنبې د ورځې دا څرګندونې وروسته له هغې وشوې، چې امریکا او جنوبې کوریا هغه تړون لاسلیک کړ، چې له مخې به یي دواړه هېوادونه د شمالي کوریا هرې حملې ته که هغه کوچېنۍ هم وي، په ګډه ځواب وایي.

د پیونګ یانګ د ګواښ د مخه د جنوبي کوریا د دفاع وزارت ویاند وي یونګ سب په سیول کې په یوه خبري کنفرانس کې د خبرداری اعلان وکړ:

"که شمالي کوریا لکه د پخوا په څیر بیا لمسونکې اقدام وکړي، زموږ پوځ به زر یا هم لس زره چنده زیات ورته ځواب ووايي، ترڅو د چونان د هغو ۴۶ اتلانو روح ارامه شي، چې له خپل هېواده د دفاع په لاره کې وژل شوي دي."

د جنوبي کوریا ولسمشرې پارک یو نهای د سې شنبې په ورځ په ملي ادیره کې د چونان د ډوبې شوی کشتۍ د پیښې د قربانیانو په یاد جوړو شویو مراسمو کې پر پیونګ یانګ غږ وکړ، چې خپل دریځ بدل کړي:

"شمالي کوریا باید له خپلو اټمي وسلو، توغندیو، لمسونې او ګواښونو لاس واخلي او دا هېواد د نړېوالې ټولنې یو مسول غړی شي. دا به د شمالي کوریا د بقا لپاره یواځینۍ لاره وي."

شمالي کوریا په تېر ډسمبر میاشت کې د ځمکې مدار ته یو سټلایت یا مصنوعې سپوږمکۍ توغولې وه، خو ګمان نه کېږې چې دا هېواد دې د اوږده واټن ویشتونکې توغندي ولري چې متحده ایالاتو ته ورسیږي.

شمالي کوریا تيره میاشت خپل درېیم اټمي ازمیښت وکړ او د ملګرو ملتونو امنیت شورا ورباندې سخت بندیزونه ولګول.
XS
SM
MD
LG