د لاسرسۍ وړ لېنکونه

تازه خبر
دوشنبه ۲۰ زمری ۱۳۹۹ کابل ۰۸:۱۶

افغانستان

د افغانستان د پوهنتونونو نوی درسي نصاب اعلان کړای شو

د افغانستان د لوړو زده کړو وزارت نن د هېواد د پوهنتونونو نوی درسي نصاب اعلان کړ.

د لوړو زده کړو وزیر عبیدالله عبید نن په یوه خبري غونډه کې وویل چې؛ دغه نصاب د بهرنیو هیوادونو له درسي معیارونو سره برابر دی.

"موږه د ټولني له اړتیاو سره سم درسي نصاب لرو او د ټولو پوهنتونو او پوهنځیو پر درسي نصاب له سره کتنه شوې او نوی نصاب جوړ شوی او د دې په اساس موږ غواړو درسي پروګرامونه پرمخ ویسو."

اوسمهال د اکثرو پوهنتونونو محصلین شکایت کوي چې؛ درسي نصاب مواد یې زاړه دي.

د ورځې تازه خبرونه دلته ولولئ

ملي امنیت شورا: د پاته ۴۰۰ طالب زندانیانو راخوشې کول نه‌دی پیل شوی

د افغانستان ولسمشر محمد اشرف غني

د افغانستان د ملي امنیت شورا چارواکي وايي، تر اوسه د پاته ۴۰۰ طالب زندانیانو د راخوشې کولو بهیر نه‌دی پیل شوی، خو وروسته له هغه چې ولسمشر په دې اړه فرمان لاسلیک کړي، د بندیانو د خلاصون بهیر به پیل شي.

دا خبره په ملي امنیت شورا کې د ملکیانو د خوندیتوب او د پخلاینې د چارو مشر انتظار خادم ازادي راډيو ته وکړه.

ښاغلی خادم زیاتوي: "ولسمشر فرمان لاسلیک کوي او د لارښوونې پر اساس به‌یې بندیان راخوشې کړو. تر اوسه خلاصون نه‌دی پیل شوی. خو موږ ژمن یو او پلان هم ورته لرو."

د افغانستان ولسمشر اشرف غني پرون د لویې مشورتي جرګې په پای کې د جرګې د ګډونوالو سلا ومنله چې ۴۰۰ طالب بندیان خوشې کړي.

هلمند کې ۳۰۰ مېرمنو ته د کار زمینه برابره شوه

ارشیف

د افغانستان د کرنې او مالدارۍ وزارت په هلمند کې ۳۰۰ مېرمنو ته د کار زمینه برابره کړې ده.

د دغه وزارت ویاند اکبر رستمي نن ازادي راډیو ته وویل چې دغه مېرمنې د دې ولایت په مرکز او ناوې ولسوالۍ کې په کروندو کې په کار بوختې دي.

دغه کاري فرصتونه مېرمنو ته د بېلابېلو مېوو او سبو د کرکېلې لپاره د کورنیو باغچو په جوړولو سره برابرې شوې دي.

کومې مېرمنې چې اوس په دې ولایت کې د سبو او مېوو د کرکېلې په برخه کې فعالیت لري، تر دې وړاندې په کورونو کې اوزګاره وې.

د کرنې وزارت د بشري مرستو برابرولو خیریه مؤسسې په همکارۍ دغو مېرمنو ته د کورنیو باغچو په جوړولو سره پر دوی د سبو ۱۰ ډوله تخمونه او کیمیاوي سرې هم وېشلې دي.

د دې پروژې د پلي کولو موخه په دې ولایت کې د کورنیو باغچو وده او پراختیا او د بې‌وزلو کورنیو اقتصادي ملاتړ دی.

کندهار کې چاودنو ۱۰ ملکي کسان وژلي

د کندرهار ولایت نقشه

د کندهار په ارغستان ولسوالۍ کې په دو جلا جلا ماین چاودنو کې ۱۰ ملکي کسان وژل شوي.

د کندهار د امنیه قوماندانۍ ویاند جمال ناصر بارکزي ازادي رادیو ته وویل چې دواړه چاودنې یکشنبه ماسپښین شوې دي.

هغه د پېښې جزئیات داسې بیان کړل: "یو ماین د ارغستان ولسوالۍ د شنه نري په سیمه کې د ملکي خلکو په موټر چاودېدلی چې اته کسان په‌کې شهیدان شوي دي. دویم ماین د برج کلي په سیمه کې په دوو پليو کسانو چاودېدلی چې دا دوه کسان هم شهیدان شوي. دا دواړه ماینونه وسله‌والو مخالفینو کېنولي و."

د دې پېښو مسؤلیت تر اوسه چا نه‌دی منلی.

ارغستان د کندهار یوه لیرې پرته او سرحدي ولسوالۍ ده چې امنیتي وضعه‌یې ډېره ښه نه‌بلل کېږي.

چارواکي: پکتیکا کې ۱۵ تنه طالبان وژل شوي

ارشیف

د پکتیکا امنیتي چارواکي وایي پرون‌یې وسله‌والو مخالفینو ته درنه مرګ‌ژوبله اړولې ده.

د دغه ولایت امنیه قوماندان سمونوال نثار احمد عبدالرحیم‌زي رسنیو ته په یوه پيغام کې وویل چې یکشنبه ماسپښين افغان پولیسو په سروبي ولسوالۍ کې ۱۵ وسله‌وال بریدګر ووژل او ۶ نور یې ټپیان کړل.

هغه وویل: "د سروبي په ولسوالۍ کې د موږ پولیس چې هلته په ګزمه وتلي و له مخالفینو سره مخ شول. په نتیجه کي يې د مخالفینو ۱۵ تنه مړه او شپږ نور یې ټپیان دي. په جسدونو کې یو تن احمدشاه نومېږي چې د سروبي ولسوالۍ نظامي مسؤل و. ده په تېرو وختونو کې په خلکو ډېر ظلمونه کړي و."

نوموړي رسنیو ته دا هم ویلي په تېر یوه شپه او ورځ کې یې د کشفي معلوماتو پر اساس پولیسو په مرکز ښرنه، جاني‌خېلو او یحیی‌خېلو ولسوالیو کې ۶ وسله‌وال هم نیولي دي.

وسله‌والو طالبانو په پکتیکا کې د دې پېښې او یا دا چې دوی ته مرګ‌ژوبله اوښتې که څنګه څه تبصره نه‌ده کړې.

د سلیمان لایق جنازه له جرمني کابل ته راورسېده

سلیمان لایق

نن دوشنبه د اکاډمیسین سلیمان لایق جنازه له جرمني څخه کابل ته راورسېده.

سلیمان لایق د اختر په لومړۍ ورځ د جرمني هېواد په یو روغتون کې د ژوند پور پرې کړ.

دی تېر ۲۰۱۹ کال په یوه ځانمرګي برید کې ټپي شوی و.

د افغانستان د علومو اکاډمۍ سرپرست څېړنوال عبدالظاهر شکېب ازادي راډيو ته وویل تمه وه یکشنبه د ارواښاد لایق جنازه کابل ته ورسېږي، خو په پروازونو کې د ستونزو له امله دا کار په یوه ورځ ځنډ کېږي.

د اروښاد لایق زوی غرزي لایق هم ازادي راډیو ته تأیید کړه چې جنازه به سهار مهال د کابل هوايي ډګر ته ورسېږي او په کابل کې به خاورو ته سپارل کېږي.

وار له مخه د اکاډمیسین سلیمان لایق د اعزاز او تدفین کمېسیون او علومو اکاډمۍ په کابل ښار کې د ښاغلي لایق تصویرونه او ملي اشعار د کابل په واټونو کې نصب کړي دي.

اکاډمیسین غلام مجدد سلیمان لایق د افغانستان یو مطرح شاعر، لیکوال او څېړونکی و چې په پښتو او دري ژبو یې ګڼ اثار چاپ شوي.

کابل کې چاودنې ۲ تنه وژلي او ۵ نور ټپیان دي

د افغانستان په عمومي نقشه کې کابل ولایت

د کابل امنیه قوماندانۍ وايي، په کمپنۍ سیمه کې یوې بمي چاودنې دوه ملکي وګړي چې یوه مېرمن هم په‌کې وه، وژلي او پنځه امنیتي سرتېري یې ټپیان کړي دي.

د کابل د امنیه قوماندانۍ ویاند فردوس فرامرز نن یکشنبه په یوه خبرپاڼه کې وویل، ماین د کمپنۍ په بازار کې په یوه کراچۍ کې ایښودل شوی و او امنیتي ځواکونو کشف کړی و، خو هغه مهال چې د ساحې د کلابندولو او د دې ماین د شنډولو هڅه‌یې کوله وچاودېده.

د دې حملې مسؤلیت تر اوسه کومې ډلې نه‌دی منلی.

طالبان: مذاکرات به د بندیانو له خوشې کېدو وروسته یوه اوونۍ کې پیل شي

په قطر کې د ملا برادر په مشرۍ د طالبانو د سیاسي دفتر غړي

طالبان وايي چې بین‌الافغاني خبرې به د ۴۰۰ طالب بندیانو له خوشې کېدو وروسته د یوې اوونۍ په بهیر کې پیل شي.

په قطر کې د طالبانو د سیاسي دفتر ویاند سهیل شاهین له اسوشیټډ پرس خبري اژانس سره په خبرو کې د ۴۰۰ طالب بندیانو د خوشې کولو په اړه د لویې جرګې پرېکړه مثبته وبلله، خو ویلي یې دي چې طالبان له امریکا سره د سولې موافقې ته ژمن دي او د اوربند په اړه بحث به د همدې موافقې له مخې په بین‌الافغاني خبرو کې وشي.

ولسمشر اشرف غني د ۴۰۰ طالب بندیانو د خوشې کولو په اړه د مشورتي لویې جرګې غوښتنه تأیید کړه او ژمنه‌یې وکړه چې د دې بندیانو د خلاصون حکم به نن لاسلیک کړي.

د سولې مشورتي لویې جرګې نن په خپله درېیمه او وروستۍ غونډه کې په خپل پرېکړه‌لیک کې د سولې د ټینګښت لپاره د ۴۰۰ طالب بندیانو د خوشې کېدو غوښتنه وکړه. ښاغلي غني جرګې ته په وینا کې وویل چې د جرګې پرېکړه د ملت پرېکړه ده او حکومت‌یې په تطبیقولو مکلف دی.

هغه زیاته کړه: "په پرېکړه‌لیک کې همداراز ټینګار شوی چې د دې بندیانو له خوشې کېدو سره سم باید له کومې پلمې پرته د مستقیمو خبرو ژر تر ژره پیل یقیني شي."

جرمني د افغان سولې ټینګښت کې د فعال رول لوبولو ته چمتووالی وښود

د افغانستان لپاره د جرمني ځانګړی استازی مارکُس پوتزل

جرمني په افغانستان کې د سولې د ټینګښت په پروسه کې د فعال رول لوبولو ته چمتووالی ښودلی دی.

د افغانستان لپاره د جرمني ځانګړي استازي مارکُس پوتزل په یوه خبرپاڼه کې چې د سولې د مشورتي لویې جرګې د پرېکړه‌لیک له خپرېدو وروسته خپره شوه ویلي د ۴۰۰ طالب بندیانو د خوشې کېدو د فرمان له لاسلیک سره دواړه لوري باید د بین‌الافغاني خبرو پیل ته چمتو شي.

ښاغلی پوتزل وايي چې له دې خبرو سره په یوه وخت کې باید د ټول هېواد په کچه اوربند ټینګ شي.

پاکستان د ۴۰۰ طالب بندیانو د خوشې کېدو پرېکړه وستایله

د افغان حکومت له لوري یو شمېر خوشې شوي طالب بندیان

پاکستان د ۴۰۰ طالب بندیانو د خوشې کېدو په اړه د ولسمشر اشرف غني پرېکړه ستایلې او هیله‌یې څرګنده کړې چې له دې سره به بین‌الافغاني خبرې ژر تر ژره پیل شي.

د پاکستان د بهرنیو چارو وزارت په یوه بیان کې ویلي دي چې نړیواله ټولنه باید د افغانانو ترمنځ د خبرو د بریا او په افغانستان کې د خبرو له لارې د دایمي سولې او ثبات د ټینګښت ملاتړ وکړي.

'فاریاب کې د یوه سرتېري له لوري پر یوې ماشومې د تېري څېړنه پیل شوه'

د افغانستان په عمومي نقشه کې فاریاب ولایت

شاهین قول اردو د فاریاب په بلچراغ ولسوالۍ کې د ملي اردو د یوه سرتېري له‌خوا پر یوې ماشومې د جنسي تېري د ادعا په اړه د څېړنو د پیل خبر ورکوي.

د بلچراغ ولسوال عبدالجمیل صدیقي ازادي راډیو ته وویل چې پرون مازیګر د ملي اردو یوه سرتېري خپلې پوستې ته پر لاره پر یوې اووه کلنې ماشومې جنسي تېری کړی دی.

ښاغلی صدیقي زیاتوي: "د ملي اردو یوه سرتېري چې خپلې پوستې ته روان و، له دې اووه کلنې ماشومې سره مخامخ شوی او د زنا عمل‌یې ورسره کړی دی."

ولسوال وايي چې ماشومه په روغتون کې ده او روغتیايي حالت‌یې ښه دی.

د شاهین قول اردو ویاند حنیف رضايي نن یکشنبه ازادي راډیو ته وویل چې دا ادعا نه‌تأییدوي او نه‌یې ردوي، خو نوموړی زیاتوي چې یو پلاوی په دې اړه د څېړنو لپاره نن سیمې ته واستول شو.

شاهین قول اردو: شمال کې ۷ طالبان وژل شوي او ۷ نور ټپیان دي

ارشیف

شاهین قول اردو په تېرو ۲۴ ساعتونو کې په شمال کې د افغان ځواکونو په ځوابي حملو کې د ۱۴ طالبانو د مرګ‌ژوبلې خبر ورکوي.

۲۰۹ شاهین قول اردو په یوه خبرپاڼه کې چې نن خپره شوه وايي، طالبانو د بلخ ولایت په شولګرې، د فاریاب په ګرزیوان، د جوزجان په فیض‌اباد او د سرپل په صیاد ولسوالیو او د سرپل په مرکز کې پر افغان ځواکونو د حملو پلان لاره، خو په ځوابي حملو کې اووه تنه طالبان وژل شوي او اووه نور ټپیان دي.

د تندر او شاهین قول اردوګانو د دې ادعاوو په اړه طالبانو څه نه‌دي ویلي.

تندر قول اردو: پکتیکا کې ۹ طالبان وژل شوي

ارشیف، پکتیکا کې افغان ځواکونه

تندر قول اردو په پکتیکا ولایت کې د افغان ځواکونو په ځوابي برید کې د نهو طالبانو د وژل کېدو او د درېیو نورو د ټپي کېدو خبر ورکوي.

۲۰۳ تندر قول اردو په یوه خبرپاڼه کې چې نن خپره شوه وايي، طالبانو غوښتل د پکتیکا په ارګون او وازې خوا ولسوالیو کې پر امنیتي پوستو حملې وکړي، خو د افغان ځواکونو په ځوابي بریدونو کې د ارګون ولسوالۍ په شېخانو سیمه کې پنځه تنه طالبان وژل شوي او درې ټپیان دي او د وازې خوا ولسوالۍ په تروکي سیمه کې څلور طالبان وژل شوي دي.

په بیان کې د یوه افغان سرتېري د ټپي کېدو خبر هم ورکړل شوی دی.

ولسمشر غني به نن د ۴۰۰ طالب بندیانو د خلاصون حکم لاسلیک کړي

ولسمشر محمد اشرف غني

ولسمشر اشرف غني د ۴۰۰ طالب بندیانو د خوشې کولو په اړه د مشورتي لویې جرګې غوښتنه تأیید کړه او ژمنه‌یې وکړه چې د دې بندیانو د خلاصون حکم به نن لاسلیک کړي.

د سولې مشورتي لویې جرګې نن په خپله درېیمه او وروستۍ غونډه کې په خپل پرېکړه‌لیک کې د سولې د ټینګښت لپاره د ۴۰۰ طالب بندیانو د خوشې کېدو غوښتنه وکړه.

افغان حکومت مخکې ویلي و چې دا بندیان خطرناک مجرمان دي او ولسمشر یې د خوشې کولو صلاحیت نه‌لري، خو ښاغلي غني جرګې ته په وینا کې وویل چې د جرګې پرېکړه د ملت پرېکړه ده او حکومت‌یې په تطبیقولو مکلف دی.

ښاغلی غني وايي: ‌"لویې جرګې په خپل پرېکړه‌لیک کې همداراز ټینګار کړی چې د دې بندیانو له خوشې کېدو سره سم باید له کومې پلمې پرته د مستقیمو خبرو ژر تر ژره پیل یقیني شي."

جرګې همداراز په هېواد کې د سمدستي او دایمي اوربند غوښتنه کړې او پر نړیوالې ټولنې، په خاص ډول پر متحده ایالاتو یې غږ کړی دی چې له افغانستان سره پر خپلو کړو ژمنو عمل وکړي.

اشرف غني به نن د مشورتي لویې جرګې د وړاندیز په اړه پرېکړه وکړي

محمد اشرف غني

ټاکل شوې ده چې د افغانستان ولسمشر محمد اشرف غني نن (یکشنبه) په مشورتي لویه جرګه کې د ۴۰۰ طالب بندیانو په اړه د دې جرګې د وړاندیز په اړه وروستۍ پرېکړه اعلان کړي.

د ولسمشر غني د پرېکړې تر اعلان مخکې باور کېږي چې مشورتي لویه جرګه به حکومت ته د پاتې طالب بندیانو د خلاصون سپارښتنه وکړي.

د طالب بندیانو خلاصون به د افغانانو ترمنځ د سولې خبرو ته لار هواره کړي.

د مشورتي لویې جرګې رئیس عبدالله عبدالله پرون وویل، د ۵۰ واړو کمېټو غړو د بندیانو د خلاصون ملاتړ کړی.

کرکټ بورډ: د افغانستان او زېمبابوې ترمنځ سیالۍ لغوه شوه

ارشیف، ۲۰۱۸ کال کې د افغانستان او زېمبابوې د کرکټ ملي لوبډلو ترمنځ سیالۍ

د افغانستان کرکټ بورډ وایي، د دوی او زېمبابوې د ملي لوبډلو ترمنځ پلان شوې سیالۍ لغوه شوې ده.

ټاکل شوې وه چې دغه لوبډلې به نږدې راتلونکي کې پنځه ۲۰ اوریزې سیالۍ کوي.

کرکټ بورډ په یوه خبرپاڼه کې ویلي د زېمبابوې حکومت خپلې کرکټ ادارې ته د کرونا ویروس د خطر له امله د یادو لوبو اجازه ورنه‌کړه چې ورسره د لوبو دا لړۍ هم لغوه شوه.

نور راوښيه

XS
SM
MD
LG