د بګرام زندان افغان حکومت ته وسپارل شو
افغان چارواکو د بګرام زندان د بشپړ مسوولیت تر لاسه کول د افغانستان د ملي حاکمیت یوه مهمه برخه وبلله او ټینګار یې وکړ، چې په ساتنه کې به یې ټول نړېوال معیارونه په پام کې ونیسي. د بګرام زندان بشپړ مسوولیت د بګرام په هوایی ډګر کې په ځانګړو مراسمو کې د دوشنبې په ورځ له امریکایي ځواکونو څخه افغان حکومت ته وسپارل شو. د افغانستان دفاع وزیر جنرال بسم الله محمدي وویل، چې افغان ځواکونه د دې زندان د ساتلو پوره توان لري او هیڅ ډول ستونزه به په دې برخه کې رامنځ ته نه شي.