د لاسرسۍ وړ لېنکونه

تازه خبر
شنبه ۲۵ زمری ۱۳۹۹ کابل ۰۳:۴۰

افغانستان

ولسمشر کرزي او د ناټو قومندان له میدان وردګو نه د ځانګړو امریکایې ځواکونو پر وتلو موافقه وکړه

د افغانستان جمهوري ریاست وایې، چې ولسمشر کرزي او په افغانستان کې د ناټو او امریکایې ځواکونو عمومي قومندان له میدان وردګو څخه د ځانګړو امریکایې ځواکونو پر وتلو موافقه وکړه.

د جمهوري ریاست یوه ویاند فایق واحدی ازادي راډيو ته وویل چې، دا ځواکونه به لومړی د میدان وردګ له نرخ څخه وتل پيل کړي:

(نن د ولسمشر حامد کرزي او جنرال جوزف ډانفورډ ترمنځ په غونډه کې پر دې موافقه وشوه چې له میدان وردګو څخه د امریکایې ځانګړو ځواکونو وتل لومړی له نرخ ولسوالۍ څخه پیل شي. )

په ورته وخت کې د ایساف مطبوعاتي دفتر هم د یوې اعلامیې په خپرولو سره دا موافقه تایید کړه.

په اعلامیه کې راغلي چې دا موافقه نن په کابل کې د ولسمشر حامد کرزي او په افغانستان کې د بهرنیو ځواکونو د عمومي قومندان جنرال جوزف ډنفورډ په لیدنه کې وشوه.

د افغانستان د دفاع وزارت ویاند جنرال ظاهر عظیمي وایی چې ځانګړي امریکایی ځواکونه یوازې د میدان وردک ولایت په نرخ ولسوالۍ کې میشت دي.

د ورځې تازه خبرونه دلته ولولئ

افغان چارواکي: د هوايي دهلیز له لارې ۲۹ سلنه صادرات زیات شوي

ارشیف

د افغانستان صنایعو او سوداګرۍ وزارت وايي، د تېر کال د لومړیو ۷ میاشتو پرتله سږ کال د هېواد ۲۹ سلنه صادرات د هوايي دهلیز له لارې زیات شوي.

د دې وزارت د مطبوعاتو برخې مسئول جواد دبیر نن ازادي راډيو ته وویل، سره له دې چې کرونا ویروس د روان کال په لومړیو ۲ میاشتو کې د افغانستان د صادراتو کچه راکمه کړې و خو د خصوصي سکټور او د حکومت په هڅو سره دغه اوښتی زیان بېرته جبران شو.

د ښاغلي دبیر په خبره، اوس د افغانستان وچه او تازه میوه د هوايي دهلیزونو له لارې په اساني سره د نورو هېوادنو ته صادرېږي.

نوموړي وايي، روان بهیر د ټولو روغتیايي سپارښتونو سره په پام کې ادامه لري.

سیمه ییز چارواکي: په ارزګان او کونړ کې ۷ پولیس وژل شوي

ارشیف

په ارزګان او کونړ ولایتونو کې ۷ افغان پولیس د وسله والو طالبانو بریدونو کې وژل شوي دي.

افغان چارواکي وایي، طالبانو تېره شپه په یادو ولایتونو کې د پولیسو پر پوستو ډله ییز بریدونه وکړل.

د ارزګان د والي ویاند زړګي عبادي وویل چې د دې ولایت په ترینکوټ ولسوالۍ کې د طالبانو سره د افغان پوځیانو برید یو ساعت دوام وکړ.

نوموړي د اوښتې مرګ ژوبلې په اړه وویل: "تېره شپه د یک لینګي او صوفیانو په سیمو کې وسله والو طالبانو د افغان امنیتي ځواکونو پر پوستو ډله ییز بریدونه کړي دي چې په نتیجه کې یې پنځه افغان سرتېري وژل شوي او پنځه نور پولیس ټپیان شول."

بلخوا د کونړ امنیه قومندان ډګروال محمد یوسف مظلومیار هم نن آزادي راډیو ته وویل چې په مرورې، غازي آباد او دانګام ولسوالیو کې دوه پولیس د افغان ځواکونو پر پوستو د طالبانو په بریدونو کې ووژل شول.

د دواړو ولایتونو چارواکو په دې پېښو کې وسله والو مخالفینو ته هم د مرګ ژوبلې اړولو خبر ورکړی، خو دقیقه شمېره یې نه ده ښودلې.

تر اوسه طالبانو د یادو پېښو په اړه تبصره نه ده کړې.

افغاني تولیدات په نړیوال انلاین بازار کې نندارې ته وړاندې شول

ارشیف

د افغانستان د صنعت او سوداګرۍ وزارت وايي، افغاني تولیدات نړیوال انلاین بازار کې نندارې ته وړاندې شول.

د دې وزارت د عامه اړیکو مسئول جواد دبیر نن ازادي راډيو ته وویل، دغې انلاین بازار ټولو شرکتونو ته یو ښه د بازار موندنې فرصت برابر کړی او له دې فرصت په استفادې دغه شرکتونه کولای شي خپل تولیدات نندارې ته وړاندې کړي.

د ښاغلي دبیر په خبره، دغه نندارتون د یو بهرني شرکت لخوا په لاره اچول شوی او افغان سوداګرو ته هم په کې د ګډون بلنه ورکړل شوې.

په هېواد کې د کرونا ویروس له خپرېدو وروسته د انلاین نندارتونو بازار هم ګرم شوی دی.

او نن د کابل په شهزاده سرای کې افغانۍ د څو بهرنیو اسعارو پروړاندې په دې ډول بدلېږي.

بامیان چارواکي: ۴۵ زره کورنۍ بېړنیو خوارکي توکو ته اړتیا لري

ارشیف

د بامیانو د اقتصاد ریاست وايي، په دې ولایت کې ۴۵ زره کورنۍ بېړنیو خوارکي توکو ته اړتیا لري.

د بامیانو د اقتصاد رئیس عزیز الله متین نن ازادي راډیو ته وویل، سږکال د کرنیزو محصولاتو تولید د پام وړ کم شوی او لاسي صنایع او همداراز یو شمېر نورو خصوصي سکټورنو هم خپل فعالیت د کرونا ویروس له امله کم کړی.

د خپاره شویو راپورونو له مخې په دې ولایت کې تر دا مهاله هېڅ یو تولیدی فابریکه شتون نه لري.

د دې ولایت اقتصاد ریاست چارواکي له افغان حکومت غوښتنه کوي چې په دې ولایت کې روان حالت ته جدي پاملرنه وکړي.

ښاغلی متین ګواښ کوي که بامیان ولایت ته جدي پاملرنه ونشي د هوا به سړېدو سره به د خلکو اقتصادي ستونزې نورې هم ډېرې شي.

عبدالله عبدالله پر فوزیې کوفي برید وغانده

عبدالله عبدالله

د افغانستان د ملي مصالحې د عالي شورا رئیس عبدالله عبدالله هغه څه غندلي چې د سولې د مرکچي پلاوي د غړې فوزیه کوفي د وژلو هڅه یې بللې ده.

ښاغلي عبدالله پر خپل ټویټر له حکومت غوښتي چې د دې پېښې عاملان دې پیدا کړي.

د طالبانو سره د بین الافغاني خبرو لپاره د حکومت د مرکچي پلاوي مشر محمد معصوم ستانکزي تېره شپه پر خپل ټویټر د اغلې کوفي د ټپي کیدو خبر ورکړ.

نوموړې ویلې، مېرمن کوفي تېر ماښام د کابل - پروان په لویه لاره د ناڅرګنده وسله والو په برید کې ټپي شوې ده.

تر اوسه چا د دې برید مسئولیت پر غاړه نه دی اخیستی.

د سولې د مرکچي پلاوي یو بل غړي باتور دوستم ویلي، د بشریت دښمنانو د میرمن کوفي د رسا غږ د خاموشه کولو قصد درلود.

د افغانستان د بشري حقونو د خپلواک کمېسیون ریسې شهرزاد اکبر هم ددې پېښې په اړه د څېړنو غوښتنه کړې.

نوموړې پر خپل ټویټر لیکلي: "دا ډول هدفي بریدونه، د سولې په بهیر کې د اعتماد فضا زیانمنولی شي."

دا پېښه په داسې حال کې رامنځته کېږي چې په نژدې ورځو کې د قطر په پلازمېنه دوحه کې بین الافغاني خبرې پیلېږي.

فوزیه کوفي په یوه وسله‌واله حمله کې ټپي شوه

فوزیه کوفي

د ولسي جرګې پخوانۍ استازې او د حکومت د سولې د مرکچي هیئت غړې فوزیه کوفي پرون په یوه وسله‌واله حمله کې ټپي شوه.

د افغانستان د سولې د مرکچي پلاوي مشر محمد معصوم ستانکزي تېره شپه پر خپل ټويټر ليکلي چې فوزيه کوفي تېر ماښام د پروان-کابل پر لاره د نامعلومو وسله‌والو کسانو په حمله کې ټپي شوې ده.

ښاغلی ستانکزی زياتوي چې مېرمن کوفي برسېرنه ټپي شوې او روغتيايي وضعیت‌يې ښه دی.

تر اوسه د دې پېښې مسؤلیت چا نه‌دی منلی.

افغان ځواکونو د ننګرهار ګوشتې ولسوالۍ کې پوځي تطبیقات وکړل

ارشیف، د افغان ځواکونو پوځي تطبیقات

د ننګرهار په ګوشتې ولسوالۍ کې د لوی درستیز ستر جنرال محمد ياسين ضياء په حضور کې پوځي تطبیقات وشول.

دغه تطبیقات د ګوشتې ولسوالۍ په «ګوڅړۍ» سیمه کې پرون جمعه شوي دي.

د ننګرهار ولایت مطبوعاتي دفتر په یوه خبرپاڼه کې ویلي، په دغو تطبیقاتو کې پلیو، کمانډو، ضربتي، پوله‌ساتو او هوايي ځواکونو برخه درلوده.

دا تطبیقات په داسې حال کې کېږي چې پرون په مرکز جلال‌اباد کې لسګونه مدني فعالانو او د دغه ښار اوسېدونکو د پاکستان خلاف لاریون وکړ.

دوی اعتراض درلود چې پر ډیورند کرښه د پاکستان له‌خوا اغزن سیم غځول شوی، د افغانستان په خاوره کې دننه تأسیسات جوړ شوي او تحرکات زیات شوي، خو حکومتي چارواکي چوپه خوله دي.

کاپیسا کې د ملي اردو د یوه کنډک قوماندان او دوه ساتونکي یې ووژل شول

د افغانستان په عمومي نقشه کې کاپیسا ولایت

په کاپیسا ولایت کې د ملي اردو د یوه کنډک قوماندان له خپلو دوو ساتونکو سره وژل شوی دی.

په پېښه کې چې پرون جمعه په تګاب ولسوالۍ کې شوې ده، څلور ملکیان ټپیان شوي دي.

د کاپیسا د امنیه قوماندانۍ ویاند عبدالشایق شورش پرون ناوخته ازادي راډیو ته وویل، لومړی وسله‌والو طالبانو د تګاب ولسوالۍ پر ودانۍ حمله وکړه چې وروسته د ملي اردو له مقاومت سره مخامخ شول.

ښاغلي شورش وویل چې دغې حملې څو ساعته دوام وکړ.

وسله‌والو طالبانو د دې پېښې په اړه څه نه‌دي ویلي.

د چلنج کپ د لومړۍ درجه مسابقو په لړ کې ننګرهار او فاریاب لوبې وګټلې

ارشیف

د کرکټ په ولایتي سیالیو کې د ننګرهار او فاریاب ولایتي لوبډلو بریاوې خپلې کړلې.

د چلنج کپ د لومړۍ درجه مسابقو په لړ کې درېیمه مسابقه پرون جمعه د ننګرهار او د میدان وردګ او څلورمه د فاریاب او کندهار لوبډلو ترمنځ وشوه.

د کرکټ بورډ ویاند فرید هوتک پرون ناوخته ازادي راډیو ته وویل: "ننګرهار او فاریاب لوبډلو بریاوې ترلاسه کړې دي. دا ۵۰ اووره لوبې دي. دغه لوبې په کرکټ کې د لوبغاړو د ودې او پرمختګ او په تخنیکي برخه کې د ښه‌والي لپاره یو ښه فرصت دی."

په پام کې ده نن شنبه د چلنج کپ لومړۍ درجه سیالیو په دوام په الف ډله کې د کابل او هلمند لوبډلې د بلخ او خوست کرکټ ټیمونو سره مخامخ شي.

په خوست ولایت کې دغه ۵۰ اووره مسابقې چې تر راروانې شنبې «۲۰۲۰ کال د اګسټ ۲۲» دوام کوي، د اتو ولایتي لوبډلو ترمنځ کېږي.

په پام کې ده پایلوبه یا نهايي مسابقه په کابل کې وشي.

بدخشان کې چاودنې د ملي اردو ۴ سرتېري ووژل

د افغانستان په عمومي نقشه کې بدخشان ولایت

د بدخشان امنیتي چارواکو ویلي د ملي اردو څلور سرتېري د ماین په یوه چاودنه کې وژل شوي.

د بدخشان د امنیه قوماندانۍ ویاند ثناالله روحاني ازادي راډیو ته وویل پېښه نن له غرمې مخکې شوې او دوه سرتېري په‌کې ژوبل شوي هم دي.

ښاغلی روحاني زیاتوي: "شاوخوا ۱۰ بجې د ملي اردو رنجر موټر غوښتل له فیض‌اباد ښاره ارګو ولسوالۍ ته لاړ شي چې د رېزکان کوتل په سیمه کې په ماین وربرابر شو. په چاودنه کې څلور د ملي اردو سرتېري وژل شوي او دوه نور یې ټپيان دي."

چا د دې برید مسؤلیت نه‌دی منلی. طالبانو هم تر اوسه په دې اړه رسنیو ته څه نه‌دي ویلي.

'د طالبانو له مړو سره د افغان پوځیانو پر ناوړه چلند' د یوناما اعتراض

یوناما

د ملګرو ملتونو مرستندویه مأموریت یوناما ویلي په خواله رسنیو د وېډیوګانو له مخې چې ظاهراً ښکاروي افغان پوځیان د طالبانو له مړو سره ناوړه چلند کوي، ډېر ټکان ورکوونکی دی.

یوناما پرون په خپل ټویټر زیاته کړې دا چې د افغانستان دفاع وزارت په دې اړه د تحقیقاتو د پيل خبره کړې هیله ده دا څېړنې چټکې او ازادې وي.

په افغانستان کې د ملګرو ملتونو مرستندویه مأموریت ټینګار کړی که چېرته جرم ثابت شي باید مجرمین وپېژندل شي او حساب کتاب ورسره وشي.

د افغانستان دفاع وزارت پرون اعلان وکړ په ټولنیزو شبکو کې د خپرې شوې وېډیو په اړه چې ظاهراً امنيتي سرتېري له نیول شویو جسدونو سره ناوړه چلند کوي، خبر شوي.

دفاع وزارت ویلي دا موضوع په جدي توګه څېړي او که ثابته شي دا د ملي اردو منسوبین دي د افغانستان له قوانینو سره سم به له سرغړوونکو سره چلند وشي.

د طالبانو ډلې هم د افغانستان د پوځ په لاس د خپلو جنګیالیو له مړو سره په ناوړه چلند جدي اعتراض کړی دی.

ولسمشر غني: د طالب وسله‌والو خوشې کول د ټولې نړۍ لپاره یو ګواښ دی

افغان ولسمشر محمد اشرف غني

افغان ولسمشر محمد اشرف غني د سولې د خبرو د یوې برخې په توګه د سلګونه طالب وسله‌والو خوشې کول د ټولې نړۍ لپاره یو ګواښ بللی دی.

ولسمشر غني پرون د امریکا متحده ایالاتو د بهرنیو اړیکو شورا له لوري په یوه جوړه شوې انلاین غونډه کې ګډون کړی او دا خبره‌یې یاده کړې ده.

ښاغلی غني زیاتوي: "لېست به احتمالاً موږ دواړو، تاسو او نړۍ ته خطر پېښ کړي. ځکه په دې لېست کې د مخدره موادو قاچاقبران او سخت مجرمین شامل دي، خو دا اقدام مو ضروري وباله او د لویې جرګې تر اجماع وروسته ما اړوند اسناد لاسلیک کړل."

ښاغلي غني زیاته کړې د سولې په ترلاسه کولو ټولو اجماع درلوده، نه‌یې د قیمت په اړه هغه بیه چې د ده په خبره لویه برخه‌یې ادا شوه.

د راپورونو په اساس د طالبانو له ۴۰۰ خوشې کېدونکو بندیانو یو ۱۵۰ په اعدام محکوم دي.

طالبانو ویلي د ۴۰۰ بندیانو په خوشې کېدو سره بین‌الافغاني خبرې کوي.

چارواکي: طالبانو ارزګان کې دوه ماشومانې نجونې وژلي

د ارزګان ترینکوټ ښار یوه برخه

د ارزګان امنیتي چارواکي پر وسله‌والو طالبانو تور لګوي چې د دې ولایت په مرکز ترینکوټ کې یې دوه ماشومانې نجونې وژلې دي.

د ارزګان امنیه قوماندان سمونوال شفیق‌الله سهار نن ازادي راډيو ته وویل چې وسله‌والو طالبانو پرون ماښام د مرکز ترينکوټ اړوند خانقاه سيمه کې هغه دوه ماشومانې نجونې په ډزو ووژلې چې په خپله ځمکه کې یې بادام ټولول.

ښاغلی سهار زیاتوي: "دا ماشومانې د بادامو ټولولو ته تللې وې چې ظالمانو انداخت پرې کړی او شهیدانې کړې یې دي. دوی نه ښځو ته ګوري نه ماشومانو ته، نه کشرانو او نه مشرانو ته."

د سمونوال سهار په وینا وژل شوې نجونې یوه اووه کلنه او بله نهه کلنه وه.

طالبانو تر اوسه په دې اړه څه نه‌دي ویلي.

شاهین قول اردو: فاریاب کې ۷ وسله‌والو مخالفینو ته مرګ‌ژوبله اوښتې

ارشیف، فاریاب کې د افغان ځواکونو عملیات

د افغانستان ۲۰۹ شاهین قول اردو وایي په فاریاب ولایت کې د افغان ځواکونو او طالبانو ترمنځ نښتو کې ۷ تنه وسله‌والو مخالفینو ته مرګ‌ژوبله اوښتې ده.

د دغه قول اردو ویاند محمد حنیف رضایي د پنجشنبې په ماښام ازادي راډیو ته وویل: "د ملي اردو یو اکمالاتي کاروان د فاریاب د مرکز میمنې ښار له کمپ څخه د خواجه سبز پوش پر لارې روان وو چې په لاره کې یې له وسله‌والو طالبانو سره جګړه ونښته. د یو ساعته جګړې پر مهال ۳ طالبان وژل شوي او ۴ نور ټپیان دي."

ښاغلي رضایي وویل په دې نښتو کې د ملي پوځ اکمالاتي کاروان ته زیان نه‌دی رسېدلی او په خوندي ډول تر خپل مقصده ورسېد.

وسله‌والو طالبانو تر اوسه د دې پېښې په اړه څه نه‌دي ویلي.

حمد الله محب: د دیني عالمانو امنیت د حکومت لومړیتوب دی

د افغانستان ملي امنیت سلاکار حمد الله محب

د افغانستان د ملي امنیت سلاکار وایي د هېواد د دیني عالمانو د امنیت ټینګښت د حکومت لپاره په لومړیتوبونو کې راځي.

حمد الله محب دا خبره د پنجشنبې په ورځ د دیني عالمانو د خوندیتوب کمېټې په لومړنۍ غونډه کې وکړه.

د ملي امنیت شورا په یوې خبرپاڼه کې د ښاغلي محب له قوله ویل شوي چې د دې کمېټې غونډې به په دوامداره توګه ترسره کېږي څو د دیني عالمانو د امنیت ټینګولو په اړه بحثونه وشي.

په خبرپاڼه کې دا هم ویل شوي چې دا کمېټه د افغانستان د ولسمشر محمد اشرف غني د سپارښتنې سره سم جوړه شوې ده.

په افغانستان کې د دیني عالمانو د خوندیتوب نشتوالي په اړه اندېښنې وروسته له هغه ډېرې شوې چې په جون میاشت کې په پلازمېنه کابل کې د وزیر محمد اکبر خان جومات ملا امام مولوي ایاز نیازی او د شېرشاه سوري جومات ملا امام عزیز الله مفلح په دوو جلا چاودنو کې ووژل شول.

د افغانستان د ملي امنیت شورا سلاکار ویلي چې د دغو پېښو په اړه هر اړخیزه ارزونه شوې، خو په اړه‌یې نور جزئیات نه‌دي ورکړي.

نور راوښيه

XS
SM
MD
LG