د لاسرسۍ وړ لېنکونه

تازه خبر
سه شنبه ۵ زمری ۱۴۰۰ کابل ۱۲:۰۸

افغانستان

د هند ۱۸ لویو کمپنیو دې ته زړه ښه کړی، چې په افغانستان کې پانګونه وکړي


افغان چارواکي وایي، چې د هند اتلسو ۱۸ لویو کمپنیو دې ته زړه ښه کړی چې په افغانستان کې پانګونه وکړي.

دغه کمپنۍ د هند صنعتي کانفدراسیون پورې تړاو لري او مسولین یې د یوه درې ورځني سفر لپاره کابل ته راغلي.

د افغانستان د سوداګرۍ وزیر انورالحق احدي د هیواد اوسني شرایط د پانګونې لپاره مناسب وبلل او له هندي سوداګرو یې وغوښتل چې د افغانانو د اقتصادي پرمختګ لپاره هڅې وکړي:

(په افغانستان کې د پانګونې وضیعت ډیر ښه دی، مونږ د سوداګرو د اندیښنو د لرې کولو لپاره ګړندۍ هڅې کوو.

مونږ ځينې سکتورونو مشخص کړي چې د پانګونې او سوداګرۍ فرصتونه ډیر ښه په کې مساعد دي.)

په کابل کې د هند سفیر ګاتم موکو فیدیا وایي چې په دې وروستیو کې د خپل هیواد ډیرې پانګونې افغانستان ته را جلب کړي او خپلې هڅې به همداسې ګړندۍ وساتي

د ورځې تازه خبرونه دلته ولولئ

طالبانو منلې چې لوګر کې یې یو ماشوم وژلی

د افغانستان په نقشه کې د لوګر ولایت

وسله والو طالبانو ومنله چې په لوګر کې یې یو ماشوم وژلی او یوه نجلۍ یې ټپي کړې ده.

دا پېښه وړمه ورځ ماسپښین مهال د لوګر ولایت د محمداغې ولسوالۍ په اړونده سیمه کې شوې ده.

نورالله چې د وژل شوي ماشوم د کاکا زوی دی، ازادي راډیو ته وویل چې نوموړی ماشوم هغه مهال د وسله والو طالبانو له لوري ووژل شو چې وسله والو طالبانو چک پاینټ اچولی و او پر دوی یې ډزې وکړې.

دی وایي، دوی لا هم نه پوهیږي چې ولې یې د کورنۍ غړي په نښه شوي دي، په داسې حال کې چې د خپلې کورنۍ هېڅ غړی یې دولتي او نظامي دنده نه لري.

د وسله والو طالبانو ویاند ذبیح الله مجاهد ازادي راډیو ته وویل چې ډزې کوونکی کس یې نیولی او دا مهال ترې څېړنې روانې دي.

د اوبو ملي اداره: ۹ ولایتونو کې پر۴۰  پروژو کار پیل شوی

ارشیف

دافغانستان د اوبو ملي اداره وایي، په ۹ ولایتونو کې تر ۴۰ زیاتو پروژو باندې کار پيل کړی.

د دغې ادارې ویاند نظام الدین خپلواک نن سې شنبه (د زمري په ۵مه) ازادي راډیو ته وویل چې دغه پروژې کوچني بندونه دي چې د ۱۸ میلیونه امریکایي ډالرو په ارزښت جوړیږي: "د اوبو مدیریت، د موسمي سیلابونو د کنټرول، د ځمکې لاندې اوبو د سرچینو پیاوړي کولو او خلکو ته د کاري زمینو پیدا کولو په هدف په ۹ ولایتونو کې جوړیږي."

د اوبو د زېرمه کولو دا کوچني بندونه په پنجشیر، پروان،تخار او یو شمېر نورو ولایتونو کې جوړیږي.

د دغو پروژو له لارې به سلګونو کسانو ته کاري زمینې برابرې شي. دغه پروژې به د نږدې یو کال په موده کې بشپړې شي.

د کرنې وزیر: افغانان د خوړو نه خوندیتوب په لومړی کرښه کې دي

د افغانستان د کرنې، اوبو لګولو او مالدارۍ وزیر انوارالحق احدي

د افغانستان د کرنې، اوبو لګولو او مالدارۍ وزیر وایي، افغانان د خوړو د نه خوندیتوب په لومړۍ کرښه کې دي.

انوارالحق احدي دا څرګندونې د افغانستان په استازولۍ، د ملګرو ملتونو د خوړو سیسټمونو 'UNFSS' په غونډه کې وکړې.

دغه غونډه پرون ناوخته په انلاین ډول جوړه شوې وه چې د افغانستان ترڅنګ ۱۱۱ نورو هېوادونو هم په کې ګډون کړی و.

ښاغلي احدي وویل، د لوږې کړکېچ د منځه وړلو لپاره تر ۲۰۳۰میلادي کاله پورې جدي هلو ځلو ته اړتیا ده.

د کرنې وزیر وویل چې افغانستان کې د وچکالۍ او جګړو له امله د بې وزلۍ او د خوړو نه خوندیتوب کچې د لوړېدا اندېښنې موجودې دي.

نوموړي دغه شان وویل چې افغان دولت د خپلو خلکو لپاره سالم او مناسبو خوړو تأمین ته ژمن دی او د خوړو د سټنډرډ کولو په پار، د نړیوالې ټولنې همکاري اړینه ده.

د شمېرو له مخې دا مهال شااوخوا ۱۳میلیونه افغانان د خوړو خوندیتوب نه لري.

دفاع وزارت: تخار کې د ۳ طالب قوماندانانو په ګډون ۲۸ وسله وال وژل شوي

ارشیف، افغان امنیتي ځواکونه

د افغانستان دفاع وزارت ادعا کوي چې تخار کې یې د طالبانو د درېیو مهمو قوماندانانو په ګډون د دې ډلې ۲۸ وسله وال وژلي دي.

د وزارت مطبوعاتي دفتر ویلي چې دغه شمېر طالبان تېره ورځ د دوی هوایي ځواکونو د تخار د مرکز اړوند خسپکه، چشمه شېر، ګاومالي او خطایان کلیو کې په نښه کړل.

وزارت د طالبانو وژل شوي ځایي قوماندانان کوچ بای، درویش او ابو داود بللي دي.

دفاع وزارت په یوه جلا خبرپاڼه کې ویلي چې ځواکونو یې د غزني مرکز اړوند ګنج نو اباد سیمه کې هم د حنظله په نوم د طالبانو یو مهم قوماندان له ۵ ملګرو سره وژلی دی.

طالبانو د دغو دواړو پیښو په اړه څه نه دي ویلي.

دفاع وزارت: د بلخ کلدار ولسوالۍ د۲۰ طالبانو په وژلو بېرته ونیول شوه

افغان امنیتي ځواکونه

د افغانستان دفاع وزارت وايي، د بلخ کلدار ولسوالۍ د شااوخوا شلو طالبانو په وژلو سره بېرته د افغان ځواکونو له خوا ونیول شوه.

د دفاع وزارت یوه ویاند فواد امان په خپل ټوېټر افغان پوځیانو د ولسي پاڅون په ملاتړ کلدار ولسوالي ازاده کړه.

هاخوا په بلخ کې د مېشتې شاهین ۲۰۹ قول اردو ویاند حنیف رضايي په دې اړه دوشنبه ماښام ازادي راډیو ته وویل: "د افغان امنیتي او دفاعي ځواکونو د عملیاتو په پایله کې چې د ولسي پاڅون همکاري هم ورسره وه شل وسله وال طالبان وژل شوي او ۱۶ تنه یې ټپیان دي. یو شمېر وسلې او مهمات یې هم افغان پوځیانو ته په لاس ورغلي. او د افغانستان دری رنګه بیرغ د کلدار ولسوالۍ په ټولو ولسوالیو باندې ودرول شو."

د طالبانو ویاند ذبیح الله مجاهد بیا ادعا کړې چې د کلدار په جوی جدید سیمه کې ۶ افغان عسکر د طالبانو له خوا وژل شوي او ۱۳ نور یې ژوبل دي.

د بلخ یو شمېر ولسوالۍ په وروستیو څو اوونیو کې د افغان پوځیانو او طالبانو تر منځ د سختو جګړو په نتیجه کې لاس په لاس شوي.

نی: کندهار کې نیول شوي خبریالان لا نه دي خوشې شوي

د کندهار ښار یوه څنډه

په کندهار کې د ازادو رسنیو د ملاتړ اداره نی وايي، د ملي امنیت له خوا نیول شوي خبریالان لا هم نه دي خوشي شوي.

د نی ادارې د کندهار څانګې مشر عبدالسمېع غیرتمل بېګا ازادي راډیو ته وویل چې څلور افغان خبریالان د طالبانو تر ولکې لاندې بولدک ولسوالۍ ته تللي وو چې د راستنېدو پر مهال ملي امنیت ونیول، خو د دوی له هڅو سره سره لا نه دي خوشې شوي.

غیرتمل زیاته کړه: "موږ که څه هم بار-بار غوښتنه وه، خو تراوسه پورې زموږ غوښتنو ته مثبت ځواب نه دی ویل شوی. نه هغه دلایل چې د ملي امنیت اداره یې لري موږ ته روښانه کوي چې په کوم دلیل باندې دوی نیول شوي دي. خو موږ به کوښښ وکړو چې د دوی چاره وکړو او را خوشې یې کړو."

د کندهار د ملي امنیت له خوا په نیول شوېو خبریالانو کې د ملت غږ په نوم د یوې راډیو درې خبریالان بسم الله وطندوست، قدرت سلطاني او مجیب عبیدي او د سینهوا یا د چین خبري اژانس عکاس ثناالله سیام شامل دي.

بسم الله وطندوست د سولې ولسي حرکت ویاند هم دی. دی مخکې د طالبانو له خوا هم د ځینو نورو ملګرو سره نیول شوی و.

ملت غږ راډیو په خپل فیسبوک لیکلي چې د کندهار د ملي امنیت ادارې ورته ویلي، دا خبریالان د امنیت شورا په امر نیول شوي هغه څه چې لا پرې افغان چارواکو تبصره نه ده کړې.

هاخوا د طالبانو د سیاسي دفتر ویاند محمد نعیم هم بېګا په خپل ټوېټر لیکلي، افغان حکومت دا خبریالان د دې لپاره نیولي چې د ده په خبره په حقایقو پسې ګرځېدل او د پېښو د سپیناوي کوښښ یې کاوه.

ملګرو ملتونه: د افغان سولې پروسه باید ګړندۍ شي

دوحه کې د طالبانو سیاسي استازي

ملګرو ملتونو ټینګار کړی چې د افغانستان د سولې پروسه باید ګړندۍ شي.

د افغانستان لپاره د ملګرو ملتونو د سرمنشي ځانګړې استازې ډیبرا لاینز پرون په دې تړاو په دوحه کې د افغان دولت د مرکچي پلاوي له مشر محمد معصوم ستانکزي سره خبرې کړي دي.

یوناما په خپل ټوېټر د اغلې ډیبرا لاینز په حواله لیکلي چې اسانچارۍ/منځګړیتوب د انتخابونو په شمول د دې اړتیا ده چې د افغانستان د سولې پروسه ګړندۍ شي او د ملګرو ملتونو سازمان په دې برخه کې له قطر سره کار کوي.

قطر د افغانستان د دولت او طالبانو د خبرو کوربه دی.

له اغلې لاینز سره په خبرو کې د افغان دولت د مرکچي ټیم مشر ښاغلي ستانکزي هم د اساسی قانون په چوکاټ کې د خبرو په اهمیت باندې ټینګار کړی دی.

افغان حکومت د پاکستان چترال ته د ۴۶ افغان پوځیانو د اوښتو راپورونه رد کړل

د افغانستان د وسله‌والو ځواکونو ویاند اجمل عمر شینواري

د افغانستان حکومت له کونړ څخه د پاکستان چترال سیمې ته د ۴۶ افغان پوځیانو د اوښتو راپورونه رد کړل.

د افغانستان د وسله‌والو ځواکونو ویاند اجمل عمر شینواري نن په یوه خبري غونډه کې په دې اړه راپورونه بې‌بنسټه وبلل.

دی وايي: "دا رښتیا نه‌ده چې زموږ پوځي پرسونل دې کوم هېواد ته پناه وړې وي، هغه هم پاکستان ته. هغه حساسیت چې د افغانستان خلک، په تېره زموږ پوځیان‌یې د پاکستان پر وړاندې لري ټولو ته ښکاره دی."

له دې مخکې د پاکستان پوځ په یوه بیان کې وویل چې د ۵ افسرانو په ګډون ۴۶ افغان پوځیانو ته‌یې پناه ورکړې ده. بیان زیاتوي چې دا سرتېري پرون شپه چترال ته واوښتل.

د کونړ د ولایتي شورا غړي شېر زمین خان ازادي راډیو ته وویل چې د سرحدي ځواکونو او ملي اردو دا سرتېري د کونړ ولایت له ناړۍ ولسوالۍ څخه د چترال ارندو سیمې ته اوښتي دي.

د پاکستان پوځ وايي، افغان پوځیانو ته‌یې ډوډۍ، استوګنځای او درمل برابر کړي دي.

د پوځ په بیان کې راغلي چې دا سرتېري به د لازمو پړاوونو له بشپړولو وروسته افغانستان ته وسپارل شي. له دې مخکې ۳۵ تنه نور افغان پوځیان هم له طالبانو سره د جګړې له لیکو څخه پاکستان ته تښتېدلي وو.

د هېواد پر یو شمېر سرحدي سیمو د طالبانو له ولکې وروسته سلګونه افغان سرتېري او دولتي مأمورین تاجکستان، ایران او پاکستان ته وتښتېدل.

افغان حکومت: له سقوط شویو ولسوالیو له ۳۰ زیاتې بېرته ونیول شوې

د افغان ځواکونو عملیات

افغان حکومت وايي، له سقوط شویو ولسوالیو یې تر دا مهاله له ۳۰ زیاتې بېرته نیولې دي.

د افغان وسله‌والو ځواکونو عمومي ویاند اجمل عمر شینواري د دوشنبې په ورځ «۱۴۰۰ کال د زمري ۰۴» په کابل کې رسنیو ته وویل، له هغې ورځې چې افغان امنیتي او دفاعي ځواکونو ته د یرغلیزو عملیاتو د پیل امر شوی له طالبانو یې دا ولسوالۍ بېرته نیولې دي.

شینواري وویل، سره له دې چې په ۲۵ ولایتونو کې جګړه روانه ده، خو په تېره یوازې یوه اوونۍ کې ۱۵۴ عملیات د افغانستان په ډېرو ولایتونو کې ترسره شوي چې په پایله کې یې نږدې ۱،۵۰۰ طالبان وژل شوي او شااوخوا ۱،۰۰۰ نور یې ټپان شوي دي.

دی زیاتوي: "افغان ملي پوځ د هوايي ځواک په برخه کې له پوره ملاتړه برخه‌من دی او د همدوی پر مټ مو له ۳۰ زیاتې ولسوالۍ تر دا مهاله نیولې دي او ډېر ژر به د نورو بریاوو خبرونه هم تر تاسو درورسېږي."

ښاغلی شینواری وايي، په تېره اوونۍ کې طالبانو ۱۴ ملکي کسان د هېواد په بېلابېلو سیمو کې وژلي او ۲۹ نور یې ټپیان کړي دي.

خو طالبان بیا دا ادعاوې ردوي. د دې ډلې ویاند ذبیح‌الله مجاهد ازادي راډيو ته په استول شوي پیغام کې ويلي، د دوی جنګیالي نه‌دي وژل شوي او دا تش په نوم تبلیغات دي.

ښاغلي شینواري د هغه ولسوالیو د شمېر په اړه څه ونه‌ویل چې د وسله‌والو طالبانو له لوري سقوط شوي، خو طالبانو له دې وړاندې رسنیو ته په استول شویو پیغامونو کې د شاخوا ۱۹۰ ولسوالیو د نیولو ادعا کړې.

دغه ډلې تازه د کونړ د ناړۍ ولسوالۍ د نیولو دعوه هم کړې ده. اخو افغان حکومت هم تازه د بلخ ولایت د کلدار ولسوالۍ د بېرته نیولو ادعا کړې ده.

دا په داسې حال کې ده چې په وروستیو کې د سختو جګړو له امله ګڼ شمېر ولسوالۍ د افغان ځواکونو او طالبانو ترمنځ لاس په لاس شوي.

د پاکستان پوځ وايي چترال سیمې ته اوښتو ۴۶ افغان پوځیانو ته‌یې پناه ورکړې

پاکستاني پوځیان او پولیس

د پاکستان پوځ هغو ۴۶ افغان پوځیانو ته پناه ورکړې چې د پاکستان چترال سیمې ته اوښتي وو.

د پاکستان پوځ په یوه بیان کې ویلي، د افغان پوځ ۴۶ سرتېري چې پنځه افسران هم په‌کې دي پرون شپه چترال ته واوښتل.

د کونړ د ولایتي شورا غړي شېر زمین خان ازادي راډیو ته وویل، د سرحدي ځواکونو او ملي اردو دا سرتېري د کونړ ولایت له ناړۍ ولسوالۍ څخه د چترال ارندو سیمې ته تښتېدلي دي.

د پاکستان پوځ وايي، افغان پوځیانو ته‌یې ډوډۍ، استوګنځای او درمل برابر کړي دي.

د پوځ په بیان کې راغلي چې دا سرتېري به د لازمو پړاوونو له بشپړولو وروسته افغانستان ته وسپارل شي. له دې مخکې ۳۵ تنه نور افغان پوځیان هم له طالبانو سره د جګړې له لیکو څخه پاکستان ته تښتېدلي وو.

د هېواد پر یو شمېر سرحدي سیمو د طالبانو له ولکې وروسته سلګونه افغان سرتېري او دولتي مأمورین تاجکستان، ایران او پاکستان ته وتښتېدل.

د ازادو رسنیو د ملاتړ اداره: د افغانستان ملي امنیت ادارې ۴ خبریالان نیولي

ارشیف، انځور تزئیني بڼه لري.

د ازادو رسنیو د ملاتړ اداره، نی وايي د افغانستان د ملي امنیت ادارې څلور خبریالان چې په کندهار کې د طالبانو تر ولکې لاندې سیمو ته د راپور برابرولو په مقصد تللي وو، نیولي دي.

په کندهار کې د نی مسؤل عبدالسمېع غیرتمل ازادي راډیو ته وویل چې دا خبریالان د طالبانو تر ولکې لاندې بولدک ولسوالۍ ته تللي وو چې د راستنېدو پر مهال ملي امنیت ونیول. ښاغلي غیرتمل وویل چې د دې خبریالانو د خوشې کولو لپاره هڅې روانې دي.

دی زیاتوي: "د ملي امنیت شورا ته خبر ورکړل شوی او خبرې ورسره روانې دي. موږ هڅه کوو چې ډېر ژر دا خبریالان راخوشې کړو او له امنیت شورا سره د دوی په اړه بحث او خبرې اترې وکړو."

نی وايي، په نیول شویو خبریالانو کې د ملت غږ په نوم د یوې سیمه‌ییزې راډیو درې خبریالان، بسم‌الله وطندوست، عبیدي او قدرت سلطاني دي او څلورم د چین د سینهوا خبري اژانس عکاس ثناءالله سیام شامل دي.

په افغانستان کې سلګونه جريبه کروندو ته اوبه برابرېږي

ارشیف

د افغانستان د کرنې، اوبو لګونې او مالدارۍ وزارت وايي، په افغانستان کې سلګونه جريبه کروندو ته اوبه برابرېږي.

د دې وزارت ویاند اکبر رستمي نن ازادي راډیو ته وویل، دغه وزارت هلې ځلې کوي او ټاکل شوې ده د دغو کروندو اوبه د ۴۵ زېرمو د جوړولو له لارې برابرې شي.

دغه زېرمې د لوګر، غزني، پکتيا، پکتيکا او د ميدان وردګو په ولايتونو کې جوړېږي.

د کرنې، اوبو لګولو او مالدارۍ وزارت وایي چې ټاکل شوې ده دغه زېرمې په راتلونکو درې مياشتو کې ګټې اخیستنې ته وسپارل شي.

وزارت وایي، د دغو زېرمو په ګټې اخیستنې سره به د بزګرانو په سلګونو جريبه کروندې خړوبه شي.

هره زېرمه به له ١٥ تر ١٨ جريبه کروندې خړوبه کړي.

دا په داسې حال کې ده چې د افغانستان یو شمېر ولایتونه وچکالۍ ځپلي او زیاتې کرنیزې ځمکې د شاړه کېدو له ګواښ سره مخ دي.

د افغانستان د تورغنډۍ بندر د سوداګريزو کاروانونو پر مخ پرانیستل شو

ارشیف

د افغانستان په لوېدیځ کې د تورغنډۍ بندر د سوداګريزو کاروانونو پر مخ پرانیستل شو.

د افغانستان د سوداګرۍ او پانګونې خونې مرستیال یونس مومند نن ازادي راډیو ته وویل چې دغه بندر د ترکمنستان هېواد او د افغانستان د چارواکو له پرله‌پسې غوښتنو وروسته تېره شپه ناوخته د سوداګريزو کاروانونو پر مخ پرانیستل شو.

ښاغلی مومند زیاتوي: "تر اوسه ۳۵ ټانکره تېل، ۲۲ موټره ګاز وارد شوي او نن احتمال شته چې ۱۳ واګونه اوړه، ۱۲ واګونه غنم هېواد ته وارد شي."

دغه بندر چې د افغانستان او ترکمنستان ترمنځ دی څو ورځې مخکې د وسله‌والو طالبانو د بریدونو په پایله کې د سوداګريزو کاروانونو پر مخ تړل شوی و.

دا په داسې حال کې ده چې د هېواد پر یو شمېر بندرونو د طالبانو بریدونو د خوراکي او سونګ توکو بیه لوړه کړې ده.

خو د افغانستان حکومت وايي چې ډېر ژر به د طالبانو ټغر په ټولولو سره یو شمېر هغه بندرونه چې تر اوسه د دغې ډلې په واک کې دي، د تجارتي کاروانونو پر مخ پرانیزي.

دا په داسې حال کې ده چې اوس هم د اوړو، غوړيو، وریجو، ګازو او تېلو بیه د هېواد په بازارونو کې لوړه شوې چې خلک‌يې اندېښمن کړي دي.

چارواکي: د بلخ کلدار ولسوالۍ د طالبانو له ولکې ازاده شوه

ارشیف، بلخ کې د افغان ځواکونو عملیات

د بلخ امنیتي چارواکي وايي، کلدار ولسوالۍ د طالبانو له ولکې ازاده شوه.

د بلخ د امنیه قوماندانۍ ویاند عادل شاه عادل نن ازادي راډیو ته وویل چې د دې ولسوالۍ مرکز نن غرمه د افغان ځواکونو د هوايي او ځمکنیو عملیاتو په ترڅ کې ونیول شو.

ښاغلی عادل زیاتوي: "افغان ځواکونه د وسله‌والو مخالفینو د حملو مخنیوي لپاره هلته دېره دي. زموږ هڅې روانې دي څو له لیرې پرتو سیمو هم د طالبانو پاتې شوني تصفیه شي."

د بلخ د پولیسو ویاند وویل چې په دې عملیاتو کې طالبانو ته درنه مرګ‌ژوبله اوښتې، خو هغه‌يې کره شمېره ونه‌ښوده. عادل زیاته کړه چې د کلدار ولسوالۍ د بېرته نیولو په عملیاتو کې افغان ځواکونو ته زیان نه‌دی اوښتې.

د بلخ له ۱۴ ولسوالیو څخه ۸ د طالبانو په ولکه کې دي.

طالبانو ویلي چې د کلدار ولسوالۍ په نښتو کې یې دولتي ځواکونو ته درنه مرګ‌ژوبله اړولې ده.

یوناما: که طالبان حملې بندې نه‌کړي، د ملکي تلفاتو شمېر به بې‌ساری لوړ شي

ارشیف، لوګر کې په یوې موټر بم چاودنه کې وژل شوي کسان

ملګري ملتونه خبرداری ورکوي چې که وسله‌وال طالبان خپلې حملې بندې نه‌کړي، نو په افغانستان کې به د ملکي تلفاتو شمېر په تېره یوه لسیزه کې بې‌سارې لوړې کچې ته ورسېږي.

په افغانستان کې د ملګرو ملتونو مرستندوی دفتر، یوناما په یوه خبرپاڼه کې چې نن د زمري په څلورمه نېټه خپره شوه د روان ۲۰۲۱ کال په لومړۍ نیمايي کې د افغانستان په جګړه کې د ملکي تلفاتو راپور خپور کړی او ویلي یې دي چې په تېره څه باندې یوه لسیزه کې چې په افغانستان کې خپل مأموریت پیل شوی، د یوه کال په ترڅ کې د ملکي تلفاتو اوسنۍ شمېره ښايي تر ټولو لوړه وي.

د یوناما په راپور کې راغلي چې د روان کال په لومړیو شپږو میاشتو کې د ۱،۶۵۹ په شاوخوا کې ملکي افغانان په جګړو کې وژل شوي او ۳،۵۵۴ نور ټپیان دي.

په راپور کې د نږدې ۴۰ فیصد ملکي تلفاتو پړه پر طالبانو، د نږدې ۹ فیصدو پر داعش ډلې او د ۱۶ فیصده نورو پړه د حکومت پر نامعلومو وسله‌والو مخالفینو اچول شوې. په راپور کې افغان ځواکونه او حکومت پلوي وسله‌وال په سلو کې د شااوخوا ۲۵ ملکي تلفاتو عاملان بلل شوي دي.

د راپور له خپرېدو سره په یوه وخت کې د یوناما مشرې دیبرا لاینز په یوه بیان کې ویلي چې که د تاوتریخوالي مخ په زیاتېدو بهیر ونه‌درول شي، نو په بې‌ساري شمېر ملکي افغانان به مړه او ټپیان شي.

خو افغان حکومت بیا په دې راپور کې د افغان امنیتي او دفاعي ځواکونو له‌خوا ملکیانو ته د اوښتو تلفاتو په اړه د دې راپور شمېرې رد کړې دي.

طالبانو دا راپور یو اړخیز بللی او ویلي یې دي چې په تېرو شپږو میاشتو کې د هېواد په یوه سیمه کې طالبانو ملکي وګړي په عمدي ډول نه‌دي زیانمن کړي او داسې حملې یې نه‌دي کړي چې د عامو خلکو د تلفاتو احتمال په‌کې وي.

نور راوښيه

XS
SM
MD
LG