د لاسرسۍ وړ لېنکونه

تازه خبر
چهارشنبه ۶ زمری ۱۴۰۰ کابل ۰۳:۲۸

افغانستان

د فراه په بالابلوک کې په یوې ترافیکې پیښه کې درې ته مړه شوي

د فراه په بالابلوک ولسوالۍ کې نن سهار په یوې ترافیکي پیښه کې درې تنه مړه او دیارلس نور ټپيان شول.

د فراه د والي ویاند عبدالرحمن ژوندی وایي، چې ټکر یوه مسافر وړونکي بس او لارۍ موټر کړی دی.

چارواکي د پيښې علت د موټر چلوونکي بې پروايي ښيي.

د ورځې تازه خبرونه دلته ولولئ

پکتیکا چارواکي: د طالبانو له لوري پر خښ شوي ماین ۴ ملکیان وژل شوي

د افغانستان په نقشه کې د پکتیکا ولایت

د پکتیکا امنیتي چارواکي وايي په دې ولایت کې د وسله والو طالبانو له لوري پر خښ شوي ماین څلور ملکیان وژل شوي، خو له افغان ځواکونو سره په جګړه کې ۶ وسله وال طالبان وژل شوي.

د پکتیکا د امنیه قوماندانۍ ویاند شاه محمد ارین نن له غرمې وړاندې رسنیو ته وویل چې د پکتیکا ولایت په مټاخان ولسوالۍ کې تېر ماښام په یوه سراچه ډول موټر چاودنه شوې چې په کې سپاره څلور کسان وژل شوي دي.

ارین وایي، وژل شوي ټول کسان ملکي وګړي دي او ماین د وسله والو طالبانو له لوري په عامه لاره کې ځای پر ځای شوی و

همدا راز د یوه بل خبر له مخې د پکتیکا په جاني خېلو ولسوالۍ کې د افغان ځواکونو او وسله والو طالبانو تر منځ جګړه شوې.

د امنیه قوماندانۍ ویاند شاه محمد ارین وایي، د افغان ځواکونو په ځوابي ډزو کې شپږ وسله وال طالبان وژل شوي او اته تنه ټپیان شوي دي.

د ارین په وینا په وژل شوېو کې یو پاکستانۍ هم شامل دی او د درېیو کسانو جسدونه د جګړې په ډګر کې پاتې دي.

وسله والو طالبانو تر اوسه د دې دواړو پېښو په اړه رسنیو ته څه نه دي ویلي.

خوست چارواکي: یوه کور کې یو شمېر وسلې، مهمات او ماینونه نیول شوي

خوست کې نیول شوي پوځي تجهیزات

د خوست د ملي امنیت منسوبینو تېره شپه د ګربزو ولسوالۍ د منګلو په کلي کې له یوه کوره یوه اندازه وسلې، مهمات، ماینونه او نور پوځي تجهیزات نیولي دي.

د ملي امنیت منسوبنیو نیول شوې وسلې، مهمات، ماینونه او نور پوځي تجهیزات د یاد ریاست په انګړ کې رسنیو ته وښودل.

نن چهارشنبه (د زمري په ۶مه) د خوست والي مهمند کټوازي ازادي راډیو ته وویل چې د یادو وسلو په تور یو کس هم نیول شوی چې دا مهال ورڅخه پوښتنې ګرویږنې روانې دي.

د ده په وینا په نیول شوېو وسلو او مهماتو کې ۴۰ ډوله بېلابېل پوځي تجهیزات شامل دي.

خوست والي وویل، د دوی کشفي او استخباراتي معلومات ښيې چې وسله وال مخالفین هڅه کوي، په خوست کې د قومونو او خلکو تر منځ اختلافات پیدا کړي او په واسطه يې دا ولایت نا امنه کړي.

خوست والي له خلکو وغوښتل چې د هر ډول ورانکارو عملونو په شنډولو او د پېښيدونکو مالي او ځاني زیانونو په مخنیوي کې دې له افغان امنیتي او دفاعي ځواکونو سره مرسته وکړي.

د خوست امنیتي ځواکونو یوه میاشت مخکې په ښار کې له ۴ ټنه چاودیدونکو توکو ډک موټر هم نیولي او شنډ کړي وو.

عمران خان: ګرانه ده چې طالبان سیاسي روغې جوړې ته اړ کړای شي

د پاکستان صدراعظم عمران خان

د پاکستان صدراعظم عمران خان وايي، اوس خورا ګرانه ده چې طالبان سیاسي روغې جوړې ته مجبوره کړل شي.

عمران خان له پي بي اېس نیوز ټلوېزیون سره په مرکه کې امریکا د افغانستان د حالاتو د خرابولو مسووله وبلله، ویې ویل، کله چې شااوخوا یو نیم لک امریکايي پوځیان په افغانستان کې مېشت وو، د سیاسي روغې جوړې امکان و، خو کله چې یې ۱۰ زره سرتېري وااېستل او د نورو د اېستلو مهالوېش یې اعلان کړ، طالبانو فکر وکړ چې جګړه یې ګټلې ده.

عمران خان وویل، اوس څوک طالبان سولې ته اړ اېستلی نه شي.

د افغانستان حکومت پاکستان د طالبانو په ملاتړ تورنوي او وايي چې په وروستیو کې له پاکستانه زرګونه طالبان او نور سخت دریځي د جګړې لپاره افغانستان ته وراوښتي دي.

خو عمران خان له پي بي ایس سره په مرکه کې دا تور بې اساسه وباله.

طالبان وايي، د قطر د دفتر یو پلاوی یې چین ته تللی

دوحه کې د طالبانو سیاسي استازي

طالبان وايي، د قطر د دفتر یو پلاوی یې له چینايي چارواکو سره د خبرو لپاره چین ته تللی دی.

د طالبانو د قطر د دفتر ویاند محمد نعیم ویلي چې د ملا عبدالغني برادر په مشرۍ د دوی نهه کسیز پلاوی له چینايي چارواکو سره د افغانستان پر اوسني وضعیت او د سولې پر پروسې خبرې وکړې.

د محمدنعیم په وینا طالب پلاوي چین ته ډاډ ورکړ چې د افغانستان له خاورې به د هېڅ هېواد پرضد کار نه اخیستل کېږي.

له بلې خوا رویټرز خبري اژانس د چین د بهرنیو چارو وزارت په قول راپور ورکړی چې د دغه هېواد د بهرنیو چارو وزیر وانګ يي نن چهارشنبه په تیان جین شمالي ولایت کې له طالب پلاوي سره وکتل.

برښنا شرکت:کابل او څو ولایتونو ته پرچاو شوې برښنا ترمیمیږي 

ارشیف، عکس تزئیني بڼه لري

د افغانستان د برښنا شرکت مسوولان وايي چې نن به کابل او څو نورو ولایتونو ته پرچاو شوې برښنا ترمیم شي.

د پروان ولایت د برښنا شرکت رييس روح الله ساجد ازادي راډیو ته وویل چې کابل، پروان او نورو ولایتونو ته د وارداتي برښنا ستنې د بغلان ولایت په کیله ګي سیمه کې ویجاړې شوې وې خو له پرون راهیسې د برښنا شرکت کار کوونکو د ستنو د ترمیم کار پیل کړی دی.

افغانستان ته له ازبیکستان او تاجکستان څخه وارداتي برښنا هر څه موده وروسته د جګړو یا د دولت د وسله والو مخالفانو د حملو له کبله پرچاو کېږي.

د امریکا د بهرنیو چارو وزیر له خپل هندي سیال سره ولیدل

د امریکا د بهرنیو چارو وزیر انتوني بلېنکن

د امریکا د بهرنیو چارو وزیر انتوني بلېنکن نن سهار له خپل هندي سیال اېس جې شنکر سره ولیدل.

دا د بهرنیو چارو د وزیر په توګه نوې ډېلي ته د بلېنکن لومړی سفر دی او تمه ده چې په ترڅ کې به یې د افغانستان د روان وضعیت، د کرونا ویروس ضد واکسین د تجهیزاتو او د هند د بشري حقونو پر اړوندو مسایلو خبرې وکړي.

تمه ده چې ښاغلی بلېنکن به وروسته د هند له صدراعظم ناریندر مودي سره هم وګوري او د افغانستان په اړه به خبرې ورسره وکړي.

پنټاګون: د طالبانو پر سنګرونو حملې زیاتې شوي

پنټاګون

پنټاګون په تېره یوه اوونۍ کې د طالبانو پر سنګرونو د حملو د زیاتېدو خبر ورکوي.

د پنټاګون یوه ویاند تورن جنرال رابرت لودویک تېر ماښام خبریالانو ته وویل چې دا حملې هم د عادي او متعارفو او هم د بې پیلوټه الوتکو په وسیله شوي دي خو په دې اړه یې نور جزییات ورنه کړل.

دا حملې د افغانستان په بېلابېلو سیمو کې شوي خو ډېر تمرکز یې د کندهار پر شااوخوا وو.

په منځني ختیځ کې د امریکا د پوځ د مرکزي قرارګاه عمومي قوماندان جنرال کنت مککنزي د یکشنبې په ورځ په کابل کې وویل، که طالبان خپلو حملو ته زور ورکړي نو امریکا به هم د افغان ځواکونو هوايي ملاتړ ته دوام ورکړي.

امریکايي چارواکو ویلي چې امریکايۍ الوتکې له بهره افغانستان ته راغلي او هوايي حملې یې کړي دي ځکه د امریکا پوځ خپلې جنګي الوتکې له افغانستانه ایستلي دي.

چارواکي: نامعلومو وسله والو د لوګر د عدلیې رئیس محمد ګل عالم وواژه

د لوګر د عدلیې رئیس محمد ګل عالم

نامعلومو وسله والو د لوګر ولایت د عدلیې رييس محمدګل عالم پرون مازدېګر په کابل کې وواژه.

د لوګر د والي ویاند دیدار لونګ ازادي راډیو ته وویل، محمدګل عالم کابل ته تللی و چې د دغه ښار په پنځمه ناحیه کې د نامعلومو وسله والو له لوري پرې ډزې وشوې او ووژل شو.

محمدګل عالم پخوا د پکتیکا د عدلیې رييس و او له تېرو دوو میاشتو راهیسې یې په لوګر کې د عدلیې د رييس په توګه دنده پیل کړې وه.

تراوسه پورې د دولت وسله والو مخالفانو د دې برید په اړه څه نه دي ویلي.

عمر: د 'خاشه ځوان' وژنه د طالبانو له خوا د عام وژنې څرګندونه ده

 د جمهوري ریاست د ستراتېژیکو او عامه اړیکو ادارې مشر وحید عمر

د طالبانو له خوا د خاشه ځوان په نوم د یوه کامیډین وژل کېدو پراخ عکس العملونه پارولي دي.

دفاع وزارت وايي، د خاشه ځوان په نوم تېره اوونۍ په ډنډ ولسوالۍ کې تر نیول کېدو وروسته ووژل شو، خو د هغه د نیول کېدو د شېبې یوه ویډیو پرون په ټولنیزو شبکو کې ډېره لاس په لاس شوه.

د جمهوري ریاست د ستراتېژیکو او عامه اړیکو ادارې مشر وحید عمر، ویلي، د خاشه ځوان وژل کېدل په افغانستان کې د طالبانو له خوا د عام­وژنې د کمپاین څرګندونه کوي.

وحید عمر له خلکو غوښتنه کړې چې په ټول هېواد کې له موجودو امکاناتو په استفاده خپل اواز اوچت کړي.

د ولسمشر لومړي مرستیال امر الله صالح په دې تړاو په ټویټر کې لیکلي، د طنز او انتقاد غلي کول په واقعیت کې د ټولنې د خاموشه کولو معنی لري، خو دا ټولنه به هېڅکله د ده په وینا کوم ظلم ته تسلیم نه شي.

د دفاع وزارت مرستیال ویاند فواد امان په ټویټر کې پر دې پېښه خواشیني ښوولې ده.

سویډن مېشتي افغانان نن د پاکستان سفارت مخې ته لاریون کوي

د ستاکهلم یوه څنډه

په سویډن کې مېشت افغانان په پام کې لري چې نن چهارشنبه په پلازمېنه ستاکهولم کې د پاکستان سفارت مخې ته لاریون وکړي.

د دغه لاریون یوه تنظیموونکي عنایت عادل، ازادي راډیو ته وویل، دوی به له پاکستانه وغواړي چې د طالبانو له ملاتړه لاس واخلي: "د لاریون هدف دا دی چې د پاکستان له حکومت او استخباراتي ادارې (ISI) وغواړو چې د طالبانو ملاتړ ونه کړي. د ترهګرو ملاتړ دې نه کوي او په افغانستان کې نیابتي جنګ بند کړي. له طالبانو هم غواړو چې افغان­وژنه بنده کړي او موږ سوله غواړو."

تردې مخکې د کابل تر څنګ، د امریکا په ځینو ښارونو، بریتانیا، بلجیم او نورو هېوادونو کې هم د پاکستان د سفارتونو مخې ته دغسې لاریونونه شوي دي.

د لاریون برخوالو پاکستان د وسله والو طالبانو په ملاتړ تورن کړی او په اسلام اباد کې یې د افغان سفیر د لور سلسلې علیخېل د تښتونې او ربړونې پېښه یې غندلې ده.

سلسله علیخېل د چنګاښ/سرطان پر ۲۵مه وتښتول شوه چې تر څو ساعته برمتې او ربړونې وروسته خوشې شوه.

ډیبرا لاینز عبدالله عبدالله سره د سولې پروسې پر ګړندي کېدو خبرې وکړې

د یوناما مشره ډیبرا لاینز د ملي مصالحې عالي شورا له رییس عبدالله عبدالله سره

د یوناما مشرې د ملي مصالحې عالي شورا له رئیس سره د سولې پروسې پر ګړندي کېدو خبرې وکړې.

ډیبرا لاینز او عبدالله عبدالله پرون په سپیدار ماڼۍ کې په دې کتنه کې د افغانانو د خوندیتوب لپاره د سولې پر داسې موافقه ټینګار وکړ چې د منځګړو په مرسته ورباندې مذاکرې شوې وي.

یوناما په یوه ټویټ کې ویلي، په دې کتنه کې په دوحه کې د دولت او طالبانو د هیئتونو د وروستیو مذاکرو په باب هم خبرې وشوې.

د دولت او طالبانو مذاکراتي ډلو د جولای میاشتې پر اولسمه او اتلسمه په لوړه کچه دوه ورځني مذاکرات وکړل، خو له کومې څرګندې نتیجې پرته پای ته ورسېدې.

د افغان دولت د هیئت مشري د ملي مصالحې مشر عبدالله عبدالله او د طالبانو مشري ملا عبدالغني برادر کوله.

انتوني بلېنکن د هند له لوړ-رتبه چارواکو سره پر افغانستان غږیږي

د امریکا د متحدو ایالاتونو د بهرنیو چارو وزیر انتوني بلېنکن

ټاکل شوې د امریکا د متحدو ایالاتونو د بهرنیو چارو وزیر انتوني بلېنکن، نن چهارشنبه د هند له لوړ-رتبه چارواکو سره د افغانستان پر موضوع خبرې وکړي.

بلېنکن چې پرون سې شنبه هندوستان ته ورسېد نن له صدراعظم ناریندرا مودي او د بهرنیو چارو وزیر اېس. جې شنکر سره ګوري.

په داسې حال کې چې بهرني ځواکونه له افغانستانه په وتلو دي، نوي ډیلي په وروستیو کې د طالبانو له خوا د زیاتو سیمو د لاندې کولو په اړه اندېښنه ښوولې ده.

هندوستان چې د افغان دولت له عمده ملاتړو څخه ګڼل کېږي، د ناامنیو له زیاتېدو سره جوخت په کندهار کې د خپلې قونسلګرۍ ۵۰ کارکوونکي وایستل.

بلېنکن به تر دغه سفر وروسته کویټ ته ځي.

راشد خان د ۱۰۰ توپونو په لوبه کې غوره لوبغاړی اعلان شو

د افغانستان کرکټ ملي لوبډلې لوبغاړی راشد خان

افغان لوبغاړی راشد خان د ۱۰۰ توپونو په لوبه کې غوره لوبغاړی اعلان شو.

د افغانستان د کرکټ ملي لوبډلې پياوړي لوبغاړي راشد خان تېره شپه د روکېټس لوبډله بریالۍ کړه او غوره لوبغاړی شو.

دا لوبه د ناردرن سوپر چارجرز او ټرینټ روکېټس لوبډلو ترمنځ ترسره شوه.

ناردرن سوپر چارجز په ۹۹ توپونو کې ټول لوبغاړي له لاسه ورکړل او ۱۳۲ منډې یې وکړې.

د ټرینټ روکېټس لوبډلې په ۹۴ توپونو د ۸ لوبغاړو په سوځېدو ټاکل شوی هدف پوره کړ او بریا یې خپله کړه.

راشد خان د ۳ لوبغاړو په سوځولو او ۲۵ منډو په ترسره کولو غوره لوبغاړی شو.

هنګري: که طالبان افغانستان کې واکمنان شي، ډېر افغانان به خپل کورونه پرېږدي

د هنګري د بهرنیو چارو وزیر پیتر سیارتو

د هنګري د بهرنیو چارو وزیر پیتر سیارتو وایي، که طالبان په افغانستان کې واکمنان شي، ډېر افغانان به خپل کورونه پرېږدي.

ښاغلي سیارتو پرون دا خبره په یوه خبري غونډه کې په استانبول کې وکړه.

ده وویل: "د ناټو پرېکړه چې له افغانستانه وځي د کډوالۍ د نوي موج سبب کېدای شي. که طالبان پر افغانستان مسلط شي، نو ډېر افغانان به خپل کورونه پرېږدي. زموږ د استخباراتي افسرانو د راپورونو له مخې، په زرګونه افغانان هره ورځ خپل کورونه پرېږدي، کله چې موږ نقشې ته ګورو نو داسې انتظار کوو چې د مهاجرینو تازه موج به ډېر ژر ترکیې ته ورسېږي."

سیارتو زیاته کړه چې دا کډوال به له ترکیې د هنګري په ګډون نورو هېوادو ته ځانونه ورسوي.

وروسته تر دې چې د مې په میاشت کې په افغانستان کې د پاتې امریکایي او ناټو ځواکونو وتل پيل شول، په دې هېواد کې شخړې د پام وړ زیاتې شوې دي.

د چارواکو په وینا په دې څو میاشتو کې په زرګونه کورنۍ د افغانستان دننه بې‌ځایه شوې دي او مجبوره شوې دي چې خپل کورونه پرېږدي.

د کاپیسا چارواکي: نجراب ولسوالۍ کې ۲۵ طالبان ووژل شول

ارشیف، کاپیسا کې د افغان ځواکونو عملیات

د کاپیسا امنیتي چارواکي وایي چې په نجراب ولسوالۍ کې یې ۲۵ طالبان وژلي دي.

د کاپیسا د امنیه قوماندانۍ د رسنیو د برخې مسؤل عبدالشایق شورش ازادي راډیو ته وویل چې طالبانو تېره شپه د یولس نیمو بجو خوا ته د فرخ شاه پر دره حمله وکړه چې په ځوابي برید کې ۲۵ طالبان ووژل شول او ۱۵ تنه‌یې ټپیان شول.

د ښاغلي شورش په وینا د دې جګړې پر مهال څلور تنه افغان ځواکونه او دوه ملکیان هم وژل شوي دي.

طالبانو په دې اړه څه نه‌دي ویلي.

نور راوښيه

XS
SM
MD
LG