د لاسرسۍ وړ لېنکونه

تازه خبر
یکشنبه ۱۰ زمری ۱۴۰۰ کابل ۱۱:۵۷

افغانستان

په پنجوايي کې د ۱۶ ملکي افغانانو په وژنه تورن امریکايی سرتېری یوې صحي معاینې ته معرفي شوی

د راپورونو له مخې د کندهار په پنجوايي ولسوالۍ کې د شپاړلسو ملکي افغانانو په وژنه تورن امریکايی سرتېری یوې صحي معاینې ته معرفي شوی دی.

دا معاینه پرون پیل شوه او ټاکل شوې چې د مې میاشتې تر لومړۍ نېټې پورې دوام وکړي. رویټرز خبري آژانس د پوځي سرچینو په حواله چې نوم یې نه دی اخیستی راپور ورکړی چې له دې معاینې وروسته به معلومه شي چې آیا د امریکا د پوځ بریدګی رابرت بېلز د جنایت د سرته رسولو پرمهال له ذهني پلوه روغ و کنه او آیا له صحي پلوه د محاکمې وړ دی کنه.

نه دېرش کلن رابرت بېلز تورن دی چې تېرکال د مارچ د یوولسمې نېټې په سهار وختي یې د پنجوايي ولسوالۍ په دوو کلیو کې شپاړس ملکي کسان په دوو حملو کې وژلي او شپږ نور یې ټپیان کړي دي.

څارنوالانو د بېلز لپاره چې په افغانستان او عراق کې د څلورو جګړو ګډونوال دی، د اعدام سزا غواړي او وايي چې نوموړي په عمدي قتلونو لاس پورې کړی. بېلز تراوسه د ځان دفاع نه ده کړې خو تمه ده چې د ده د رواني حالت څرنګوالی به پر ده د حکم په صادرولو کې اساسي ونډه ولري.

د ورځې تازه خبرونه دلته ولولئ

بندرونو کې ناامنۍ؛ الکوزی: په وارداتو کې ۱۰ سلنه کموالی راغلی

د افغانستان د سوداګرۍ خونو فدارسیون

د افغانستان د سوداګرۍ خونو فدارسیون وايي، په بندرونو کې د ناامنیو له امله د تېر لمریز کال د همدې مودې پرتله په وارداتو کې لس سلنه کموالی راغلی دی.

د دغه فدارسیون مرستیال خان جان الکوزي نن یکشنبه (د زمري ۱۰مه) ازادي راډیو ته وویل، ځینې سوداګریز بندرونه د طالبانو لاسونو ته لوېدلي، که څه هم صادارت او واردات ورنه کېږي، خو له سوداګریزو مالونو دوه ځایه محصول اخیستل کېږي، یو ځای حکومت او بل ځای یې هم طالبان اخلي.

الکوزي زیاته کړه: "د ناامنیو له امله په وارداتو کې لس سلنه کمښت راغلی، پخوا به چې پنځوس سوداګریز واګونونه افغانستان ته راتلل، خو اوس ایله شل او یا دریش راځي."

ښاغلی الکوزی زیاتوي، دا چې اوس د مېوې موسم دی، نو د تېرکال د همدې مودې پرتله یې په صادراتو کې پنځلس سلنه زیاتوالی راغلی.

دا په داسې حال کې ده چې د راپورونو پر بنسټ په دې وروستیو کې شپږ لوی بندرونه د طالبانو لاسونو ته لوېدلي چې د افغانستان د مالیې وزارت وايي، له دې سره د دولت په عوایدو کې کموالی راغلی دی.

طالبانو ويلي چې د دوی تر ولکې لاندې ګمرکونو کې عواید د طالبانو د تعرفو پر بنسټ ټولېږي، خو د دوی په خبره شخصي جېبونو ته نه بلکې بیت المال ته سپارل کېږي.

تېره اوونۍ د افغانستان دفاع وزارت ازادي راډيو ته ویلي وو چې د مهمو بندرونو او ستراتیژيکو سیمو د بېرته نیولو لپاره عملیاتي پلان چمتو شوی، خو د ملکي تلفاتو د مخنیوي لپاره دا عملیات په احتياط روان دي.

چارواکي: پکتیا کې د زعفرانو ۲۱ ننداریزې کروندې جوړېږي

ارشیف، د افغانستان زعفران

د افغانستان د کرنې، مالدارۍ او اوبو لګولو وزارت وايي، په پکتیا ولایت کې د زعفرانو ۲۱ ننداریزې کروندې جوړېږي.

د دغه وزارت ویاند اکبر رستمي نن یکشنبه (د زمري ۱۰مه) ازادي راډیو ته وویل چې یادې ننداریزې کروندې به په مرکز، احمد ابا، سیدکرم، شواک، ګرده څېړۍ او وزې ځدراڼ ولسواليو کې د زعفرانو د تولید د زیاتوالي او دودولو په موخه جوړ شي.

د نوموړي په وینا د یادو سیمو بزګرانو ته د زعفرانو د پیازو د وېش لړۍ هم پیل شوې چې هر بزګر ته ۵۰۰ کیلو د زعفرانو تخم ورکول کېږي.

د کرنې وزارت چارواکي وايي، زعفران په لږه ځمکه کې ډېر حاصل ورکوي، د اوبو اړتیا يې کمه، کرنیزې چارې یې اسانه او د پکتیا اقلیم ورته ښه مناسب دی.

د زعفرانو د کر برخه کې دا هڅونې داسې مهال دي چې روان کال د دویم ځل لپاره افغان زعفرانو د کیفیت له پلوه په نړۍ کې لومړی مقام خپل کړ.

د کندهار پر هوايي ډګر تېره شپه راکټونه لګېدلي

د کندهار د احمدشاه بابا هوايي ډګر

د کندهار پر احمدشاه بابا هوايي ډګر تېره شپه څو راکټونه ولګېدل. لومړني راپورونه وايي چې د راکټونو د لګېدو له کبله مرګ ژوبله نه ده پېښه شوې.

د احمدشاه بابا هوايي ډګر ريیس مسعود پښتون فرانس پرېس خبري اژانس ته ویلي چې دوه راکټونه د هوايي ډګر پر ځغاستلیکې لګېدلي او له کبله یې ټولې الوتنې لغوه شوي دي.

ده په عین حال کې ویلي چې د ځغاستلیکې د بېرته جوړولو کار پیل شوی او تمه لري چې نن ورځ به بشپړ شي.

کندهار په وروستیو ورځو کې د خونړیو نښتو په میدان بدل شوی چې له کبله یې زرګونه کورنۍ بې ځایه کېدو ته مجبوره شوې دي.

د هرات ښار ته نژدې بیا جګړې شوي

ارشیف، هرات ښار

افغان امنیتي ځواکونو او وسله والو طالبانو پرون شنبه(د زمري ۹مه) یو وار بیا د هرات ښار ته نژدې جګړو ته دوام ورکړ.

تردې یوه ورځ وړاندې یعنې د جمعې په ورځ هم طالبانو د هرات ښار تر لمنو پرمختګ کړی و، خو امنیتي ځواکونه وتوانېدل چې دا ډله شاتګ ته اړ باسي.

د طالبانو ویاند ذبیح الله مجاهد ازادي راډیو ته ویلي چې پرونۍ حملې یې د حکومتي ځواکونو د هغو بریدونو په ځواب کې وکړې چې د طالبانو پر ساحو یې کړې وې.

راپورونه وايي چې د کندهار ښار په ځینو حوزو کې هم خونړۍ جګړه دوام لري.

طالبانو پرون د هلمند ولایت د مرکز لښکرګاه ښار مرکزي برخو ته د لنډ وخت لپاره پرمختګ وکړ، خو وروسته وځپل شول.

دفاع وزارت: بلخ کې د طالبان د جلب او جذب مسول ونیول شو

نیول شوي کسان

د افغانستان دفاع وزارت وایي چې د بلخ په کلدار ولسوالۍ کې یې د طالبانو د جلب او جذب مسول او دوه مسلکي ماین جوړونکي نیولي دي.

دغه وزارت تېرماښام په یوه خبرپاڼه کې د طالبانو نیول شوی مسول عبدالقادر یاد کړی دی.

خبرپاڼه کې راغلي چې له دې کسانو سره یوه اندازه چاودیدونکي توکي هم نیول شوي دي.

طالبانو بیا له ازادي راډيو سره په خبرو کې دا ادعا رد کړې او ویلي یې دي چې کلدار ولسوالۍ کې یې کوم مسول نه دی نیول شوی.

د نورستان والي وايي، نن یکشنبه سیلاب ځپلو ته مرستې رسېږي

نورستان کې سیلاب ځپلي

د نورستان والي وایي، نن یکشنبه (د زمري ۱۰مه) سهار به د کامدیش ولسوالۍ د میردیش سیمې سیلاب ځپلو ته مرسته ور ورسېږي.

حافظ عبدالقیوم تېر ماښام ازادي راډيو ته وویل چې کامدیش کې سېلابونو ۱۱۳ تنه وژلي ۱۷ یې ټپیان کړي او پر دې سربیره یې خلکو ته دروند مالي زیان اړولی دی: "۱۷۳ کورونه مکمل تخریب شوي دي، ۱۲ کیلو متره سړک هم تر اوبو لاندې شوی او ۱۱ سوه جریمه زراعتي ځمکه تخریب شوې. موږ له زیانمنو شویو سره په لومړي پړاو کې عاجلې خوراکي او غیرخوراکي مرستې کوو."

دغې سیمه کې تېره چهارشنبه سیلابونه راووتل.

طبیعي پیښو ته د رسیدو په چارو کې د دولت وزیر غلام بهاوالدین جیلاني پرون ازادي راډیو ته وویل چې د طالبانو د حضور له کبله سیلاب ځپلو ته مرسته کوونکي ټیمونه نه دي ور رسیدلي.

له دې وړاندې بیا طالبانو ژمنه کړې وه چې سیلاب ځپلو ته د مرستو لپاره لارې خلاصې دي.

د لوړو زده کړو وزارت او د بشري حقونو کمېسیون ترمنځ یوه هوکړه وشوه

دا هوکړه د لوړو زده کړو د وزیر عباس بصیر او د بشري حقونو د مشرې شهرزاد اکبر له خوا لاسلیک شوه. 

د افغانستان د لوړو زده کړو وزارت او د بشري حقونو خپلواک کمېسیون تحصیلي نصاب کې د بشري حقونو د شمولیت په اړه یوه هوکړه لاسلیک کړه.

د لوړو زده کړو وزارت په اعلامیه کې راغلي چې دا هوکړه پرون شنبه (د زمري ۹مه) د لوړو زده کړو د وزیر عباس بصیر او د بشري حقونو د مشرې شهرزاد اکبر له خوا لاسلیک شوه.

خبرپاڼه کې راغلي چې له دې سره به په هېواد کې د بشري حقونو د ارزښتونو پوهاوي او تطبیق ته ښه زمینه برابره شي.

د بشري حقونو خپلواک کمېسیون هم دا کار ګټور بللی او ویلي یې دي چې د بشري حقونو معنی لرونکو ارزښتونو ته لاره هواروي.

خبرپاڼه کې د هوکړې د عملي کولو پر لارو چارو جزیات نه دي ورکړل شوي.

ترکیه: که افغان دولت موافق وي د کابل هوایي ډګر مدیریت ته چمتو یو

د کابل هوايي ډګر

د ترکیې د دفاع وزیر حلوسي اکار وایي، که د افغانستان دولت ورسره موافقه وکړي، هېواد یې چمتو دی چې د کابل هوایي ډګر د مدیریت مسولیت واخلي.

اکار دا څرګندونې پرون له خپل افغان سیال بسم الله محمدي سره د ټیلیفوني خبرو پر مهال وکړې.

په انقره کې د افغانستان د سفارت له خوا خپره شوې خبرپاڼه کې راغلي چې د ترکیې د دفاع وزیر د افغان ځواکونو د ملاتړ او روزنې لپاره هم چمتوالی ښودلی دی.

ترکیه غواړي د بهرنیو ځواکونو له وتلو وروسته کابل کې د حامد کرزي نړیوال هوایي ډګر د کنټرول مسولیت واخلي، خو طالبانو ورسره کلک مخالفت وښود.

د طالبانو له مخالفت وروسته ترکي ولسمشر رجب طیب اردغان وویل چې په دې اړه له ښکېلو خواوو سره خبرې کوي، خو تر اوسه د کومې وروستۍ پرېکړې څرک نه لګېږي.

جلال اباد کې نامعلومو وسله والو ۳ تنه وژلي

د جلال اباد ښار عمومي منظره.

په تېرو شااوخوا ۴۰ ساعتونو کې په جلال اباد ښار کې درې تنه د نامعلومو وسله والو له خوا په ډزو وژل شوي او دوه تنه ټپیان شوي دي.

نن هم د جلال اباد په کهنه فروشۍ سیمه کې په ډزو یو تن ووژل شول او دوه لارویان ټپیان شول.

د والي ویاند عطا الله خوګیاڼي په دې اړه زیات جزییات نه دي ورکړي، خو ویلي یې دي چې وژل شوی کس امنیتي او ټپیان شوي کسان ملکیان دي چې عاملان یې تښتېدلي خو د نیولو هڅې یې روانې دي.

همداشان تېره او وړمه ورځ هم د جلال اباد ښار په دوو جلا پېښو کې دوه تنه چې یو یې انجینر و، د نامعلومو کسانو له خوا په ډزو وژل شوي دي.

د دې پېښو په تړاو بیا له هڅو سره-سره ځایي چارواکو او امنیتي مسؤلانو معلومات نه دي شریک کړي او نه یې هم په تړاو څوک نیول شوي دي.

د دې پېښو مسؤلیت هم تر دې دمه چا نه دی منلی.

۲۰۹ شاهین قول اردو: بلخ کې ۱۵ طالبان وژل شوي

ارشیف، عکس تزئیني بڼه لري

په بلخ ولایت کې ۲۰۹ شاهین قول اردو په هوايي حملو کې د ۱۵ وسله والو طالبانو د وژل کېدو خبر ورکړ.

د دې قول اردو ویاند حنیف رضايي، نن شنبه (د زمري ۹مه) ازادي راډیو ته وویل، دغه حملې نن په چمتال ولسوالۍ کې شوي دي: "پنځلس تروریست طالبان وژل شوي، ۱۱ عرادې موټرسایکلونه او اووه بېلابېل ډوله وسلې او قرارګاه یې کاملاً له منځه وړل شوي دي."

وسله والو طالبانو په دې اړه څه نه دي ویلي.

راپورونه وايي، د چمتال په ګډون د بلخ ولایت اته ولسوالۍ دا مهال د وسله والو طالبانو په کنټرول کې دي.

د نورستان والي وايي، سېلابونو کې د مړو شمېر ۱۱۳ ته زیات شوی

نورستان کې راوتلي سیلابونه

د نورستان والي وايي، په وروستیو سېلابونو کې د مړو شمېر ۱۱۳ ته زیات شوی دی.

حافظ عبدالقیوم نن ازادي راډیو ته وویل، دغو سېلابونو په کامدېش ولسوالۍ کې د سر او مال درانه زیانونه اړولي: "اخري ګزارش کې ۱۱۳ کسان شهیدان شوي،۱۷ ټپیان دي،۱۷۳ کورونه مکمل ویجاړ شوي،۱۲ کیلو متره سرک هم بشپړ تخریب شوی دی،۱۱۰۰ جریبه ځمکه ۱۷ ژرندې ویجاړې شوي دي."

د نورستان والي وایي، په سېلابونو کې د برښنا د تولید فابرېکې او نورې ټولګټې پروژې هم ویجاړې شوي دي.

تر دې مخکې په سېلابونو کې د مړینو شمېر ضد و نقیض ښوول شوی و.

د تخار چارواکي: د تالقان اړوند شااوخوا ۲۰ کلي له طالبانو پاک شوي

تخار کې امینتي ځواکونه

د تخار ولایت امنیه قومانداني وايي، د مرکز تالقان اړوند شااوخوا ۲۰ کلي له وسله والو طالبانو تصفیه شوي او حملې یې په شا تمبول شوي دي.

د امنیې قوماندانۍ ویاند خلیل اسیر وویل، د امنیتي ځواکونو په پرونیو عملیاتو کې چې ولسي پاڅونوالو یې هم مرسته کوله، د تالقان شااوخوا ۲۰ کلي له وسله والو تصفیه شوي دي.

ښاغلی اسیر وايي، وسله والو طالبانو تېره شپه هم د تالقان پر ځینو حوزو او سیمو حملې پلان کړې وې چې شنډې کړای شوي دي، خو وسله والو طالبانو دا موضوع رد کړې ده.

په وسله والو نښتو کې د یوه پاڅونوال د وژل کېدو او درېیو نورو د ټپي کېدو خبر ورکړل شوی دی.

جرمني کې لسګونه افغانانو د پاکستان قونسلګرۍ مخې ته لاریون کړی

فرانکفورت کې راوتلی لاریون

د جرمني په فرانکفورت ښار کې پرون ناوخته په لسګونو افغانانو د پاکستان د قونسلګرۍ مخې ته لاریون وکړ.

د لاریون یوه تنظیموونکي خالد یوسفي، د دې حرکت د موخې په اړه ازادي راډیو ته وویل: "لومړۍ موخه مو دا وه چې د افغانستان له ملي اردو او جمهوري نظامه خپل ملاتړ څرګند کړو. دویمه موخه مو دا وه چې د پاکستان لاسوهنه او دوه مخیتوب وغندو او خلکو ته یې ښکاره کړو."

پاکستان تردې مخکې د طالبانو د ملاتړ تورونه رد کړي او ویلي یې دي، د افغانستان جګړې اسلام اباد هم اغېزمن کړی دی.

بل خوا ټاکل شوې سبا یکشنبه (د زمري پر لسمه) د فرانسې په پلازمېنه پاریس کې هم په لسګونو افغانان د ایفل ټاور مخې ته لاریون وکړي.

په دغو لاریونونو کې برخوالو وسله وال طالبان تورن کړي چې د پاکستان په همکارۍ یې په افغانستان کې خپلې جګړې شدیدې کړي دي.

تر دې مخکې د کابل تر څنګ د امریکا د متحدو ایالاتونو په څو ښارونو، بلجیم، بریتانیا او نورو هېوادونو کې هم ورته لاریونونه شوي دي.

چارواکي: په لوګر کې د هندواڼو حاصلات لس سلنه زیات شوي

ارشیف،عکس تزئیني بڼه لري

د افغانستان د کرنې، اوبو لګولو او مالدارۍ وزارت وايي، روان کال په لوګر ولایت کې د هندواڼو حاصلات لس سلنه زیات شوي دي.

د دغه وزارت ویاند اکبر رستمي ازادي راډيو ته وویل چې روان کال دغه ولایت کې په ۳۵۷ هکتاره ځمکه کې هندواڼې کرل شوي چې ۱۵ زره ۶۱۸ مټریک ټنه هندواڼې حاصل یې ورکړی.

‎د نوموړي په وینا د لوګر هندواڼې د کابل په ګډون د ګاونډیو ولایتونو په بازارونو کې ښه پلور لري چې د یو من هندواڼو بیه تر ۱۷۰ افغانیو پورې رسېږي.

ښاغلي رستمي ونه ویل چې تېر کال په یاد ولایت کې د هندواڼو کرنیز حاصلات څومره و؟

د وزارت د معلوماتو له مخې په لوګر ولایت کې زیاتره بزګرانو د هندواڼو کرکیلې ته مخه کړې او په کښت کې له نویو میتوډونو کار اخلي.

سوداګرۍ وزارت: د چین په نندارتونونو کې افغاني توکو ښه بازار درلود

په چین کې یو نندارتون

د افغانستان د صنعت او سوداګرۍ وزارت وايي، د چین په نندارتونونو کې افغاني صنعتي توکو ښه پلور او بازار درلود.

د دغه وزارت ویاند فواد احمدي د دغو ننداتونونو په اړه نن شنبه (د زمري په ۹مه) ازادي راډيو ته وویل، یو د لانژو نړیوال سوداګریز نندارتون و چې د دغه هېواد په ګانسو ولایت کې د جولای په اتمه جوړ شوی و او څلور ورځې یې دوام وکړ.

د نوموړي په وینا بل نندارتون د ورېښمو لار سیاحتي نندارتون و چې په شانشي ولایت کې د جولای په ۱۶مه جوړ شوی و چې دوه ورځې یې دوام وکړ.

د ښاغلي احمدي په وینا دغو نندارتونونو کې په شپږو غرفو کې افغاني غالۍ، زعفران، ګاڼې او لاسي صنایع نندارې ته اېښودل شوي وو.

د نوموړي په خبره په یادو نندارتونونو کې ګډون کوونکو افغاني شرکتونو خپل ډېری محصولات وپلورل او چینایي پانګه والو او سوداګریزو شرکتونو سره یې بېلابېل سوداګریزو تړونونه هم لاسلیک کړل.

نور راوښيه

XS
SM
MD
LG