د لاسرسۍ وړ لېنکونه

تازه خبر
چهارشنبه ۲۲ زمری ۱۳۹۹ کابل ۱۱:۱۱

خبرونه

اروپايي مشرانو د سوريې د رژيم مخالفانو ته د وسلو لېږلو پرېکړه وځنډوله



د اروپایي اتحادیي مشرانو د بشار الاسد د رژیم مخالفانو ته د وسلو استولو یا نه استولو پریکړه وځنډوله.

د اروپایي شوری مشر هرمان وان رامپوا وویل، د اروپایي اتحادیې د بهرنیو چارو وزیران به په راتلونکي اوونۍ کي په دبلین کي د سوریې د رژیم مخالفانو ته د وسلو استولو بندېز وارزوي.

ده د جمعې په ورځ په بروکسل کې د اروپایي اتحادیي د مشرانو د دوه ورځنۍ غونډې په پاي کې دا اعلان وکړ.

فرانسي او انګلستان له نورو غړیو هیوادو څخه غوښتې چې د سوریي د رژیم مخالفانو ته د وسلو استولو بندیېز دي لري کړي.

د ورځې تازه خبرونه دلته ولولئ

کرونا ویروس سریلانکا کې د ځايي خلکو او فیلانو ترمنځ اخ‌وډب کم کړی

سریلانکا کې فیلان

په سریلانکا کې د وحشي ژوو د پالنې اداره وايي، د کرونا د خپرېدو د مخنیوي بندیزونو دغلته د ځايي خلکو او فیلانو ترمنځ اخ‌وډب کم کړی دی.

په سریلانکا کې د وحشي ژوو د ساتنې ادارو ویلي چې تېر کال په سریلانکا کې خلکو ۴۰۵ فیلان وژلي وو.

په هند او سریلانکا کې یوه لویه ستونزه دا ده چې فیلان وخت نا وخت په خوراک پسې ګرځي او د کروندګرو پر کښتونو او باغونو حملې کوي.

په سریلانکا کې چې ګڼ ځنګلونه لري وحشي فیلانو تېر کال ۱۲۱ تنه وژلي و.

پلخمري کې ماین چاودنې د دوو رسنیو دفتر ویجاړ کړی

د افغانستان عمومي نقشه کې بغلان ولایت

د بغلان پلخمري ښار کې ماین چاودنې د سیمه‌ییزې راډیو ارمان شهر او شهربانو اوونیزې دفتر ویجاړ کړی دی. د چارواکو په وینا پېښه پرون ماښام شوې.

د دې دواړو ادارو مشر سید عظیم هاشمي نن (د اګسټ ۱۲مه) ازادي راډیو ته وویل چې په چاودنو کې چا ته د سر زیان نه‌دی اوښتی، خو مالي تاوان‌یې اړولی دی.

سید عظیم هاشمي زیاتوي: "دې چاودنې زموږ د دفتر څو کمپیوټرونه خراب کړي، زموږ په دفتر کې کار ممکن نه‌دی او زموږ پر همکارانو یې منفي اغېز کړی دی."

د افغانستان د ازادو رسنیو د ملاتړ دفتر، نی دا حمله غندلې او له امنیتي ځواکونو یې غوښتنه کړې چې د رسنیو امنیت ته پام وکړي.

د بې‌پولې خبریالانو د نړیوالې ادارې په وینا، افغانستان د نړۍ په کچه د خبریالانو لپاره له ډېرو خطرناکو هېوادونو دی.

چارواکي: سرپل کې وسله‌والو طالبانو دوه ملکيان ووژل

د افغانستان په عمومي نقشه کې سرپل ولایت

دوه ولسي وګړي د سرپل د سانچارک ولسوالۍ کې په هغه برید کې وژل شوي چې چارواکي وايي طالبانو کړی.

د سانچارک ولسوال، نقیب‌الله دقیق نن (د اګست ۲۲مه) د ازادي راډیو خبریال ته وویل چې په وژل شویو کې یو ۱۳ کلن هلک هم شامل دی.

نقیب‌الله دقیق زیاتوي: "یو ۱۳ کلن بزګر هلک چې شفیع‌الله نومېده، سږ کال د اسد په ۲۰مه د وسله‌والو طالبانو په ماین الوتی و، روغتون ته په لاره کې د خواجه سرخ په سیمه کې، وسله‌والو طالبانو بیا حمله ورباندې کړې، هغه‌یې له یوه خپلوان سره تښتولی او پرون ماښام‌یې دواړه په مرمیو غلبېل کړي دي."

د سانچارک ولسوال وویل چې دوهم ملکي وګړی چې په دې پېښه کې وژل شوی یو سپین ږیری سړی دی.

وسله‌والو طالبانو تر اوسه د دې ادعا په اړه څه نه‌دي ویلي.

افغان حکومت: طالبان دې د حکومت پاتې جنګي اسیران خوشې کړي

ارشیف، قطر کې یو شمېر طالبان

افغان حکومت له وسله‌والو طالبانو غوښتنه کوي چې له دوی سره د حکومت پاتې جنګي اسیران دې خوشې کړي.

په امنیت شورا کې د ملکي خلکو د خوندیتوب د برخې مشر، انتظار خادم نن (د اګسټ په ۱۲مه) ازادي راډیو ته وویل چې د طالبانو د هغو ۴۰۰ بندیانو چې د هغه په وینا حتی په قانوني ډول د خلاصون وړ نه‌و، د خلاصولو د پلان د عملي کولو چارې پيل شوې دي.

انتظار خادم وايي: "هغوی باید زموږ بندیان راخوشې کړي، که د هغوی بندیان کورنۍ لري، زموږ بندیان هم کورنۍ لري، که د هغوی بندیان د خوشې کېدو لپاره رهبري لري، زموږ بندیان هم رهبري لري او دا به تعقیب کړي."

طالبانو له حکومت سره د سولې د خبرو د پیل لپاره د خپلو ۵،۰۰۰ بندیانو د خوشې کېدو شرط وړاندې کړی و، تر اوسه د هغوی ۴،۶۰۰ بندیان د حکومت له زندانونو او توقیف ځایونو خوشې شوي دي.

وسله‌والو طالبانو ویلي د حکومت تر زر تنو زیات بندیان‌یې خوشې کړي، هغه شمېر چې د دوحې د تړون له مخې یې دوی خوشې کېدو ته ژمن وو.

انتظار خادم ونه‌ویل چې طالبانو سره څومره حکومتي اسیران لا هم پاتې دي.

نوموړي وویل، ۴۰۰ طالب بندیان به زر خوشې شي او د خوشې کېدو چمتووالی یې روان دی.

پکتیا کې د مچلغو بند د جوړېدو په چارو نیوکې زياتې شوي

د مچلغو بند

په پکتیا کې د مچلغو بند په چارو نیوکې.

د پکتیا له مرکز څخه ختیځ لور ته په شااوخوا ۱۴ کیلو مترۍ کې پراته د احمدابا ولسوالي، چېرته چې مچلغو بند جوړیږي.

له احمدابا ولسوالۍ شمالي لوري ته، چېرې چې پراخه دښته او ګڼ کلي موجود دي، نږدې پنځه کیلو متره مزل وروسته د مچلغو کلی راځي، د دې کلي په بر سر کې د دوو لویو غرونو په منځ دره کې یاد بند جوړيږي.

له دې بنده د غرونو په څنډه کې دوه کانالونو غځیږي، چې یو یې د سید کرم ولسوالۍ په لور او بل یې هم د احمدابا ولسوالۍ د ځمکو خړوبولو لپاره جوړیږي.

د دې بند چارې د پلان مطابق په څلورو کالونو کې بشپړیږي، خو د سیمې خلک یې چارې پڅې بولي او وایي، په ځینو برخو کې له بې کیفیته موادو هم ګټه اخیستل کېږي او ځینې وختونه یې چارې ودرېږي.

د پروژې مسؤل جاوید احمد هجرت وایي، د بند د جوړیدو چارې د پروپوزل سره سمې په ښه کیفیت روانې دي.

د مچلغو د بند چارې چې په تېرو څو کلونو کې درې ځله پیل شوې، خو بېرته د امنیتي ستونزو له امله په ټپه ودریدې.

دا ځل یې د جوړېدو چارې د ارګ عملیاتي ادارې په لاس کې اخیستې او تر اوسه د دې بند ۹ سلنه کار پر مخ تللی.

د دې پروژې د مسؤلینو په خبره دا بند به د ۲۳۰۰ هکټاره ځمکې د خړوبولو او تر ۴۰۰ کیلوواټه برښنا د تولید ظرفیت ولري.

امریکا د کرونا واکسین جوړو لپاره د 'مدرنا' شرکت سره تړون وکړ

د مدرنا درمل جوړولو شرکت

امریکا متحده ایالتونو د کرونا ویروس د ازمایښتي واکسین د سلو میلیونو ډوزو د تولید لپاره د مدرنا درمل جوړولو له شرکت سره د یو نیم میلیارد ډالرو په تړون موافقه کړې ده.

دا تړون پرون په سپینه ماڼۍ کې شوی دی.

تېره اوونۍ هم له ځینو نورو شرکتونو سره ورته تړونونه شوي و.

د امریکا متحده ایالتونو د ولسمشر ډونالډ ټرمپ اداره په دې هڅه کې ده چې د روان میلادي کال تر پایه د کرونا ضد واکسین راوباسي.

د روغتیا نړیوال سازمان د اعلان له مخې تر اوسه پورې په ټوله نړۍ کې د کرونا ویروس یا کوویډ-۱۹ وبا د ختمولو لپاره ۱۵۰ واکسینونه جوړ او ازمویل شوي دي.

امریکا داسې وخت د کال تر پایه د واکسین د جوړولو خبره کړې چې روسیې وار له مخه پرون اعلان وکړ د کوویډ-۱۹ ناروغۍ پر ضد واکسین یې جوړ او ثبت کړی دی.

د روسیې ولسمشر ولادمیر پوتین ویلي چې د روسیې په لاس جوړ واکسین کار ورکړی او ښه ثابت شوی.

روسیې دغه واکسین ته د سپوتنیک وي نوم ورکړی دی.

ایراني چارواکي: ځينې کسان د جاسوسۍ په تور نیول شوي

ارشیف

ایراني چارواکو ویلي چې ځينې خلک یې د جاسوسۍ په تور نیولي دي.

دا خبره ایراني اژانسونو د دغه هېواد د اطلاعاتو د وزارت په حواله کړې ده.

د تازه نیول شویو کسانو په اړه ډېر معلومات نه‌دي شریک شوي.

د دې تر څنګ دوه نور ایراني الاصله اتریشي وګړي د ایران د قضایه قوې له‌خوا بریټانیا، جرمني او اسرائیلو ته د جاسوسۍ په تور په بند محکوم شوي دي.

د قضایه قوې ویاند غلام حسین اسماعیلي پرون ویلي چې ایراني الاصله اتریشی مسعود مصاحب په لسو کلونو بند محوم شوی.

اسماعیلي زیاته کړې مصاحب چې د ایران-اتریش د ملګرتیا د ټولنې مشر و له جرمني او اسرائیلي استخباراتو سره یې اړیکې درلودې او د پوځ، اټومي، ټکنالوژۍ او روغتیايي خدماتو د پروژو په اړه یې هغوی ته معلومات ورکول.

اخوا د اتریش یوې ورځپاڼې کوریر راپور ورکړی چې ۷۳ کلن مصاحب تېر ۲۰۱۹ کال په داسې حال کې نیول شوی و چې ایران ته د روغتیاپالانو د یوه ګروپ په مشري ورغلی و.

د ایران د قضایه قوې ویاند غلام حسین اسماعیلي دویم ایرانی-اتریشی وګړی شهرام شیرخاني معرفي کړی چې د ده په خبره د بریټانیا استخباراتو ته یې کار کاوه او په لسو کلونو بند محکوم شوی دی.

ایران د نړیوالو فشارونو په مقابل کې اکثر په داسې کارونو لاس پورې کوي.

د بشري حقونو مدافع ډلې او سازمانونو ایران تورنوي چې په هېڅ پلمه بهرني وګړي او دوه تابعیته ایرانیان نیسي او کلونه کلونه یې بندیانوي.

ننګرهار کې ښځو او کوچنیانو لپاره د عامه پوهاوي کمپاين پيل شو

دا کمپاین د ننګرهار ولايت په مرکز جلال اباد او ولسواليو کې د ښځو چارو رياست پیل کړی دی. 

په ننګرهار کې له ښځو او کوچنیانو سره د تاوتريخوالي د مخنيوي په هدف د عامه پوهاوي کمپاين پيل شو.

دا کمپاین د ننګرهار ولايت په مرکز جلال اباد او ولسواليو کې د ښځو چارو رياست پیل کړی دی.

د ننګرهار ولایت د رسنیو دفتر د سې شنبې په ورځ په خپره کړې اعلامیه کې د ښځو چارو د رئیسې فتانه عزيز له قوله ویلي چې په جلال اباد ښار او ۱۳ ولسواليو کې يې د کم عمره نجونو د ودولو او همداراز د ښځو او ماشومانو پر وړاندې د تاوتريخوالي د مخنيوي لپاره ښځو او نارينه وو ته عامه پوهاوی پيل کړی چې نورو ولسواليو ته به هم وغځول شي.

فاریاب کې د طالبانو یو ځايي قومندان له حکومت سره یو ځای شو

د فاریاب ولایت نقشه

د فاریاب ولایت چاراکي وايي، د طالبانو یو ځايي قومندان چې له کلونو راهیسې يې د حکومتي ځواکونو پر ضد جګړه کوله، له حکومت سره یو ځای شو.

د فاریاب امنیه قومندانۍ ویاند عبدالکریم یورش ازادي راډيو ته وویل، دغه کس او د ده تر قوماندې لاندې لسو نورو کسانو د دوشنبې په ورځ خپلې وسلې پر مځکه کېښودې.

ملا سید عزت‌الله له پنځو کلونو راهیسې پر شاهراه نمبر یک، خواجه سبز پوش، شیرین تګاب، دولت اباد، چهار ګانه اندخوی او پښتون کوټ کې تروریستي فعالیت کاوه او ډېری وختونه یې پر شاهراه نمبر یک پر اکمالاتي قطارونو چریکي حملې کولې او پر سړکونو یې ماینونه هم ښخول.

د طالبانو دغه ځايي مشر په داسې حال کې له حکومت سره یو ځای شو چې د تاوتریخوالي کمېدو او اوربند ته نوې هیلې رامنځته شوي دي.

جوبایډن 'کامالا هریس' خپله مرستیاله ټاکلې

ښي لور ته کامالا هریس او چپ لور ته جوبایډن

د امریکا په ټاکنو کې د ډیموکراټ ګوند نوماند جوبایډن اعلان کړی چې سناتوره کامالا هریس یې د خپلې مرستیالې په توګه ټاکلې ده.

مېرمن هریس ۵۵ کلنه ده او لومړۍ تورپوستې ښځه ده چې د امریکا په تاریخ کې پر یوه لوی ټاکنیز ټکټ ټاکل شوې ده.

جوبایډن پرون پر خپله ټويټر پاڼه ولیکل: "ډېر ویاړ کوم چې هریس د خپلې مرستیالې په توګه اعلانوم."

ده مېرمن هریس یوه زړه وره مبارزه بللې ده.

جوبایډن د امریکا له ولسمشر ډونالډ ټرمپ سره د نومبر میاشتې په ولسمشريزو ټاکنو کې سیالي کوي.

پوتین: روسیې د ګټنې په هدف د کویډ۱۹ یو واکسین ثبت کړ

د روسیې ولسمشر ولادیمیر پوتین

د روسیې ولسمشر ولادیمیر پوتین وايي، د کرونا ویروس یو واکسین چې په روسیه کې جوړ شوی، د استفادې په هدف ثبت شوی دی.

دا اقدام پر دې سربېره شوی چې یاد واکیسن په پراخه کچه نه دی تجربه شوی او په علني توګه یې په اړه هېڅ معلومات نه دي خپاره شوي.

پوتین دا اعلان د سې شنبې په ورځ (د اګست په یوولسمه نېټه) په یوه حکومتي غونډه کې وکړ.

ده وویل چې د روسیې جوړ د کرونا ویروس ضد واکسین د تجربې پر مهال اغېزناک ثابت شوی او د کرونا ویروس پر ضد په بدن کې اوږدمهاله مقاومت رامنځته کولای شي.

که څه هم روسیه لومړی هېواد دی چې واکسین یې ثبت کړی، په روسیه کې دننه او له دې هېواده دباندي ساینسپوهانو ورباندي انتقاد کړی دی.

دوی پر انسانانو د درېیم پړاو تجربې تر بشپړېدو او د خپلواکو روغتیايي متخصصانو تر څار مخکې د واکسین د ثبت پر پرېکړه پوښتنه پورته کوي.

د روغتیا نړیوال سازمان د معلوماتو له مخې په درېيم پړاو کې عموماً زرګونو کسان شامل وي چې څو میاشتې دوام کوي.

ویل کېږي روسی واکسین پر څه کم سلو کسانو تجربه شوی دی.

د امریکا د روغتیا وزیر الیکس ازار وویل چې د اخري پړاو تجربه د واکسین یوه مهمه برخه ده.

ده وویل چې امریکا پر سم لور روان دی او د سږ کال تر پایه به یو اغېزناک واکسین جوړ کړي.

بیلاروس کې د لاریونونو دوام

د لاریون کوونکو یو انځور

د بیلاروس په ولسمشريزو ټاکنو کې د ګټونکي اوسني ولسمشر الکساندر لوکاشینکا مخالفه کاندیده سویتلانا څيخانوس کایا له بیلاروسه وتلې او لیتوانیا ته تللې ده.

دا په داسې حال کې ده چې په منسک کې درېیمه شپه هم د ټاکنو د نتایجو پر وړاندې لاریونو دوام کړی او د پولیسو د لوی شمېر حضور په اړه راپورونه ورکړل شوي دي.

سویتلانا ویلي چې په ولسمشریزو انتخاباتو کې درغلي شوې ده.

لیتوانیا ته د دې د تګ په اړه د دې هېواد د بهرنیو چارو وزیر لیناس ینکې ویڅيس پر خپله ټويټر پاڼه پرون د اګست په یوولسمه نېټه لیکلي دي.

د دوشنبې په ورځ (د اګست په لسمه نېټه) د بیلاروس مرکزي انتخاباتي کمېسیون اعلان وکړ چې ولسمشر الکساندر لوکاشینکا اکثریت رایو ولسمشریزې ټاکنې وګټلې.

سویتلانا د ټاکنو نتایج تقلبي وبلل او وېې ویل چې ځان د ټاکنو ګټونکې ګڼي.

ولسمشر غني: د سولې مذاکرات باید ژر تر ژره پیل شي

افغان ولسمشر محمد اشرف غني

افغان ولسمشر محمد اشرف غني وايي، د سولې مذاکرات باید ژر تر ژره پیل شي.

ښاغلي غني دا خبره پرون د افغان حکومت د سولې له مذاکره کوونکي پلاوي سره د لېدو پر مهال وکړه.

د جمهوري ریاست د خبرپاڼې پر اساس ولسمشر غني زیاته کړې، د څلور سوه طالب زندانیانو د را خوشې کېدو د فرمان تر لاسلیک وروسته د خلکو تمه دا ده چې نور باید د دولت او طالبانو تر منځ د مذاکراتو د پيل لپاره هېڅ بانه او خنډ نه‌وي.

ښاغلي غني د دغو زندانیانو، چې د حکومت په وینا لویې جرمي دوسیې لري، د راخوشې کولو فرمان د دوشنبې په ورځ لاسلیک کړ.

طالبانو دا ادعا رد کړې او د مذاکراتو تر پیل مخکې يې د دغو زندانیانو د راخوشې کېدو غوښتنه کړې.

د سولې په چارو کې د دولت وزارت لوړپوړي سلاکار عزیزالله فضلي د دوشنبې په ورځ ازادي راډیو ته وویل، د سولې حکومتي مذاکره کوونکی پلاوی به د روانې میلادي میاشتې په اتلسمه نېټه قطر ته لاړ شي.

د افغان چارواکو په وینا، قطر کې چې د طالبانو سیاسي دفتر دی، د بین‌الافغاني خبرو د لومړي پړاو کوربه وي.

د امریکا د بهرنیو چارو وزیر نن پراګ ته ورسېد

مایک پومپیو پراګ ته د رسېدو پر مهال.

د امریکا متحده ایالاتو د بهرنیو چارو وزیر مایک پومپیو د مرکزي اروپا د پنځه ورځني سفر په لړ کې نن د چک جمهوریت پلازمېنې پراګ ته ورسېد.

د ده د خبرو په اجنډا کې د «5G» انټرنټي شبکې په جوړولو کې د چین د رول په اړه بحثونه شامل دي.

مایک پومپیو به دوه ورځې په چک جمهوریت کې تېروي بیا به سلووېنیا، اتریش او پولنډ ته ځي چې هلته د ځینو هغو امریکايي پوځیانو هرکلی وکړي چې له جرمني په وتو دي.

د پومپیو هڅو یو هدف دا دی چې هېوادونه وهڅوي څو د چین د ټکنالوژۍ له کمپنۍ هواوې سره همکاري ونه‌کړي.

واشنګټن دغې چینايي کمپنۍ ته د یوه ګواښ په سترګه ګوري او وايي د انټرنټ په پنځم نسل یا «5G» کې یې مخکښ رول اخیستی دی.

پومپیو به په عین حال کې اروپا هم وهڅوي چې د روسیې پر انرژۍ خپله اتکا کمه کړي.

د امریکا د بهرنیو چارو وزیر به سبا د چک جمهوریت له صدراعظم اندري بابیش سره تر کتنې مخکې د چک او امریکا د ټکنالوژۍ کمپنیو له غړو سره د «5G» په اړه وګوري.

پوتین: روسیه کې جوړ شوی د کرونا ویروس واکسین د کارونې لپاره تیار دی

د کرونا ویروس ضد واکسین چې په روسیه کې جوړ شوی دی.

د روسیې ولسمشر وايي د کرونا ویروس ضد هغه واکسین چې په روسیه کې جوړ شوی د کارونې لپاره تیار شوی دی.

ولادیمیر پوتین چې نن د حکومت یوې غونډې ته خبرې کولې د دې اعلان پر مهال وویل، یوې لور ته‌یې له وخته دغه واکسین لګول شوی دی.

ولسمشر پوتین وویل، په لومړنیو ازموینو کې ثابته شوې چې دغه واکسین «اغېزناک» دی او د کرونا ویروس په وړاندې انسانانو ته خوندیتوب ورکوي.

د نړۍ په سطحه د کرونا ویروس ضد تر ۱۰۰ زیات واکسینونه جوړ شوي، خو لږ تر لږه څلور واکسینونه پر انسانانو د ازموینو په درېیمه مرحله کې دي.

دا په داسې حال کې ده چې نن په نړۍ کې په کرونا ویروس د اخته کسانو شمېر تر ۲۰ میلیونو واوښت.

نور راوښيه

XS
SM
MD
LG