د لاسرسۍ وړ لېنکونه

تازه خبر
شنبه ۸ سلواغه ۱۴۰۱ کابل ۰۸:۱۱

افغانستان

د قرغزستان د کورنیو چارو وزارت د کاډیمۍ رييس د رشوت اخیستلو په تور ونیول شو

د قرغزستان د کورنیو چارو وزارت د کاډیمۍ رييس او د هغه مرستیال د رشوت اخیستلو په تور ونیول شول.

د قرغیزستان د ملي امنیت دولتي کمېټې نن وویل، د اکاډیمۍ مرستیال رييس رحمت الله امیرایف له خپلې یوې ښځینه همکارې د یو لک سومو، چې له دوه زره سل ډالرو سره برابرېږي، د اخیستلو په مهال ونیول شو.

ویل شوي، چې ده دا پیسې د کار په بدل کې اخیستلې.

کمېټې وویل د ملي امنیت دولتي کمېټې وروسته د امیرایف په دفتر کې ډېرې بهرنۍ پیسې وموندلې.

د ورځې تازه خبرونه دلته ولولئ

خلیلزاد بیا د نجونو زده کړو په اړه د 'مولوي عبدالحمید' نوې څرګندونې وستایلې

ایرانی دیني عالم مولوي عبدالحمید

د افغانستان د سولې لپاره د امریکا متحده‌ایالاتو مخکېني ځانګړي استازي زلمي خلیلزاد یو ځل بیا له طالبانو غوښتي چې د نجونو د زده‌کړو او کار په اړه د ایراني دیني عالم مولوي عبدالحمید پيغام واوري.

پرون یو ځل بیا د مولوي عبدالحمید نوې وینا خپره شوې چې په کې یې د افغان نجونو له‌ زده‌کړو او کار ننګه کړې او په دې برخه کې په دوی بندیزونه غیرشرعي بللي.

خلیلزاد نن سهار په خپله ټویټرپاڼه لیکلي، دی د مولوي عبدالحمید له هغې خطبې ستاینه کوي چې په کې د نجونو او ښځو د زده‌کړې د ملاتړ او تر خوا یې په سړې هوا کې له افغانانو سره د بشري مرستو غوښتنه کوي.

مولوي عبدالحمید موده وړاندې هم یوه پیغام کې ویلي و، افغان نجونې شرعي حق لري چې زده‌کړه او کار وکړي.

افغانستان کې په جنګي جرمونو ټولو تورنو د محاکمې غوښتنه وشوه

ارشیف: په کابل کې له چاودنې وروسته د یوه سوځېدلي موټر انځور -March 17, 2018

د بشري حقونو د څار سازمان په افغانستان کې په جنګي جرمونو ټولو تورنو ته د سزا او د دوی د محاکمې غوښتنه کړې.

دې سازمان یوه اعلامیه کې چې د ۲۰۱۸ کال د جنورۍ په ۲۷مه یې د طالبانو له‌خوا د جمهوریت روغتون په مخ کې د ځانمرګي برید د قربانیانو په یاد خپره کړې، دا خبره کړې ده.

په دې برید کې چې له چاودېدونو توکو ډک امبولانس په کې د جمهوریت روغتون مخې ته والوځول شو، نږدې ۱۰۰ تنه ووژل شول چې اکثریت یې ملکیان وو.

د بشري حقونو د څار سازمان په دې اعلامیه کې د هغې نجلۍ یادونه کړې چې له برید وروسته یې له سترګو وینې روانې وې او ویل یې، کوڅه له جسدونو ډکه وه.

د بشري حقونو د څار سازمان همدا ډول په ځینو پېښو کې مخکېنی جمهوري دولت، متحده‌ایالات او د اسټرالیا په ګډون یو شمېر هېوادونه هم د ملکي تلفاتو اړولو برخه کې پړه ګڼي.

په دې اعلامیه کې زیاته شوې، وروسته تر دې چې طالبان بیا واک ته ورسېدل، اعدامونو او خپل‌سرو سزا ورکولو ته یې زور ورکړی او د دې جدي سرغړونو د پای ته رسولو لپاره یې هېڅ ګام نه دی اخیستی.

په دې اعلامیه کې غوښتل شوي چې په افغانستان کې دې په ټولو جدي سرغړونکو او په جنګي جرمونو تورنو عدالت تطبیق شي.

د کابل په ګډون ځینو ولایتونو کې د واورې ورېدو اټکل شوی

په بلخ کې یو ماشوم د خپلې خیمې ته د تللې لارې څخه واوره پاکوي.

د هوا پېژندنې د ځینو نړیوالو ادارو له اټکل سره سم سبا او بل سبا د کابل په ګډون د افغانستان په یو شمېر مرکزي او جنوبي سیمو کې واوره وورېږي.

د سړې هوا دا ټکل په داسې وخت کې شوی دی چې د طالبانو د حکومت له پېښو سره د مبارزې د وزارت په وینا د تېرو درېیو اونیو په ترڅ کې د سړې هوا له امله په افغانستان کې لږ تر لږه ۱۶۰ تنه مړه شوي دي.

د افغانستان په ځینو جنوب ختیځ او ځینو شمالي ولایتونو کې سبا او بل سبا د باران د ورېدو اټکل شوی دی.

ډبلیو ایف پي: ښايي په افغانستان کې د خوارځواکو ماشومانو شمېر زیات شي

ارشیف: په افغانستان کې په خوارځواکۍ اخته ماشوم

د خوړو نړیوال پروګرام وایي، اټکل کوي چې روان میلادي کال به په افغانستان کې د هغو ماشومانو شمېر چې له سختې خوارځواکۍ کړېږي اته لکه پنځه اویا زرو ته ورسېږي.

د خوړو د نړیوال پروګرام یا ډبلیو ایف پي په باور دوه میلیونه او درې لکه نور ماشومان به هم په خوارځواکي اخته شي، خو وضعیت به یې حاد نه وي او په دې منځنۍ خوارځواکي به سږکال اته لکه څلوېښت زره مېرمنې هم مبتلا شي.

د ډبلیو ایف پي ویاند فیلیپ کروپ په کابل کې رسنیو ته وویل، که چېرته په افغانستان کې د درېیم کال په مخه وچکالي شوه نو په دې شمېرو کې ممکن روان کال شل فیصده زیاتوالی راشي.

ازبکستان افغانستان ته د برښنا لېږد کې د پام وړ کمی راوستی

ارشیف

ازبکستان افغانستان ته د برښنا د لېږد چارې له سره پیل کړې، خو د پخوا په پرتله نیمایي برښنا افغانستان ته ورکوي.

د کابل برښنا رییس حکمت اله اخندزاده پرون وویل چې ازبکستان د دوه سوه پنځوس مېګا واټه برښنا په ځای اوس سل مېګا واټه برښنا افغانستان ته صادروي چې له دې سره ستونزه نه شي حل کېدای.

په کابل کې د صنعتي پارک شاوخوا پنځوس فیصده انرژي د ازبکستان له وارداتي برښنا تمویلېږي.

نږدې دوې اونۍ مخکې افغانستان ته د ازبکستان صادراتي برښنا په بشړه ډول پرې شوې وه.

ملګرو ملتونو بېوزله افغانانو ته د پیسو ورکړه ډېره مهمه وبلله

ارشیف: په کابل کې بېوزله مېرمنې او د هغوی ماشومان

په افغانستان کې د کډوالو په چارو کې د ملګرو ملتونو د کمېشنرۍ ویانده وایي چې په دې ساړه ژمي کې بېوزله افغانانو ته د پیسو ورکړه ډېره مهمه ده.

کارولین ګلک د جمعې په ورځ په بامیان کې وویل چې سهار هوا منفي شل وه او دا ژمی په افغانستان کې په تېرو لسو کلونو کې بېساری دی.

د ملګرو ملتونو د دې ویاندې په وینا، که چېرته بېوزلو ته پیسې ورکړل شي دوی به په خپله خوښه له اړتیا سره سم خپله ستونزه حل کړي.

د ملګرو ملتو د بشري مرستو د همغږۍ اداره اټکل کوي چې په دوه زره درویشتم کال کې به په افغانستان کې د بېوزله کسان شمېر اته ویشت میلیونو ته ورسېږي.

افغانستان او يو شمېر هېوادونو کې د قران‌کريم د سوځېدو په غبرګون کې لاريونونه شوي

انځور - ارشيف

نن یو شمېر خلکو د افغانستان په ګډون پاکستان، عراق او لبنان کې د هغه څه خلاف چې دیني مقدساتو ته یې سپکاوی باله، مظاهرې وکړې.

تېره شنبه د سوېډن د مهاجرت ضد یو تندلاري سیاستوال په ستاکهلم کې ترکیې سفارت ته څېرمه د یوه اعتراض په لړ کې د قران‌کریم یوې نسخې ته اور ورته کړ.

په هالند کې هم د قران‌کریم یوه نسخه څیري کړای شوې ده.

د رویترز د راپور پر بنسټ، د کابل د امینې قومندانۍ ویاند خالد ځدران ویلي، نن د کابل په ګډون د افغانستان په بېلابېلو ولایتونو کې یو شمېر خلکو اعتراضونه کړي دي.

د راپورونه پر بنسټ، په څو هېوادونو کې اعتراض کوونکو قرانکریم ته د توهین د عاملانو د سزا غوښتنه کړې ده.

عظمت الله عمرزي د غوره لوبغاړي جایزه ګټلې

عظمت الله عمرزي د غوره لوبغاړي جایزه ګټلې

د افغانستان ملي لوبډلې ځوان الراونډر عظمت الله عمرزي د بنګله‌دېش په غوره لیګ سیالیو کې په خپلې عالي توپ اچونې سره د لوبې د غوره لوبغاړي جایزه ګټلې ده.

ښاغلی عمرزی چې له رنګپور رایډرز لوبډلې لوبیږي په ۴ اورونو کې یې د پیاوړې لوبډلې(سیلهت سټرایکرز) ۳ لوبغاړي سوځولي دي او ۱۷ منډې یې ورکړي.

نوموړي وکړای شول چې د ټام مور، توحید او مشفق الرحیم مهمې ویکټې د لوبې په پیل کې ترلاسه کړي.

د عمرزي تر ښې توپ اچونې وروسته د سټرایکرز لوبډلې یوازې ۹۳ منډو هدف وټاکله چې رایډرز لوبډلې د ۴ ویکټو په لاسه ورکولو سره ترلاسه کړ.

عظمت الله عمرزي په دې لوبه کې د غوره لوبغاړي جایزه ترلاسه کړه.

نن هم په يو شمېر ولايتونو کې د قران‌کريم د سوځېدو په غبرګون کې لاريونونه شول

ارزګان کې د قران‌کريم د سوځېدو په غبرګون کې لاريون

د طالبانو تر واکمنۍ لاندې افغانستان کې نن یوځل بیا په سوېډن کې د ترکیې د سفارت مخې ته د قرانکریم د سوځولو په غبرګون کې لاریونونه وشول.

د باختر خبري اژانس د راپور له‌مخې دا لاریونونه په پلازمېنه کابل او په غزني، بدخشان، پنجشېر، غور، بغلان، لغمان، بلخ، بادغیس او څو نورو ولایتونو کې وشول چې په ترڅ کې یې د یوه سوېډني سیاستوال دا عمل وغندل شو.

په تېرو څو ورځو کې د هېواد په نورو ولایتونو کې هم د دې پېښې په غبرګون کې لاریونونه وشول چې په ترڅ کې یې د سوېډن بیرغ هم وسوځول شو.

له نورو اسلامي هېوادونو څخه هم د ورته اعتراضونه راپورونه رارسېدلې دي.

د روغتيا سازمان: د بدخشان په يوه کلي کې د تنفسي ناروغيو له امله ۱۷ کسان مړه شوي دي

انځور - ارشيف

د روغتیا نړیوال سازمان وايي، له پرون پنجشنې د بدخشان په یوه کلي کې د سختو تنفسي ناروغیو ۹۷ قضیې او د ۱۷ کسانو مړینه ثبت شوې ده.

د دې سازمان د افغانستان څانګې پرون په یوه ټویټ کې ویلي، دوی د بدخشان د واخان ولسوالۍ په پامیر کلان کلي کې له محلي چارواکو سره د دې خپرې شوې ناروغۍ په درملنه کې همکاري کوي.

خو ازادۍ راډیو تېره اوونۍ راپور ورکړی و، چې په بدخشان کې د دغو تنفسي ناروغیو له کبله ۲۱ کسان مړه شوي دي.

له ۱۷ورځو راهیسې په افغانستان کې د یخنۍ له کبله په بېلابېلو سیمو کې تر ۱۶۰ زیات کسان مړه شوي دي.

نور راوښيه

XS
SM
MD
LG