د لاسرسۍ وړ لېنکونه

تازه خبر
دوشنبه ۲۰ زمری ۱۳۹۹ کابل ۱۱:۴۳

د نړۍ رمان کاتولیکې کلیسا نوی ستر مذهبي مشر وټاکه


د واتیکان په رمان کلیسا کې ۱۱۵کاردینالانو پرون ۷۶کلن ارجنټایني کاردینال خورخې ماریو برگوګلیو د نوي پاپ په توګه وټاکه.

برګوګلیو لومړنی پاپ دی، چې د امریکا له وچې څخه دغه مقام ته غوره کیږي. هغه د ځان لپاره د فرانسیس لقب غوره کړ.

وروسته له هغې چې د چهارشنبې په ورځ د کلیسا له نرۍ دریڅي یا دودرو څخه سپین لوګي وخوت او دا څرګنده شوه، چې نوی پاپ غوره شوی، د فرانسې کارډینال جین لویس توران په بالکن کې راښکاره شو او د سانت پتر په میدان کې راټولو شوېو خلکو ته وویل:

(په ډیرې خوشحالۍ تاسو ته اعلانوم، چې موږ نوی پاپ غوره کړ.

د هغه نوم دی خورخې ماریو برگوګلیواو د ځان لپاره یې د فرانسیس لقب غوره کړی.)

لږ ځنډ وروسته پاپ فرانسیس لسګونو زره کسانو ته په ایټالوي ژبه وویل:

(وروڼو او خویندو ماښام مو پخیر. لکه تاسو چې خبروې دغې غونډې دنده لرله، چې روم یونوی پاپ ولري.

داسې ښکاري، چې زما کارډینال وروڼه تقریبا د نړۍ تر پایه تللي، خو په هرصورت اوس موږ دلته یو.)

د نوي پاپ د غوره کیدولپاره د دوه په دریمه کارډینالانو مثبتو رایو ته اړتیا وه.

کاردینالانو نوی پاپ یوه میاشت وروسته له هغې چې پاپ بیندیکت شپاړسم استعفی ورکړه له څوځلې رایې ورکولو وروسته غوره کړ. د پاپ بیندیکت ا استعفې په تیرو شپږ سوو کلونو کې بې سارې وه.

د نړۍ سیاسي او مذهبي مشرانو هم د نوي پاپ فرانسیس د غوره کیدو هرکلی کړی دی.

د امریکا د متحده ایالتونو ولسمشربارک اوباما له امریکاڅخه د نوي پاپ د غوره کیدوهرکلی کړی او هغه یې د سیمی لپاره د قوت او خوشحالۍ نښه بللې ده.

اوباما ویلي، چې دی غواړي له نوي پاپ سره د ټولوادیانود پیروانو لپاره د سولې امنیت اوسوکالۍ د پراختیا لپاره کار وکړي.

د ملګروملتونو سرمنشي بانکې مون هیله څرګنده کړې، چې پاپ فرانسیس به د ادیانو ترمنځ ډیالوګ مخ ته یوسي.

د روسیې د اورتودوکسې کلیسا د نوي پاپ د ټاکلو هرکلی کړی اوهیله یې څرګنده کړې چې د اورتودوکس او کاتولیک کلیساو ترمنځ اړیکې به مثبت لورته پرمختګ وکړي.

د جرمني صدراعظمې انګلامیرکل وویل، دا په تیره بیا د جنوبي امریکا مسیحیانو ته خوشحاله ده.

د استرالیا صدراعظمې جولیا ګیلارد چې پرادیانو اعتقاد نه لري او پر ماشومانو د کلیسا او نورو ادارو له خوا د تیري په اړه یوه ملي څیړنه پیل کړې وویل، د نړۍ د نوې برخې څخه د پاپ غوره کیدل یوه تاریخي پیښه ده.

د فلسطیني ادارې مشرمحمود عباس پاپ فرانسیس ته بلنه ورکړې چې له بیت الحم څخه لیدنه وکړي، له هغه ځای څخه چې ګومان کیږي حضرت مسیح دنیا ته راغلی دی.
XS
SM
MD
LG