د لاسرسۍ وړ لېنکونه

تازه خبر
پنجشنبه ۱۳ سلواغه ۱۴۰۱ کابل ۱۱:۱۴

افغانستان

ننګرهار کې د پولیسو له روزنیز مرکزه ۱۶۵ تنه پولیس فارغ شول

په ننګرهار کې د پولیسو له روزنیز مرکزه ۱۶۵ تنه پولیس د مسلکي زده کړو د ترلاسه کولو وروسته فارغ شول.

د ننګرهار د پوليسو د روزنيز مرکز مشر سمونوال مفاد خان ازادۍ راډيو ته وویل، چې نن يې له ياد روزنيز مرکزه دوه ډلې مسلکي پوليس فارغ کړل، چې ۸۹ تنه ساتنمنان دي، چې څلور میاشتې مسلکي زده کړې ورکړل شوي او ۷۶ تنه نور سربازان،چې اته اونۍ زده کړې ورکړل شوې وې فارغ شول.

د یادې اکاډمۍ د چارواکو په خبره ،د ننګرهار له روزنيز کورس څخه تر اوسه پورې ٦٤٩٢١ تنه پوليس فارغ شوي دي.

د ورځې تازه خبرونه دلته ولولئ

استاد اسماعيل مشعل د طالبانو له‌خوا نيول شوی دی

د پوهنتون استاد اسماعيل مشعل خپل زرګونه ټوکه کتابونه ډالۍ کوي.

د پوهنتون استاد او مدني فعال اسماعیل مشعل د طالبانو له‌خوا نیول شوی دی.

اسماعیل مشعل د طالبانو له‌خوا د نجونو پر لوړو زده‌کړو د بنديز د اعتراض په پار خپل تحصیلي اسناد څيرلي وو.

هغه په دې وروستیو کې یو ګرځنده کتابتون هم جوړ کړی و او غوښتل یې په کابل کې ۲۱زره ټوکه شخصي کتابونه ووېشي.

د استاد اسماعیل مشعل د دفتر مسوول استاد فرید ازادي راډيو ته وویل، طالبانو ښاغلی مشعل د کابل ښار له درېیمې ناحیې څخه نیولی او نامعلوم ځای ته یې انتقال کړی دی.

ښاغلی فرید وايي چې طالبانو له استاد مشعل سره ډېر ناوړه چلند وکړ او هغه یې وواهه.

اسماعیل مشعل له نیول کېدو مخکې ازادي راډيو ته وویل، د طالبانو له‌خوا د افغان ښځو او نجونو پر زده‌کړو د بندیز په اعتراض کې یې خپل خصوصي ښوونځی او دارالمعلمین تړلي او په درېیو پوهنتونونو کې یې له استادۍ استعفا کړې ده.

طالبانو هلمند کې ۱۶ کسانو ته سزاوې ورکړي دي

د افغانستان په عمومي نقشه کې د هلمند ولايت موقعيت

طالب چارواکو په هلمند ولایت کې ۱۶ کسانو ته په عام محضر کې سزاوې ورکړي دي.

د طالبانو سترې محکمې په یوه اعلامیه کې دا کسان په نامشروع اړیکو، غلاو، لواطت او نورو جرمونو تورن کړي دي.

طالبانو په وروستیو څو میاشتو کې سلګونه تورنو کسانو ته د خلکو په مخ کې سزاوې ورکړي دي.

پر طالبانو باندې د بشري حقونو ګڼو مدافع بنسټونو نیوکه کړې ده چې تورن کسان اکثر عدالت ته له لاس‌رسي پرته محاکمه او په خپل سر بېلابېلې سزاوې ورکوي.

رينا اميري: پر نجونو د محدوديت زياتولو سره طالبان له نړيوالې ټولنې واټن ډېروي

رينا اميري

د افغان ښځو، نجونو او بشري حقونو لپاره د امریکا ځانګړې استازې رینا امیري ویلي، طالبان پر ښځو او نجونو د محدودیتونو په زیاتولو له نړیوالې ټولنې سره خپل واټن لا پسې ډېروي.

هغې دا خبره نن په خپل ټوېټر لیکلې ده.

رینا امیري دې ته هم اشاره کړې چې طالبان پخوانیو تګلارو ته ستانه شوي هغه چې په نويمه لسیزه کې حاکم وو.

د افغان ښځو، نجونو او بشري حقونو لپاره د امریکا ځانګړې استازې وروسته تر هغه دا څرګندونې کړي چې د امریکا د بهرنیو چارو وزیر انتوني بلېنکن پر طالب مشرانو د امریکا د ویزو بندیز اعلان کړ.

ښاغلي بلېنکن ویلي، چې پر افغان ښځو د طالبانو له‌خوا د تعلیم او کار د بندیزونو پرېکړې د امریکا د دغه اقدام لامل شوي.

د امریکا د بهرنیو چارو وزیر دا هم ویلي چې واشنګټن به له خپلو متحدو هېوادونو سره په همغږۍ کار ته دوام ورکړي څو طالبانو ته څرګنده کړي چې د دوی کړنې به د پام وړ تاوان ولري او له نړیوالې ټولنې سره به یې د اړیکو د ښه کېدو مخه ډب کړي.

طالبانو د ۲۰۲۲ کال په وروستیو کې په نادولتي مؤسسو کې د ښځو د کار مخه ونیوله او تر هغه مخکې یې د پوهنتونو دروازې هم د نجونو پر مخ وتړلې.

پر طالبانو دا بنديزونه داسې مهال ولګېدل چې د نجونو د ثانوي او لېسو دورې ښوونځي یې له څه باندې ۵۰۰ ورځو راهیسې تړلي.

د هوا پېژندنې ادارې يو شمېر ولايتونو کې د واورو ورېدو اټکل کړی دی

ارشيف

د افغانستان د هوا پېژندنې ملي ادارې نن او سبا په یو شمېر ولایتونو کې د درنې واورې اټکل کړی دی.

د دغې ادارې د خبرپاڼې له‌مخې د پنجشنبې او جمعې په ورځو په بدخشان، میدان وردګ، بامیان، دایکندي، فرا، هرات، غور، سرپل، بلخ، جوزجان، فاریاب او بادغیس کې شدیده واوره وشي.

له دې وړاندې واورې او ورسره سړې څپې په افغانستان کې د نژدې دوه سوه کسانو ژوند اخیستی او لسګونه زره څاروي یې هم له‌منځه وړي دي.

په افغانستان کې سږنی ژمی داسې مهال له واورو او بې‌سارې سړې څپې سره مل دی چې خلک یې تر پخوا ډېر بې وزله او بې امکاناتو دي.

د ملګرو ملتونو د بشري مرستو د همغږۍ ادارې ویلي، سږ کال ۲۸ میلیونه افغانان بېړنیو خوراکي مرستو ته اړتیا لري.

ازبکستان افغانستان ته پرون د ریل ګاډي خدمات ودرول

ارشيف

د ازبکستان د ریل پټلۍ ادارې پرون په یوه خبرپاڼه کې وویل، دا چې افغانستان نه و توانېدلی له دغې پروژې په وخت تخنیکي ساتنه وکړي، نو دوی اړ شول چې د ریل خدمات و دروي.

د انټرفاکس خبري اژانس د راپور له‌مخې د ازبکستان او د طالبانو د حکومت چارواکو تېره دسمبر میاشت کې سره کتلي و او افغان لوري ژمنه ورکړې وه چې د افغانستان خاوره کې د دغې پټلۍ تخنیکي چارې به تر فبروري میاشتې بشپړیږي.

د طالبانو د حکومت ویاند ذبیح‌الله مجاهد ویلي، د دوی د اورګاډي اداره کومه تخنیکي ستونزه نه‌لري او په خبره یې دا کار د ازبکستان د ریل ادارې له خوا د لنډ وخت لپاره شوی دی.

د ریل دغه پټلۍ چې له حیرتان بندره تر مزار شریف ښاره غځېدلې ۷۵ کیلو متره اوږدوالی لري او ۲۰۱۰ کال کې د ۱۲۹ میلیونه ډالرو په جوړېدو ګټې اخیستنې ته وړاندې شوه.

طالبانو پرېکړه کړې چې د تخار چاه اب ولسوالۍ د سرو زرو کان دې داوطلبۍ ته وړاندې شي

تخار، انځور - ارشيف

د طالبانو د رئیس الوزرا اقتصادي مرستیال د اقتصادي کمېسیون په ناسته کې پرېکړه کړې چې د تخار د چاه اب ولسوالۍ د سرو زرو کان دې داوطلبۍ ته وړاندې شي.

د سمتي په نوم د دغه کان د اکتشاف او کېندنې چارې په پخواني حکومت کې د یوه خصوصي شرکت له‌خوا پيل شوې وې، خو طالبانو تېر کال د کان د اکتشاف او کېندنې چارې و درولې.

د طالبانو د رئیس الوزرا د مرستیال او اقتصادي کمېسیون د رئیس ملا عبدالغني برادر په مشرۍ غونډه کې د چهارشنبې په ورځ پرېکړه شوې چې دغه کان دې بیا داوطلبۍ ته وړاندې شي.

دوی نه‌دي ویلي چې ولې له پخواني قراردادي شرکت سره د کان تړون لغوه شوی خو پخوا تر دې په تخار کې د طالبانو ځایي چارواکو ویلي، د سمتي کان قراردادي شرکت ستندردونه دې مراعات کړي.

ویل شوي چې دغه کان شاوخوا دېرش ټنه سر زر لري.

د طالبانو حکومت د یو شمېر نورو کانونو د کېندنې چارې هم ګړندۍ کړي، خو د کانونو متخصصان نیوکه پرې کوي چې دوی دې برخه کې لازم ظرفیتونه نه‌لري او تړونونو کې له بېړې کار اخلي.

د افغانستان کرکټ بورډ د کم عمره ځوانانو لوبډلې ۳۰ کسیزه نوملړ وټاکه

د افغان کرکټ بورډ د کم عمره ځوانانو ملي لوبډلې ۳۰ کسیزه نوملړ

د افغانستان کرکټ بورډ ادارې په یوه خبرپاڼه کې د هغو دېرشو ځوانانو نوملړ خپور کړی دی چې د دوی په وینا تر نولسو کلونو د کم عمره ځوانانو ملي لوبډله به ترې وټاکل شي.

کرکټ بورډ په یوې خبرپاڼه کې ویلي دي چې د نولس کلنو کم عمره ځوانانو لوبډلې لومړنی تمریناتي کمپ بشپړ شو او د دویم کمپ لپاره یې ۳۰ غوره لوبغاړي غوره کړي دي.

د خبرپاڼې د جزیاتو له مخې چې په ټاکل شویو لوبغاړو کې احمدالله، اکرم، علي احمد، اصف محمد، بشیر احمد، فهیم، فرهاد عثماني، فریدون، ګلزار، حمزه، حسن عیسی خېل، هدایت، حزب الله درانی، جمشېد، جاوېد، کامران هوتک، خالد، خلیل احمد، محمد هارون، ناصر حسن، ناصر خان، نعمان، نعمان شاه، شېر خان، سهېل، سلیمان عربزی، عثمان خان، وفي الله، یما عرب او یونس ځدراڼ شامل دي.

کرکټ بورډ زیاتوي: "دغه ۳۰ لوبغاړي به په دویم پړاو روزنیز او تمریناتي کمپ کې په بېلابېلو ډولونو وازمویل شي او د افغانستان کرکټ بورډ د پلان له مخې به روان کال د نولس کلنو کم عمره لوبغاړو د اسیا کپ او د راتلونکي کال د نولس کلنو کم عمره لوبغاړو د نړیوال جام سیالیو ترڅنګ له نورو هېوادونو سره د ګڼ شمېر دوه اړخیزو سیالیو لپاره په بشپړ ډول چمتو شي."

دغه راز یاده اداره وايي چې د افغانستان ملي نولس کلنې کم عمره لوبډلې د جوړولو پروسه څه باندې دوه میاشتې وړاندې د ازادې ازموینې په اعلان سره پیل شوه چې د غوراوي کمېټې د ټول هېواد په کچه له شااوخوا ۵۰۰۰ لوبغاړو ازموینه واخیسته او لومړي پړاو ته ترې ۱۰۷ لوبغاړي وټاکل شو، له دې وروسته په خوست ولایت کې دې لوبغاړو په ۸ ورځني کمپ کې ګډون وکړ او راتلونکو پړاوونو ته ترې ۳۰ تنه غوره شول.

د یادونې وړ ده چې په روان زیږدیز کال کې به د افغانستان ملي نولس کلنه لوبډله په اسیا جام سیالیو کې ګډون وکړي.

راشدخان اوس هم د نړۍ په کچه لومړی نمبر توپ اچونکی دی

د افغانستان کرکټ د شلو اورونو لوبډلمشر راشدخان

د افغانستان کرکټ د شلو اورونو لوبډلمشر راشدخان د کرکټ نړیوالې شورا په اعلان شوې درجه بندۍ کې لا هم په لومړي مقام کې دی.

خان چې ډېره موده دا مقام له لاسه ورکړی و، له تېرو دوو میاشتو راهیسې یو وار بیا د شل اوریزو سیالیو تر ټولو توپ اچونکو مخکښ دی.

د نوموړي د درجه بندۍ نومرې ۶۹۸ دي او د سریلانکا له توپ اچونکي وانیندو هسرنګا څخه یې یوازې درې نومرې زیاتې دي.

په دې درجه بندۍ کې د افغانستان بل ورو توپ اچونکی مجیب الرحمن بیا په اتم مقام کې ځای لري.

د یادونې وړ ده چې راشدخان اوسمهال د نړۍ په کچه دویم نمبر توپ اچونکی دی چې په شل اورونو کې یې ۵۰۰ ویکټې اخستې دي.

د افغانستان د کورني کرکټ لومړی ټورنمنټ پیل شو

ارشیف

د افغانستان کرکټ بورډ د کورني کرکټ څانګې له لوري د ۳۱ ولایتونو ترمنځ د وزیر محمد اکبر خان په نوم دویمه درجه ولایتي سیالۍ پیل شوې.

کرکټ بورډ ویلي چې په لومړي پړاو کې د ۱۶ ولایتونو لوبډلې په درې ګروپونو کې په ننګرهار، کندهار او خوست ولایتونو کې سیالۍ کوي.

د دې سیالیو په لړ کې د چهارشنبې په ورځ د فبرورۍ ۱ نېټه د ننګرهار په غازي امان الله خان لوبغالي کې د ننګرهار ب او میدان وردګو لوبډلو سیالي وکړه او ننګرهار ب لوبډلې وګټله.

په دې سیالۍ کې د ننګرهار ب لپاره عابدمحمدي او حزب الله دراني سلیزې جوړې کړې.

په خوست ولایت کې بیا دوه لوبې ترسره شوې چې خوست الف لوبډلې بغلان ته ماتې ورکړه او لوګر د کابل ب لوبډله له ماتې سره مخ کړه.

دغه راز په کندهار کې بیا نورستان له سمنګانو لوبه وګټله.

په دې سیالیو کې د لوګر لوبغاړي سیدمحمد نیازي ۵ لوبغاړي او د نورستان لوبغاړي نصیر خان ۶ لوبغاړي وسوځول.

د یادونې وړ ده چې دا سیالۍ به د فبرورۍ میاشتې تر ۲۱مې نېټې پورې دوام وکړي.

د افغانستان په ځینو سیمو کې د واورې او بارانونو د ورېدو اټکل شوی

د بامیان مرکز یوه څنډه

د افغانستان د هوا پېژندنې د ادارې له اټکل سره سم سبا او بل سبا په میدان وردګ، بامیان، غور، دایکندي، سرپل، بلخ، جوزجان، فاریاب، بادغیس، هرات او بدخشان کې واورې او بارانونه وورېږي.

په افغانستان کې له تېرو څه باندې درېیو اونیو راهیسې د سړې هوا له امله تر ۱۶۶ ډېرو کسانو ژوند له لاسه ورکړی دی او په سلګونو زره څاروي تلف شوي دي.

دغه راز تر سلو ډېر کورونه بشپړ یا یې یوه برخه د ورښتونو له امله تخریب شوي دي.

نور راوښيه

XS
SM
MD
LG