د لاسرسۍ وړ لېنکونه

تازه خبر
سه شنبه ۱۸ سلواغه ۱۴۰۱ کابل ۰۷:۰۴

خبرونه

جان کري د يوه لادرکه شوي پخواني اجنټ له کورنۍ سره وکتل

د امریکا د متحده ایالاتو د بهرنیو چارو وزیر جان کري د تحقيقاتو فدرالي ادارې (FBI) د پخواني ایجڼت له کورنۍ سره چې شپږ کاله وړاندې لادرکه شوی، وکتل.

کري د جمعې په ورځ په یوې اعلامیې کې وویل، د رابرت لیونسن (Robert Levinson) له میرمنې او زوى سره یې وکتل.

په اعلامیې کي یو ځل بیا ټینګار شوی چې د امریکا حکومت د لیونسن د څرک معلومولو او کورته د هغه امن ستنولو په کار کې ژمن دی.

د بهرنیو چارو وزیر جان کري په اعلامیې کې پر ایران غږ کړی چې د لیونسن د میندلو لپاره دې د امریکا د مرستې وړانديز ومني.

لیونسن د ۲۰۰۷ م کال د مارچ په اتمه د ایران له کیش ټاپو څخه د کتنې پر مهال لادرکه شوی و.

د امریکا فدرال استخباراتې اداري یا (ایف بي آي) د نوموړي په اړه د معلوماتو په بدل کي د یو میلیون ډالرو انعام اعلان کړی دی. لیونسن په ۱۹۹۸ کال کې د ایف بي آي له ادارې څخه تقاعد شوی و.

د ایران حکومت ویلې، د لوینسن د ځاي په اړه هیڅ معلومات نه لري.

د ورځې تازه خبرونه دلته ولولئ

کابل کې د کم‌عمره ځوانانو د فوټبال سیالۍ پیل شوې

په کابل کې د کم عمره ځوانانو فوټبال لوبډله

د افغانستان فوټبال فدراسیون له لوري په کابل کې تر ۱۴ کلونو د کم‌عمره ځوانانو ترمنځ فوټبال سیالۍ پیل شوې.

د فوټبال فدراسیون په وینا، د دغو سیالیو موخه له ۱۴ کلونو کم‌عمره فوټبال ملي لوبډلې ته د غوره لوبغاړو ورپېژندل دي.

یاد فدراسیون دغه راز زیاتوي ډېر ژر به په نورو ولایاتو کې هم د کم‌عمره ځوانانو سیالۍ پیل شي.

د یادونې وړ ده چې نن (د فبرورۍ ۷مه) په هرات ولایت کې هم د لسو لوبډلو ترمنځ د فوټبال غوره لیګ سیالۍ پیل شوي دي.

په کورني کرېکټ سياليو کې فيصل خان غبرګه سلیزه ووهله

افغان کرېکټ لوبغاړی فيصل خان

د افغانستان په کورنیو کرېکټ سیالیو کې د میدان وردګ لوبغاړي فیصل خان غبرګه سلیزه ووهله.

ښاغلي خان نن(د فبرورۍ ۷مه) د ننګرهار په غازي امان الله خان لوبغالي کې د هلمند لوبډلې پر وړاندې ۲۰۴ ناسوځېدلې منډې وکړې.

نوموړي ۱۶۴ توپونه لوبولي، ۲۵ څلوریزې او ۵ شپږیزې یې وهلي دي.

دغه یو ورځنۍ سیالۍ چې د ۳۱ دویمه درجه ولایتونو ترمنځ روانې دي، رسمي حیثیت نه‌لري؛ خو د افغانستان کورني کرېکټ د کړنلارې له‌مخې راتلونکو سترو رسمي کورنیو سیالیو ته د رسېدو لپاره هر ځوان لوبغاړی باید په دې کچه سیالیو کې ښې لوبې ترسره کړي.

د یادونې وړ ده چې تر دې وړاندې د افغانستان اوسني ملي لوبغاړي عثمان غني او د لوګر ولایتي لوبغاړي صابر حنیف هم په دویمه درجه ولایتي سیالیو کې غبرګې سلیزې وهلې وې.

د ځینو طالبانو د تایید شویو حسابونو په اړه 'ایلون ماسک' ته خبرداری ورکړ شوی

د ټویټر اجراییه رییس ایلون ماسک

د امریکا یو شمېر جمهوریپالو وکیلانو د ټویټر اجراییه رییس ایلون ماسک ته د طالبانو د ځینو چارواکو د تایید شویو حسابونو په اړه خبرداری ورکړی دی.

د واشنګټن ټایمز ورځپاڼې د راپور له مخې د استازو جرګې غړو پات فالون، کیت سیلف، روني جکسن او جیمز مویلان په یوه لیک کې ماسک پوښتلی دی چې ټویټر څنګه د دوی په وینا د شریرو عناصرو له خوا د دې ټولنیزې شبکې د ناوړه کارولو مخه نیسي او د ابي رنګه علامې په وسیله د حسابونو د تایید په بهیر کې د حساب لرونکو هویت څنګه چک کوي.

ماسک وروسته له دې چې د ټویټر اجراییه رییس شو د شخصي حسابونو د تایید لپاره بیه وټاکله چې ورسره د طالبانو ځینو چارواکو هم د خپلو ټویټر حسابونو لپاره د تایید ابي علامه وپېرله.

دې کار ځینې خلک اندېښمن کړل چې ښايي له ټویټر څخه د نفرت د خپرولو لپاره کار واخیستل شي.

په ترکیه او سوریه کې د پرونۍ زلزلې د مړو شمېر ۵۰۰۰ کسانو ته ورسېد

د اسوشېټېډپرېس خبري اژانس د راپور له مخې یوازې په ترکیه کې له ۶۰۰۰ زیاتې ودانۍ نړېدلي چې لا یې هم تر لاندې د پاتې کسانو د ژغورنې عملیات روان دي.

په ترکیه او سوریه کې د پرونۍ زلزلې د مړو شمېر ۵۰۰۰ او د ټپیانو زرګونو ته ورسېد.

د رویټرز خبري اژانس د راپور له مخې په ترکیه کې د دې خونړۍ زلزلې د مړیو شمېر ۳۴۰۰ او د ټپیانو شمېر ۲۰ زرو ته رسېدلی.

په سوریه کې د مړو شمېر له ۱۶۰۰ اوښتی او زرګونه نور ټپیان شوي دي.

د اسوشېټېډپرېس خبري اژانس د راپور له مخې یوازې په ترکیه کې له ۶۰۰۰ زیاتې ودانۍ نړېدلي چې لا یې هم تر لاندې د پاتې کسانو د ژغورنې عملیات روان دي.

اژانس د ملګروملتونو په حواله ویلي چې په سوریې کې هم ۲۲۴ ودانۍ نړېدلي او ۳۲۵ نورې زیانمنې شوي دي.

پرونۍ زلزله د ۱۹۹۹ کال له زلزلې وروسته چې له ۱۷ زره زیات کسان یې ووژل، د ترکیې تر ټولو خونړۍ زلزله ده.

د پاکستان له یو زندانه ۴۰ نور افغانان خوشې شوي

ارشیف: د کراچۍ په یوه زندان کې بندي افغانان

د پاکستان د سند ایالت له یو زندانه د ۴۰ نورو افغانانو د خوشې کېدو خبر ورکړل شوی دی.

باختر خبري اژانس چې د طالبانو حکومت یې اداره کوي نن د کډوالو او راستنېدونکو چارو وزارت د بیان په حواله راپور ورکړ چې دا کډوال په پاکستان کې د افغان سفارت او په اسلام اباد کې د کډوالو د ادارې د هڅو په نتیجه کې خوشې شوي دي.

په بیان کې راغلي چې ټول خوشې شوي کسان به ډېر ژر د سپین بولدک د دروازې له لارې افغانستان ته واستول شي.

بیان زیاتوي چې د کراچۍ په لندي او پېچي محبسونو کې د ۱۶۰ نورو افغانانو د خوشې کولو هڅې هم روانې دي او ښايي اړونده محکمه تر دوو درېیو ورځو د هغوی د خوشې کولو حکم وکړي.

په کراچۍ کې د افغان بندیانو مدافع وکیلې منیزې کاکړ له دې مخکې ازادي راډیو ته ویلي و چې د کراچۍ په مرکزي زندان کې ۱۴۰۰ افغانان لاهم بندیان دي.

په ترکیه او سوریه کې د زلزلې د قربانیانو شمېر نږدې څلور نیم زرو ته ورسېد

اسوشېټېډپرېس خبري اژانس لیکلي، یوازې ترکیه کې له ۵۶۰۰ ډېرې ودانۍ ویجاړې شوي چې لا یې هم تر لاندې د بند پاتې شویو کسانو د ژغورنې عملیات روان دي.

په ترکیه او سوریه کې د خونړۍ زلزلې د قربانیانو شمېر نږدې څلور نیم زرو ته ورسېد.

رویټرز اژانس لیکلي چې نږدې ۳۰۰۰ کسان په ترکیه او لږ تر لږه ۱۴۴۴په سوریه کې مړه شوي دي.

اسوشېټېډپرېس خبري اژانس لیکلي، یوازې ترکیه کې له ۵۶۰۰ ډېرې ودانۍ ویجاړې شوي چې لا یې هم تر لاندې د بند پاتې شویو کسانو د ژغورنې عملیات روان دي.

دغه اژانس د ملګرو ملتونو په حواله ویلي چې د سوریې دننه هم ۲۲۴ ودانۍ نړېدلي او ۳۲۵ نورې تخریب شوي دي.

په ترکیه او سوریه کې د ټپيانو شمېر هم له ۱۶ زرو ډېر ښودل شوی دی.

د ترکیې ولسمشر رجب طیب اردوغان چې په مې میاشت کې سخت انتخابات په مخکې لري، دا زلزله تاریخي وبلله خو ویې ویل چې چارواکي به له مصیبت ځپلو سره تر وسې وسې مرستو ته اوږه ورکړي.

د اسټرالیا د شل اوریزو لوبډلمشر له نړیوال کرکټ تقاعد اعلان کړ

ایرون فينچ

د اسټرالیا کرکټ ملي لوبډلې د شلو اورونو لوبډلمشر ایرون فينچ له نړیوال کرکټ لاس په سر شو.

فينچ د کرکټ په ټولو فارمټونو کې د اسټرالیا لپاره ۲۵۴ نړیوالې سیالۍ ترسره کړې.

هغه په ۵ ټېسټ، ۱۴۶ یو ورځنیو او ۱۰۳ نړیوالو شل اوریزو سیالیو کې ولوبېده.

اسټرالیا په ۲۰۲۱ کال کې د ایرون فینچ په لوبډلمشرۍ د شل اوریزو سیالیو لومړنی نړیوال جام ګټلی و.

نوموړی په نړیواله کچه یوازینی لوبغاړی و چې د یوه هېواد لپاره په ۷۶ نړیوالو سیالیو کې لوبډلمشري کوي.

هغه د اسټرالیا په میلبرن کرکټ لوبغالي کې رسنیو ته ویلي دي: "په دې وپوهېدم چې د شل اوریزو سیالیو په راروان نړیوال جام کې چې په ۲۰۲۴ کال کې به ترسره شي، ونه لوبېږم، نو په همدې خاطر غواړم نړیوال کرکټ پرېږدم څو لوبډله راروان جام ته خپل پلان چمتو کړي."

ایرون فینچ په ۲۰۱۱ کال د انګلنډ پر وړاندې لومړنۍ نړیواله شل اوریزه سیالي ترسره کړه چې ټولټال یې په یو ورځنیو او شل اوریزو لوبو کې ۸۸۰۴ منډې وکړې.

هغه په یو ورځنیو لوبو کې ۱۷ او په شل اوریزو سیالیو کې دوه سلیزې وهلي دي.

فینچ د شل اوریزو سیالیو په یوه پاڼۍ کې ۱۷۲ منډې کړې وې چې دا نړیوال ریکارډ یوازې د هغه په نوم ثبت دی.

د یادونې ده چې ۳۶ کلن فینچ ۱۲ کاله په نړیوال کرکټ کې ولوبېده.

د اسلامي همکاریو سازمان د افغانستان په اړه بحث کوي

ارشیف: د اسلامي همکاریو د سازمان د غړو هېوادونو د مشرانو انځور

د اسلامي همکاریو د سازمان یا او ای سي عمومي منشي حسین ابراهیم طه وايي چې په افغانستان کې روان بدلونونه د فلسطین په څېر د دې سازمان د اجراییه کمېټې د فوق العاده جلسې مهمه برخه ده.

ښاغلي طه دا څرګندونې د اسلامي همکاریو د جګپوړو چارواکو د ۴۹مې غونډې په درشل کې پرون د دې سازمان مقدماتې غونډې ته د وینا پرمهال وکړې.

په پام کې ده چې د بهرنیو چارو د وزیرانو ۴۹مه غونډه د راروانې مارچ میاشتې په ۱۶مه او ۱۷مه جوړه شي.

طه بېګا په یوه بیان کې وویل چې په پرونۍ غونډه کې د افغانستان لپاره د دې سازمان د استازي طارق علي بخیت له لارې د طالبانو له چارواکو سره د تعامل د اړتیا په ګډون یو لړ سپارښتنې وشوې.

د اسلامي همکاریو سازمان د مرغومي په ۲۱مه له یوې بېړنۍ غونډې وروسته په یوه بیان کې د طالبانو له حکومته وغوښتل چې د نجونو تعلیم او د ښځو کار ته اجازه ورکړي.

د اسلامي همکاریو سازمان وویل چې د پوهنتون په ګډون تعلیم ته د نجونو لاسرسی د بشر اساسي حق دی او باید محدود نه شي.

یونېسف: افغانستان د تېرو ۱۵ کلونو له تر ټولو سخت ژمي سره مخامخ دی

ارشیف: په کابل کې بېوزله ښځې او ماشومان

د ملګرو ملتونو د ماشومانو د ملاتړ د صندوق یا یونېسف د اجراییه مرستیال وايي، افغانستان د تېرو ۱۵ کلونو له تر ټولو سخت ژمي سره مخامخ دی.

عمر عبدي په یوه بیان کې چې پرون یې پر ټویټر خپور کړ ویلي چې د افغانانو بشري اړتیاوې خورا زیاتې دي.

د یونېسف دې چارواکي ویلي چې که له افغانانو سره مرستې ونه شي نو یو بشري ناورین به رامنځته شي.

د عبدي په وینا دا مهال شاوخوا ۲۸ میلیون افغانان مرستو ته اړ دي.

دا څرګندونې داسې مهال کېږي چې د ملګرو ملتونو بېلابېلو ادارو هم په سږني ژمي کې بشري مرستو ته د افغانانو پر جدي اړتیاوو ټینګار کړی.

ګڼو رسنیزو ادارو له طالبانو د 'مرتضی بهبودي' د خوشې کولو غوښتنه کړې

ارشیف

د بې سرحده خبریالانو ټولنې یا ار ایس ایف او د فرانسې ۱۴ رسنیو او تولیدي شرکتونو د طالبانو له حکومته غوښتي دي چې افغان الاصله فرانسوی خبریال مرتضی بهبودي له بنده خوشې کړي.

دې ټولنې دا غوښتنه پرون په یوه بیان کې وکړه.

ار ایس ایف وايي، بهبودي نږدې یوه میاشت مخکې په کابل کې نیول شوی او بندي شوی دی.

د خبریالانو دا مدافع ټولنه وايي چې بهبودي دوه ورځې وروسته له دې چې د سفر په نیت افغانستان ته ولاړ، د جنوري په ۷مه د طالبانو له خوا ونیول شو.

طالبانو تراوسه په دې اړه څه نه دي ویلي.

طالبانو د ۲۰۲۱ کال په اګست میاشت کې پر افغانستان له واکمنېدو وروسته یو شمېر خبریالان ونیول چې ځینې یې وروسته خوشې کړل. تراوسه د طالبانو له خوا د نیول شویو خبریالانو دقیق شمېر نه دی معلوم.

نور راوښيه

XS
SM
MD
LG