د لاسرسۍ وړ لېنکونه

تازه خبر
دوشنبه ۱۷ سلواغه ۱۴۰۱ کابل ۱۱:۴۵

خبرونه

د کابل په هوايي ډګر کې درې کسان له هيرويينو سره ونيول شول

د کابل د هوايي ډګر امنیتی مسوولین وایی ، درې کسان چی غوښتل یی په خپلو خیټو کی د کپسول په شکل هیرویین هندوستان ته قاچاق کړي، نیول شویدي.

د کابل دنړیوال هوایي ډګر د سرحدی پولیسو قومندان جنرال محمد جمعه عدیل نن رسنیو ته وویل، دا درې تنه د نیمروز ولایت اوسیدونکي دي او په خپلو خیټو کې یې له درېیو کیلوګرامه ډیر مخدره مواد ځاي کړي و.

نوموړي وویل چې په وروستیو دریو څلور میاشتو کې دوه نور کسان هم د کابل په هوايي ډګر کې د مخدره موادو د قاچاق په تور نیول شوي دي.

بله خوا په ننګرهار ولایت کې امنيتي کسانو زر لیټره تیزاب چې د هیرویینو په جوړولو کې ورڅخه کار اخیستل کیږي، نیولې دي.

د ننګرهار امنيه قومندان مل پاسوال محمد شريف امين خبریالانو ته وویل، ددوي ځواکونو د بهسودو ولسوالۍ په رينګ روډ سيمه کې پنځوس بوشکې تیزاب نيولي دي.

امین وايي، ددغو تیزابو په تړاو دوه کسان هم نیول شوي دي.

د ورځې تازه خبرونه دلته ولولئ

ترکيه کې د زلزلې له امله ۷۶ کسان مړه شوي

ترکيه کې د زلزلې انځور

په ترکیه او سوریه کې د نن سهار په زلزله کې د مړو شمېر په زیاتېدو دی.

د رویترز اژانس په وینا، د ترکیې د طبیعي افتونو په وړاندې د مبارزې ادارې تر اوسه د څه باندې ۷۶ کسانو مړینه او د ۴۴۰ نورو ټپي کېدل تایید کړي دي.

اسوشېټېډ پریس اژانس بیا راپور ورکړی، چې څه باندې ۹۹ کسان په سوریه کې مړه شوي او ۳۳۴ تنه نور ټپیان شوي دي.

اټکل کېږي، چې د مړو شمېر به تر دې خورا زیات وي، ځکه په ترکیه او سوریه کې لا هم ګڼ کسان تر نړېدلو ودانیو لاندې راګیر پاتې دي.

د امریکا د جیولوژیکي سروې اداره وايي، دا زلزله د ریښتر په مقیاس اووه اعشاریه اته درجې وه.

د امریکا د جیولوژیکي سروې ادارې په وینا، د زلزلې مرکز د سوریې د پولې په ۹۰ کیلومترۍ کې د ترکیې په غازي عینتاب کې و.

د زلزلې ټکانونه، په لبنان او قبرس کې هم احساس شوي دي.

يونان کې د کښتۍ ډوبېدو پېښه کې څلور پناه غوښتونکي مړه شوي

د یونان ساحلي ساتونکي وايي، چې د درېیو ماشومانو په ګډون څلور پناه غوښتونکي وروسته له هغې مړه شول چې کښتۍ یې پرون د اژه سمندرګي په جنوب شرق کې له لیروس ټاپو دباندې ډوبه شوه.

چارواکو ویلي، چې ماشومانو په روغتون کې تر بستر کېدو وروسته ساه ورکړه.

د یونان یوه چارواکي ویلي، چې دغه کښتۍ له ترکیې روانه شوې وه.

د دغو پناه غوښتونکو هویت نه‌دی مشخص شوی.

د هسپانیا او ایټالیا تر څنګ یونان له منځني ختیځ، افریقا او اسیا څخه اروپا ته د داخلېدو لپاره د پناه غوښتونکو عمده لار ده.

د روسيې د بهرنيو چارو وزير عراق ته تللی

د روسیې د بهرنیو چارو وزیر سرګی لاوروف

د روسیې د بهرنیو چارو وزیر سرګی لاوروف پرون ناوخته پر انرژۍ او د خوړو پر خوندیتوب د خبرو لپاره عراق ته ورسېد.

دا خبره د عراق د بهرنیو چارو وزارت ویاند احمد الصحاف کړې ده.

لاوروف د یوه لوی هیئت مشري کوي.

الصحاف د فرانسې خبري اژانس ته ویلي، په دې هیئت کې د تېلو او ګازو د کمپنیو استازي دغه راز پانګه‌وال شامل دي.

د روسیې د بهرنیو چارو وزیر به نن دوشنبه له خپل عراقي سیال فواد حسین سره وګوري.

د واورو له امله له کابل سره د ډايکنډي، غور او باميان ولايتونو لارې تړل شوي

ارشيف

د دایکنډي، غور او بامیان ولایتونو لپاره د طالبانو چارواکو پرون ویلي، سخت اورښتونه او توفانونه له کابل سره د دغو ولایتونو د لارو د تړل کېدو سبب شوي دي.

د غور لپاره د طالبانو د والي ویاند عبدالواحد حماس پرون د غور-کابل د لویې لارې د تړل کېدو موضوع تایید کړه او وايي د مرکز او شپږو ولسوالیو ترمنځ لارې هم بندې دي.

د بامیان لپاره د طالبانو چارواکو هم د دایکنډي، غور او بامیان ولایتونو له اوسېدونکو غوښتنه کړې، چې د هوا د وضعیت تر ښه کېدو پورې د دغو ولایتونو پر لویو لارو له سفر کولو ډډه وکړي.

والسټریټ ژورنال: روسيه او ايران د بې‌پيلوټه الوتکو د توليد پلانونه پر مخ وړي

د ايران يوه بې‌پيلوټه الوتکه

روسیه او ایران غواړي هغه پلانونه مخته یوسي چې له‌مخې به یې په روسیه کې د ایران ساخت د شاوخوا شپږ زره هغو بې‌پیلوټه الوتکو تولید پیلیږي چې مسکو په اوس وخت کې ورڅخه د اوکراین په جګړه کې کار اخلي.

دا خبر پرون یکشنبې امریکایي والسټریټ ژورنال ورځپاڼې د امریکا د متحدو ایالتونو د یوه متحد چې نوم یې نه‌دی اخیستل شوی، د چارواکو له قوله ورکړی دی.

دغو چارواکو ویلي چې مسکو او تهران هڅه کوي چې یوه چټکه بې‌پیلوټه الوتکه تولید کړي چې په ښه توګه د اوکراین د هوايي مدافعې ځواک چلنج کړي.

واشنګټن تېره میاشت خبرداری ورکړ چې مسکو او تهران په روسیه کې د بې‌پیلوټه الوتکو د جوړولو د یوې فابریکې پر جوړولو غور کوي.

د روغتيا سازمان: هر افغان ماشوم بايد د پوليو ضد واکسين شي

ارشيف

د روغتیا نړیوال سازمان یا WHO وایي، له پولیو څخه د یوه خلاص افغانستان لپاره اړینه ده چې کوچني ماشومان د پولیو ضد واکسین په هر کمپاین کې واکسین شي.

WHO پرون په یوه ټویټ کې ویلي، پولیو یوه ناعلاجه ناروغي ده خو یوازې هغه مهال یې مخه نیول کېدای شي چې ټول له پنځو کلونو کم‌عمره ماشومان په هر کمپاین کې د پولیو پر ضد واکسن شي.

د روغتیا د نړیوال سازمان په وینا په دې کار سره یوازې خپل ماشومان نه ساتئ بلکې د ټولو لپاره یوه سالمه او خوندي ټولنه هم رامنځته کوئ.

د پولیو ضد د واکسین په هغه کمپاین کې چې په تېره جنوري میاشت کې د افغانستان په شاوخوا پنځلسو ولایتونو کې ترسره شو، له پنځو کلونو کم‌عمره ۵،۳ ملیونه ماشومان په نښه شوي و.

په افغانستان کې چې تېر۲۰۲۲ کال د پولیو دوه مثبتې پېښې ثبت شوې وې، سږ کال تر اوسه د پولیو هیڅ یوه پېښه نه‌ده ثبت شوې.

د روغتیا د نړیوال سازمان په وینا تېر کال پاکستان کې د پولیو۲۰ او موزمبیق کې اته مثبتې پېښې ثبت شوې وې.

اوچا: افغانستان کې مرستو ته اړتيا ډېره شوې ده

ارشيف

د ملګروملتونو د بشري مرستود همغږۍ اداره یا اوچا وایي، سره له‌دې چې تېر۲۰۲۲کال مرستندویه ادارو په افغانستان کې ۲۵،۳ ملیون وګړو ته مرستې رسولي خو اړتیاوې لا هم خورا زیاتې دي.

اوچا پرون په یوه ټویټ کې ویلي، په بې‌ساري توګه د تېر کال له غبرګون سره سره د سږني ۲۰۲۳ کال لید مبهم او ستونزمن ښکاري.

اوچا ویلي، د یوه تر ټولو ناوړه حالت د مخنیوي لپاره عاجل تمویل او یوه مناسب عملیاتي چاپيریال ته اړتیا ده.

اوچا دغه څرګندونې داسې مهال کوي چې په غیردولتي مؤسسو کې پر ښځینه کارکونکو د طالبانو له لوري د لګول شوي بندیز له کبله ډېرو مرستندویه ادارو په دې هېواد کې خپل فعالیتونه یا بشپړ او یاهم جزي درولي دي.

د کډوالو عالي کمېشنري: پکتيکا او خوست کې مو زرګونه زلزله‌ځپلو ته سرپناوې برابر کړي

په پکتیکا کې د یو این ایچ سي آر له لوري نوي جوړ شوي کورونه

د ملګروملتونو د کډوالو عالي کمېشنرۍ، UNHCR وایي، په پکتیکا او خوست ولایتونو کې یې د هغو په زرګونو کسانو لپاره ګرمې سرپناوې برابرې کړي دي چې کورونه یې د تېرې سرطان میاشتې په زلزله کې ویجاړ شوي و.

د افغانستان لپاره د UNHCR څانګې پرون په خپله ټویټرپاڼه کې په دې اړه چې دغې ادارې زیانمن شویو کسانو ته څومره ګرمې سرپناوې برابرې کړي نور جزیات نه‌دي ورکړي.

خو يادې ادارې ویلي یې دي، مخکې له دې چې ژمی پیل شي، د پکتيکا په ګیان ولسوالۍ کې یې له اوو زره ډېرو کورنیو سره د نغدو پیسو او د کورنیو توکو مرستې کړي دي.

د ملګروملتونو د کډوالو د عالي کمېشنرۍ په وینا د دغو مرستو چې د قزاقستان له‌خوا برابرې شوې، هدف دا و چې هره کورنۍ د ځان لپاره د سونګ موادو د اخیستو وس او هم په ژمي کې د تودوخي لپاره وسایل ولري.

دغې زلزلې د پکتیکا ګیان او برمل ولسوالیو او د خوست سپیرې ولسوالۍ خلکو ته درانه ځاني او مالي زیانونه اړولي و.

روزا اوتونبايووا: حرفوي زده‌کړې د افغانستان د اقتصادي پرمختګ لپاره مهمې دي

د افغانستان لپاره د ملګروملتونو د سرمنشي ځانګړې استازې او د یوناما مشره روزا اوتونبایووا

د افغانستان لپاره د ملګروملتونو د سرمنشي ځانګړې استازې او د یوناما مشره روزا اوتونبایووا وایي، حرفوي زده‌کړې د افغانستان د اقتصادي پرمختګ لپاره ډېرې مهمې دي او ښځې او نجونې باید په‌کې ونډه ولري.

یوناما پرون یکشنبې په یوه ټویټ کې ویلي، چې مېرمن اوتانبایووا د افغانستان د تخنیکي او مسلکي زده‌کړو له ادارې څخه کتنه ترسره کړه ترڅو د دغې ادارې د فعالیتونو په اړه معلومات ترلاسه کړي او په دې هم پوه شي چې څومره نجونو ته د حرفوي زده‌کړو امکانات برابر شوي دي.

د طالبانو د دغې ادارې مشر مولوي غلام حیدر شهامت د دغې کتنې په اړه په یوه ټویټ کې یوازې دومره ویلي چې، ځوان نسل ښه استعدادونه لري چې ورڅخه کار نه‌دی اخیستل شوی خو اداره یې اوس دې ته ژمنه ده چې د هر هغه ځوان ملاتړ به کوي چې د وطن لپاره د خدمت اراده ولري.

نوموړي د نجونو د زده‌کړې یادونه نه‌ده کړې خو د دې ادارې مرستیال، مولوي غلام سعید احساس په یوه جلا ټویټ کې ویلي، د ښځو د زده‌کړې او کار ستونزه به ډېر ژر هواره شي او هیله یې ښودلې چې د علم زده‌کړه له سیاست جلا شي.

طالبانو چې له مخکې یې نجونې او ښځې له شپږم ټولګي پورته له لوړو زده‌کړو بې برخې کړي، په تېره ډسمبر میاشت کې په غیردولتي مؤسسو کې یې د ښځو پر کار هم بندیز ولګاوه.

د طالبانو حکومت: له ازبکستان به د ريل‌ګاډي خدمات بېرته پيل شي

ارشيف

د طالبانو د حکومت د اوسپنې پټلۍ د ادارې چارواکي وایي، روانه اونۍ یو پلاوی ازبکستان ته ځي چې له دې هېواده د افغانستان حیرتان - مزارشریف پر غځول شوې د ریلګاډي پر پټلۍ د سوداګریزو توکو د انتقالاتو ستونزه حل کړي.

د دې ادارې ویاند سمیع دراني تېره ورځ ازادي راډیو ته وویل چې، له ازبکستان لوري سره د اسلامي امارت د اړوندو ادارو په ګډون د جوړې شوې کمېټې په وروستیو څو غونډو کې موافقه شوې چې د دغه پټلۍ مدیریت او ټولې چارې به افغانستان ته سپارل کېږي.

نوموړي وويل: "یو اکشن پلان ترتیب شوی دی. د دغه اکشن پلان پر اساس باید یوه تفاهم نامه له ازبکستان سره نهایي او لاسلیک شي. د دغې تفاهم نامې له‌مخې به د ازبکستان حیرتان پټلۍ ځینې چارې ازبکستان ته سپارل کېږي. تمه ده په دغه سفر کې به دغه موافقه نهایي شي او ان‌شاالله له حیرتان مزارشریف د وسپنې پټلۍ څخه به د سوداګریزو توکو انتقالات بېرته پیل شي."

د ازبکستان د ریل پټلۍ ادارې تېره اوونۍ اعلان وکړ چې، د دغې پټلۍ فعالیت یې له دې کبله ځنډولی چې افغانستان نه‌دی توانېدلی چې پر وخت د دغې پروژې تخنیکي ساتنه وکړي.

نور راوښيه

XS
SM
MD
LG