د لاسرسۍ وړ لېنکونه

تازه خبر
دوشنبه ۱۰ سلواغه ۱۴۰۱ کابل ۰۱:۵۸

افغانستان

د افغانستان د انتخاباتو د خپلواک کمیسیون رئیس خبرداری

د انتخاباتو د خپلواک کمیسیون رئیس خبرداری ورکړ، چې د ۲۰۱۴ کال د انتخاباتو په مهال به په ناامنو سیمو کې د رایو صندقونه کېنه ږدي.

فضل احمد معنوي نن له خبریالانو سره په خبرو کې د شفافو انتخاباتو لپاره سراسري امنیت مهم وباله او ویې ویل، امنیي ارګانونه باید په دې اړه اقدامات وکړي:

(په کوم ځای کې چې امنیت یې نه وي نیول شوی، هلته د رایي ورکولو صندوق نه اږدم.

امنیتي مسولین مکلفه دي چې د رایي د مرکزونو امنیت ونیسي. زما د کارکونکو امنیت ټینګ کړي.

د رايي ورکونکي امنیت ټينګ کړي او د کاندیدانو امنیت ونیسي. )

ښاغلي معنوي زیاته کړه، چې تر راتلونکو څو ورځو پورې به د رايي ورکولو د مرکزونو لسټ له امنیتي ارګانونو سره شریک کړي.

د افغانستان د جمهوري ریاست او ولایتي شوراګانو انتخابات د ۱۳۹۳ کال د حمله په شپاړلسمه ترسره کیږي.

د ورځې تازه خبرونه دلته ولولئ

په کونړ کې د یوه کور د چت پرېوتو پېښه کې ۳ کسان مړه شوي

ارشیف

د کونړ په شیګل ولسوالۍ کې تر سخت اورښت وروسته د یوه کور د چت د پرېوتو په پېښه کې ۳ وړې نجونې مړې شوې دي.

په کونړ کې د طبیعي پېښو پر وړاندې د مبارزې ادارې یوه کارکوونکي احسان الله نن یکشنبه ازادي راډیو ته ویلي، دغه چت سهار وختي درې بجې پرېوتی، چې په نتیجه کې یې د ښځو او ماشومانو په ګډون ۶ نور کسان ټپیان شوي دي.

د طبیعي پېښو پر وړاندې د مبارزې لپاره د دولت وزارت چې د طالبانو په کنټرول کې دی، وايي په تېرو درېیو اوونیو کې د بېلابېلو پېښو په نتیجه کې د مړو شمېر ۱۶۶ کسانو ته رسېدلی دی.

نن او سبا هم د افغانستان په مرکزي سیمو کې د اورښتونو اټکل شوی دی.

ایټالیا کې پر افغان ښځو د لګول شویو محدودیتونو پر خلاف لاریون شوی

په ایټالیا کې د پي ټي ایم د اروپا څانګې د لاریون کوونکو پلویانو انځور

د پښتون ژغورنې غورځنګ یا پي ټي ایم اروپايي څانګې په لسګونه پلویانو پر افغان نجونو او ښځو د تعلیم او کار د محدودیتونو خلاف په ایټالیا کې لاریون وکړ.

د پي ټي ایم یوه غړي عبدالله احسان ازادي راډیو ته ویلي، د لاریون برخه والو له طالبانو غوښتنه وکړه چې د نجونو او ښځو د تعلیم، تحصیل او کار حق دې نه ځنې اخیستل کېږي.

لاریونوالو له نړیوالې ټولنې هم وغوښتل چې په دې برخه کې دې پڅ چلند نه کوي، بلکې خپل دریځ دې قاطع او روښانه کړي.

دا لاریون داسې وخت کېږي چې د طالبانو د لوړو زده کړو وزارت پرون شنبه نادولتي پوهنتونونو ته هم امر وکړ چې د کانکور په راروانو ازموینو کې نجونو او ښځو ته د ګډون حق ورنه کړي.

شاوخوا ۵۰۰ ورځې کېږي چې نجونې په افغانستان کې تر شپږم ټولګي پورته نور تعلیم نه شي کولای، تېره میاشت ښځې او نجونې پوهنتونو ته له تګ هم منع شوې او په نادولتي موسسو کې د ښځو پر کار هم بندیز ولګېد.

د ارزګان په چورې کې یو ځوان ځان وژلی

د افغانستان په عمومي نقشه کې د ارزګان ولایت موقعیت

د ارزګان په چورې ولسوالۍ کې د یوه ځوان د ځانوژنې خبر ورکړل شوی دی.

د ارزګان لپاره د طالبانو د والي ویاند احسان الله حماس ازادي راډیو ته ویلي، دغه پېښه پرون ناوخته په جنوبي قلعه راق سیمه کې شوې ده.

ویل شوي دغه ځوان ځان د کلاشینکوف په ډزو سخت ټپي کړی، وروسته یې د سختو ټپونو له کبله ساه ورکړې ده.

د طالبانو د والي ویاند وايي، د پېښې انګېزه معلومه نه ده، خو په سیمه کې ځینو کسانو ویلي، دغه ځوان وروسته له هغې ځان وژنه وکړه، چې د تره لور ده ته په نکاح نه کړای شوه.

د سالنګ لویه لار د لویو موټرو پرمخ تړل شوې

د سالنګ لویې لارې یوه څنډه

په سالنګونو کې د درنې واورې له امله لویه لار د لویو موټرو پرمخ تړل شوې ده.

د طالبانو د حکومت له پېښو سره د مبارزې د وزارت چارواکو تېره شپه ناوخته ازادي راډیو ته وویل چې په سالنګونو کې یوازې کوچنیو موټرو ته د تګ راتګ اجازه شته.

د هوا پېژندنې د یو شمېر نړیوالو ادارو له اټکل سره سم نن به په سالنګونو کې درنه واوره اوري او سبا به لږ سپکه واوره ورېږي.

مارټین ګریفیټس د افغانستان په اړه خپل راپور ملګرو ملتونو ته وړاندې کوي

د ملګرو ملتونو د بشري مرستو د همغږۍ د ادارې مشر مارټین ګریفیټس

ټاکل شوې ده چې د ملګرو ملتونو د بشري مرستو د همغږۍ د ادارې مشر مارټین ګریفیټس سبا ملګرو ملتونو ته د افغانستان په اړه خپل راپور وړاندې کړي.

د ملګرو ملتونو د سرمنشي یوه ویاند سټیفین دوجاریک خبریالانو ته وویل چې دا غونډه به د نیویارک په وخت د سهار په یولسو بجو ترسره شي چې په دې غونډه کې به د ماشومانو د ژغورنې د ادارې اجراییه رییس جانتي سورپیو او د ماشومانو د وجهي صندوق مرستیال عمر عبدي هم برخه واخلي، همداراز به د پاملرنې موسسې مشره سوفیا پینیرو په دې غونډه کې انلاین ګډون وکړي.

د مارټین ګریفیټس په مشرۍ د ملګرو ملتونو پلاوی د افغانستان بشري وضعیت ته تر اندېښنو وروسته او د طالبانو له لوري په نادولتي موسسو کې د مېرمنو د کار له بندیز وروسته تېره اونۍ کابل ته ولاړ او د طالبانو له یو شمېر چارواکو سره یې وکتل.

د افغانستان بانک ۱۶ میلیونه ډالر لیلاموي

د افغانستان بانک

د افغانستان بانک غواړي چې نن ۱۶ میلیونه ډالر لیلام کړي.

دغه بانک د دې ډالرو د لیلام خبر پرون په ټویټر کې خپور کړ.

د افغانستان بانک له سوداګریزو بانکونو او د صرافۍ او پولي خدمتونو له شرکتونو غوښتې دي چې په دې داوطلبي کې برخه واخلي.

د افغانستان بانک تېره اونۍ هم ۱۵ میلیونه ډالر لیلام کړل.

دغه بانک د دې لپاره بازار ته ډالر د لیلام لپاره عرضه کوي چې د ډالر په وړاندې د افغانۍ ارزښت وساتي.

د کابل په شهزاده سرای کې پرون د بازارونو د تړلو تر وخت پورې یو امریکایي ډالر په نهه اتیا افغانیو او شپېتو پولو تبادله شو.

کرکټ؛ افغانستان د متحده عربي اماراتو پر وړاندې لوبې کوي

د افغانستان د کرکټ لوبغاړي

د افغانستان کرکټ بورډ د درې شل اوریزو سیالیو لپاره د عربي متحده اماراتو پر وړاندې لوبډله اعلان کړه.

کرکټ بورډ نن شنبه په یوې خبرپاڼه کې لیکلي چې دا سیالۍ به د فبرورۍ میاشتې په ۱۶مه، ۱۸مه او ۱۹مه نېټو ترسره شي.

په اعلان شوې لوبډله کې راشد خان، رحمن الله ګربز، عبدالرحمن رحماني، افسر ځاځی، عظمت الله عمرزی، بلال سمیع، فرید احمدملک، فضل الحق فاروقي، ګلبدین نایب، حضرت الله ځاځی، ابراهیم ځدراڼ، مجیب الرحمن، نجیب الله ځدراڼ، ننګیال خروټی، نوین الحق، نجات مسعود، نور احمد، رحمت شاه، صدیق الله اتل، شاهد الله کمال، شرف الدین اشرف او ظاهر خان شامل دي.

کرکټ بورډ زیاتوي چې اعلان شوې ۲۲ کسیزه لوبډله به لومړی په متحده عربي اماراتو کې تمریناتي کمپ ترسره کړي او تر کمپ وروسته به ۱۵-۱۷ لوبغاړي سیالیو ته غوره شي.

د دواړو کرکټ ادارو له هوکړې سره سم به درې واړه سیالۍ په ابوظبۍ لوبغالي کې ترسره شي.

کرکټ بورډ ادارې دغه راز ویلي: "دغه سیالۍ د افغانستان او متحده عربي اماراتو د کرکټ بورډونو ترمنځ د دوه اړخیزو همکاریو دتړون له مخې، چې څه موده وړاندې د دواړو هېوادونو ترمنځ لاسلیک شو، ترسره کېږي. د یاد تړون له مخې به د افغانستان کرکټ مليلوبډله هر کال د متحده عربي امارتو پر وړاندې درې شل اوریزې نړیوالې سیالۍ ترسره کوي چې په بدل کې به یې د افغانستان کرکټبورډ په یاد هېواد کې د لوبو د اجازې له فیسونو پرته د نورو لوبډلو کوربه توب کوي."

د یادونې وړ ده چې دا په ۲۰۲۳ کال کې د افغان کرېکټ ملي لوبډلې لومړنی بهرنی سفر دی.

طالبان: په بېلابېلو پېښو کې د مړو شمېر ۱۶۶ کسانو ته رسېدلی

په غزني ښار کې د سږنۍ ورېدلې واورې انځور

د طبیعي پېښو په وړاندې د طالبانو وزارت وايي، د مرغومي یا جدي له ۲۰مې په بېلابېلو پېښو کې د مړو شمېر ۱۶۶ کسانو ته رسېدلی دی.

د دغه وزارت مالي او اداري رییس مولوي عبدالرحمن زاهد په هغه ویډیو کې چې نن رسنیو ته لېږل شوې ویلي، دغه کسان په سېلابونو، اورلګېدو او ګازو نیولو په پېښو کې مړه شوي دي.

هغه وویل: "د مرغومې له ۲۰مې تر اوسه د هېواد په ۲۴ ولایتونو کې ۱۶۶ کسان شهیدان،۲۲ کسان ټپیان شوي. تر ۱۰۰ زیات کورونه یا نیمه یا بشپړ ویجاړ شوي او نږدې ۸۰زره څاروي تلف شوي دي."

بلخوا د هوا پېژندنې د ځینو نړیوالو ادارو له اټکل سره سم سبا او بل سبا د کابل په ګډون د افغانستان په یو شمېر مرکزي او جنوبي سیمو کې واوره وورېږي.

خلیلزاد بیا د نجونو زده کړو په اړه د 'مولوي عبدالحمید' نوې څرګندونې وستایلې

ایرانی دیني عالم مولوي عبدالحمید

د افغانستان د سولې لپاره د امریکا متحده‌ایالاتو مخکېني ځانګړي استازي زلمي خلیلزاد یو ځل بیا له طالبانو غوښتي چې د نجونو د زده‌کړو او کار په اړه د ایراني دیني عالم مولوي عبدالحمید پيغام واوري.

پرون یو ځل بیا د مولوي عبدالحمید نوې وینا خپره شوې چې په کې یې د افغان نجونو له‌ زده‌کړو او کار ننګه کړې او په دې برخه کې په دوی بندیزونه غیرشرعي بللي.

خلیلزاد نن سهار په خپله ټویټرپاڼه لیکلي، دی د مولوي عبدالحمید له هغې خطبې ستاینه کوي چې په کې د نجونو او ښځو د زده‌کړې د ملاتړ او تر خوا یې په سړې هوا کې له افغانانو سره د بشري مرستو غوښتنه کوي.

مولوي عبدالحمید موده وړاندې هم یوه پیغام کې ویلي و، افغان نجونې شرعي حق لري چې زده‌کړه او کار وکړي.

افغانستان کې په جنګي جرمونو ټولو تورنو د محاکمې غوښتنه وشوه

ارشیف: په کابل کې له چاودنې وروسته د یوه سوځېدلي موټر انځور -March 17, 2018

د بشري حقونو د څار سازمان په افغانستان کې په جنګي جرمونو ټولو تورنو ته د سزا او د دوی د محاکمې غوښتنه کړې.

دې سازمان یوه اعلامیه کې چې د ۲۰۱۸ کال د جنورۍ په ۲۷مه یې د طالبانو له‌خوا د جمهوریت روغتون په مخ کې د ځانمرګي برید د قربانیانو په یاد خپره کړې، دا خبره کړې ده.

په دې برید کې چې له چاودېدونو توکو ډک امبولانس په کې د جمهوریت روغتون مخې ته والوځول شو، نږدې ۱۰۰ تنه ووژل شول چې اکثریت یې ملکیان وو.

د بشري حقونو د څار سازمان په دې اعلامیه کې د هغې نجلۍ یادونه کړې چې له برید وروسته یې له سترګو وینې روانې وې او ویل یې، کوڅه له جسدونو ډکه وه.

د بشري حقونو د څار سازمان همدا ډول په ځینو پېښو کې مخکېنی جمهوري دولت، متحده‌ایالات او د اسټرالیا په ګډون یو شمېر هېوادونه هم د ملکي تلفاتو اړولو برخه کې پړه ګڼي.

په دې اعلامیه کې زیاته شوې، وروسته تر دې چې طالبان بیا واک ته ورسېدل، اعدامونو او خپل‌سرو سزا ورکولو ته یې زور ورکړی او د دې جدي سرغړونو د پای ته رسولو لپاره یې هېڅ ګام نه دی اخیستی.

په دې اعلامیه کې غوښتل شوي چې په افغانستان کې دې په ټولو جدي سرغړونکو او په جنګي جرمونو تورنو عدالت تطبیق شي.

نور راوښيه

XS
SM
MD
LG