د لاسرسۍ وړ لېنکونه

تازه خبر
جمعه ۱۴ سلواغه ۱۴۰۱ کابل ۰۹:۵۳

افغانستان

په درېو ولایتونو کې ۹۰۰ کسانو ته د حرفوي زده کړو زمینه برابریږي

د افغانستان د کار، ټولنیزو چارو شهیدانو او معلولینو وزارت نن په دریو ولایتونو لپاره د حرفوي زده کړو تړونونه لاسلیک کړل.

دغه تړونونو د کندز، غور او لغمان لپاره له دوو خصوصي شرکتونو سره لاسلیک شول.

د کار او ټولنیزو چارو وزارت مرستیال ډاکټر حصام الدین همراه وویل؛ چې په دغو درو ولایتونو کې به په نهو میاشتو کې څه باند نه سوه کسان په شپاړسو کسبونو وروزل شي.

په دې پروژې څه باندې یوویشت ملیونه افغانۍ لګښت راځي؛ چې نړیوال بانک یې ورکوي.

د ورځې تازه خبرونه دلته ولولئ

ريچارد بېنيټ د استاد اسماعيل مشعل پر نيول کېدو اندېښنه ښودلې

د پوهنتون استاد اسماعيل مشعل چې خلکو ته يې وړيا کتابونه وېشل، د طالبانو له لوري نيول شوی دی.

د افغانستان د بشري حقونو لپاره د ملګرو ملتونو ځانګړي راپور ورکوونکي، ریچارد بېنیټ په کابل کې د پوهنتون د یوه استاد اسماعیل مشعل پر نیولو اندېښنه وښوده.

ښاغلي بېنیت نن په یوه ټویټ کې ویلي، د سوله‌ییزو مدني حرکتونو په نښه کول او مخنیوی د نه منلو او د افغانستان له تعهداتو سره په ټکر کې عمل دی.

د طالبانو حکومت یوه چارواکي اسماعیل مشعل، چې د طالبانو په توقیف کې دی، د نظام په تخریب تورن کړ.

د طالبانو د اطلاعاتو او فرهنګ وزارت د خپرونو مشر عبدالحق حماد پرون ناوخته په خپل ټویټر کې لیکلي: استاد مشعل «په ډېر مهارت د نظام پر ضد پاروونکي کړنې ترسره کولې، ګڼ خبريالان یې پر ځان راټول کړي وو او پر عمومي سړک يې ګڼه ګوڼه جوړه کړې وه، امنيتي ادارو د تحقيقاتو لپاره بېولی دی.»

استاد مشعل چې څه موده مخکې په یو مدني حرکت کې د نجونو او ښځو په وړاندې د پوهنتونونو د دروازو له تړل کېدو وروسته د یوه خصوصي ټلوېزیون په پروګرام کې خپل تحصیلي اسناد څيرلي وو، پرون په وړیا ډول د کتابونو د وېش پر مهال ونیول شو.

بنګله‌دېش غوره لیګ؛ کریم جنت په هره لوبه کې ښه ځلېدلی

ارشي

د افغانستان کرېکټ ملي لوبډلې لوبغاړي کریم جنت د بنګله‌دېش په غوره لیګ سیالیو کې تر دې دمه ښې لوبې کړي دي.

ښاغلی جنت چې د الراونډر په توګه لوبیږي، په توپ اچونه او توپ وهنه کې د خپلې لوبډلې لپاره ښه لوبېدلی دی.

نوموړی چې د فارټن باریشال لوبډلې غړی دی، نن(د فبرورۍ ۳مه) د خولنا ټایګرز لوبډلې پر وړاندې ۱۶ منډې وکړې او ۴ وېکټې یې ترلاسه کړې.

کریم جنت تر دې دمه په یاد لیګ کې ۱۰ لوبې ترسره کړي دي چې ټولټال یې ۱۳۹ منډې کړي دي او ۱۰ وېکټې یې اخستي دي.

هغه تر ډېره د لوبې په وروستیو شېبو کې توپ وهنې ته راځي او تر ډېره یې د خپلې لوبډلې ملا ورتړلې ده.

د دوی لوبډله اوس مهال د نومرو په جدول کې دویم ځای لري.

د یادونې وړ ده چې د بنګله‌دېش په غوره لیګ سیالیو کې نور افغان لوبغاړي عثمان غني، ابراهیم ځدراڼ او عظمت الله عمرزی هم ښه لوبېدلي دي.

پاکستاني چارواکي: د طالبانو له حکومت ترهګرۍ سره مبارزې برخه کې د همکارۍ تمه لرو

د طالبانو د حکومت او پاکستان هېواد بيرغونه

د پاکستان د بهرنیو چارو وزارت ویلي، په افغانستان کې د طالبانو له حکومته د ترهګرۍ په وړاندې د مبارزې په برخه کې د صادقانه همکارۍ تمه لري.

د بهرنیو چارو وزارت ویاندې ممتاز زهرا بلوچ پرون په اسلام اباد کې د اوونیزې خبري غونډې پر مهال د یوې پوښتنې په ځواب کې وویل، پاکستان هیله لري چې د طالبانو حکومت به د ترهګرۍ پر ضد هغه ژمنې پوره کړي چې له نړیوالې ټولنې سره یې کړې دي.

نوموړې دا څرګندونې تر هغې یوه ورځ وروسته وکړې چې د طالبانو د حکومت د بهرنیو چارو سرپرست وزیر امیر خان متقي هغه ادعاګانې ناسمې وبللې چې ګواکې د پېښور پر یوه جومات په برید کې د افغانستان خاوره کارول شوې وه.

د پاکستان د دفاع وزیر خواجه اصف د جنورۍ پر ۳۱مه د ملي اسمبلۍ غونډې ته ویلي، طالبانو د ۲۰۲۰ز کال د فبرورۍ پر ۲۹مه له امریکا سره د دوحې موافقه کې ژمنه کړې وه چې افغانستان به د نورو هېوادونو پرضد کارېدو ته نه‌پرېږدي، خو د پېښور په برید کې د هغه په وینا د افغانستان له خاورې کار اخیستل شوی دی.

طالبانو استاد اسماعيل مشعل د نظام پر تخريب تورن کړی دی

د پوهنتون استاد اسماعيل مشعل خپل زرګونه ټوکه کتابونه ډالۍ کوي.

د طالبانو حکومت یوه چارواکي د کابل پوهنتون استاد اسماعیل مشعل، چې د طالبانو په توقیف کې دی، د نظام پر تخریب تورن کړ.

د طالبانو د اطلاعاتو او فرهنګ وزارت د خپرونو مشر عبدالحق حماد پرون ناوخته په خپل ټویټر کې لیکلي، استاد مشعل «په ډېر مهارت د نظام پر ضد پاروونکي کړنې ترسره کولې، ګڼ خبريالان یې پر ځان راټول کړي وو او پر عمومي سړک يې ګڼه ګوڼه جوړه کړې وه، امنيتي ادارو د تحقيقاتو لپاره بېولی دی.»

استاد مشعل چې څه موده مخکې په یو مدني حرکت کې د نجونو او ښځو په وړاندې د پوهنتونونو د دروازو له تړل کېدو وروسته د یوه خصوصي ټلوېزیون په پروګرام کې خپل تحصیلي اسناد څيرلي وو، پرون په وړیا ډول د کتابونو د وېش پر مهال ونیول شو.

کابل کې د نهه ولايتونو د لوبغاړو ترمنځ د تکواندو سيالۍ ترسره شوي

ارشيف

په کابل کې د نهه ولایتونو د څه باندې ۱۵۰ لوبغاړو تر منځ د تکواندو سیالۍ شوي.

د تکواندو د ملي فدراسیون چارواکو ویلي، دا سیالۍ یې د تکواندو د ملي ټیم د پخواني سر روزونکي کوریايي ماستر مین سین هاک د هڅو د درنښت په خاطر د هغه په نوم پلان او ترسره کړي.

په دې سیالیو کې اتل لوبغاړي د تکواندو د فدراسیون په رده بندي کې ځای پیدا کوي چې بیا په نورو سیالیو کې د ګډون چانس ترلاسه کولای شي.

مین سین هاک څو کاله د افغانستان د تکواندو د ملي ټیم سر روزونکی وو او د هغه د هڅو په مټ روح الله نیکپا وتوانېد په بیجینګ او لندن کې د المپيک له لوبو د برنزو مډالونه وګټي.

ښاغلي هاک د ګڼو نورو مډالونو او لاسته راوړنو په ګټلو کې هم د افغان لوبغاړو لاس‌نیوی کړی دی او هغوی یې روزلي دي.

صالح: پاکستان د افغانستان له وضعيت ډېره ناوړه استفاده وکړه

امر الله صالح

د افغانستان د پخواني ولسمشر لومړي مرستيال امرالله صالح ملګرو ملتونو کې د پاکستان استازي څرګندونو ته غبرګون ښودلی.

نوموړي پاکستان په دې تورن کړ چې، د افغانستان له حالاتو یې خورا ناوړه استفاده وکړه او د ای ایس ای تر څارنې لاندې مدرسو کې یې افغان هلکان، چې اکثره یې پښتانه وو، د عصري توب او زده‌کړو خلاف و روزل.

په ملګروملتو کې د پاکستان سفیر منیر اکرم د چهارشنبې په ورځ په نیویارک کې وویل، د طالبانو له لوري د ښځو د زده‌کړو او تعلیم مخالفت د پښتنو له کلتور سره تړاو لري.

د منیر اکرم دا څرګندونې د یو شمېر افغان او پاکستاني سیاستوالو له توند غبرګون سره مخامخ شوي او د پاکستان د ملي جرګې د بهرنیو اړیکو کمېټې منیر اکرم د خپلو خبرو د سپیناوي لپاره دې کمېټې ته احضار کړی دی.

سيګار: د طالبانو له بياځلي واک وروسته امريکا د افغانستان لپاره ۸مليارده ډالر ځانګړي کړي دي

د سيګار لوګو

سيګار وايي، د طالبانو له بياځلي واک وروسته امريکا د افغانستان لپاره ۸مليارده ډالر ځانګړي کړي دي.

سیګار یا په افغانستان کې د امریکا د بیارغونې د ځانګړي سرمفتش دفتر، کانګریس ته په خپل نوي درې میاشتني راپور کې ویلي، د ۲۰۲۱ په اګست کې د طالبانو له واک ته رسېدو وروسته د امریکا متحدو ایالتونو د افغانستان په تړاو ۸ میلیارد ډالره مهیا کړي چې د دې پیسو ډېره برخه افغان اتباعو یا کډوالو ته ځانګړې شوې ده.

د سیګار په راپور کې، چې د پنجشنبې په ورځ خپور شو راغلي، په دې پیسو کې د افغانستان بانک هغه درې نیم ملیارد ډالره هم شامل دي چې په سویس کې د افغانستان لپاره نوي جوړ شوي صندوق ته انتقال شوي دي.

د سیګار د راپور له‌مخې، امریکا په یاده موده کې تر ۲ میلیارد ډالره زیاتې پیسې عمدتاً بشري چارو ته ځانګړي کړي دي.

د افغانستان د بیارغونې لپاره د امریکا سرمفتش په خپل راپور کې د طالبانو له لوري د ښځو خلاف د اقداماتو په خاطر د کانګریس له غړیو غوښتي چې، باید افغانستان ته بشري مرستې په داسې ډول ورکړل شي چې د طالبانو لاس ته ونه رسیږي.

سیګار په دې اندېښنه ښوولې چې طالبان له دغو مرستو څخه د مالیې او یا د جواز د صدور په بڼو عاید ترلاسه کوي.

د سرې مياشتې ټولنه: د ۱۱زره په زړه سوري ماشومانو د درملنې هڅه کوو

افغاني سره میاشت ټولنه وايي، یوولس زره په زړه سوري ماشومان یې ثبت کړي او هڅه کوي چې په هېواد کې دننه یا بهر یې درملنه وکړي.

د دې ټولنې ویاند عرفان الله شرفزوی تېره شپه ازادي راډیو ته وویل، له ۲۰۰۸ څخه تر اوسه پورې په هېواد کې دننه او بهر د ۱۳ زره ماشومانو د سوریو زړونو درملنه شوې ده.

د ده په وینا، دا پروسه د یوه کال په مخه درېدلې وه خو له تېرو ۵ میاشتو راهیسې بیا پیل شوې ده.

شرفزوی وايي، په تېرو ۵ میاشتو کې د کابل په ۶ روغتونونو کې ۱۸۴ تنه تداوي شوي او کورونو ته تللي، خو په دې موده کې ۱۱ زره نور ثبت شوي چې باید په داخل او یا خارج کې تداوي شي.

پخوا ډېر شمېر په زړه سوري ماشومان د درملنې لپاره جرمني ته استول کېدل.

افغاني سره میاشت ټولنه هڅه کوي چې یو وار بیا بېلابېلو هېوادونه د دې ډول ماشومانو په درملنه کې مرستې زیاتې کړي.

د پروان په سیدخېل ولسوالۍ کې د چاودنې له امله يو تن وژل شوی دی

ولایت پروان در نقشه افغانستان

د پروان ولایت په سیدخېل ولسوالۍ کې چاودنې یو تن وژلی دی.

په پروان ولایت کې طالب چارواکو وویل چې، دا پېښه د پنجشنبې په سهار د سیدخېل ولسوالۍ په رسول داد خېل سیمه کې وشوه.

د طالبانو د پروان والي ویاند سیدحکمت الله شمیم ازادي راډیو ته وویل، چې د دې پېښې په تړاو د وژل شوي کس زوم او زوی نیول شوي او پوښتنې ورڅخه پیل شوي دي.

تر اوسه پورې د دې پېښې انګېزه څرګننده نه‌ده.

هند په خپله کلنۍ بوديجه کې د افغانستان لپاره ۲۰مليونه روپۍ ځانګړې کړي دي

ارشيف

طالبانو د هند له لوري د خپل هېواد د ۲۰۲۳ کال په بودجه کې افغانستان ته د ۲۰ملیون روپیو د ځانګړي کېدو هرکلی وکړ.

د هند د مالیې وزیر نیرمالا سیتارا مان د چهارشنبې په ورځ په نوي ډیلي کې وویل، دا پیسې یې د افغانستان انکشافي چارو ته اختصاص کړي دي.

هند د خپل هېواد د تېر کال په بودحه کې هم همدومره پیسې د افغانستان پرمختیايي چارو ته ځانګړې کړې وې.

د طالبانو د قطر د دفتر مشر سُهیل شاهین پرون (پنجشنبه) هندي رسنیو ته وویل چې، دوی له افغانستان سره د هند د دې مرستې ستاینه کوي او لاور لري چې دا به د دوو هېوادونو د اړیکو له لا پراختیا سره مرسته وکړي.

نور راوښيه

XS
SM
MD
LG